ފުލުހުންތަކެއް ޑިއުޓީގައި: ފުލުހުންގެ ބޮޑުކުރި އެލަވަންސް ނުދޭ މައްސަލަ ރިޔާޒު ވަނީ ރައްޔިތުންގެ މަޖިލީހުގެ މާލިއްޔަތު ކޮމެޓީގެ ސަމާލުކަމަށް ވެސް ގެނެސްފައި.
19 މާޗް 2017 - 11:11
15 comments
ފުލުހުންގެ މުސާރަ އާއި އިނާޔަތްތައް ބޮޑުކުރަން ނިންމުމަށް ފަހު ވެސް ކުރީގެ މުސާރަ ދެމުން އަންނަ މައްސަލާގައި ފިނޭންސް މިނިސްޓަރު އަހްމަދު މުނައްވަރާ ސުވާލުކުރެއްވުމަށް ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު އަދި ކުރީގެ ޕޮލިސް ކޮމިޝަނަރު އަބްދުﷲ ރިޔާޒް ހުށަހަޅުއްވައިފި އެވެ.
ރިޔާޒު އެދިވަޑައިގެންފައި ވަނީ، ފުލުހުންނަށް ލިބެމުންދާ އެލަވަންސް ބޮޑުކުރަން ނިންމުމަށް ފަހު އެއަށް އަމަލުނުކުރަނީ ކީއްވެގެންތޯ ސާފުކޮށްދިނުމަށެވެ. ފުލުހުންގެ އެލަވަންސްގެ މައްސަލަ އޭނާ ވަނީ ރައްޔިތުންގެ މަޖިލީހުގެ މާލިއްޔަތު ކޮމެޓީގެ ސަމާލުކަމަށް ވެސް ގެނެސްފަ އެވެ.
މިދިޔަ ޖެނުއަރީ މަހުން ފެށިގެން ފުލުހުންގެ މުސާރަ އާއި އިނާޔަތްތައް ބޮޑުކުރަން ނިންމައި، ފިނޭންސް މިނިސްޓްރީ އަށް ފޮނުވި ނަމަވެސް އެ މިނިސްޓްރީން އެންގީ މުސާރަ ބޮޑުކުރެވޭނީ ކަމާބެހޭ އިދާރާތަކުގައި މަޝްވަރާ ކުރުމަށް ފަހުގައި ކަމަށެވެ. އެހެންވެ ވޭތުވެދިޔަ ދެ މަހު ވެސް ފުލުހުންނަށް ޖަމާކުރީ ކުރީގެ އޮނިގަނޑުގެ ދަށުން އޮންނަ މުސާރަ އެވެ.
މިއަހަރުގެ ދައުލަތުގެ ބަޖެޓް ފާސް ކުރިއިރު ވެސް ފުލުހުންގެ ބަޖެޓަށް ވަނީ 230 މިލިއަނަށް ވުރެ ބޮޑު އަދަދެއް އިތުރުކޮށްފަ އެވެ.
ފުލުހުންގެ މުސާރައިގެ އޮނިގަނޑަށް ހުށަހަޅާފައިވާ އާ ބަދަލާ އެކު ކޮންމެ ފުލުހަކަށް ވެސް ލިވިން އެލަވަންސް ލިބޭނެ އެވެ. މި އެލެވަންސް ކުރިން ދެމުން އައީ މާލޭގައި ކުއްޔަށް އުޅޭ ފުލުހުން އަމިއްލައަށް ހުށަހެޅުމުން އެ މީހެއްގެ ހާލަތަށް ބެލުމަށް ފަހު އެވެ. އެ ގޮތުން، ލިވިން އެލަވަންސަށް 2،500 ރުފިޔާ ލިބެ އެވެ. އެކަމަކު، އާ އޮނިގަނޑުގެ ދަށުން ކޮންމެ ފުލުހަކަށް ވެސް ލިވިން އެލަވަންސް ގޮތުގައި 4،000ރ ލިބޭނެ އެވެ. އެހެންވެ، އެންމެ އާދައިގެ ފުލުހެއްގެ މުސާރަ އަށް ވެސް ގާތްގަނޑަކަށް 4،000 އެއްހާ ރުފިޔާ އިތުރުވާނެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަލީ
19 March 2017
އެލަވަންސް ދޭކައް ނުޖެހޭ މިހާރު ކުރާނެ މާބޮޑުކަމެއް ނޯވޭ މުޒާހަރާއެއް ވެސް ނުކުރޭ ހަރުގެޔައްވަދެ އެތާހުންނަ މުދާކޮޅު ފޭރުން ފިޔަވާ
ނިއްޓު
19 March 2017
ތިޔަބުނާ މަޖިލީހުން ހަމަ ތިރިވިއުކުރީވެސް، ތިފާސްކުރީވެސް. ދެން އިތުރަށް ބަލަންޖެހޭ ކަމެެެއް އޮތުންތީ ހަމަ ޖޯކެއް.
