މިރޭ ކުނޫޒުގައި ބޭއްވި ޖަލްސާގައި މައުމޫން ވާހަކަދައްކަވަނީ. ފޮޓޯ: ހުސެއިން ވަހީދު /މިހާރު
31 ޖުލައި 2017 - 00:40
ގާނޫނުއަސާސީ އޮތީ ތަޅުއެޅުވިފައި ކަމަށް ވިދާޅުވިޔަސް އެ ގާނޫނުއަސާސީ އޮތީ އެގޮތަށް ނޫން ކަމަށް ކުރީގެ ރައީސް މައުމޫން އަބްދުލްގައްޔޫމް މިރޭ ވިދާޅުވެއްޖެ އެވެ.
އިދިކޮޅު ފަރާތްތަކުން މިރޭ ކުނޫޒްގައި ބޭއްވި ޖަލްސާގައި ވާހަކަދައްކަވަމުން މައުމޫން ވިދާޅުވީ މިހާރު ގައުމުގެ ވަލިއްޔުލް އަމުރަކީ ގާނޫނުއަސާސީ ކަމަށާއި އޭގައިވާ ގޮތަށް ނޫން ގޮތަކަށް އެއްވެސް މީހަކަށް އަމަލުނުކުރެވޭނެ ކަމަށެވެ.
"ބުއްދި ގަބޫލްނުކުރާ ކަންތައްތައް ފެންނާތީ އަޅުގަނޑު ވަރަށް ކަންބޮޑުވޭ. އަޅުގަނޑުމެންނަކީ އިންސާނުން. މާތްﷲ ވަނީ އަޅުގަނޑުމެންނަށް ބުއްދި ދެއްވާފައި. އެއާ އެއްގޮތަށް ކަންތައްތައް ކުރަން ޖެހޭނީ،" ގާނޫނުއަސާސީއާ ހިލާފަށް ސަރުކާރުން ކުރާ ކަންތައްތަކާ މެދު ހިތްހަމަޖެހިވަޑައިނުގެން ވާހަކަދައްކަވަމުން މައުމޫން ވިދާޅުވި އެވެ.
އެމަނިކުފާނު ވިދާޅުވީ ހުރިހާ އެންމެންނާ މެދު ވެސް އަމަލުކުރަން ޖެހޭނީ އެއް ހަމައަކުން ކަމަށެވެ. ނަމަވެސް މިހާރު މިފެންނަނީ "ކުދި ކެކުރި ބޮޑު ކެކުރި" އުސޫލް ކަމަށް ވެސް މައުމޫން ވިދާޅުވި އެވެ.
"ތިޔަބޭފުޅުން [އިދިކޮޅު ފަރާތްތަކުން] ތިޔަކުރައްވާ މަސައްކަތަކީ އެއްވެސް ހާލެއްގައި ގައުމުގެ ހަލަބޮލިކަން އުފައްދަވަން ނުވަތަ ފިތުނަ ފަސާދަ އުފައްދަވަން ކުރައްވާ މަސައްކަތެއް ނޫން. އެހެން ކިޔައިގެން ވެސް ބައެއް ބަޔާންތައް އެބަ ނެރޭ. ތިޔަ ބޭފުޅުން ތިޔަ މަސައްކަތްކުރައްވަނީ ގާނޫނުއަސާސީ ނަގަހައްޓަވަން،" އިދިކޮޅު ފަރާތްތަކުން ކުރަމުން އަންނަ މަސައްކަތްތަކަށް ތައުރީފް ކުރައްވަމުން އެ މަނިކުފާނު ވިދާޅުވި އެވެ.
މައުމޫން ވިދާޅުވީ މަޖިލީހުގެ ހިމެނިވަޑައިގަންނަވާ ގުޅިފައިވާ ޕާޓީތަކުގެ މެމްބަރުން މަސައްކަތްކުރައްވަނީ ގާނޫނުއަސާސީ ދެމެހެއްޓުމުގެ އިތުރުން ގައުމުގެ ހަމަޖެހުމާއި އަމަންއަމާންކަން ދެމެހެއްޓުމުގެ މަސައްކަތް ކަމަށެވެ.
"[ތިޔަ މަސައްކަތް ކުރައްވަނީ] އަމިއްލަ އެދުމުގެ ހެދުން އަޅައިގެން ގައުމު ފަސާދަކުރާކަށް ނޫން. ތިޔަ މަސައްކަތްކުރައްވަނީ އިހުލާސްތެރިކަމާއެކު ގައުމަށް ހިދުމަތްކުރެއްވުމަށް. ދިވެހި ރައްޔިތުންނަށް ހިދުމަތް ކުރެއްވުމަށް،" އެމަނިކުފާނު ވިދާޅުވި އެވެ.
