ވަޔާއި ކަނޑުތައް ވަރަށް ގަދަ، ތިންވަނަ ފަހަރަށް މިއަދު ވައިޓް އެލާޓް ނެރެފި!

ރާއްޖޭގެ ބޮޑު ސަރަހައްދަކަށް ވައިގަދަވެ، ކަނޑުތައް ވެސް ވަރަށް ގަދަވާނެ ކަމަށް ލަފާކޮށް ތިންވަނަ ފަހަރަށް މެޓް އޮފީހުން މިއަދު ވައިޓް އެލާޓް ނެރެފި އެވެ.

މޫސުމާ ބެހޭ އިދާރާ، މެޓް އޮފީހުން ދެންމެ ނެރުނު ވައިޓް އެލާޓްގައި ބުނީ ހއ. އަތޮޅުން ފެށިގެން ތ. އަތޮޅަށް، މިރޭ 7:45 އާ ހަމައަށް ގަޑިއަކު 19 މޭލާއި 24 މޭލުގެ ބާރުމިނުގައި ވައި ޖެހި، ކަނޑުތައް ވެސް ގަދަވާނެ ކަމަށް ލަފާކުރެވޭ ކަމަށެވެ. އަދި ވިލާގަނޑުގައި ގަޑިއަކު 45 މޭލަށް ވައިގަދަވުން އެކަށީގެންވާ ކަމަށް އެ އޮފީހުން ބުންޏެވެ.

ވައިގަދަވެ، ކަނޑުތައް ވެސް ގަދަވާނެ ކަމަށް ލަފާކޮށް މެޓް އޮފީހުން މިއަދު އެންމެ ފުރަތަމަ ވައިޓް އެލާޓް ނެރުނީ ރޭ މެންދަމު 2:00 އިން ހެނދުނު 8:00 އަށެވެ. އަދި ހެނދުނު 9:45 އިން މެންދުރު ފަހު 1:45 އަށް ވެސް ވައިޓް އެލާޓް ނެރުނެވެ.

މުޅި ރާއްޖެއަށް ކުރިއަށް އޮތް ތިން ދުވަހު ވެސް ވައިގަދަވެ، ކަނޑުތައް ގަދަވާނެ ކަމަށް މެޓް އޮފީހުން އިއްޔެ ވަނީ ލަފާކޮށްފަ އެވެ.

"މަޑުވާން ފަށާނެ ކަމަށް އަދި ބެލެވެނީ އަންނަ ބުރާސްފަތި ދުވަހުން ފެށިގެން،" މެޓް އޮފީހުގެ އޮފިޝަލަކު "މިހާރު"އަށް އިއްޔެ ވިދާޅުވި އެވެ.

ރާއްޖެއަށް މިހާރު މި ކުރަނީ ހުޅަނގު މޫސުމުގެ ވިއްސާރަ އެވެ.

މިއީ ކަނޑުގަދަ ދުވަސްވަރަކަށް ވާތީ، ކަނޑުދަތުރުކުރާ ފަރާތްތަކުން މޫސުމަށް ހާއްސަ ސަމާލުކަމެއް ދިނުމަށް ކަމާބެހޭ އިދާރާތަކުން ވަނީ އިލްތިމާސްކޮށްފަ އެވެ.