މާލޭގެ ސްކޫލެއްގެ ޓީޗަރުންތަކެއް މިއަހަރުގެ ޓީޗަރުންގެ ދުވަސް ފާހަގަ ކުރުމުގެ ހަފްލާއެއްގައި. --ފޮޓޯ މިހާރު
10 އެޕްރީލް 2017 - 15:47
45 comments
ސަރުކާރުގެ ސްކޫލްތަކުގެ ވެރިންނާއި ހުރިހާ މުދައްރިސުންނާއި އިދާރީ މުވައްޒަފުންގެ އިނގިރޭސި ފެންވަރު މަތި ކުރުމަށް ބޭރުގެ ފަރާތަކާ ގުޅިގެން އެޑިއުކޭޝަން މިނިސްޓްރީން ފަށަން ތައްޔާރުވަމުން އަންނަ ޕްރޮގްރާމާ މެދު ބައެއް ޓީޗަރުންގެ މެދުގައި ކަންބޮޑުވުން އުފެދިއްޖެ އެވެ.
މާލޭގެ ސްކޫލްތަކުގެ ބައެއް ޓީޗަރުން ބުނި ގޮތުގައި އެ ޕްރޮގްރާމް ކުރިއަށް ގެންދަނީ ކޮން ގޮތަކަށް ކަމެއް ކަށަވަރެއް ނުވެ އެވެ. އެކި މީހުން އެކި ގޮތަށް މައުލޫމާތު ދޭއިރު، އެ ޕްރޮގްރާމްގެ ފީގެ ޖުމްލައަކީ ވެސް ކިހާ ވަރެއް ކަމެއް އަދި ނޭނގެ އެވެ.
މާލޭ ސްކޫލެއްގެ ސާނަވީ ޓީޗަރަކު ވިދާޅުވި ގޮތުގައި އެ ޕްރޮގްރާމްގައި ހުރިހާ ޓީޗަރުން ބައިވެރިވާން ޖެހޭނެ ކަމަށް ވަނީ އަންގައިފަ އެވެ. އަދި ނުވަ މަސްދުވަހަށް ހިންގާ އެ ޕްރޮގްރާމްގައި ބައިވެރިވުމުން ކޯސް ފީގެ ގޮތުގައި މުސާރަ އިން މަހަކު 1،600ރ. ކަނޑާނެ ކަން ވެސް ވަނީ އަންގައިފަ އެވެ.
"ނަމަވެސް އެކި ސްކޫލްތަކުގެ ޓީޗަރުން ބުނަނީ އެކި ގޮތަށް. އެހެން ޓީޗަރަކު އެބަ ބުނޭ އެ ސްކޫލުން އެންގިޔޭ މަހަކު މުސާރަ އިން ކަނޑާނީ 2،000ރ، އޭ ވެސް. އެކަމަކު ކިޔަވަން ޖެހެނީ ކިތައް މަސްދުވަސް ވަންދެން ކަމެއް އަދި ނޭނގެޔޭ. އެހެންވީމާ މި ވާނުވާއެއް ނޭނގޭ. ބައެއް މީހުން ބުނޭ ކޯހުގައި ބައިވެރިވާން މަޖުބޫރޭ ވެސް. އަނެއް ބަޔަކު ބުނޭ މަޖުބޫރު ކަމެއް ނޭނގެޔޭ،" މާލޭގެ ސްކޫލެއްގެ ޓީޗަރަކު ވިދާޅުވި އެވެ.
އެޑިއުކޭޝަން މިނިސްޓްރީގެ އޮފިޝަލަކު "މިހާރު" އަށް ވިދާޅުވީ މި ޕްރޮގްރާމްގައި ބައިވެރިވުން އެއްވެސް ހާލެއްގައި މަޖުބޫރު ނޫން ކަމަށެވެ. އަދި މިއީ އޮންލައިން ކޯހެއް ކަމުން އެ މުދައްރިސަކު ބޭނުން ވަގުތަކު ކޯސް ހެދޭނެ ކަމަށް ވެސް އޮފިޝަލް ވިދާޅުވި އެވެ. މީގެ އިތުރުން ސްކޫލުތަކުގެ އިދާރާގައި މަސައްކަތް ކުރައްވާ ބޭފުޅުންނަށް ވެސް މި ޕްރޮގްރާމުގައި ބައިވެރިވުމުގެ އިހްތިޔާރު އޮންނާނެ ކަމަށް އޭނާ ވިދާޅުވި އެވެ.