އަބްދުއްލާ އަލީ
19 March 2017
ދަވްލަތުން ކުރާ ހަރަދު ތަކަކީ ބަޖެޓް ކޮށްގެން މަޖިލީހުން ފާސްކުރެވިގެން ހިގާކަންކަން ، މުސާރަ ނުވަތަ އިނާޔަތް ބޮޑު ކުރެވޭނީ މުސާރަ ނުވަތަ އިނާޔަތް ބޮޑުކުރުމުގެ ކުރިން ފިނޭންސަށް ހުށަހަޅާ ފިނޭންސް އިން އާއެކޭ ބުނުމަށްފަހު. އެނޫންގޮތަކަށް ބޮޑުކުރެވޭ މުސާރައާއިނާޔަތަށް ފިނޭންސުން ދޭކަށް ނުޖެހޭނެ. ސަބަބަކީ އާމްދަނީ އާ ހަރަދު މެނޭޖް ކުރަނީ ފިނޭންސުން ކަމުގައިވާތީ ހަރަދު މެނޭޖް ކުރަން އެގޭނީ ފިނޭންސަށްވުމުން. ދެކޮޅުނުޖެހޭ ގޮތަސް އެކަން ކުރެވެން ނޯންނާތީ
ދިވެހިމީހާ
19 March 2017
ފުލުހުންގެ މުސާރަ އިތުރުކުރަމަށް ބަޖެޓްގައި ވަނީ ފައިސާ ހިމަނާފަ، އަދި ފުލުހުންގެ މުސާރައާއި އެލަވަންސްގެ ގެނައިބަދަލުތަގުގެ އޯޑަރު ވަނީ ފާސްކޮށްފަ.
ސަލީމްޢަލީ
19 March 2017
ވާނުވާ ނޭންގި ކޮމެންޓް ނުކޮށްބަލަ. ފުލުހުންގެ މުސާރަ ބޮޑުކުރަން ކުރަންޖެހޭ ހުރިހާ ދިރާސާއެއްކޮށް ރައްޔިތުންގެ މަޖިލީހުން ބަޖެޓް ފާސްކޮށްފައި އޮތީ. ދެން އަނެއްކާ އަލުން ފިނޭސްއަށް ހުށަހަޅަންޖެހޭ ސަބަބެއް ނެތް.
ކުރިކީލަ
19 March 2017
އަސްލު ބުނަންތަ. ފުލުހުން ކުރާ މަސައްކަތާ ބަލާއިރު މިހާރު ލިބެނީ މަސައްކަތާއި ނުބައްދަލު ކުޑަ މުސާރައެއް. އެއީ އާދައިގެ ފުލުހަކަށް 10000 ރުފިޔާ. އޭގެ އިތުރުން އާމްދަނީ ހޯދާނެ އިތުރު އެއްވެސް މަސައްކަތެއް ކުރުން އޮންނަނީ މަނާކޮށްފަ. އަމިއްލަ ރަށުގަ ގިނަދުވަހު ވަޒީފާ އަދާކުރުން މަނާ. ކުރިމަތި ލާންޖެހެނީ ރާއްޖޭގަ ތިބި އެންމެ ނުލަފާ މީހުންނާ. ކިރިޔާ ކަމެއް ހިނގާއިރަށް އެންމެ ފުރަތަމަ އެލާރޓްކުރަނީ ފުލުހުން. ދެން އަސްލު ފުލުހުންގެ އެހީތެރިކަމެއް ނެތި ދިވެހި ރައްޔިތުންނަށް ފޮޑިއެއް ވެސް ނުޖެހޭވަރަށް ޒިންމާތައް ބޮލުގަ އަޅުވާފަ އޮންނަނީ. މި ހުރިހާކަމެއް މިހެން ހުރިއިރު ފުލުހުންނަށް އެށީގެންވާ ރަނގަޅު މުސާރައެއް ދޭންޖެހޭނެ ކަމަށް ކޮންމެ މީހަކުވެސް ގަބޫލު ކުރަންޖެހޭނެ. އެހެން މުއައްސަސާ ތަކުންވެސް އެބައެއްގެ މުސާރަ ކުޑަކަމަށް ފާހަގަ ކުރެވޭނަމަ ހަމަ ބޮޑު ކުރަން މަސައްކަތް ކުރުން އެއީ ރަނގަޅު ގޮތަކީ. ބައެއްގެ މަސައްކަތުން ރައްޔިތުންގެ މަޖިލީހުންވެސް ބަޖެޓް ފާސްވީމަ މުސާރަ ނުދީ ހިފެހެއްޓުން އަސްލު ގޯސް.
