ނޮޓް ނެގޯޝިއަބްލް ޖަހާފައިވާ ޗެކްތަކެއް ބީއެމްއެލް އިން ޖަމާކޮށްދިން ވާހަކަ އެ ބޭންކުން ދޮގުކުރޭ. --ފޮޓޯ/މިހާރު
18 ޖުލައި 2019 - 16:59
29 comments
އެމްއެމްޕީއާރުސީން ދޫކުރި ބައެއް ރަށްރަށުގެ އެކުއިޒިޝަން ކޮސްޓްގެ ގޮތުގައި އެކި ފަރާތްތަކުން އެ ކުންފުންޏަށް ދިން ޗެކްތަކުގެ ތެރެއިން "ނޮޓް ނެގޯޝިއަބްލް" ޗެކްތަކެއް ވެސް ބީއެމްއެލުން އެސްއޯއެފަށް ޖަމާކޮށްދީފައިވާ ކަން "މިހާރު" އަށް އެނގިއްޖެ އެވެ.
ދައުލަތަށް 1.3 ބިލިއަން ރުފިޔާ ގެއްލުނު ޚިޔާނާތުގައި، ބީއެމްއެލް އިން މިގޮތަށް އަމަލުކުރިކަން ތަހުގީގަށް އެނގިފައިވޭތޯ އެހުމުން އެންޓި ކޮރަޕްޝަން ކޮމިޝަން (އޭސީސީ) އިން ވެސް ވަނީ އެކަން ކަށަވަރުކޮށް ދީފަ އެވެ.
"ނޮޓް ނެގޯޝިއަބްލް" ޗެކްތައް ޖަމާކުރަން ޖެހޭނީ ހަމައެކަނި ޗެކްގައި ލިއެފައި އޮންނަ ފަރާތުގެ އެކައުންޓަށެވެ. އެކަހަލަ އެއްވެސް ޗެކެއް އެސްއޯއެފްގެ އެކައުންޓަށް ޖަމާކޮށްފައި ނުވާނެ ކަމަށް، ފެށުނީއްސުރެ ބީއެމްއެލުން އަންނަނީ ބުނަމުންނެވެ. އަދި މިދިއަ ހަފުތާގެ އަންގާރަަދުވަހު އޮތް ރައްޔިތުންގެ މަޖިލިހުގެ މާލިއްޔަތު ކޮމިޓީގެ ބައްދަލުވުމުގައި ވެސް އެ ބޭންކުން ތަކުރާރުކޮށް، އެގޮތަށް ބުންޏެވެ.
މި މައްސަލައާ ގުޅިގެން މިއަދު ބީއެމްއެލް އަށް ގުޅުމުން ވެސް އެތަނުގެ އިސް ބޭފުޅަކު ވިދާޅުވީ "ނޮޓް ނެގޯޝިއަބްލް ޗެކެއް ޖަމާކޮށްފައި ނޯންނާނެ" ކަމަށެވެ.
އެކަމަކު ހެކި ހުރި ބައެއް މީހުން، ނަން ނުޖަހާ ގޮތަށް ވާހަކަ ދައްކަމުން، ބުނީ ހަމައެކަނި އެމްއެމްޕީއާރުސީގެ އެކައުންޓަށް ޖަމާކުރެވޭ ގޮތަށް ދޫކޮށްފައިވާ "ނޮޓް ނެގޯޝިއަބްލް" ޗެކްތަކެއް އެސްއޯއެފަށް ޖަމާކޮށްދީފައިވާ ކަމަށެވެ. އެ ބޭންކްގައި އޮންނަ އެސްއޯއެފްގެ އެކައުންޓަށް ބީއެމްއެލްގެ ޗެކްތަކެއްގެ އިތުރުން އެހެން ބޭންކްތަކުގެ ހަމަ އެކަހަލަ ބައެއް ޗެކްތައް ވެސް ޖަމާކޮށްދީފައިވާ ކަމަށް އެނގިފައިވެ އެވެ.
އެމްއެމްޕީއާރުސީގެ ޚިޔާނާތުގައި އެންޑޯސްމަންޓާ ޚިލާފަށް ބީއެމްއެލް އިން ޗެކްތަކެއް ޖަމާކޮށްފައިވާ ކަމަށް އޮޑިޓަ ޖެނެރަލް އާއި އޭސީސީން ކުރި ތަހުގީގުތަކުގެ ރިޕޯޓްގައި ބުނެފައިވީ ނަމަވެސް ނޮޓް ނެގޯޝިއަބްލް ޗެކްތަކެއް ޖަމާކޮށްފައި ހުރި ކަމަކަށް ސީދާ ބުނެފައެއް ނުވެ އެވެ. އަދި ބީއެމްއެލްގެ ދިފާއު މިހާތަނަށް ބިނާކޮށްފައި އޮތް މައިގަނޑު ބިންގަލަކީ ވެސް، އެފަދަ ޗެކެއް އެހެން ބަޔަކަށް ޖަމާކޮށްފައިނުވާނެ ކަމެވެ.
