މަޖިލީހުގައި ބޭއްވި ނޫސްވެރިންގެ ބައްދަލުވުމެއްގައި އާދަމް ޝަރީފް ވާހަކަ ދައްކަވަނީ--ފައިލް ފޮޓޯ: މިހާރު
23 މެއި 2023 - 11:19
ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝިދަށް ތާއީދު ކުރައްވާ މެންބަރުން އެމްޑީޕީން ވަކިވެ، އުފައްދަން މަސައްކަތްކުރާ "ދަ ޑިމޮކްރެޓްސް" އަށް ރިޔާސީ އިންތިހާބުގައި ގިނަ އަދަދެއްގެ ވޯޓު ލިބިއްޖެ ނަމަ ޕީޕީއެމް/ޕީއެންސީ ވެރިކަމަށް އަންނަން ފަސޭހަ ވާނެ ކަމަށް ޕީއެންސީގެ ނައިބު ރައީސް އާދަމް ޝަރީފް މިއަދު ވިދާޅުވެއްޖެ އެވެ.
އިދިކޮޅު ފަރާތްތަކުން މަޖިލީހަށް ހުށަހެޅި ގަރާރަކަށް ބަހުސް ކުރައްވަމުން، މަޑުއްވަރި ދާއިރާގެ މެމްބަރު އާދަމް ޝަރީފް ވިދާޅުވީ، މިހާރު ކުރަން އޮތް އެންމެ ރަނގަޅު މަސައްކަތަކީ ރައީސް އިބްރާހިމް މުހައްމަދު ސޯލިހުގެ ވެރިކަން ބަދަލު ކުރުން ކަމަށެވެ.
ކޮންމެ ނަމެއްގައި ގަރާރުތަކާއި މައްސަލަތައް މަޖިލީހަށް ހުށަހެޅިޔަސް އެ މައްސަލަތަކުގައި އޮންނަނީ "އިބޫ ނޫން ގޮތެއް" ހޯދަން މަސައްކަތް ކުރުން ކަމަށް އާދަމް ޝަރީފް ވިދާޅުވި އެވެ.
އޭނާ ވިދާޅުވި ގޮތުގައި ދަ ޑިމޮކްރެޓްސްގެ ފަރާތުން ރިޔާސީ އިންތިހާބަށް ނުކުންނަވާނެ ކަމަށް ބެލެެވެނީ އެމްޑީޕީގެ ރައީސްގެ މަގާމުގައި މި ވަގުތު ހުންނެވި ނަޝީދެވެ.
[ނަޝީދަށް] މަދުވެގެން 30،000 ވޯޓު ނެގި ކަމުގައިވިޔަސް އެއީ ޕީޕީއެމް އަށް ލިބޭ ޕްލަސްއެއް. އަޅުގަނޑުމެން ވެރިކަމަށް އަންނަން ފަސޭހަ ވާނެ ކަމެއް -- އާދަމް ޝަރީފް
ރިޔާސީ އިންތިހާބުގައި އެ މަނިކުފާނަށް އެންމެ މަދުވެގެން 30،000 ވޯޓު ހޯދުނަސް އޭގެ ސަބަބުން ޕީޕީއެމަށް ފައިދާ ވާނެ ކަމަށް އާދަމް ޝަރީފް ވިދާޅުވި އެވެ.
"މަދުވެގެން 30،000 ވޯޓު ނެގި ކަމުގައިވިޔަސް އެއީ ޕީޕީއެމް އަށް ލިބޭ ޕްލަސްއެއް. އަޅުގަނޑުމެން ވެރިކަމަށް އަންނަން ފަސޭހަ ވާނެ ކަމެއް. އެހެންވެ އަޅުގަނޑުމެން މި ބަލަނީ ރައީސް ޔާމީނަށް ވެރިކަމަށް ވަޑައިގަނެވޭނެ މަގު ފަހިވެގެން ދާ ކަމަށް،" އޭނާ ވިދާޅުވި އެވެ.