މިނިސްޓްރީން ބުނި ގޮތުގައި މިކޯހުގައި، ދިވެހި ބަހުން ކިޔަވައިދޭ މާއްދާތަކުގެ މުދައްރިސުން ބައިވެރިވުމަކީ މަޖުބޫރު ކަމެއް ނޫނެވެ.
އެޑިޔުކޭޝަނުން ބުނި ގޮތުގައި މިއީ ތިން އަހަރުގެ ޕްރޮގްރާމަކަށްވާ އިރު، މި ޕްރޮގްރާމުގައި ބައިވެރިވުމަށް ވަކި މުހުލަތެއް ނޯންނާނެ އެވެ. މީގެ އިތުރުން ކޯހުގެ ފީ އަކީ މަހަކު 1،600 ރުފިޔާ އެވެ. އަަދި ކޯހުގެ ފީއަށް ވާ ފައިސާ މުސާރަ އިން ކަނޑާ ގޮތަށް ވެސް ނުވަތަ އެ މީހަކު ވަކިން ފައިސާ ދައްކާ ގޮތަށް ވެސް ހަމަޖެހޭނެ ކަމަށް އެޑިޔުކޭޝަނުން ބުންޏެވެ..
ނަމަވެސް މިދިޔަ މާޗް މަހުގެ ވަނަ ދުވަހު އެޑިޔުކޭޝަން މިނިސްޓްރީން މާލޭގެ ސްކޫލްތަކަށް ފޮނުވި ސިޓީގައި ބުނެފައިވާ ގޮތުގައި މި ޕްރޮގްރާމްގައި އެ ސްކޫލްތަކުގެ ހުރިހާ ޓީޗަރުން ބައިވެރިވާންޖެހެ އެވެ.
އަދި އެކަމުގައި، ދިވެހި ބަހުން މާއްދާތައް ކިޔަވައިދޭ ޓީޗަރުން ވެސް އިސްތިސްނާ ނުވާ ކަމަށާއި އެ ޕްރޮގްރާމްގައި ބައިވެރިވުމަކީ ޓީޗަރުންނަށް އޮތް އިޚްތިޔާރީ ކަމެއް ނޫން ކަމަށް ވެސް މާލޭގެ ބައެއް ސްކޫލްތަކުން ބުންޏެވެ.
"ހުރިހާ ސްކޫލެއްގެ ޓީޗަރުން ވެސް ހަދަން ޖެހޭ ކަމަށް ވަނީ އަންގާފަ. އިންގްލިޝް މީޑިއަމް، ދިވެހި، އިސްލާމް އަދި ގުރުއާން ކިޔަވާދޭ ޓީޗަރުން ވެސް،" މާލޭ ސްކޫލެއްގެ މުދައްރިސަކު "މިހާރު" އަށް ވިދާޅުވި އެވެ.
އެޑިޔުކޭޝަނުންނާއި ބައެއް ސްކޫލްތަކުން ބުނި ގޮތުގައި މިހާރު ކުރިއަށް ދަނީ، މި ކޯސް ހަދަންޖެހޭނެ މީހުން ކަނޑައެޅުމަށްޓަކައި ފެންވަރު ބެލުމުގެ ގޮތުން ނަގާ ޓެސްޓު ހެދުމުގެ މަސައްކަތެވެ. އިނގިރޭސި ބަހުގެ ފެންވަރު ބެލުމަށް ބާއްވާ ޓެސްޓު ވެސް ނަގަނީ އޮންލައިން ކޮށެވެ.
އެ މިނިސްޓްރީން ބުނި ގޮތުގައި މި ޕްރޮގްރާމްގައި ކިޔަވައިދޭނީ ބޭރުގެ ޖަމާއަތެއް ކަމަށްވާ "އިންގްލިޝް ފަސްޓް"ގެ ތަޖުރިބާކާރުންނެވެ.
އެޑިއުކޭޝަނުން ސްކޫލުތަކަށް ފޮނުވި ސިޓީގައިވާ ގޮތުން ޓީޗަރުންގެ މުސާރަ އިން ކޯހުގެ ފީ ކެނޑުމާ މެދު އިއުތިރާޒެއް ނެތް ކަމަށް އިގްރާރެއްގައި ސޮއި ކުރަން ޖެހެ އެވެ. އަދި އިނގިރޭސި ފެންވަރު ބެލުމަށް ބާއްވާ ޓެސްޓްގައި ސްކޫލުގެ ހުރިހާ ޓީޗަރުން ބައިވެރިވާ ކަން ކަށަވަރު ކުރަން ޖެހެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ސަލްމާން
12 April 2017
ތިޔަގޮތަށް އޮންލައިންކޮށް ކޯސްހަދައިގެން ތިންހަތަރު އަހަރުންނޫނީ ކަވަރުނުކުރެވޭ ޑިގްރީ އަދި މާސްޓާސް ފެންވަރުގެ ކޯސްތައް އެންމެ އަހަރަކުން ނިންމާ ސެޓްފިކެޓް ލީބޭތީ ހިނިއާދޭ.
