އަންނަ އަހަރުގެ ބަޖެޓް 25 ބިލިއަނަށް ކުޑަކުރަން ސަލީމް ގޮވާލައްވައިފި

އަންނަ އަހަރަށް ލަފާކުރާ ބަޖެޓުގެ އަދަދު 36.9 ބިލިއަން ރުފިޔާ އިން 25 ބިލިއަން ރުފިޔާ އަށް ކުޑަކުރަން ރައްޔިތުންގެ މަޖިލީހުގެ މައިނޯރިޓީ ލީޑަރު އަދި އޭދަފުށީ ދާއިރާގެ ޕީޕީއެމްގެ މެމްބަރު އަހުމަދު ސަލީމް (ރެޑްވޭވް ސަލީމް) މިއަދު ގޮވައިލައްވައިފި އެވެ.

އަންނަ އަހަރުގެ ބަޖެޓާ ގުޅޭ ގޮތުން ރައްޔިތުންގެ މަޖިލީހުގެ މިއަދުގެ ޖަލްސާގައި ކުރި ބަހުސްގައި ސަލީމް ވިދާޅުވީ، ބަަޖެޓްގައި ހިމެނޭ ދަރަނި ބޮޑުވުމުން ޑޮލަރުގެ އަގު ނުހިފެހެއްޓޭ ކަމަށާއި އޭގެ ނަތީޖާއަކީ ތަަކެތީގެ އަގުބޮޑުވުން ކަމަށެވެ. އޭނާ ވިދާޅުވީ ކުރީގެ ރައީސް އަބްދުﷲ ޔާމީނުގެ ވެރިކަމުގައި ދަރަނި ހުރީ އެވްރެޖްކޮށް، އަހަރަކު ހަތަރު ބިލިއަނުގައި ކަމަށް ވިޔަސް މި ސަރުކާރުގައި އެ އަދަދު އުޅެނީ 14 ބިލިއަނުގައި ކަމަށެވެ.

"ބަޖެޓްގެ ދަރަނި ބޮޑުވެގެން ގޮސް ޑޮލަރު [ގެ އަގު] ނުހިފެހެއްޓިގެން މި އުޅެނީ. ޑޮލަރު ރާއްޖެ އަށް ނުވަންނަނީއެއް ނޫން. ބޭނުންވާ ވަރަށް ޑޮލަރު ރާއްޖެ އަށް އެބަ ވަދޭ. އެއީ ބޮޑު އަގުގައި ގަންނަން ވެއްޖެއްޔާ އެ ފައިސާ އެބަ ލިބޭ ވިއްޔާ،" ސަލީމް ވިދާޅުވި އެވެ.

އޭނާ ވިދާޅުވިގޮތުގައި، ބަޖެޓް ކުޑަކުރަން ޖެހެނީ ދަރަނި ކުޑަކޮށް، ޑޮލަރުގެ އަގު ހިފެހެއްޓުމަށްޓަކަ އެވެ. ޑޮލަރުގެ އަގު ބޮޑުވުމާއި ދައުލަތުގެ ދަރަންޏާ ގުޅުމެއް ނެތް ކަމަށް ބައެއް މީހުން ހީކުރިޔަސް، އެއީ ވަރަށް ބޮޑަށް ގުޅިފައި އޮންނަ ދެ ކަންތައް ކަމަށް މަޝްހޫރު ވިޔަފާރިވެރިޔާ އަދި މާލޭގައި ރެޑް ވޭވްގެ ފިހާރަތައް ހިންގަވާ ސަލީމް ވިދާޅުވި އެވެ.

"އެހެންވީމާ ކުރިއަށް ދެވޭނީ ދައުލަތުގެ ދަރަނި އިންތިހާ އަށް ކުޑަކޮށްގެން. އަޅުގަނޑު ގޮވައިލަން ދައުލަތުގެ ބަޖެޓް 25 ބިލިޔަނަށް ކުޑަކުރަން. ކުޑަކޮށްފައި އަލުން ބަޖެޓް މި މަޖިލީހަށް ގެނައުމަށް،" ސަލީމް ވިދާޅުވި އެވެ.

އޭނާ ވިދާޅުވީ ކޮވިޑްގެ ބަލިމަޑުކަމުގައި ރާއްޖެ އަށް ކުރިމަތިވި އިގްތިސާދީ މައްސަލަތަކާ އެކު ދަރަނި ބޮޑުވެފައި ވާއިރު، އެ ހާލަތު ދިއުމުން ދަރަނި ކުޑަކުރަން ޖެހޭ ކަމަށެވެ. ދަަރަނި ކުޑަ ނުކުރާ ނަމަ އަންނަ ރޯދަމަހު ރާއްޖޭގައި ތަކެތީގެ އަގު އިންތިހާ އަށް ބޮޑުވެދާނެ ކަމަށް ވެސް ސަލީމް ވިދާޅުވި އެވެ.

ދައުލަތުގެ ދަަރަނި ބޮޑުވާތީ އެމްޑީޕީގެ ބައެއް މެމްބަރުން ވެސް މިއަދު ކަންބޮޑުވުން ފާޅުކުރެއްވި އެވެ. އެކަމުގެ ކަންބޮޑުވުން ފާޅުކުރައްވަމުން، މަރަދޫ ދާއިރާގެ މެމްބަރު އިބްރާހީމް ޝަރީފް (މަވޯޓާ ޝަރީފު) ވިދާޅުވީ ދައުލަތުގެ ދަރަނި 100 ބިލިއަނަށް އެރުމަަކީ ރާއްޖެއަށް އުފުލޭނެ ބުރައެއް ނޫން ކަމަށެވެ.