މައުމޫން ވިދާޅުވީ ގާނޫނުއަސާސީގައި ހުރިހާ ފަރާތްތަކުން އަމަލުކުރަން ޖެހޭނީ އެއާ އެއްގޮތަށް ކަމަށެވެ. އަދި އެއާ އެއްގޮތަށް އަމަލުނުކުރާތީ އެ މަނިކުފާނުގެ ބޮލަށް އުނދަގޫފުޅުވާ ކަމަށް ވެސް މައުމޫން ވިދާޅުވި އެވެ.
"ގާނޫނުއަސާސީއަކު ނޫން ތަޅު އެޅުވިފައި ހުރީ. ތަޅު އަޅުވާފައި ހުރީ މަޖިލީހުގައި. އަޅުގަނޑު ދުށިން އޭގެ ފޮޓޯ ވެސް. އެކަމަކު ގާނޫނުއަސާސީގައި އެބުނާ ނިޒާމުގައި ހުރީ ތަޅު އެޅުވިފައެއް ނޫން. އެހެރީ ހުދޫދުތައް ބަޔާންކޮށްފައި،" 2008 ގައި ގާނޫނުއަސާސީ ތަސްދީގު ކުރެއްވި ރައީސް ވިދާޅުވި އެވެ.
ގާނޫނުއަސާސީގައި ހިމެނޭ އެކި ހައްގުތަކާއި މިނިވަންކަމުގެ ބާބުތަކުގައި ހިމެނޭ މާއްދާތަކާ ބެހޭ ގޮތުން ވަރަށް ތަފުސީލްކޮށް ވާހަކަދައްކަވަމުން މައުމޫން ވިދާޅުވީ ގާނޫނުއަސާސީގައި ކޮންމެ ބާރެއްގެ ވާޖިބުތަކާއި ހައްގުތަކާއި އެ ހައްގުތައް ފެށޭ ތަނާއި ނިމޭތަނާއި ފާރަވެރިވާ ގޮތްތައް ވެސް ބަޔާންކޮށްފައިވާ ކަމަށެވެ.
"އަޅުގަނޑު ހިތަށް އަރަނީ ހުރިހާ ބޭފުޅުން ދައުލަތު މަތީ މަގާމާ ހަވާލުވުމުގެ ކުރިން ހުވައެއް ކުރައްވަން ޖެހޭ. ރައީސުލްޖުމްހޫރިއްޔާ ވެސް އެ ހުވާގައިވާ ގޮތަށް އަމަލުކުރަން މާތްﷲ ގަންދީ ހުވާކުރުމަށްފަހު އެ ހުވާގައިވާ ގޮތަށް އަމަލުކުރަން ޖެހޭ. އެއީ ވަރަށް ބޮޑު ހުވައެއް،" އެމަނިކުފާނު ވިދާޅުވި އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ހޮލީ ޑައިވާ
31 July 2017
ޤާނޫނުއަސާސީއަށް ޙުރުމަތްތެރިކޮށް ހިތާ އެއްވެސް ސަރުކާރެއް ނުދެކެން. ޤާނޫނުއަސާސީ އޭގެ އެންމެ ފުރިހަމަގޮތުގައި މި ދިވެހި ފަސްގަނޑުއި އެއްވެސް ޒަމާނެއްގައި އިންގާފައެއްނުވޭ. މިވެރިކަން ވެއްޓޭނީ ފުލުހުންއާއި ސިފައިންގެ އެއްބާރުލުމާއެކު. ޝުކުރިއްޔާ
ސސ
31 July 2017
މާލީ ބަޔާން ހުށަހަޅަން ނުކެރޭ ސިޔާސީ މީހުން ބުނާނީ އަބަދުވެސް ޤާނޫނު އޮތީ އޮޅުންބޮޅުން އަރާފަޔޯ؟
ގަޅި
31 July 2017
ވ ފޫހިމީހެއް.
ނޯލީޑަރ
31 July 2017
އިދިކޮޅުން މިހާރު އެކައްޗެއް ކިޔަން ވެއްޖއެއްނުނ. އެކަނކު ބުނާނެ ގާނޫނު އަސާސީއެއް ނެތޭ. އަނެކަކު ބުނާނެ އުވުނީއޭ. އަނެކަކު ބުނާނެ ވަލިއްޔުލް އަމުރަކީ ގާނޫނު އަސާސީއޭ.