އާދަމް ޝަރީފް ވިދާޅުވީ އެމްޑީޕީ އަށް ރައްޔިތުންގެ މަޖިލީހުގެ ސުޕަ މެޖޯރިޓީ ގެއްލުމުން ސަރުކާރަށް ފަނޑިޔާރުންނަށް އުނދަގޫ ނުކުރެވޭނެ ކަމަށާއި އިންސާފުވެރިކަމާ އެކީ ޝަރީއަތް ހިނގައިފި ނަމަ ޔާމީން މިނިވަންވެ، މި އަހަރުގެ ރިޔާސީ އިންތިހާބު ކާމިޔާބު ކުރައްވާނެ ކަމަށެވެ.
މިތިބީ އެންމެން އެކުގައި ”އިބޫ ނޫންގޮތެއް“ ހޯދުމަށް. pic.twitter.com/POSwY0rqEz
— Ibrahim Shujau (@IbrahimShujaau) May 22, 2023
ރާއްޖޭގެ ސިޔާސީ މަސްރަހު މިހާރު ބަދަލުވަމުން ދާ ގޮތުން ދެ ޕާޓީއެއް ފިޔަވައި ސިޔާސީ ހުރިހާ ޕާޓީއެއް އޮތީ މިހާރުގެ ވެރިކަން ބަދަލު ކުރުމަށް އެއްބަސްވެގެން ކަމަށާއި ސިޔާސީ ދާއިރާގައި އުޅުއްވާ ފުންނާބު އުސް އެތައް ބަޔަކު ގުޅިގެން މަސައްކަތް ކުރާ ތަން ފެންނަ ކަމަށް ވެސް އާދަމް ޝަރީފް ވިދާޅުވި އެވެ.
މިހާތަނަށް ބޭއްވި ރިޔާސީ އިންތިހާބުތަކުގެ ނަތީޖާ އަށް ބަލާއިރު އެންމެ ގިނަ ވޯޓު ހޯދަނީ ޕީޕީއެމާއި އެމްޑީޕީ އެވެ. ނަމަވެސް މިހާރު އެމްޑީޕީ ދެބައިވެފައި އޮތުމާ ގުޅިގެން މި އަހަރުގެ ރިޔާސީ އިންތިހާބުގައި އެއް ޕާޓީއަކަށް އެންމެ ގިނަ ވޯޓު ލިބޭނެ ކަމަށް ބައެއް ސިޔާސީ ތަޖުރިބާކާރުން ލަފާ ކުރަނީ ޕީޕީއެމަށެވެ.
ޕީޕީއެމް/ޕީއެންސީ އާއި ނަޝީދުގެ ދަ ޑިމޮކްރެޓްސް އާއި ޖުމްހޫރީ ޕާޓީ އަދި އެމްއެންޕީން ގުޅިގެން މަސައްކަތް ކުރަމުން އައި ނަމަވެސް އެ ފަރާތްތައް ރަސްމީކޮށް އުފައްދާފައި ވަނީ ރާއްޖެ-މޮރިޝަސް މައްސަލާގައި "ކަނޑު ވިއްކާލުމާ ދެކޮޅު" މަސައްކަތް ކުރާ ކޯލިޝަނެކެވެ.
އެއީ ސިޔާސީ މަސައްކަތް ކުރާ ކޯލިޝަނެއް ނޫން ކަމަށް އެ ޕާޓީތަކުން ބުންޏަސް މި ފަހަކަށް އައިސް މި ސަރުކާރާ ދެކޮޅަށް ގުޅިގެން އެ ޕާޓީތަކުން މަޝްވަރާ ކުރަމުން އަންނަ ވާހަކަ ޓުވިޓާ އާއި އެކި ތަންތަނުގައި އަންނަނީ ދައްކަމުންނެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
ލިރާރު ބިން ޖަގިޔާ
23 May 2023
އެންޑީޕީން ކަނޑާލިކަމަށް އެބުނާ 39 ހާސް މެމްބަރުންނާ، ޕްރައިމަރީގަ ނަޝީދާސް ވޯޓްދިން އެންމެންގެ ވޯޓް ލިބޭނެކަމަށް ބަލަމާ. ހީވަނީ ފުރަތަމަބުރުން ނަގާނެހެން. އަދަމް ޝަރީފްގެ ހިސާބުޖެހުން ގޯސް. ޕީޕީއެމަށް ޗާންސެއް ނެތް.