ކުޑޭ
12 April 2017
ޓީޗަރުންނަށް މުސާރަބޮޑު ވީމާ އިދާރީ މުވައްޒަފުންގެ މުސާރައެއް ބޮޑެއްނުވޭ... ފުލޫ ޖެހިގެން ސްކޫލްތައް ބަންދުކުރީމާވެސް އިދާރީ މީހުން ނުކުންނަންޖެހޭ 2015 ވަނަ އަހަރު ޓީޗަރުން ކިޔަވަން ފުރުޞަތު ހުޅުވާލީއިރުވެސް އިދާރީ މުވައްޒަފުން ބާކީ ކުރި އިދާރީ މުވައްޒަފަކު މާސްޓަރސް ހެދިޔަސް މުސާރައަކަށް އެއްވެސް ބަދަލެއްނާދޭ... ބާކީކޮށް ތަފާތުކޮށް ހެދުމުގައި ހައްދުފަހަނަ އަޅާގޮސް އޮއް އެޑިޔުކޭޝަން މިނިސްޓްރީގެ ބޮޑުން ލާރިކާންވީާ 19000ރުފިޔާ ދައްކައިގެން ކޯސްހަދަން އިދާރީ މުވައްޒަފުންނަށް މަޖުބޫރު ކުރުވުމަކީ ބޭ އިންސާފުގެ ތެރެއަށް އިތުރު ބޮޅެއް
މުބާހު
12 April 2017
އިނގިރޭސި ޓީޗަރުންގެ އިންގިރޭސި ފެންވަރު ރަނގަޅުކުރުމަކީ މުހިއްމުކަމެއް. ޢެއިން އަހަރެމެންގެ ދަރިންގެ މުސްތަގުބަލަށް ސީދާ އަސަރުކުރާނެކަމެއް.
ސްކޫލް އެޑްމިން
12 April 2017
އަޅުގަނޑުގެ މުސާރައަކީ 4465 ރުފިޔާ މި މުސާރައިން ޕެންސަން ސްކީމްއަށް 350ރ ކަޑާ، އެސްޓިއޯ ސްކީމަށް 1500ރ ފޯންބިލް އިންޓަރނެޓް 400ރ ކޭބަލް ފީ 200ރ ކަރަންޓްފީ 500ރ ގެއަށްބޭނުންވާ ކާއެއްޗެހި ގަތުމަށް 1500ރ ގޭސް 275ރ ނެޕީ ފަދަ ތަކެތި 500ރ ސްކޫލްގެ އެކިއެކި ބޭނުމަށް 600ރ މިވަރުން ކިހިނެތްތޯ ފަހައް ފައިސާކޮޅެއް ރައްކާ ކުރެވޭނީ، ގިނަ މަސްތަކުގައި 15 އަށް ދާއިރަށް އަތުގައި ނޯވޭ އިސްތައްޓެއްވެސް، އެކަމުވެސް އަހަރެމެންގެ ހާލެއް ބަލާލުމެއްނެތި މި ކަމަނާ އެ ބުނަނީ އަހަރެމެންގެ މުސާރައިން މަހަކު 1600ރ ދޭށެ، މުޅިއެކު 19000ރ ހާދަ ބޮޑު އެއްޗެކޭ، ... މި ވެސް ވަރަށް ވާހަކަ
ގިޔާސް
11 April 2017
މުސާރައިން ދެބައި ކުޅައެއި އެއްބައި ދީގެން ކިހިނެއްތޯ ، އަޅުގަޑުމެން އުޅޭނީ ކިޔަވަން ބޭޏުން އެކަމަކު ލިބޭ އެއްޗަކުން ދެވޭނީ ، މިހާރު މިވާ ގޮތަކީ އެމީހުން ނިންމާފަ ބައިވެރިކޮށްފައި ބުނަނީ ދައްކަށޭ ، މަޖްބޫރު ، ޕާޓިއަށް ވަނުންވެސް މަޖްބޫރު ، ކިޔެވުންވެސް މަޖްބޫރު ވަޒީފާގެ ހަމަހަމަކަންވެސް ނެތް ، މީވާ ގައުމެއް އަޅުންގެ ބަޅުން ޝުކުރިއްޔާ!