އޮޑިޓަ ޖެނެރަލްގެ ރިޕޯޓްގައި ބުނެފައި ވަނީ ބީއެމްއެލް އިން ޗެކްތައް ޖަމާކޮށްދީފައި ވަނީ އެންޑޯސްކުރުމުގެ އުސޫލާ ޚިލާފަށް ކަމަށެވެ. އަދި އޭސީސީން މިދިއަ ފެބްރުއަރީ މަހު އާންމުކުރި ތަހުގީގު ރިޕޯޓްގައި ވެސް އެފަދަ ޗެކެއް، އެހެން ބަޔަކަށް ޖަމާކުރިކަމުގެ ވާހަކައެއް ނެތެވެ.
ނޮޓް ނެގޯޝިއަބްލް ޗެކްތަކުގެ ވާހަކަ މިހާރު ކީއްވެ؟
ކުރިން ހިންގި ތަހުގީގުތަކުގައި ނޮޓް ނެގޯޝިއަބްލް ޗެކްތަކެއް އެސްއޯއެފަށް ޖަމާކޮށްދިން ވާހަކަ ނެތީ ކީއްވެގެން ކަމާ މެދު ސުވާލު އުފެދުނަސް، ބައެއް މުއައްސަސާތަކުން އެކަމަށް ރައްދުވާ ގޮތަށް، ރައްޔިތުންގެ މަޖިލިހުގެ ކޮމިޓީތަކުގައި ވާހަކަ ދައްކާފައިވެ އެވެ. އެގޮތުން އޭސީސީން ބުނެފައި ވަނީ ތަހުގީގަށް ބޭނުންވާ ހުރިހާ މައުލޫމާތުތައް ހޯދުމުގައި ބީއެމްއެލްގެ ތެރެއިން ދަތިތަކެއް ކުރިމަތިވި ކަމަށެވެ.
ބީއެމްއެލްގެ ތަހުގީގާ ގުޅޭ ގޮތުން "މިހާރު" އިން ސުވާލު ދެންނެވުމުން އޭސީސީގެ ރައީސް މުއައްވިޒް ރަޝީދު މިއަދު ވިދާޅުވީ ނޮޓް ނެގޯޝިއަބްލް ޗެކްތަކެއް ބީއެމްއެލް އިން ޖަމާކޮށްދިން ކަން ފާހަގަވެ އެކަން މިހާރު ބަލަމުން އަންނަ ކަމަށެވެ. ބީއެމްއެލްގެ މުވައްޒަފުންނާ ސުވާލުކޮށް ތަހުގީގަށް ބަޔާންތައް ނަގަމުންދާތީ އޭނާ ތަފްސީލެއް ނުދެއްވި އެވެ.
ހިޔާނާތާ ގުޅިގެން ނެރުނު އޭސީސީގެ ރިޕޯޓުގައި އެ ވާހަކަ ނުހިމެނީ ކީއްވެތޯ އެހުމުން އޭނާ ވިދާޅުވީ ތަފްސީލުތައް ނުހިމެނި ސަބަބަކީ ރިޕޯޓު ނެރުނު އިރު ބީއެމްއެލްއާ ގުޅޭ ކަންކަން ވަކި މައްސަލައެއްގެ ގޮތުގައި ތަހުގީގު ކުރަމުންދާތީ ކަމަށެވެ. އަދި ނޮޓް ނެގޯޝިއަބްލް ޗެކްތަކާ ގުޅޭ ގޮތުން އެ ތަހުގީގުގައި ސުވާލުކޮށްފައިވާނެ ކަމަށް ވެސް އޭނާ ވިދާޅުވި އެވެ.
މާލިއްޔަތު ކޮމެޓީ އަށް ބީއެމްއެލްގެ އިސް ވެރިން ހާޒިރުކުރުމުން އެންމެ ގިނަ މެމްބަރުން ކަންބޮޑުވުން ފާޅުކުރެއްވީ ވެސް އެންޑޯސް ނުކުރެވޭ ޗެކްތަކެއް ޖަމާކޮށްދިން ސަބަބާ ގުޅޭ ގޮތުންނެވެ. އެކަމަކު ނޮޓް ނެގޯޝިއަބްލް ޗެކްތައް ޖަމާކުރި ސަބަބާ ގުޅޭ ގޮތުން ކުރި ތުހުމަތުތައް ބޭންކުން ދޮގުކުރި އެވެ.