ޗިކުސް
19 March 2017
އަސްލު ވަޒީފާގެ ގަޑީގަޔާ އެހެނިހެން ގަނޑިތަކުގަ ކަމެއް ނެތިފަ އެބުރުންވެސް ގިނަ ، މި ވާހަކަވެސް ބުނެލިނަމަ ސަޅިވީސް.
ހުސެންވަހީދު
19 March 2017
ރިޔާޒަކީ ފުލުހުންގެ ފަރާތުން މަޖިލީހަށް ކަނޑައަޅާފައި ހުރި މެންބަރުތޯ؟
ލަބީދު
19 March 2017
އަޒުމް ކީ ވެއްޓުނީ
ކެޔޮޅު
19 March 2017
މި ރިޔާޒު ފުލުހުންގެ ބޮޑަކަށް ހުރިއިރު އެލެވެސް ބޮޑު ނުކޮށްދީ މިހާރު ފުލުހުންނަށް މާ ހެޔޮ އެދިގެން މި އުޅެނީ ކޮންމެވެސް ސިޔާސީ ފައިދާޔެއް ނަގަން
ފީކަޅާއިބްރާހިމްފުޅު
19 March 2017
ރިޔާޒް ހުރި އިރުގައި ހުރިހާގޮތަކުންވެސް ޕޮލިސްއަށް ކުރި އެރުންތަށް އައި. ރިޔާޒަކީ ވަރަށް ހިންގުންތެރި ވެރިއެއް.
ޑރ ޑްރީމްސް
19 March 2017
އާދައިގެ ނިކަމެތި ސިވިލް ސާވަންޓުންގެ މުސާރައިގެ ވާހަކަ ދައްކާނެ މީހަކު ނެތް ބާ؟
Kekeke
19 March 2017
ސިވިލް ސާވަންޓުންނަށް މިހާރު ކުރާ މަސައްކަތާ ބަލާފަ ލިބޭ ވަރަށް ވެސް ޝުކުރުކުރަން ޖެހޭ. ފުލުހުންނަކީ ރޭގަނޑެއް ދުވާލެއް ވިއްސާރައެއް އަތްވެއް ހުކުރެއް ހޮނިހިރެއް އޮންނަ ބައެއް ނޫން.
ގަމާރު
19 March 2017
ތިޔަ މީހުންނަށް ބޮޑު ކުރަންޔާ ، ޓިޗަރުންނަށް ވެސް ބޮޑުކުރަންވާނެ ، އެމީހުންނަކީވެސް ރޭގަނޑެއް ދުވާލެއް ވިއްސާރައެއް އަތްވެއް ހުކުރެއް ހޮނިހިރެއް އޮންނަ ބައެއް ނޫން.ދުވަސް ނިމިގެންދާ އިރު މަސައްކަތް ނިމޭ ބަޔެއް ނޫން ، ޑިލްކުރަނީ ވެސް އެންމެ ނޯރޓީ ކުދިންނާ ، ތިމީހުންނަށް މުސާރަ ބޮޑުވުމަށް ވުރެ އައުލާތްކަން ބޮޑީ ޓީޗަރުންގެ މުސާރަ ބޮޑުކުރުމަށް މިހާރުން މިހާރަށް ގޮވާލަން.
ޖަމަލޭ
19 March 2017
ނުވާނެ ކަމެއް ތީ!!