އިތުރު 20 ރަށަކަށް އެމްބިއުލާންސް ފޮނުވަން ތައްޔާރުވެއްޖެ

ރަށްރަށް ފޮނުވަން ގެނެސްފައި ހުރި އެމްބިއުލެންސްތަކެއް.-- ފައިލް ފޮޓޯ

އިފްރާޒް އަލީ، މިހާރު

29 ނޮވެމްބަރ 2021 - 18:51

އެމްބިއުލާންސް ފޮނުވަން ސަރުކާރުން ކަނޑައެޅި ރަށްތަކުގެ ތެރެއިން އިތުރު 20 ރަށަކަށް ފޮނުވާނެ އެމްބިއުލާންސްތައް މިއަދު މާލެ ގެނެސްފި އެވެ.

ހެލްތު މިނިސްޓްރީން ބުނީ ރަށްރަށުގައި ބޭނުންކުރަން އެސްޓީއޯ މެދުވެރިކޮށް ގެންނަން 20 އެމްބިއުލާންސްގެ ދެވަނަ ޝިޕްމެންޓް ކަސްޓަމްސް އިން ކްލިއާ ކުރުމަށް ފަހު، އިދާރީ ގޮތުން ފުރިހަމަ ކުރަންޖެހޭ ކަންކަން މިހާރު ކުރަމުން އަންނަ ކަމަށެވެ.

އެ ކަންކަން ނިމުމުން ރަށްރަށަށް އެމްބިއުލާންސްތައް ފޮނުވަން ފަށާނެ އެވެ.

އެސްޓީއޯ މެދުވެރިކޮށް ގަނެފައިވާ 20 އެމްބިއުލާންސްގެ ފުރަތަމަ ޝިޕްމެންޓް ގެނައީ މިދިޔަ މަހު އެވެ. މިހާރު އެ ހުރިހާ އެމްބިއުލާންސްތަކެއް ވަނީ ރަށްރަށް ފޮނުވައިފަ އެވެ.

We have received the second batch of Ambulances to Male’ under MOU signed between STO and @MoHmv
We aim to dispatch this additional 20 ambulances to the regional islands as promised. 😊 pic.twitter.com/qlDL9cSJce
— STO (@stoplc) November 29, 2021

ބައެއް ރަށްރަށުގައި އެމްބިއުލާންސް ހަލާކުވެ، އެ ހިދުމަތް މެދުކެނޑިފައި އޮތުމުން ގިނަ ދަތިތައް ކުރިމަތިވާކަމުގެ ޝަކުވާ ލިބެ އެވެ. ކޮވިޑްގެ ހާލަތު އެންމެ ގޯސްވި ދުވަސްވަރު ވެސް، އެމްބިއުލާންސް ނެތުމުންނާއި ހަލާކުވެފައި އޮތުމުން ދަތިތަކާ ކުރިމަތިވި އެވެ.

މި ސަރުކާރުގެ އަމާޒަކީ މި އަހަރު ނިމުމުގެ ކުރިން 60 ރަށަކަށް އެމްބިއުލާންސް ފޮނުވުމެވެ.

ހެލްތު މިނިސްޓަރު އަހްމަދު ނަސީމް ވިދާޅުވެފައި ވަނީ ރަށްރަށަށް އެމްބިއުލާންސް ގެންދަނީ ތިން ގޮތަކުން ކަމަށެވެ. އެއީ އެ މިނިސްޓްރީގެ ބަޖެޓުންނާއި ޖަޕާނު ސަރުކާރުގެ އެހީގެ އިތުރުން އެހެން ޕްރޮގްރާމެއްގެ ތެރެއިންނެވެ.