އެމްޑީޕީގެ މެނިފެސްޓޯ އިފްތިތާހުކޮށްފި؛ ސްޓޫޑެންޓް ލޯނު މާފުކުރުން ހިމެނޭ!

އެމްޑީޕީން މި އަހަރުގެ ރިޔާސީ އިންތިހާބަށް ތައްޔާރުކުރި މެނިފެސްޓޯގެ ފުރަތަމަ ސިޔާސަތު މިރޭ އިފްތިތާހުކޮށްފި އެވެ.

ޢެ މެނިފެސްޓޯ އިފްތިތާހުކޮށްދެއްވީ، ރައީސް އަދި އެމްޑީޕީގެ ކެންޑޑޭޓް އިބްރާހިމް މުހައްމަދު ސޯލިހު މިހާރު ދ. އަތޮޅަށް ކުރައްވާ ދަތުރުފުޅުގައި ދ. ކުޑަހުވަދޫގައި ބޭއްވި ޖަލްސާގައި އެމަނިކުފާނެވެ.

އެމްޑީޕީން ބުނި ގޮތުގައި، މި މެނިފެސްޓޯ ބަހާފައި ވަނީ ފަސް ސިޔާސަތެއްގެ މައްޗަށެވެ. އެއީ؛

1. އުފާވެރި ދިރިއުޅުން

2. އަމާން މުޖުތަމައު

3. ޒުވާނުންގެ އާޖީލު

4. އިގުތިސާދީ ބޮޑު ބަދަލު

5. ހެޔޮވެރިކަން

އޭގެ ތެރެއިން މިރޭ އިފްތިތާހުކުރީ "އުފާވެރި ދިރިއުޅުން"، މި ސިޔާސަތެވެ.

އެ ސިޔާސަތާ ގުޅޭ ތަފުސީލު ދެއްވީ ސޯޝިއޮލޮޖީގެ ދާއިރާއިން ތައުލީމު ހާސިލުކުރައްވާފައިވާ ޑރ. އައިޝަތު ޝަފީނާ ހުށަހެޅުއްވި ޕްރެޒެންޓޭޝަނެއްގަ އެވެ. އޭނާ ވިދާޅުވި ގޮތުގައި، މި މެނިފެސްޓޯގައި ހިމެނޭނީ، އާންމުންގެ ބައިވެރިވުމާއި މަޝްވަރާ އާއީ ކާމާބެހޭ ފަންނީ މާހިރުންގެ އިރުޝާދާއި ލަފާގެ މަތިން އެކުލަވާލެވުނު ސިޔާސަތުތަކެކެވެ.

"އަޅުގަނޑުމެން މި ސިޔާސަތުތައް ބައްޓަންކުރުމުގައި އެމްޑީޕީގެ ފަރާތުން ރާއްޖޭގެ ހުރިހާ ރަށަކަށް ދަތުރުކުރި. ހުރިހާ ރައްޔިތުންގެ ބައިވެރިވުމާއި އެ ރައްޔިތުންގެ ބޭނުންވާ ކަންތައްތައް އަޅުގަނޑުމެން އަޑުއެހިން،" އޭނާ ވިދާޅުވި އެވެ.

ޝަފީނާ ވިދާޅުވީ "އުފާވެރި ދިރިއުޅުން" ސިޔާސަތުގައި މައިގަނޑު ތިން ބައެއް ހިމެނޭ ކަމަށެވެ. އެއީ ދުޅަހެޔޮ ބަދަހި މުޖުތަމައު އާއި އުފެއްދުންތެރި ފުދުންތެރި ޖީލު އަދި ޝާމިލު އޯގާތެރި ރައްޔިތުން ކަމަށް އޭނާ ވިދާޅުވި އެވެ.

އޭނާ ވިދާޅުވީ، މި ސިޔާސަތުގެ ދަށުން ސަރުކާރުން ކަނޑައަޅާ ވަކި އުސޫލެއްގެ ތެރެއިން، މަތީ ތައުލީމު ހާސިލުކުރުމަށް ސަރުކާރުން ދޭ ސްޓޫޑެންޓް ލޯނު ދެއްކުން ބުރައަކަށް ވެފައިވާ ދަރިވަރުންނަށް ލޯނު މާފުކޮށްދިނުން ވެސް ހިމެނޭ ކަމަށެވެ.

"ސްޓޫޑެންޓް ލޯނުގެ ގްރޭސް ޕީރިއަޑް އިތުރުކޮށް، ވަޒީފާއެއް ލިބުނު ކަން ކަށަވަރުކުރުމުން ލޯނު އަނބުރާ ދެއްކޭ އުސޫލަށް ބަދަލުކުރާނެ،" އޭނާ ވިދާޅުވި އެވެ.

ހިލޭ ޑިގްރީ ޕްރޮގްރާމަށް ވެސް ބަދަލު ގެނެސް، ސެޓްފިކެޓް ލެވަލް 1 އިން ފެށިގެން ޑިގްރީއާ ހަމައަށް ހިލޭ ކިޔެވޭ ގޮތަށް ބަދަލުކުރަން ވެސް އެ ސިޔާސަތުގައި ހިމަނާފައިވާ ކަމަށް ޝަފީނާ ވިދާޅުވި އެވެ.

އެ ސިޔާސަތުން ފާހަގަކުރެވުނު ބައެއް ކަންކަން

• ނޭޝަނަލް ބަޔޯމެޑިކަލް އިކުއިޕްމަންޓް ސެންޓަރެއް ހެދުން.

• ޑްރޯން ބޭނުންކޮށްގެން ސާމްޕަލް ޓްރާންސްފާކުރުން.

• ބައިނަލްއަގުވާމީ ސްޓޭންޑާޑްތަކާ އެއްގޮތަށް ފިޓްނަސްގެ ދާއިރާ ރެގިއުލޭޓްކުރުން.

• ސައިކަލު ޕެރަމެޑިކްސްގެ ހިދުމަތް ފެށުން.

• ޑްރަގް ރިހެބިލިޓޭޝަންގެ ފަރުވާ ވަރުގަދަކޮށް، ރާއްޖޭގެ ތިން ސަރަހައްދެއްގައި ތިން ރިކަވަރީ ވިލެޖު ހެދުން.

• ހައުސިން ފައިނޭންސް ފޯރުކޮށްދޭ ވަކި ބޭންކެއް ހެދުން.

• ރިއަލް އެސްޓޭޓް މާކެޓް ރެގިއުލޭޓްކުރުން.

• ކައުންސިލް ހައުސިން ތައާރަފުކުރުން.

• ޒަކާތާ ބެހޭ ގާނޫނެއް ހެދުމާއި ހައްޖާއި އުމުރާގެ އަގު ކޮންޓްރޯލްކުރުން.

• ދިވެހިބަސް ކުރިއެރުވުމަށް ބޭނުންވާ ޒަމާނީ ކޮންޓެންޓް ތައްޔާރުކުރުމަށް މާލީ އެހީ ބީސީސީ މެދުވެރިކޮށް ހޯދުން.

• ކަނޑައެޅޭ ވަކި އުސޫލަކުން ސްޓޫޑެންޓް ލޯނު މާފުކޮށްދިނުން.

މެނިފެސްޓޯގެ ތަފުސީލު އެމްޑީޕީގެ ވެބްސައިޓުގައި ޝައިއުކުރާނެ ކަމަށް އެ ޕާޓީން ބުންޏެވެ.