ބާރު ސްޕީޑުގައި ވެހިކަލް ދުއްވާ މީހުންނަށް ހަރުކަށި ފިޔަވަޅު އަޅަން ގާނޫނަށް ބަދަލު ގެންނަން ރައީސް އަންގައިފި

ބާރު ސްޕީޑުގައި ވެހިކަލް ދުއްވާ މީހުންނަށް ހަރުކަށި ފިޔަވަޅުތައް އެޅުމަށް ގާނޫނުތަކާއި ގަވައިދުތަކަށް ގެންނަންޖެހޭ ބަދަލުތައް ގެނެސް ތަންފީޒު ކުރަން ފެށުމަށް ރައީސް ޑރ. މުހައްމަދު މުއިއްޒު ކަމާ ގުޅޭ އިދާރާތަކަށް އަންގަވައިފި އެވެ.

ރައީސް އެގޮތަށް އެންގެވީ ރޭގެ މެންދަމުގެ ވަގުތެއްގައި ބާރު ސްޕީޑުގައި ދުއްވި ސްޕޯޓްސް ކާރަކާއި ސައިކަލެއް ޖެހި ހިނގި ނުރައްކާތެރި އެކްސިޑެންޓުގައި ޒުވާނަކު ނިޔާވެފައިވަނިކޮށެވެ.

ރޭ މެންދަމު ތިނެއް ޖަހަން އުޅެނިކޮށް ހުޅުމާލޭގެ ސެންޓްރަލް ޕާކު ސަރައްދުން އުރީދޫގެ ހެޑް އޮފީހާ ދިމާލުން ހިނގި އެކްސިޑެންޓުގައި ނިޔާބީ ލ. އިސްދު އަށް އުފަން ހަސަން ސަމާހު އެވެ. މޯލްޑިވްސް ކަރެކްޝަނަލް ސާވިސްގައި މަސައްކަތްކުރާ އުމުރުން 23 އަހަރުގެ އެ ޒުވާނާ އެ ގަޑީގައި މަގުމަތީގައި އުޅުނީ ޓީއެފްޖީން ރޭ ދަންވަރު ބޭއްވި މެރަތަން ނުވަތަ ދުވުމުގައި ބައިވެރިވުމަށެވެ. އެކަމަކު، އެ ދުވުމުގެ ކުރިން ހިނގި އެކްސިޑެންޓުގައި ސަމާހު ނިޔާވީ އެވެ.

މި އެކްސިޑެންޓު ހިނގިއިރު ސްޕޯޓްސް ކާރު ދުއްވަން އިނީ ސ. ހިތަދޫ ވައިލެޓްފެހި މުހައްމަދު ވިސާމް ސިދުގީ އެވެ. އުމުރުން 29 އަހަރުގެ އެ ޒުވާނާ ރޭ ވަނީ ހައްޔަރުކޮށްފަ އެވެ.

އެކްސިޑެންޓުގައި ނިޔާވި ސަމާހުގެ އާއިލާ އަށް ތައުޒިޔާ ފޮނުއްވައި ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ އެއްވެސް ރަށެއްގައި އެއްވެސް ވަގުތަކު ބާރު ސްޕީޑުގައި ވެހިކަލް ދުއްވާ މީހުންނާ މެދު ހަރުކަށި ފިޔަވަޅުތައް އެޅުމަށް އަންގަވާފައިވާ ކަމަށެވެ.

"ރާއްޖޭގެ އެއްވެސް ރަށެއްގައި، އެއްވެސް ވަގުތަކު ބާރު ސްޕީޑުގައި ވެހިކަލް ދުއްވާ ފަރާތްތަކާ މެދު ހަރުކަށި ފިޔަވަޅުތައް އެޅުމަށް ގާނޫނުތަކާއި ގަވާއިދުތަކަށް ގެންނަންޖެހޭ ބަދަލުތައް ގެނެސް، އެކަންކަން ތަންފީޒުކުރަން ފަށަން ސަރުކާރުގެ ކަމާ ގުޅުން ހުރި އިދާރާތަކަށް މިހާރު ވާނީ އަންގާފައި،" ރައީސް ވިދާޅުވި އެވެ.

އެ މަނިކުފާނު ވިދާޅުވީ އެފަދަ ނުރައްކާތެރި ހާދިސާތައް ހުއްޓުވުމަށް އެންމެންގެ އެއްބާރުލުން ބޭނުންވާ ކަމަށެވެ. އަދި ނުރައްކާތެރިކޮށް ބާރަށް އުޅަނދު ދުއްވުން ހުއްޓުވައި މާލެ އާއި ރާއްޖޭގެ އެހެން ރަށްރަށުގެ މަގުތަކަކީ ވެސް އެންމެނަށް އަމާންކަމާ އެކު، ބޭނުންކުރެވޭނެ ތަންތަނަށް ހެދުމަށް ސަރުކާރުން ކުރަންޖެހޭ ކަންކަން ކުރައްވާނެ ކަމަށް ރައީސް ވިދާޅުވި އެވެ.

ރޭގެ އެކްސިޑެންޓުގެ ރިޕޯޓް ފުލުހުންނަށް ލިބުނީ ރޭގެ މެންދަމު 2:48 ގައި ކަމަށް ފުލުހުން ވަނީ ބުނެފަ އެވެ.

އެކްސިޑެންޓުގައި ސަމާނު ނިޔާވީ ހުޅުމާލެ ހޮސްޕިޓަލަށް ގެންގޮސް ފަރުވާދެނިކޮށް ކުޑައިރުކޮޅެއްގެ ތެރޭގަ އެވެ. އެކްސިޑެންޓް ހިނގީ ޓީއެފްޖީގެ މެރަތަން އޮންނަ ސަރަަހައްދަށް ސައިކަލުގައި ބައެއް ރައްޓެހިން ގެންގޮސްދިން ފަހުންނެވެ.

ހަފްތާ ބަންދުގައި ހުޅުމާލޭގައި ސްޕޯޓްސް ކާރުތަކުގެ އުނދަގޫ އިންތިހާއަށް ބޮޑުވެފައިވާ ދަނޑިވަޅެއްގައި މި އެކްސިޑެންޓު ހިނގިއިރު މިތަނުގައި މީގެ ކުރިން ވެސް އެފަދަ އެކްސިޑެންޓެއް ހިނގި އެވެ. ބާރަށް ދުއްވި ކާރަކުން ސައިކަލެއްގައި ޖެހި މީގެ ކުރިން ވެސް އެތަނުގައި މީހަކު މަރުވި އެވެ. އަދި މިފަހުން ވަނީ ހުޅުމާލޭ 2 ގައި ވެސް ސްޕޯޓްސް ކާރަކުން ޖެހި ސައިކަލެއްގައި އިން މީހަކަށް ވަރަށް ބޮޑަަށް އަނިޔާވެފަ އެވެ.