އިންތިޚާބު ބޭއްވުމާ ގުޅޭގޮތުން މިރޭ ގޮތެއް ނިންމަނީ

އަންނަ މަހުގެ ހަތަރު ވަނަ ދުވަހު ބޭއްވުމަށް ނިންމާފައިވާ ލޯކަލް ކައުންސިލްތަކުގެ އިންތިޚާބު ފަސް ކުރުމާ ގުޅޭގޮތުން މިރޭ ގޮތެއް ނިންމުމަށް އިލެކްޝަންސް ކޮމިޝަން (އީސީ) އިން ނިންމައިފި އެވެ.

ކޮވިޑް-19 އަށް 8 މީހަކު ރާއްޖޭން ޕޮޒިޓިވް ވެފައިވާއިރު ސިއްހީ ތަޖުރިބާކާރުންނާއި ބައެއް އާއްމުންވެސް އަންނަނީ އިންތިޚާބު ފަސް ކުރުމަށް ގޮވާލަމުންނެވެ. އަދި އިންތިޚާބު ބޭއްވިޔަސް ވޯޓް ލާން ނުދާނެ ކަމަށްވެސް ބައެއް މީހުން އަންނަނީ ބުނަމުންނެވެ.

އީސީގެ މެމްބަރު އަހުމަދު އަކުރަމް މިއަދު ވިދާޅުވީ ހާލަތު ރަނގަޅަށް އޮޅުންފިލުވުމަށް ފަހު އިންތިޚާބާ ގުޅޭގޮތުން އީސީން މިރޭ ގޮތެއް ނިންމާނެ ކަމަށެވެ.

"ރައްޔިތުންގެ ކަންބޮޑުވުންތައް އަޅުގަނޑުމެން އަބަދުވެސް އަޑު އަހާނެ،" އަކްރަމް ދެންމެ ކުރެއްވި ޓްވީޓެއްގައި ވިދާޅުވި އެވެ.

އީސީގެ ރައީސް އަހުމަދު ޝަރީފް އިއްޔެ ވިދާޅުވީ އިންތިޚާބު ފަސް ކުރުމުގެ ވިސްނުމެއް އެހާތަނަށް އެކޮމިޝަނުން ނުގެންގުޅޭ ކަމަށެވެ. އަދި އިންތިޚާބު ފަސްކޮށްފި ނަމަ ދެން އިންތިޚާބު ބޭއްވުމަށް 30 މިލިއަން ރުފިޔާ އިތުރަށް ބޭނުންވާނެ ކަމަށްވެސް ޝަރީފް ވިދާޅުވި އެވެ.

ގާނޫނު ބުނާގޮތުން މިހާރު ހިނގަމުންދާ ކައުންސިލްގެ މުއްދަތު ހަމަވުމުގެ އެއް މަސް ކުރިން އާ ކައުންސިލަރުން އިންތިޚާބު ކުރަން ޖެހެ އެވެ. އެހެންކަމުން އިންތިޚާބު ބޭއްވުމުގެ އެންމެ ފަހުގެ ތާރީހަކީ މޭމަހުގެ 3 ވަނަ ދުވަހެވެ. އެއަށްވުރެ ފަސް ވާނަމަ ހައި ކޯޓުގެ ލަފާ ހޯދަން ޖެހޭނެ އެވެ.

ނަމަވެސް އިންތިޚާބު ފަސް ކުރުމަކީ ރާއްޖެއަށް އާ ކަމެއް ނޫނެވެ. އެންމެ ފަހުން ބޭއްވި ލޯކަލް ކައުންސިލްތަކުގެ އިންތިޚާބުވެސް ވަނީ ގާނޫނު ބުނާ މުއްދަތައްވުރެ ފަސްކޮށްފަ އެވެ.

ކޮވިޑް-19 ފެތުރުން ހުއްޓުވުމަށްޓަކައި މިދުވަސްވަރު ގިނަ މީހުން އެއްވެ ނޫޅުމަށް ސިއްހީ ތަޖުރިބާކާރުން ލަފާ ދެ އެވެ.