މަސްވެރިންނަށް ވިއްކާ ތެލުން 40 ލާރި ހެޔޮކޮށް، އަށް ރުފިޔާ އަށް ވިއްކަން ފަށަނީ

މިފްކޯގެ މަސް ކިރުވާ ބޯޓެއް: އާ އަގުގައި މިފްކޯގެ ސެންޓަރުތަކުންނާއި އެ ކުންފުނީގެ ބޯޓުތަކުން ތެޔޮ ގަންނަން ލިބޭނެ.-- ފޮޓޯ: އިބްރާހިމް ޒަކީ

އަލީ ނާފިޒް، މިހާރު

01 ނޮވެމްބަރ 2016 - 09:36

3 comments

މަސްވެރިންނަށް ވިއްކާ ޑީސަލް ލީޓަރަކުން 40 ލާރި އަގު ހެޔޮކޮށް، އަށް ރުފިޔާ އަށް ވިއްކަން މިއަދު ފަށައިފި އެވެ.

ސަރުކާރުގެ މަސް ކުންފުނި، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ރޭ ނެރުނު ބަޔާނެއްގައި ބުނި ގޮތުގައި މަސް ގަންނަ މިފްކޯގެ ސެންޓަރުތަކުންނާއި އެ ކުންފުނީގެ ބޯޓުތަކުން މަސްވެރިންނަށް އެ އަގުގައި މިހާރު ޑީސަލް ގަންނަން ލިބޭނެ އެވެ.

"ދުނިޔޭގެ ތެލުގެ ބާޒާރަށް ބަދަލެއް ނައިކަމުގައި ވިޔަސް، މިފްކޯ އިން މި ބަދަލު ގެނައީ ސަރުކާރުން މިފްކޯ އަކީ އެސްޓީއޯގެ ސަބްސިޑަރީ ކުންފުންޏަކަށް ބަދަލުކުރުމާ ގުޅިގެން މަސްވެރިންގެ ކުރިއެރުމަށާއި ލާބަ އަށް ކުރެވޭ މަސައްކަތްތަކުގެ ތެރެއިންނެވެ،" ބަޔާނުގައިވެ އެވެ.

މަސްވެރިންނަށް ވިއްކާ ތެލުގެ އަގު ހެޔޮކުރަން ނިންމާފައިވާކަން އެސްޓީއޯގެ މެނޭޖިން ޑިރެކްޓަރު އަހުމަދު ޝަހީރު ވަނީ މިދިޔަ އާދިއްތަ ދުވަހު އިއުލާން ކުރައްވައިފަ އެވެ. އޭނާ ވިދާޅުވި ގޮތުގައި އެ ބަދަލު ގެންނަނީ އެސްޓީއޯ އާއި މިފްކޯ ގުޅިގެން މަސްވެރިންނަށް ރަނގަޅު ގޮތްތަކެއް ހަދައިދެވޭނެތީ އެވެ.

މަސްވެރިންނަށް ވިއްކާ ތެލުގެ އަގު މި އަހަރުގެ ކުރީކޮޅު ވެސް ހެޔޮ ކުރި އެވެ. މިފްކޯ ވަކިން ހިންގިއިރު ގެނައި އެ ބަދަލުގެ ދަށުން، އޭރު 10.50 ރުފިޔާ އަށް ވިއްކަމުން ދިޔަ ޑީސަލް ލީޓަރެއް 7.30 ރުފިޔާ އަށް ކުޑަ ކުރި އެވެ. އެކަމަކު، ފަހުން މަސްވެރިންނަށް ވިއްކާ ތެލުގެ އަގު ވަނީ 8.40 އަށް ބޮޑުކޮށްފަ އެވެ.

ސަރުކާރުން ވަނީ މި މަހުގެ ކުރީކޮޅު މިފްކޯ އެސްޓީއޯގެ ދަށަށް ގެންގޮސްފަ އެވެ. އަދި މިފްކޯގެ 300 މިލިއަން ރުފިޔާގެ ދަރަންޏާ ސަރުކާރުން ހަވާލުވެފައި ވާއިރު، މިފްކޯ މިހާރު ހިންގަނީ އެސްޓީއޯގެ 99.99 ޕަސެންޓް ހިއްސާ އާއި އެސްޓީއޯގެ އިތުރު ސަބްސިޑަރީއެއް ކަމަށްވާ އެލައިޑް އިންޝުއަރެންސްގެ 0.01 ޕަސެންޓް ހިއްސާވާ ކުންފުންޏެއްގެ ގޮތުގަ އެވެ.