ހެޕީ މާކެޓުން ބެޓަރި ވެހިކަލްތައް ބޭނުންކުރަން ފަށައިފި

ރާއްޖޭގައި ފިނިކުރި ކަބޯތަކެތީގެ ފިޔަފާރި އެންމެ ފުޅާ ދާއިރާއެއްގައި ކުރަމުން އަންނަ އެއް ކުންފުނި، ހެޕީ މާކެޓްގެ އޮޕަރޭޝަންތަކަށް ބެޓަރިން ދުއްވާ ވެހިކަލް ބޭނުންކުރަން ފަށައިފި އެވެ.

ހޭޕީ މާކެޓްގެ "ގްރީން ފްލީޓް"ގެ ދަށުން މާލެ ސަރަހައްދުގައި ބެޓެރިން ދުއްވާ 30 ވެހިކަލް ބޭނުންކުރަން ވަނީ ނިންމައިފަ އެވެ.

ހެޕީ މާކެޓްގެ ސީއީއޯ އަލީ އިހުސާން ވިދާޅުވީ މާލެއަކީ ވައި ނުސާފު ތަނަކަށް ވާއިރު ހެޕީ މާކެޓްގެ ސަބަބުން އިތުރަށް އެކަން ބޮޑުވިޔަ ނުދިނުމަކީ، ޒިންމާދާރު ކުންފުންޏެއްގެ ގޮތުން މަސައްކަތް ކުރަން ޖެހޭ ކަމެއް ކަމަށެވެ. އޭގެ ސަބަބުން ކުރިއަށް އޮތް ތަނުގައި އެ ކުންފުނީގެ ހިންގުމުގެ ހަރަދުތައް ވެސް ކުޑަ ކުރެވޭނެ ކަމަށް އޭނާ ވިދާޅުވި އެވެ.

"މި ބަދަލު ގެނައުމަށް އަޅުގަނޑުމެން ނިންމީ ދެ ކަމަކަށް ބަލައިގެން. އެގޮތުން، ފުރަތަމަ ކަމަކަށް މި ބަދަލު ގެނައުމުން އަޅުގަނޑުމެންގެ ހުރިހާ ވެހިކަލްތަކަކީ ވެސް ތިމާވެއްޓާ ރައްޓެހި އުޅަނދުތަކެއް ކަން ޔަގީން ކުރެވޭނެ. އަޅުގަނޑުމެންގެ ސަބަބުން ތިމަވެއްޓަށް ލިބޭ ގެއްލުން ވެސް ކުޑަ ކުރެވޭނެ،" އިހުސާން ވިދާޅުވި އެވެ.

ހެޕީ މާކެޓްގެ ގްރީން ފްލީޓުގެ ވެހިކަލަކަށް މުދާ އަރުވަނީ -- ފޮޓޯ: ހެޕީ މާކެޓް

"ދެވަނަ ކަމަކަށް މީގެ ސަބަބުން އަޅުގަނޑުމެންގެ ހިންގުމުގެ ހަރަދު ވެސް ކުޑަ އެބަ ކުރެވޭ. ލަފާކުރެވޭ ގޮތުގައި ހަރަދުގެ 30 ޕަސެންޓާއި 40 ޕަސެންޓާ ދެމެދުގެ މިންވަރެއް ސަލާމަތް ކުރެވޭނެ."

ހެޕީ މާކެޓުން މާލެ ސަރަހައްދުގެ އިތުރުން އައްޑު އާއި ކުޅުދުއްފުށީގައި ވެސް ފިހާރަތައް ހިންގަ އެވެ. އެހެންކަމުން މި މަސް ނިމޭއިރު އެ ފިހާރަތަކުގައި ވެސް ބޭނުންކުރާނީ ބެޓަރިން ދުއްވާ ވެހިކަލްތައް ކަމަށް އެ ކުންފުނިން ބުންޏެވެ.