ސަރުކާނު
31 July 2017
ތިޔައީ ޒަޢީމޭ މި ލަވަ ހަނދާންވާތީ ދެއްކެވޭހާ ވާހަކަތީ. މަނިކުފާނުގެ ރަންދައުރުގައި މަނިކުފާނު މާނަކުރެއްވިގޮތާ މަނިކުފާނުގެ ރަންވަންލޯ ދުވަސްތަކުގަ މަނިކުފާނުގެ ކޮއްކޯފުޅު މާނަކުރައްވާ ގޮތް ހަމަ އެއްގޮތެއް. ތަފާތަކީ ޒަމާން. ދެއްތޯ؟
ކަޅުސޮރު
31 July 2017
ގާނޫން އަސާސީގެ 27ވަނަމާއްދާއިން މުޒާހަރާކުރުމުގެ ހައްގުލިބި އެމީހަކުހިތަށްއެރި ސަރަހައްދަކަށް އެއްވެ މުޒާހަރާކުރާއިރު އެ އެއްވާސަރަހައްދުގައި ދިރިއުޅޭމީހުންގެ ހައްގާއި އެސަރަހައްދުގައި ވިޔަފާރިއާއި އިގުތިޞާދީ މަސައްކަތްކުރާމީހުންގެ ހައްގާއި ބަލިމީހުންނާއި ކުޑަކުދިންގެ ހައްގުވެސް އޮންނަންޖެހޭނެކަމުގެ ވާހަކަވެސް މާނަކުރާފަރަތްތަކުން މާނަކޮށް ދިނުމަށް ގޮވާލަން.
ގޮވާކޮއި
31 July 2017
މައުމޫނޫ އަހަރަމެން މުސްލިމުން ވާގިއެދެންވީ ހަމަ އެކަކު އަނެކަކުކިބައންތަ؟ ނުވަތަނަޝީދުގެ ކިބައިންތަ؟
ވާގަލި
31 July 2017
ހަގީގަތުގައިވެސް ކުޑަކެކުރި އާއި ބޮޑުކެކުރިީގެ ނިޒާމަށް ވެރިކަން ކުރެއްވި ރައީސަކީ މައުމޫން.
ފަޅުވެރިން
31 July 2017
މައުމޫންގެ މިހާރުގެ ގޭމްޕްލޭން އަކީ އިދިކޮޅުގައި ތިބި ފާހަގަކުރެވޭ މީހުންނަށް ޚުޝާމަދު ކޮށްގެން، އެމީހުންގެ ބޯކައިގެން، އެމީހުން ހައްލައިގެން އެމީހުން ލައްވާ ޣައިރުޤާނޫނީ ކަންކަން ކުރުވުން! ރޭގެ ޖަލްސާގައި އޭނަ ވާހަކަދެއްކުމުގެ މައިގަނޑު ބޭނުމަކީ، މިއަދު އޮންނަ މަޖްލިސްގައި ހައިޖާނު އުފެއްދުމަށް މަޖްލިސް މެންބަރުންނަށް ހިތްވަރުދިނުން! ރޭގެ ޖަލްސާގައި ފެނުނު މަންޒަރުތަކުން ހަމަ ހިނި އާދޭ! އިބޫ ޞޯލިޙްމެން ވެސް މައުމޫން ޚުޝާމަދު ކޮށްލީމާ ފަރިވެ ފޮޅިގެން އެކަކު އަނެކަކާ ދިމާއަށް ބަލަ ބަލާފައި ހީހީފައި އުފާވެގެން އުޅެނީ ހަމަ ކުޑަ ކުދިންތަކެއް އުޅޭހެން! ހާދަ ޖޯކު ބައެކޭ ދެން! މިއިރު މިމީހުންނަކަށް ނޭނގޭ މިއީ މިމީހުން ހައްލަން މައުމޫން ހަމަ ދުލުކުރިން ދައްކާލާ ގިރިޓީ ވާހަކަތަކެއް ކަމެއް!! މައުމޫންގެ ހިތް ދުވަހަކުވެސް މިމީހުންނަށް ހެޔޮވާނެތަ؟ ނުވާނެ! މައުމޫންގެ ހުރިހާ ވާހަކައެއްގެވެސް އަސާސަކީ ޙަސަދައާއި، ބަދަލުހިފުން!!
ފާތިމަތު
31 July 2017
މައުމޫން ޕްލީޒް ގޭގައި މަޑުމަޑުން އިންނަވާ... ކުދޯކުދޯ ނުގޮވާ... ބަލަގަ އެޒަމާނުގައި އެއް ރައްޔިތުން ދުލުގައި ތަޅުއެޅުއްވީ މަނިކުފާނު... ތަރައްޤީ ތީރީސް އަހަރު ނުވެނު.... ދެއްތޯ...ދެން ހަމަ އަންނަނީ ހިނި...