ރިސޯޓުތަކުން ދެއްކި ކުލި އިތުރުވެ މިދިޔަ މަހުގެ އާމްދަނީ މައްޗަށް

މި އަހަރު ހުޅުވަން ނިންމާފައިވާ ސެއިންޓް ރެޖިސް ވޮށްމުލި ރިސޯޓު: ގިނަ ރިސޯޓުތަކެއް ހުޅުވަމުން އަންނައިރު، އެ ތަންތަނުން ދައްކާ ކުލީގެ މިންވަރު ވެސް ދަނީ އިތުރުވަމުން.

އަލީ ނާފިޒް، މިހާރު

11 އޮކްޓޯބަރ 2016 - 11:26

6 comments

ރިސޯޓުތަކުން ކުލި ދެއްކި މިންވަރު އިތުރުވެ، ޓެކްސްގެ ގޮތުގައި މިދިޔަ މަހު ދައުލަތަށް ލިބުނު އާމްދަނީ މައްޗަށް ހިނގައްޖެ އެވެ.

ޓެކްސްއާ ބެހޭ ކަންކަން ބަލަހައްޓާ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން މިއަދު އާއްމުކުރި ތަފާސްހިސާބުތައް ދައްކާ ގޮތުން މިދިޔަ މަހު ވަނީ 1.11 ބިލިއަން ރުފިޔާ އާމްދަނީގެ ގޮތުގައި ބަލައިގަނެފަ އެވެ. އެއީ މިދިޔަ އަހަރުގެ ސެޕްޓެމްބަރު މަހާ އަޅާބަލާއިރު 24.6 ޕަސެންޓު އަދި މިދިޔަ މަހު ލިބޭނެ ކަމަށް އަންދާޒާކުރި ވަރަށް ވުރެ 0.3 ޕަސެންޓު އިތުރު އަދަދެކެވެ.

"... އާމްދަނީ އިތުރުވި މައިގަނޑު އެއް ސަބަބަކީ ރިސޯޓުތަކުގެ ކުލީގެ ގޮތުގައި ދައްކާފައިވާ އަދަދު އިތުރުވުމެވެ،" ތަފާސްހިސާބާ އެކު މީރާ އިން އާއްމުކުރި ބަޔާނެއްގައިވެ އެވެ.

ރިސޯޓުތަކުން ދެއްކި ކުލީގެ އަދަދު އިތުރުވިއިރު، ގިނަ އާ ރިސޯޓުތަކެއް މި އަަހަރުގެ މިހާތަނަށް ވަނީ ހުޅުވާފަ އެވެ. އަދި މި އަހަރުގެ ބާކީ އޮތް ދުވަސްތަކުގައި ގާތްގަނޑަކަށް އިތުރު ނުވަ ރިސޯޓު ހުޅުވަން ވަނީ ތައްޔާރުވެފަ އެވެ. މީގެ އިތުރުން، އަންނަ އަހަރު ވެސް އިތުރު 20 ރިސޯޓު ބާޒާރަށް ނެރޭނެ ކަމަށް ސަރުކާރުން ވަނީ ބުނެފަ އެވެ. އޭގެ ތެރޭގައި އެންމެ މަތީ ފަންތީގެ ހޮޓާތަކާއި ރިސޯޓުތައް ހިންގާ ދުނިޔޭގެ އެންމެ ބޮޑެތި ބްރޭންޑުތައް ވެސް ހިމެނެ އެވެ.

މިދިޔަ މަހުގެ އާމްދަނީގެ ހުލާސާ:

- ޖީއެސްޓީ: 449.1 މިލިއަން ރުފިޔާ (ޖުމްލަ އާމްދަނީގެ 40.6 ޕަސެންޓު)

- ރިސޯޓުތަކުން ދެއްކި ކުލި: 328.38 މިލިއަން ރުފިޔާ (ޖުމްލަ އާމްދަނީގެ 29.7 ޕަސެންޓު)

- ވިޔަފާރީގެ ފައިދާ އިން ދެއްކި ޓެކްސް: 79.3 މިލިއަން ރުފިޔާ (ޖުމްލަ އާމްދަނީގެ 7.2 ޕަސެންޓު)

- ޖޫރިމަނާ: 65.82 މިލިއަން ރުފިޔާ (ޖުމްލަ އާމްދަނީގެ ހަ ޕަސެންޓު)

- ގްރީން ޓެކްސް: 54.74 މިލިއަން ރުފިޔާ (ޖުމްލަ އާމްދަނީގެ ފަސް ޕަސެންޓު)

