އައިސީޖޭގައި އޮތް އިޒްރޭލްގެ މައްސަލަ އަށް ރާއްޖެ އިން ތަދައްޚުލުވާން ހުށަހަޅައިފި

އިޒްރޭލުން ފަލަސްތީނުގައި ހިންގަމުން ދަނީ ނަސްލު ނައްތާލުމުގެ އަމަލުތަކެއް ކަމަށް ބުނެ ސައުތު އެފްރިކާ އިން އިންޓަނޭޝަނަލް ކޯޓު އޮފް ޖަސްޓިސް (އައިސީޖޭ) އަށް ހުށަހަޅާފައިވާ މައްސަލަ އަށް ރާއްޖެ އިން ތަދައްޚުލުވާން ހުށަހަޅަން ޖެހޭ "ޑެކްލެރޭޝަން އޮފް އިންޓަވެންޝަން" މިއަދު ހުށަހަޅައިފި އެވެ.

އެޓާނީ ޖެނަރަލްގެ އޮފީހުން ނެރުނު ބަޔާނެއްގައި ބުނީ، އެ މައްސަލާގައި ތަދައްޚުލުވާން ހުށަހަޅަންޖެހޭ ލިޔުން، އެޓާނީ ޖެނަރަލް އަހުމަދު އުޝާމް މިއަދު ހުށަހަޅުއްވާފައިވާ ކަމަށެވެ.

އެއީ ދެކުނު އެފްރިކާގެ ފަރާތުން މިދިޔަ އަހަރުގެ ޑިސެމްބަރު 29 ގައި އައިސީޖޭ އަށް ހުށަހެޅި މައްސަލައެކެވެ.

ދެކުނު އެފްރިކާ އިން ހުށަހެޅީ އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ޣައްޒާގައި ހިންގަމުންދާ ލާއިންސާނީ އަމަލުތަކަކީ 1948 ވަނަ އަހަރުގެ ކޮންވެންޝަން އޮފް ދަ ޕްރިވެންްޝަން އެންޑް ޕަނިޝްމަންޓް އޮފް ދަ ކްރައިމް އޮފް ޖެނޮސައިޑް (ޖެނޮސައިޑް ކޮންވެންޝަން) އާ ހިލާފު އަމަލުތަކެއް ކަމަށެވެ.

އެހެންވެ މިއަދު ރާއްޖެ އިން ހުށަހެޅި އިންޓަވެންޝަން ބިނާވެފައި ވަނީ ޖެނޮސައިޑް ކޮންވެންޝަންގެ ދަށުން "އިންސައިޓްމަންޓް ޓު ކޮމިޓް ޖެނޮސައިޑް" އަދި "ޑިއުޓީ ޓު ޕަނިޝް ދަ އިންސައިޓްމަންޓް އޮފް ޖެނޮސައިޑް" މާނަކޮށްފައިވާ ގޮތާ ގުޅޭ ގޮތުން ކަމަށް އޭޖީ އޮފީހުން ބުނެ އެވެ.

އިންޓަނޭޝަނަލް އެއިޑް ކެމްޕޭން (އައިއޭސީ) އިން އިންތިޒާމު ކޮށްގެން "ދިވެހިން ފަލަސްތީނާއެކު" ނަމުގައި ބޭއްވި ބޮޑު އެއްވުމުގައި ގިނަ ބަޔަކު ބައިވެރިވަނީ -- ފޮޓޯ: ފަޔާޒު މޫސާ | މިހާރު

ބަންޑާރަ ނައިބުގެ އޮފީހުން ބުނީ އިޒްރޭލުން ހިންގަމުންދާ އަމަލުތައް ކުށްވެރިކޮށް، އެއީ ޖެނޮސައިޑް އަދި އެޕާތައިޑްގެ އަމަލުތަކެއް ކަމާއި އެއީ ބައިނަލްއަގްވާމީ ގާނޫނުތަކާ ވެސް ހިލާފު ޖަރީމާތަކެއް ކަމަށް ދިވެހި ސަރުކާރުން އަންނަނީ ބައިނަލްއަގްވާމީ އެހެން މައިދާންތަކުގައި ވަކާލާތުކުރަމުން ކަމަށެވެ.

މި ފަހުން އޮތް އދ. ގެ އާންމު މަޖިލީހުގެ 79 ވަނަ ސެޝަންގައި ރައީސް ޑރ. މުހައްމަދު މުއިއްޒު ވެސް ވަނީ ޣައްޒާގައި އިޒްރޭލުން ހިންގަމުންދަނީ ނަސްލު ނައްތާލުމުގެ ގަތުލުއާމެއް ކަމާއި އެކަންކަމަށް އިޒްރޭލު ޖަވާބުދާރީ ކުރުވަންޖެހޭ ކަމަށް ވިދާޅުވެފަ އެވެ.

އިޒްރޭލުގެ އެ އަމަލުތައް ހުއްޓާލުމަށް ދިވެހި ސަރުކާރުން ތަކުރާރުކޮށް ގޮވާލަމުން އަންނައިރު 1967 ވަނަ އަހަރުގެ ބޯޑަރާ އެއްގޮތަށް މިނިވަން ދައުލަތެއް ހޯދުމަށް ފަލަސްތީނުގެ ރައްޔިތުންގެ ކުރަމުންދާ މަސައްކަތުގައި ފުރިހަމައަށް ރާއްޖޭން އެއްބާރުލުން ދޭނެ ކަމަށް ދިވެހި ސަރުކާރުން ބުނެފައި ވެ އެވެ.

މިދިޔަ އަހަރުގެ އޮކްޓޯބަރު 7 ގައި ހަމާސް އިން އިޒްރޭލަށް ހަމަލާދީ ހާހަކަށް ވުރެ ގިނަ މީހުން މަރާލައި 250 މީހަކު ރަހީނު ކުރުމުން، ހަމާސް ނައްތާލަން ކަމަށް ބުނެ އިޒްރޭލުން ދޭން ފެށި ހަމަލާތަކުގައި ފަލަސްތީނުގެ 40،000 އަށް ވުރެ މީހަކު ވަނީ މިހާތަނަށް ޝަހީދު ކޮށްލައިފަ އެވެ.

އެ ހަމަލާތަކާ ދެކޮޅަށް ސައުތު އެފްރިކާ އިން އައިސީޖޭއާ ދެކޮޅަށް ހުށަހެޅި މައްސަލާގައި ހަމަލާތައް ހުއްޓާލުމަށް އަންގައި ވަގުތީ އަމުރެއް ނެރުނެވެ. ނަމަވެސް، މިހާތަނަށް އިޒްރޭލުން އެ ހަމަލާތައް ހުއްޓާލާފައި ނުވާއިރު، އެމެރިކާގެ އިންޒާރާ އެކު ވެސް ހަމަލާތައް ހުއްޓާނުލާނެ ކަމަށް އިޒްރޭލުން ވަނީ ބުނެފަ އެވެ.