ބީއެމްއެލުން އަމަލުކުރި އުސޫލު ދިފާއު ކުރައްވަމުން ޑެޕިއުޓީ ސީއީއޯ މުހައްމަދު ޝަރީފް ވިދާޅުވީ އެމްއެމްޕީއާރުސީގެ ނަމުގައި އެންޑޯސް ކޮށްގެން އެސްއޯއެފްގެ އެކައުންޓަށް ޖަމާކުރި ޗެކްތަކަކީ "ނޮޓް ނެގޯޝިއަބްލް" ޖަހާފައިވާ ޗެކްތަކެއް ނޫން ކަމަށެވެ. ބޭންކުން އަމަލުކޮށްފައި ވަނީ ގާނޫނުތަކާއި ބޭންކިން އުސޫލްތަކާ އެއްގޮތަށް ކަމަށާއި އެމްއެމްޕީއާރުސީގެ ޚިޔާނާތުގައި ރާއްޖޭގެ ގައުމީ ބޭންކްގެ އެއްވެސް ބައިވެރިވުމެއް ނެތް ކަމަށް ވެސް އޭނާ ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ސަތޯ
19 July 2019
ކޮން ޤައުމީ ބޭންކެއްތަ؟ތީ އަހަރެން ދަންނައެޗެއް ނޫން ކޮންމެ ޤައުމެއްގައި ޤައުމީ ބޭންކެއް އިންނަ ކަމެއް؟ މަރުކަޒީ ބޭންކުގެ އިތުރަށް ޤައުމީ ބޭންކު ހުންނަތޯ ނުވަތަ މީ ނޫސްވެރިން ހަދައިގެން އުޅޭ އެއްޗެއްތޯ ފަހުމެއް ނުވޭ
ޢޭސީސީ ބެއްޔާ
19 July 2019
ޢެދުވަސްވަރު ޢަޒީމާ ކާރިއަށް އަދީބު އެތަކެއް އެތަކެއް ދުވަހު އައި. ޙަފްތާއަކު އެތަކެއް ފަހަރު ކޮންބޭނުމެއްގައި ކަން އިނގިވަޑައިގަންނަވާނީ އެކަމަނާ އަށް. ޢޭސީސީގެ ތަހުގީގަށް މިކަން އެނގޭނެ. ރެކޯޑު ހުންނާނެ. ޝާއިއުރަނީ މުވައްވިޒު މެންވެސް ބޭނުންވާ މައުލޫމާތު އެކަނިދޯ
އިނގިލިނެތްކުއްޖާ
19 July 2019
ސަހަރޯ! ރައްޔިތުންނަށް ލައްކަ ހުވަފެން ދައްކާފައި މިވެރިން ލައްކަ ގިނަ ޖަރީމާ ހިންގާފައި ދޮތަ! މާތް ކަލާކޯ! ރައްޔިތުން ނޭވެ. މިފަދަ ކަންބަލިތައް އަލްޙާ ޢީދަށް ރައްޔިތުން ނުކުމެ ކަތިލަން ތައްޔާރުވޭ.
ދަތްނެތްކުއްޖާ
18 July 2019
ރައްޔިތުންނޭވެ! އަދިވެސް ލައްކަ ގިނަ އަޑުތައް އިވޭނެއެވެ. ރައްޔިތުންގެ ފައިސާ އާއި މުދާތައް ނިމިދިޔަ ސަރުކާރުގެ އިސްވެރިން ނާއި މަޖުލިހުގެ ބައެއް މެމްބަރުން ވަނީ ކައި ހުސްކޮއްފައެވެ. ބައެއް މެމްބަރުން އަގު ބޮޑެތި ފްލެޓު ތަކާއި ޒަމާނީ ކާރުތައް އަނބި ދަރިންގެ ބާރތްޑޭ ދުވަހު ސަޕްރައިޒް ގިފްޓްގެ ގޮތުގަވެސް ހަދިޔާކޮއް އުލުނުއެވެ. މިއަދު އެވެރިން ހިތުން އެތިބީ ފިލައެވެ. ﷲގެ ވާގިފުލާއި އެކު މިވެރިންގެ މައްސަލަތައްވެސް ބެލި ޙައްގުވާ އަދަބު ލިބޭނެއެވެ.