- އެހެނިހެން ޓެކުހާއި ފީ: 128.44 މިލިއަން ރުފިޔާ (ޖުމްލަ އާމްދަނީގެ 11.6 ޕަސެންޓު)

މިދިޔަ މަހުގެ އާމްދަނީ މައްޗަށް ގޮސްފައި ވާއިރު، މި އަހަރުގެ މިހާތަނަށް ލިބުނު އާމްދަނީ ވަނީ 11.39 ބިލިއަން ރުފިޔާ އަށް އަރާފަ އެވެ. އެއީ މިދިޔަ އަހަރުގެ އެ މުއްދަތާ އަޅާބަލާއިރު 8.1 ޕަސެންޓު އިތުރު އަދަދެކެވެ.

އާމްދަނީ މައްޗަށް ގޮސްފައި މިވަނީ އޭގެ ކުރީ ދެ މަހު ލިބުނު މިންވަރު ދަށަށް ގޮސްފައި ވަނިކޮށެވެ. އެ ގޮތުން، ޖުލައި މަހު މީރާ އިން ބަލައިގަތް 1.35 ބިލިއަން ރުފިޔާ އަކީ މިދިޔަ އަހަރުގެ ޖުލައި މަހަށް ވުރެ 17.2 ޕަސެންޓް ދަށް އަދަދެކެވެ. އަދި އޮގަސްޓު މަހު ބަލައިގަތް އެއް ބިލިއަން ރުފިޔާ އަކީ މިދިޔަ އަހަރުގެ އޮގަސްޓު މަހު ލިބުނު ވަރަށް ވުރެ 13.4 ޕަސެންޓް ދަށް އަދަދެކެވެ.

ދައުލަތުގެ މި އަހަރުގެ 27.5 ބިލިއަން ރުފިޔާގެ ބަޖެޓުގައި 21.5 ބިލިއަން ރުފިޔާގެ އާމްދަނީއެއް ލިބޭނެ ކަމަށް ޖަހާފައިވެ އެވެ. އޭގެ ތެރެއިން ބޮޑު ބައެއް ހޯދަން ނިންމާފައިވަނީ ޓެކްސް އިތުރުކޮށްގެންނާއި އާ ޓެކްސްތައް ނަގައިގެންނެވެ. އެ ގޮތުން، މިހާރު ވަނީ ގްރީން ޓެކްސް ނަގަން ފަށާފަ އެވެ.

މީރާ ޓެކްސް ދައުލަތުގެ އާމްދަނީ ރިސޯޓް ކުލި

6 ކޮމެންޓް, 8 ރިއެކްޝަންސް

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ކޮމެންޓްތައް

އެންމެ ފަސް މަގުބޫލް

މަރީ

12 October 2016

ވިޔަފާރި ފައިދާން ނެގޭ ޓެކްސްއާއި ޖޫރިމަނާއިން ނެގޭ ޓެކްސްގެ މާބޮޑު ތަފާތެއް ނުފެނޭ. މީގެން މިބުނާ އެއްޗެއް މާނަ ކުރެވޭވަރުގެ އިކޮނޮމިސްޓެއް ސަރުކާރުގައި އެބަހުރިބާ؟ ރައްޔިތުން އިނދަޖެހެނީ، ސަރުކާރުގެ ޓެކްސް ބޮޑުވަނީ، އެކަމަކު މިޓެކްސްފައިސާއަށް މިވާގޮތެއް ހަމަ ނޭނގެ! އެކަމަކުވެސް މަމެން ޕިންކު ކުދިން ވަރަށް ހެޕީ!

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ހާސަރު

11 October 2016

ލިބޭނެކަމަށް 21 ބިލިއަން ޖަހާ ޚަރަދުވާނެކަމަށް 27 ބަލައިގެން ބަޖެޓް ފާސްކޮށްފަވާއިރު އަދި ލިބުނީ 11 ބިލިއަން އަހަރުގެ ބާކީ އޮތީ ތިންމަސް ކުރީ 9 މަހުން ލިބުނު ވަރަށްބަލާއިރު ދެން ގިނަވެގެން ލިބޭނީ 4 ބިލިއަން އެހެންވީމަ މިއަހަރު ބަޖެޓް ރެކޯޑް އަދަދަކުން ދަރަނިވެރިވެ އަހަރު ނިމޭއިރު 12 ބިލިއަން ދަރަނިވާނެ! ދެންވެސް ބުނާނެ ކުރިން އެމްޑީޕީ ވެރިކަމުގައި ދަރާފަ އޮތް ދަރަނިބޮޑުކަމުންނޭ ގައުމުގެ ދަރަނިބޮޑީ! މި ފަސް އަހަރު ނިމޭއިރު ގައުމު ދުވަހަކުވެސް ނުދަރާވަރަށް ދަރާނެކަން ޔަގީން. މޮޅުއިކޮނެމިސްޓް.