20237474774
23 May 2023
ކެނޑިޑޭޓާއިއެކު ކެންޕެއިން ޖައްސަނީ ކޮން އިރަކުތޯ؟
ތަމަޅަ
23 May 2023
ނަޝީދު ފޭވީމާ އިބޫއަށް އިތުރަށް ލިބޭނެ ވޯޓްތަކެއްވެސް ހުންނާނެ. އެބައި ގިނަވުމަކީވެސް ވެދާނެކަމެއް . އެހެންވެއްޖެނަމަ ޝަރީފުމެން ދާނީ ޗޮކުން
އީސީ
23 May 2023
ރިޔާސީ އިންތިހާބުގެ އަންދާސީ: އިބޫ 255000 ނަޝީދު5000 ގާސިމު3500 ޕީޕީއެމ125 އުމަރު50
ރައްޔިތުންގެ ނިންމުން ބޭނުންވަނީ
23 May 2023
"ސިޔާސީ ހުރިހާ ޕާޓީއެއް އޮތީ މިހާރުގެ ވެރިކަން ބަދަލު ކުރުމަށް އެއްބަސްވެގެން ކަމަށާއި..." ވެރިކަމެއް ބަދަލުވުމައް އަދި ދެމެހެއްޓުމައްވެސް ބޭނުންވަނީ ވަކިޕާޓިއެއްގެ ތާއީދެއްނޫން ރައްޔިތުންގެ ތާއީދު.
ރަކަރަކަ
23 May 2023
މަރުމޯލު! މިދެން ތަސައްރަފު ފުދިފަތިބި ފިރިހެނުން ދައްކާކަހަލަ ވާހަކަ؟
ޢަލީ ކުރުސީ
23 May 2023
ޕޕޕ ކުދިންނަށް ވޯޓުން އެއްޗެއް ނުވާނެކަން އެނގުނީދޯ؟ ކޮބާ ޔާމީނު އެއްބުރުން ނަގާ ވާހަކަ މިހާރު. މުޅި ޕާޓީ ޚަރާބު ކޮށްލަނީ ޔާމީނު ސަލާމަތް ކުރެވޭތޯ! މިހާރު އަންނިއަށް ސަނާކިޔަން ޖެހުނީ! މަޑިސީލަ ކުދިން ލަދެއް ނުގަނޭ؟ ކޮބާ ހަދައިގެން ގެނެސްދިން ވީޑިއޯ ތަކާ ލަވަތަށް؟އަދި ބުނާނެ އަންނިއަށް ވެރިކަން ލިބުނަސް އެއީ ރަގަޅެކޭ!
ޥެލްޖް
23 May 2023
މަރުހަބާ . ޕީޕީއެމް - ދަ ޑިމޮކްރޭޓްސް 2023
އައްދުބެ
23 May 2023
ގާސިމަށްވުރެ ގިނަ ވޯޓް "ދަ ޑިމޮކްރެޓްސް" އިން ނަގާނެ. ސަބަބަކީ ރަޢީސް ނަޝިދުގެ ސަޕޯޓަރުން މާގިނަވާނެ ޤާސިމުގެ ސަޕޯޓަރުންނަށްވުރެ. ގާސިމު ކައިރީގަ ތިބޭ މުސާރަވެރިން ގާސިމު ހައްދައިގެން އުޅެގެން ދާނީ ފުލަށް. އެކެއް ދޭތް ތިނެއްގަ އުޅޭނީ އެމްޑީޕީ، ޕީޕީއެމް، ދަ ޑިމޮކްރެޓްސް. ޖުމްހޫރީ ޕާޓީ ދާނީ ހަތަރު ވަނައަށް. ދެވަނަ ބުރުގަ ޕީޕީއެމް އާއި ދަ ޑިމޮކްރެޓްސް ކޯލިޝަން ހަދައިގެން 2023 ގަ ރައީސްކަމުގެ ހުވާކުރާނީ
އަލީހަމީދު
23 May 2023
ހިޔެއްނުވޭ ދަ ރެޓްސް އަށް ގާސިމަށްވުރެ ކުރި ހޯދިދާނެހެނެއް. ނަޝީދުގެ ތަރި އޮއްސިއްޖެ.
ބޮޑުރިޔާ
23 May 2023
މިމީހުން ރީތި ހުވަފެންވސް ދެކެޔޭ ދެއްތޯ