އެޗްއައިވީ ޕޮޒިޓިވް، އެކަމަކު ދުވެލި ބާރު 15 އަހަރުގެ އެތުލީޓެއް

އެންމެ 40 މިނިޓް ތެރޭގައި 10 ކިލޯމީޓަރު ދުވުނު ކަމަށް، އިންޑިއާގެ ބެންގަލޫރުގައި ދިރިއުޅޭ އުމުރުން އެންމެ 15 އަހަރުގެ ބާބޫ ސެނައްޕާ އޭނާގެ ކާފަ އާއި މާމަ ގާތު ބުނުމުން އެމީހުންނަށް ލިބުނީ ބޮޑު ޝޮކެކެވެ.

"ބަހެއް ދަތުރުކުރާ ވަރަށް ވުރެ ވެސް ބާރަށް ދުވަމޭތަ ތި ބުނީ،" ދެ ލޯ ބޮޑުވެ ގަބޫލުކުރަން ދަތިވެފައި ތިބެ ބާބޫގެ މާމަ އާއި ކާފަ ސުވާލު ކުރި އެވެ.

މި މުސްކުޅީ ދެމަފިރިންނަށް ބާބޫ އެހާ ބާރަށް ދުވެފާނެކަން ގަބޫލުކުރަން ދަތިވީ ބާބޫ އަކީ އެޗްއައިވީ ޕޮޒިޓިވް ކުއްޖަކަށް ވާތީ އެވެ. ސިއްހަތު ސަލާމަތުން ހުރި މީހަކަށް ވެސް ނުދުވެވޭހާ ބާރަށް ބާބޫ ދުވީމަ އެވެ.

"އަހަރެން ތައިލެންޑުން އެނބުރި އައިސް އަދި މިހާރަށް ވުރެ ވެސް އަވަހަށް ދުވެވޭތޯ ހިތްވަރު ކޮށްފައި މަސައްކަތް ފަށާނަން،" މިއަދު އޮންނަ ލަގޫނާ ޕުކެޓް އިންޓަނޭޝަނަލް މެރަތަންގައި އިންޑިޔާ ތަމްސީލުކުރަން ނަގާފައިވާ ބާބޫ ބުންޏެވެ.

ކުޅިވަރުގެ މި އިވެންޓްގެ ބައިވެރިންގެ ތެރެއިން އެޗްއައިވީ ޕޮޒިޓިވް ވެފައިވާ ހަމައެކަނި ބައިވެރިޔަކީ ވެސް ބާބޫ އެވެ. މި އިވެންޓުގައި ބާބޫ ބައިވެރިވަނީ އޭނާ އެންމެ ޝައުގުވެރިވާ ކަންތައް ކަމަށްވާ ދުވުމުގައި ކުރިއަށް ދިއުމަށް އެޗްއައިވީ އަށް ވެސް އޭނާ ނުހުއްޓުވޭނެކަން ސާބިތުކޮށްދިނުމަށެވެ.

ބާބޫގެ އުމުރުން އެންމެ ހަ އަހަރުގައި އޭނާގެ މައިންބަފައިން ވަނީ އެއިޑްސް ޖެހިގެން މަރުވެފަ އެވެ. ބާބޫ ވަނީ އޭނާގެ އެކުވެރި މަނިކް ޕްރަބޫއާ އެކު މިދިޔަ އަހަރުގެ ޖޫން މަހު ނެދަލެންޑްސްގައި އޮތް ބައިނަލްއަގުވާމީ ކުޑަކުދިންގެ އޮލިމްޕިކްސްގައި ވެސް ބައިވެރިފަ އެވެ.