ބޭންކް މީހާ
18 July 2019
50000ރ އަށް ވުރެ މަތީގެ ފައިސާގެ އަދަދެއް ޖަމާކުރާނަމަ އެއީ ކޮން ކަމަކުން ލިބުނު ފައިސާއެއްތޯ ޖަހަން އޮވޭ ޑިޕޮޒިޓް ސްލިޕްގައި..އެސްއޯއެފް އަށް ޖަމާކުރި ޗެކްތަކުގެ އެބައިގައި ނެތް އެއްޗެއް ލިޔެފަވެސް.އެކަމަކު ބޭންކަށް ވާ ކަމެއް ނޫން..އައީ ޖަމާކުރީ..ދޮގު ހެދުުމުން ޕީއެޗްޑީ ނަންގަވާފަ ގައުމީ ބޭންކޯ އެކަމު...
ގައުމީލޯޔަރު
19 July 2019
އެކަމަކު ގައުމީ ބޭންކުގެ ގައުމީ ލޯޔަރު ބުނަކީ އެންޓި މަނީލޯންޑަރިން ގާނޫނާ ގަވާއިދުގެ ދަށްުން ޓްރާންސެކްޝަން ނުހުއްޓުވެޔޯ، އެއީ ވަގު ފައިސާހެން ހީވަންޏާ އުސޫލުތަކާ ޚިލާފަށްވެސް ޖަމާކޮށްދޭންޖެހޭނެކަމަށޯ އޮންނަނީ، ޚާއްޞަކޮށް ރައްޔިތުންގެ ލާރިން ވައްކަން ކުރާހެން ހީވާނަމަ.
ސަކީނާ
18 July 2019
މަހުލޫފާ މައުސޫމު ހެވިފަ ބޮޑު ގޮނޑީގަ ކާޅު އިންސާފު.....
ކާޖާ
18 July 2019
މިއީ ގުޅިގެން ހިންގާފައިވާ ޖަރީމާ އެކެވެ. ދައުލަތުގެ ހުރިހާ މުއައްސަސާތަކެކެވެ. ކުރީގެ އޮޑިޓަރ ޖެނެރަލް ނިޔާޒު ބޯހަރުކަމުން އޭނާއާ އަތުއަޅުވާ ނުލެވުމުން އެނާ މަގާމުން ދުރުކޮށް ދެން ތިބި ބަޔަކަށް މަންޒަރު ދައްކާލުމާއެކު ގަވަރުނަރަށްވެސް ޖެހުނީ އިސްޖަހާށެވެ. އާބަސް ބުނާށެވެ.
ބާރީ9
18 July 2019
ޗެކްތަކުގެ ވާހަކަ މިހާރު ކީއްވެ؟... ބޭންކުގެ ދުވަސް ދުވާލަން ... ޢިންޑިޔާ ބެންކު ގަދަކުރަން....
ބާބީ
18 July 2019
ބޭންކަކީ އެތާނގެ ވެރިންގެ ތަރިކަ މުދަލެއް ނޫން. ބޭންކު ދޮވެ ސާފު ކުރުމަކީ ބޭންކަށް ރައްޔިތުންގެ އިތުބާރު ބޮޑުވާނެ ކަމެއް.
ހަޑިގިއްލާ
18 July 2019
ކަމެއް ވާއިރަށް އިންޑިއާއޭ ބުނުމުން ވައްކަން ފޮރުވޭތޯ
ޝައިނީ
18 July 2019
އާނ މިތަނުގަ ހިންގަން ޖެހޭނީ އިންޑިޔާގެ ޑާބަރް އާމްލާ އެންޑު ބަޖާޖް ބޭންކު އެވެ.
ޙުސޭނާ
18 July 2019
ފައިސާ ޖަމާވި މީހުން ކޮބާތަ
ގޮއިދޫހަސަނު
18 July 2019
އަހަރުމެން ތިފަދަކެމެއްކުރިކަމުގެ ތުހުމަތެއްވީނަމަވެސް ފުލުހުން އަހަރުމެންމީހަކު ގެއްކުނުބަހައްޓާނެ. ގެންގޮސް ގައިދީންތެރޭގައި ގެންގުޅެ، ކުށްކުރާމީހަކަށްހައްދާނެ. އެކިމުވައްސަސާތަކުގައިތިބި މިޚިޔާނާތުގައި ބައިވެރިވިކަމުގެ ތުހުމަތުކުރެވޭ އެންމެން މައްސަލައާއި ދައުވާ ހުށަހެޅިހެޅިހެން އެންމެން ޖަމާވެ ސައްލާކޮށް ވަކީލުކަމުގެ ހުނަރުން ސަލާމަތްވެވޭނެގޮތް ހަދައިދޭން މީންމީހަކު ހައްޔަރެއްވެސްނުކުރޭ. މިއީ އަހަރުމެން ރަޓުވަން ރާވައިގެންކުރާކަމެއް.