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

އަސްލުވެސް ތީ ހާސަރު

11 October 2016

ވާނުވާގައި ހުރެ މޮޅު ކޮމެންޓް ނުކުރޭ. ހަމައެކަނި މީރާއިން ލިބޭ އެއްޗަކުން ނޫން އާމްދަނީ ބަލަނީ. އަދި އިތުރު ގޮތްތަށްވެސް ހުރޭ. ނޭންގެންޏާ ވަރަށް މޮޅު ކަލްކިއުލޭޝަން ހެދިދާނެ.

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

މުހަންމަދު

11 October 2016

"- އެހެނިހެން ޓެކުހާއި ފީ: 128.44 މިލިއަން ރުފިޔާ (ޖުމްލަ އާމްދަނީގެ 11.6 ޕަސެންޓު)" މިއީ ވަރަށް ހެއްވާކަމެކެވެ. "އެހެނިހެން" މިއީ އޭގެޚުލާސާއަށް ނުދެވޭވަރުގެ އެއްޗަކީހެއްޔެވެ؟ މަށަށްހީވަނީ މިޢާމްދަނީއަކީ، އެކިފާޑުގެ ސްޓިކަރުޖަހައިގެހޯދާ ޢާމްދަނީހެނެވެ. މިއީ ކުޑަޢަދަދެއްނޫނެވެ. އެއްވެސް ހިސާބުކިތާބެއްގައި "އެެހެނިހެން" އަތުވެއްޖެނަމަ، އެއީ އެހިސާބެއްބަލަހައްޓާ ވެރިން، އެހިސާބުކިތާބުތެރެއަށް އަތްބާނައި، ހަލުވައި، ނޫނީ މުށްޖަހައި، އޭގެބޭނުންކުރުމަށް މަގުފަހިކޮށް ތަފްސީލުދޭންބޭނުންނުވެގެން ހިމަނާ ވަސީލަތެކެވެ. މިމާލެއިން ސްޓިކަރުޖަހައިގެން ގިނަޢަދަދަކަށް ސަރުކާރަށް ޢާމްދަނީ ނެގުމަކީ ކުރާކަމެކެވެ. ރާވައިގެން ކުރާކަމެކެވެ. އެކަމަކު އެކަމުން ލިބުނު ޢާމްދަނީ އެނގޭކަށްނެތެވެ. މައްސަލައެކެވެ. ސުވާލެކެވެ. ސްޓިކަރުޖެހެނީ ވަކިމީސްމީހުނާއި ފަރާތްތައް އިސްތިސްނާކޮށެވެ. ސްޓިކަރުޖަހާފަހުން އަންނަ ފޯންކޯލަކުން، ނޫނީ މެސެޖަކުން އެކަން ކެންސަލްވެ، ނުވާކަމަކަށްވެދަނީ މަދެއްކޮށެއްނޫނެވެ. މިވަރަށް ޢާމްދަނީ އިތުރުވުމަކީ، އުފަލެކެވެ. އެކަމަކު ލިބުނުގޮތް އެނގުމަކީ އެއުފަލަށްވުރެ ބޭނުންތެރިކަމެކެވެ. ބިރުވެތިވާންޖެހޭކަމެކެވެ.

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ދިވެހި

11 October 2016

https://www.mira.gov.mv/Publications.aspx ތަފްސީލްތައް. "އެހެނިހެން" އެމާނަ ކުރަނީ ކޮންއެއްޗަކަށްކަންވެސް އެއޮތީ ލިޔެފަ.

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

އަލީ

11 October 2016

ވާނުވާ ނޭންގުނަސް ހިތައް އަންނަހާ ގޮތަކަށް ހިތުން މޮޅު ތިއަރީ ތައް ހަދައިގެން ކޮމެންޓް ކުރަންވާނެ. އެހެނިހެން ގައި ހިމެނެނީ ހަމައެކަނި ތިބުނާ ސްޓިކާ ފީއެއް ނޫން. އެހެނިހެންގައި އތައް ސަތޭކަ ފީއެއް ހިމެނޭނެ.