ނަމަވެސް މި ކުއްޖާގެ ހުނަރާއި ގާބިލްކަން ދަންނަ ބަޔަކު އޭނާގެ އަމިއްލަ ގައުމަކު ނެތެވެ. އެމީހުންނަށް ލިބުނުހާ ވެސް އެއްޗަކީ މުހިއްމު މުބާރާތެއްގައި ބައިވެރިވެވުނު ކަމުގެ އުފާވެރި ހަނދާންތަކެވެ. އެކުދިންގެ ކޯޗު އެލްވިސް ޖޯސަފް ބުނި ގޮތުގައި އަރަމުންއަންނަ ޒުވާން ދެ އެތުލީޓުންނަށް ވުރެ ބޮޑަށް ބާބޫ އާއި އޭނާގެ އެކުވެރި މަނިކް ޕްރަބޫ ގިނަ ބަޔަކު ހަނދާން ކުރަނީ އެޗްއައިވީ ޕޮޒިޓިވް ދެ ކުދިންގެ ގޮތުގަ އެވެ.

ކޯޗު އެލްވިސް އަކީ ބާބޫ ކަހަލަ ކުދިންނަށް ފުރުސަތުތައް ތަނަވަސްކޮށްދިނުމަށްޓަކައި "ޗެމްޕިއަން އިން މީ" ކިޔާ ޕްރޮޖެކްޓެއް ހިންގާ މީހެކެވެ.

މިހާރު އޭނާގެ ހަޔާތުން އެންމެ ބޮޑަށް އުނިވަނީ ކޮން ކަމެއްތޯ ސުވާލުކުރުމުން ބާބޫ ބުނީ އޭނާގެ މައިންބަފައިން ކަމަށެވެ. އެމީހުން މިއަދު ދުނިޔޭގައި ތިބި ނަމަ އޭނާ ދުވާތަން ފެނިފައި އެކަމާ ވަރަށް ފަޚުރުވެރިވާނެ ކަމަށް ބާބޫ ބުންޏެވެ.

ބާބޫ ބުނީ ކޮންމެ މީހަކު ކޮންމެ އެއްޗެކޭ ކިޔަސް ފަރުވާލެއް ނެތް ކަމަށާއި ޕޫކެޓް އިން އެނބުރި އައިސް ކުރިޔަށް ވުރެ ބޮޑަށް ދުވުން ހަލުވި ކުރުމަށް ގަދައަޅާ މަސައްކަތް ފަށާނެ ކަމަށެވެ.

"އަހަރެންގެ ފޮތުގައި އެޗް.އައި އަދި ވީ އަކީ ހަމައެކަނި އިނގިރޭސި އަކުރުތަކެއް،" ބާބޫ ބުންޏެވެ.

ބާބޫގެ މޮޓޯއަކީ "ދުވަސް ނުގުނާށެވެ. ހުވަފެން ގުނާށެވެ." އެވެ.

"މީހުން ގަބޫލުކުރާ ގޮތުގައި އަހަރެމެންނަކީ ވަރަށް އަވަހަށް މަރުވެދާނެ ބައެއް. އެހެންވީމާ ލިބިފައި އޮތް ކުޑަ ވަގުތުކޮޅު ކުޅިވަރު ކުޅެން އަހަރެމެން ބާކާރުކޮށްލަނީ ކަމަށް އެމީހުން ގަބޫލު ކުރަނީ،" ބާބޫ ބުންޏެވެ.

ނަމަވެސް ދުނިޔޭގެ ފެންވަރުގެ އެތުލީޓަކަށް ވުމަށްޓަކައި އޭނާ ކުރާ މަސައްކަތަށް މީހުން ދައްކާ މިފަދަ ވާހަކަތަކުން އަސަރެއް ނުކުރާނެ ކަމަށް ބާބޫ ބުންޏެވެ.

"ތިއީ އެހެން މީހުންނާ ތަފާތު މީހެކޭ ހީނުކުރާށޭ" ބާބޫގެ މަންމަ މަރުބަލީގައި އޮވެ ބުނި ބުނުން އޭނާ އަބަދުވެސް ހަނދާން ކުރެ އެވެ.