އެމެރިކާގެ ރައީސް ޓްރަމްޕާއި ތުރުކީގެ ރައީސް އުރުދުޣާން.
18 އެޕްރީލް 2017 - 13:15
5 comments
ވޮޝިންޓަން (އެޕްރީލް 18) - ތުރުކީގެ ރައީސް އަށް އާދަޔާޚިލާފު ބާރުތައް ލިބޭ ގޮތަށް އެ ގައުމުގެ ގާނޫނު އަސާސީ އަށް ގެންނަން ހުށަހަޅާ އިސްލާހުތަކަށް ރައްޔިތުން ރުހުން ދިނުމާ ގުޅިގެން ތުރުކީގެ ރައީސް ރަޖަބު ތައްޔިބު އުރުދުޣާން އަށް އެމެރިކާގެ ރައީސް ޑޮނަލްޑް ޓްރަމްޕް މަރުހަބާ ވިދާޅުވެއްޖެ އެވެ.
ތުރުކީގެ ވޯޓު ދިޔައީ އިންސާފުން ނޫން ކަމަށް ބައިނަލްއަގުވާމީ މޮނިޓަރުން ބުނަމުން ދަނިކޮށް އުރުދުޣާން އަށް ފޯނު ކުރައްވާ ޓްރަމްޕް މަރުހަބާ ވިދާޅުވުމުން ބައެއް މީހުންގެ ޚިޔާލު ވަނީ ތަފާތުވެފަ އެވެ.
ވައިޓް ހައުސްގެ އޮފިޝަލަކު ވިދާޅުވީ ދެ ލީޑަރުން ވަނީ ސީރިއާގެ ވައިގެ މަރުކަޒަކަށް އެމެރިކާ އިން މި މަހު 7 ވަނަ ދުވަހު ދިން މިސައިލް ހަމަލާއާ ގުޅޭ ގޮތުން ވެސް މަޝްވަރާ ކުރައްވައިފައި ކަމަށެވެ. އަދި އައިއެސްއާ ދެކޮޅަށް ކުރާ ހަނގުރާމައާ ގުޅޭ ގޮތުން ވެސް ވަނީ ޚިޔާލު ބަދަލު ކުރައްވާފައި ކަމަށް ވައިޓް ހައުސް އިން ވަނީ ބުނެފަ އެވެ. އުރުދުޣާން އާއި ޓްރަމްޕް އެންމެ ފަހުން މަޝްވަރާ ކުރައްވާފައި ވަނީ ފެބްރުއަރީ މަހު އެވެ.
ތުރުކީގެ ވޯޓާ ގުޅޭ ގޮތުން ސްޓޭޓް ޑިޕާޓްމަންޓުން ކުރިން ނެރުނު ބަޔާނެއްގައި ވަނީ ތުރުކީގެ ރައްޔިތުންގެ އަސާސީ ހައްގުތައް ރައްކާތެރިވެފައިވާ ތަން ދެކެން ބޭނުންވާ ކަމަށް ބުނެފަ އެވެ.
ތުރުކީގެ ވޯޓު މޮނިޓާ ކުރި ބައިނަލްއަގުވާމީ އޮބްޒާވަރުން ބުނެފައި ވަނީ ވޯޓުގައި ކަންކަން ކޮށްފައި ވަނީ އުރުދުޣާންގެ ކޭމްޕަށް ފަހިވާ ގޮތަށް ކަމަށެވެ. އޮގަނައިޒޭޝަން ފޯ ސެކިއުރިޓީ އެންޑް ކޯޕަރޭޝަން އިން ޔޫރަޕް (އޯއެސްސީއީ) އާއި ކައުންސިލް އޮފް ޔޫރަޕް އިން ބުނެފައި ވަނީ ކެމްޕޭން ކުރުމަށް ދެ ފަރާތަށް ހަމަހަމަ ފުރުސަތު ދީފައި ނުވާ ކަމަށެވެ. ރައީސް އާއި ސަރުކާރުގެ އިސް އޮފިޝަލުން ވޯޓަށް ނުފޫޒު ފޯރުވަން މަސައްކަތްކޮށް އަދި ސަރުކާރުގެ ރިސޯސްތައް ވެސް ނަހަމަ ގޮތުގައި ބޭނުންކޮށްފައިވާ ކަމަށް މޮނިޓަރުން ވަނީ ބުނެފަ އެވެ. މީގެ އިތުރުން ތުރުކީގައި ކުއްލި ހާލަތު އިއުލާންކޮށްފައިވާތީ އަސާސީ އެތައް ހައްގެއް ހިފަހައްޓާފައިވާ ކަމަށް ވެސް ވަނީ ބުނެފަ އެވެ. ސްޓޭމްޕް ނުޖަހާ ވޯޓު ކަރުދާސް ވެސް ސައްހަ ވާނެ ކަމަށް ތުރުކީގެ އިލެކްޝަން ބޯޑުން އެންމެ ފަހު ވަގުތު ނިންމުމުން ވެސް ގިނަ ބައެއްގެ ފާޑު ކިޔުން ވަނީ އަމާޒުވެފަ އެވެ.
