ޔާމީން ގެއަށް ބަދަލު ކުރެވޭތޯ މަސައްކަތް އެބަކުރަން: ޕީޕީއެމް

ޖަލުހުމް ތަންފީޒު ކުރައްވަމުން ގެންދަވާ އިދިކޮޅުގެ ރިޔާސީ ކެންޑިޑޭޓް، ކުރީގެ ރައީސް އަބްދުﷲ ޔާމީން ގެއަށް ބަދަލުކުރަން މަސައްކަތް ކުރަމުން އަންނަ ކަމަށް އެ ޕީޕީއެމް ކޯލިޝަނުން އިއްޔެ ބުނެފި އެވެ.

ވ. އާރަށް މައްސަލާގައި ރިޝްވަތާއި މަނީ ލޯންޑްރިންގެ ކުށުގައި، ޔާމީންގެ މައްޗަށް އިއްވާފައިވާ 11 އަހަރުގެ ޖަލު ހުކުމުގެ ސަބަބުން އެ މަނިކުފާނަށް މި އަހަރުގެ ރިޔާސީ އިންތިހާބުގައި ވާދަކުރެއްވުމުގެ ފުރުސަތު އަދިވެސް އޮތީ ބަންދުވެފަ އެވެ. އެކަމަކު މި މަހުގެ ތެރޭގައި ހައި ކޯޓުން އެ މަނިކުފާނު މިނިވަންކުރާނެ ކަމުގެ އުއްމީދު އެބައޮތް ކަމަށް ވަކީލުންގެ ޓީމުން އަންނަނީ ބުނަމުންނެވެ.

ޕީޕީއެމް/ޕީއެންސީ ކޯލިޝަަންގެ ބައެއް ލީޑަރުން ބޭއްވި ނޫސްވެރިންގެ ބައްދަލުވުމެއްގައި، ޕީއެންސީ ނައިބު ރައީސް އިބްރާހިމް ޝުޖާއު ވިދާޅުވީ ޔާމީން ގެއަށް ބަދަލު ކުރުމަށް ކުރެވެން ހުރި ހުރިހާ މަސައްކަތެއް އެ ޕާޓީގެ ވަކީލުން ކުރަމުން އަންނަ ކަމަށެވެ.

ހާއްސަކޮށް ކުރިއަށް އޮތީ ރޯދަމަސް ކަމުން ގެއަށް ބަދަލުކޮށް އާއިލާ ކައިރީ އެ މަހު ޔާމީނަށް ހުންނެވޭތޯ ޕާޓީން ކުރެވެން ހުރި ހުރިހާ މަސައްކަތެއް ކުރަމުން އަންނަ ކަމަށް ވެސް ޝުޖާއު ވިދާޅުވި އެވެ.

"އަޅުގަނޑުމެން ޕާޓީގެ ހުރިހާ ރިސޯސެއް އެބަ ބޭނުންކުރަން ރައީސް ޔާމީން ގެއަށް ބަދަލުކުރެވޭތޯ. ނުކޮޮށް އެއްވެސް ކަމެއް ނުބާއްވަން، ޕާޓީގެ ހުރިހާ ރަސްމީ ގުނަންތަކުން ވެސް މަސައްކަތް ކުރަނީ ޔާމީން އެނބުރި ގެއަށް ވަޑައިގެން، އާއިލާއާއެކު ވަގުތުކޮޅެއް ހޭދަކޮށްލުން، ހާއްސަކޮށް މި އަންނަ ރޯދަ މަހަށް،" ޝުޖާއު ވިދާޅުވި އެވެ.

އާރަށް މައްސަލާގައި އެއް މިލިއަން ޑޮލަރު ރިޝްވަތުގެ ގޮތުގައި ގަބޫލުކުރައްވައި އަދި އެ ފައިސާ ލޯންޑާ ކުރެއްވިކަން ސާބިތުވެ ޖަލަށްލައި، ފަސް މިލިއަން ޑޮލަރުން ޖޫރިމަނާކުރަން ކްރިމިނަލް ކޯޓުން ހުކުމް ކުރީ މިދިޔަ ޑިސެމްބަރު 25ގަ އެވެ.

ޕީޕީއެމުން މިހާރު ނިންމާފައި ވަނީ އެ ޕާޓީން ވަކިން އިންތިހާބަށް ނުކުތުމަށެވެ. ނަމަވެސް އެ ޕާޓީގެ ކެނޑިޑޭޓް، ޔާމީން ޖަލަށް ލާފައި ވާތީ އެ ޕާޓިން ގަބޫލު ކުރަނީ މި މަސް ތެރޭގައި އެ މަނިކުފާނު މިނިވަން ވާނެ ކަމަށެވެ. އެއާއެކު ރިޔާސީ އިންތިހާބުން ޖާގަ ހޯއްދަވާނެ ކަމަށް ޕީޕީއެމުން ދެކެ އެވެ.

Yameen varah avahah minivan vaane kamuge yageenkan vakeelun dhey: PPM

The most trusted news source in the Maldives

Mihaaru

ޔާމީނަށް ވާދަނުކުރެއްވިއްޖެ ނަމަ ދެން ހަދާނެ ގޮތަކާ ދޭތެރޭ ކުރާ ސުވާލުތަކަށް ޕީޕީއެމްގެ ޖަވާބަކީ "ޕްލޭން ބީއެއް" ނެތް ކަމަށެވެ. ވޯޓު ކަރުދާސްކޮޅުގައި ޔާމީންގެ ނަން އޮންނާނެ ކަމަށް ތަކުރާރުކޮށް އެ ޕާޓީން ބުނެ އެވެ.

އިލެކްޝަންސް ކޮމިޝަނުން ނިންމާފައިވާ ގޮތުގައި، މި އަހަރުގެ ރިޔާސީ އިންތިހާބުގައި ވާދަކުރަން ކެންޑިޑޭޓުންގެ ގޮތުގައި ކުރިމަތިލުމުގެ މުއްދަތަކީ ޖުލައި 23 އިން އޮގަސްޓު 3 އަށެވެ. އެހެންކަމުން، ރިޔާސީ އިންތިހާބުގައި ވާދަކުރާ ނަމަ އޮގަސްޓް ތިން ވަނަ ދުވަހުގެ ކުރިން ޔާމީން ހުކުމުން މިނިވަންވާން ޖެހެ އެވެ.