ފްލެޓުގެ ބޮޑު މަޝްރޫއު އިފްތިތާހު ކުރުން ހުކުރު ދުވަހުގެ ރެ އަށް ފަސްކޮށްފި

ހުޅުމާލޭން 80،000 މީހުންނަށް ބޯހިޔާވަހިކަން ފޯރުކޮށްދިނުމުގެ މަޝްރޫއު ފެށުމަށް މިރޭ ބޭއްވުމަށް ހަމަޖެއްސި ހަފުލާ އަންނަ ހުކުރު ދުވަހުގެ ރެ އަށް އެކަން ފަސްކޮށްފި އެވެ.

ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ން ބުނީ ހުޅުމާލޭ ފޭސް-2 ގައި ބޭއްވުމަށް ހަމަޖައްސާފައި އޮތް ރަސްމިއްޔާތު ފަސްކުރީ މޫސުން ގޯސްވުމުގެ ސަބަބުން ކަމަށެވެ. އެ ރަސްމިއްޔާތު ފައްޓަވައި ދެއްވުމަށް ހަމަޖައްސާފައި އޮތީ ރައީސް އަބްދުﷲ ޔާމީނެވެ.

މި ރަސްމިއްޔާތުގައި ބައިވެރިވުމަށް އާއްމުކޮށް ހުޅުވާލައި، ގިނަ ބަޔަކަށް ވަނީ ދައުވަތު ފޮނުވައިފަ އެވެ.

80,000 meehunge flat mashroou mirey ifthithaah kuranee

The most trusted news source in the Maldives

Mihaaru

އެޗްޑީސީން ބުނެފައިވާ ގޮތުގައި ހުޅުމާލޭގެ ދެ ވަނަ ފިޔަވަހިން ބޯހިޔާވަހިކަން ދޭ މި މަޝްރޫއަކީ ދިވެހި ރައްޔިތުންނަށް މިހާތަނަށް ދޭ އެންމެ އުފާވެރި ޚަބަރެވެ. އަދި ރާއްޖޭގައި ފަށާ އެންމެ ބިޔަ މި މަޝްރޫއުގެ ދަށުންް، ބޯހިޔާވަހި ކަމަށް ބޭނުންވެފައިވާ ގިނަ ބަޔަކަށް އޭގެ ފުރުސަތު ލިބޭނެ ކަމަށް އެތަނުން ބުންޏެވެ.

އެނގިފައިވާ ގޮތުގައި މި މަޝްރޫއުގެ ދަށުން 14 ބުރީގެ 25 ޓަވަރު އިމާރާތް ކުރުމަށް ވަނީ ހަމަޖެހިފަ އެވެ.

ހުޅުމާލޭގެ ދެވަނަ ފިޔަވަހީގެ ގޮތުގައި 240 ހެކްޓަރުގެ ބިން ހިއްކާފައިވާއިރު، އެތަނުގައި 15،000 ހައުސިން ޔުނިޓު އެޅުމަށް އެޗްޑީސީން ވަނީ ކުރިން ނިންމައިފަ އެވެ. އެކަމަކު 80،000 މީހުންގެ ތެރޭގައި، މި ހައުސިން ޔުނިޓްތައް ދޭ މީހުން ހިމެނޭ ކަމެއް އަދި ނޭނގެ އެވެ.

ސަރުކާރުން އަންނަނީ އެކި އޮފީސްތަކާއި ކުންފުނިތަކުގެ މުވައްޒަފުންނަށް ބޯހިޔާވަހިކަން ދޭނެ ކަމުގެ ޔަގީންކަން ދެމުންނެވެ. އެގޮތުން ފުލުހުންނާއި ސިފައިންނަށް ހާއްސަ ފްލެޓްތައް އަޅަން ފަށާފައިވާއިރު ޑޮކްޓަރުންނާއި ނަރުހުންނަށް ވެސް ފްލެޓް ދޭނެ ކަމަށް ބުނެފައި ވެ އެވެ. އަދި ކަސްޓަމްސް އާއި އިމިގްރޭޝަނާއި މޯލްޑިވްސް އެއާޕޯޓްސް ކޮމްޕެނީ އަދި މޯލްޑިވްސް ނެޝަނަލް ޔުނިވަސިޓީގެ މުވައްޒަފުންނަށް ފްލެޓް ދޭން ނިންމާފައިވާކަން އެނގިފައި ވެ އެވެ.