ޖަމަލު
11 April 2017
ނަމުން ކުރިއެރުވުން : ކަމުން ފެލުން.
ޗަންކޫ
11 April 2017
ޢަވަހަށް އިނގިރޭސި ބަސް ކިޔަވާ. ނޯރތް ކޮރެޢާގަ އުޅެން ބޭނުމިއްޔާ ވެރިންގެ ބަސް ޤާނޫނަކަމަށް ބަލާ.
އދ
11 April 2017
ތިޔައީ ބޭރުބަޔަކަށް ވިޔަފާރިއެއް ހިންގައިދިނުން. އޮންލައިން ކޯހަކަށް މަހަކު ސަތޭކަޑޮލަރ.
ޗުލްބުލީ
10 April 2017
"ހުސްގަޅި" ގެ ނަމުގައި ކޮމެންޓު ކުރިމީހާ އެބުނަނީ ތެދެއް. މިރާއްޖޭގައި އެބަތިބި ތިފެންވަރުގެ ކޯހެއް ހިންގޭ ވަރުގެ މީހުން. ކީއްވެ ބިޑަކާ ނުލައި ބޭރު ބަޔަކަށް ދިނީ؟؟؟؟ އަހަރުމެން ކޯހެއް ހިންގާލަން ސްކޫލެއްގެ ކްލާހެއް ކުއްޔަށް ދޭން ބުނީމާ ނުދީ؟ އޭ.ސީ.ސީ ނިދާފަތަ؟
ޓީޗަރު
10 April 2017
ތިޔަކޯސް އޮންލައިންކޮށްހިންގުން ގޯހެއްނޫނެވެ. މައްސަލައަކީ ކޯސްހަދާމީހުންގެ ފެންވަރެވެ. މިބުނަނީ އެންމެންގެ ވާހަކައެއްނޫނެވެ. އޮންލައިންކޮށްހަދާ ކޯސްތަކުގައި އިމްތިހާނު ސެންޓަރަށް ފެންނަންއޮންނަނީ މިކޮޅުން ހަދާފައި ދޭ އެއްޗެކެވެ. އިމްތިހާނު ކަރުދާސް ހަދަނީ ހަމަ ހަގީގަތުގަވެސް އެއިމްތިހާނު ހަދަންޖެހޭމީހާއެއް ނޫނެވެ. އިމްތިހާނު ހަދަންޖެހޭ މީހާގައި ގްރޭޑް 3، 4ގެ ފެންވަރު ނުހުރެއެވެ. އެއިމްތިހާނު އޭނާއަށް މިހަދައިދެނީ މޮޅަށް ކިޔަވައިގެންތިބި އޭނާގެ ކޮއްކޮ މެނެވެ. ކަންމިހެން ހުރުމުގެ ސަބަބުބް އިމްތިހާނު ސެންޓަރަށް ގޮސްމިވަންނަނީ އެއްކަލަމީހާގެ ނަމުގައި ހަދާނިންމާފައި އޮންނަ ޓެސްޓް ޕޭޕަރެވެ. ހުރިހާސުވާލެއްގެ ޖަވާބު ރަނގަޅެވެ. ސައްތައިން ސައްތައެވެ. ކިހާމޮޅުހެއްޔެވެ. ވަގުތުން އޭނާއަށް ޑިގްރީ ސެޓްފިކެޓެވެ. ހުރިހާ އިދާރާއަކުން ބަލައިގަނެއެވެ. މައްސަލައެއްނެތެންނޫންހެއްޔެވެ؟ އެކަމަކު ހަގީގަތުގައި އޭނާއަށް އިނގިރޭސީގެ އޭ އޮންނަނީ ބަޅަށް ކައްޗަށް ހުރަހަށް ބިތަށް އިއްޗަށް ކަމެއް ނޭނގެއެވެ. އޯކޭއެއްނޫންހެއްޔެވެ. ޑިގްރީ ސެޓްފިކެޓް ލިބުނީއެވެ. އެކަމަކު އިންވިޖިލޭޓަރުންގެ ކުރިމަތީގައި ހަދާ ޓެސްޓަކުން މިބުނާ މީހާއަށް ލިބޭނީ 100 އަކުން ބޮޅެކެވެ. މިކަމާ ވިސްނާ މީހަކު އުޅޭބާއެވެ.
ޝުކުރިއްޔާ ޤައުމު
12 April 2017
ތީ ހަމަ ޤައުމުގެ ހާލަތު..