ޖުމްހޫރިއްޔަތަކަށް ތުރުކީ ބަދަލުވި ފަހުން ތުުރުކީގެ ގާނޫނު އަސާސީ އަށް ގެނައި އެންމެ ބޮޑު ބަދަލަށް ރައްޔިތުންގެ ފެންނަން ނުފެންނަ ވޯޓުގައި ބަދަލުތަކަށް ރުހޭ ކަމަށް 51.37 ޕަސެންޓް މީހުން ވަނީ ވޯޓު ދީފަ އެވެ. ގާނޫނު އަސާސީ ބަދަލު ކުރަން ދެކޮޅު ކަމަށް ބުނެފައި ވަނީ 48.63 ޕަސެންޓް މީހުންނެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ހުދުމުހުތާރު
19 April 2017
ހުދުމުހުތާރުވެރިން އެކަކު އަނެކަކާ ވަރަށް ގަޔާވާނެ. ޓްރަމްޕް ވަނީ މިސްރުގެ ސިސީއަށްވެސް ވަރަށް ތައުރީފްކޮށްފަ.
އަބްދުއްލާ އަލީ
18 April 2017
އުރުތުގާން ވެސް މިހެދީ ޓްރަމްޕް ވެސް ކުޅުނު ކުޅިގަނޑު އެހެންވެ އަވަހަށް މަރުހަބާކިޔާލީދޯ؟
ރަދީފް އެންޑް ރަފައިދާ
18 April 2017
ޓުރަންޕަށްވެސް މަރުހަބާ. އަދި ރައީސްކަމަށް އެރިފަހުން މަރުހަބާ ނުކިއިގެން މިއުޅެނީ.
ތޭންކިއު
18 April 2017
ކޮބާ އެމެންގެ ރަންރީނދޫ ޓްވިޓަރޭ. ތަމެންނަށް ފެނޭތޭ. މިއީއޭ ނިއު ވޯލްޑް އޯޑަރ އޮންނާނެ ގޮތަކީ. ދެން މަމެން ވެސް މިގައުމުގެ ގާނޫނު އަސާސީ ބަދަލު ކޮޮށްލާނަން މިއަހަރު ފަހުކޮޅު ރާއްޖޭގެ ރިޔާސީ ދައުރަކީ އެއީ 20 އަހަރުގެ އެއް ދައުރު ކަމަށް. އަދި އެކަކަށް ވިދި ވިދިގެން 20 އަހަރުގެ ދެ ދައުުރު ގައި ވެރިކަން ކުރެވޭނެ ކަމަށް. އެއިރުން ގާނޫނު އަސާސީއަށް މިއިސްލާހު މަޖްލީހުން ގެނެސްފިނަމަ ދެން މިހާރު މިހިނގާ 5 އަހަރާއި އެކު މަމެން ޕިންކީން ނަށް އަދި 15 އަހަރު ލިބޭނެ ދޯ ބައި ޑިފޯލްޓް އިން. އެއިރުން ވަރަށް އޯސަމް ވެފައި ބިއުޓިފުލް ވާނެއެވެ. މރ. ޓްރަމްޕް ތޭންކިއު ތޭންކިއު ތޭންކިއު..
ބަލާ މީހެއް
18 April 2017
ބަދަލުކޮށްލުން މައްސަލައެއްނޫން އެއީކީ ؛ އެތަނުގައި އެކަންކުރިގޮތަށް ރައްޔިތުންގެ ރުހުންހޯދަން ވޯޓެއް ލައިގެން އެކަންކުރެއްވީމާ ހަމަ ރަނގަޅުވާނެ : މިޤައުމުން ފެންނަނީ ރައްޔިތުންގެ ރުހުން ހޯދުމަށްވުރެ ބޮޑަށް މިކަމުގައި ރައްޔިތުން ރުޅިއަރުވާގޮތަށް ކަންކަން ހިގާތަން.