ރެސްޓޯރެންޓް އެސޯސިއޭޝަން އޮފް މޯލްޑިވްސް (ރޭމް)ގެ ރައީސް ހާމިދު އަފީފު--ފޮޓޯ:މުހައްމަދު އަވްޝަން އިިލިޔާސް/މިހާރު
28 ޖޫން 2021 - 20:06
62 comments
"ކޮބައިތޯ ދިވެހި މުވައްޒަފުން. ހުސްވެއްޖެ. ގައުމު ބިކަވެއްޖެ. ވިޔަފާރިތައް އިނދަ ޖެހިއްޖެ. އިގްތިސާދު ނެތި ހަލާކު ވެއްޖެ. އަޑެއް ނާހާ.. އަޑެއް ނާހާ،" ރެސްޓޯރެންޓް އެސޯސިއޭޝަން އޮފް މޯލްޑިވްސް (ރޭމް)ގެ ރައީސް ހާމިދު އަފީފަށް ވާހަކަ ކުރިއަށް ގެންދެވުނީ މިހާ ހިސާބަށެވެ.
އޭނާ އަކީ ކޮވިޑުގެ މި އުނދަގޫ ހާލަތުގައި ވިޔަފާރި ހަލާކުވުމުގެ ސަބަބުން ކުލި ދަައްކާނެ ގޮތެއް ނެތިގެން ގެއިން ނުކުންނަ ޖެހުނު މީހެކެވެ.
"ކާންދޭ އަތުގައި ދަތް ނާޅާ" ގެ ނަމުގައި މިއަދު ހަވީރު މާލޭގެ ކާނިވާ ސަރަހައްދުގައި ބޭއްވި އެއްވުމުގައި ގިނަ އަދަދެއްގެ ރެސްޓޯރެންޓާއި ކެފޭތަކުގެ ވެރިން ބައިވެރިވެ، އެ ފަރާތްތަކުގެ ކަންބޮޑުުވުންތައް ސަރުކާރަށް އިއްވި އެވެ. މި އެއްވުމުގައި ރޭމްގެ މެންބަރުންނާއި ރާއްޖޭގައި ރެސްޓޯރެންޓް ވިޔަފާރިކުރުމުގައި ގިނަ ދުވަސްވީ ވިޔަފާރިތަކުގެ ވެރިން ބައިވެރިވި އެވެ.
ރޭމްގެ ރައީސް ހާމިދު ވިދާޅުވީ، ރެސްޓޯރެންޓް ވިޔަފާރިތަކުން އާމްދަނީ ހޯދައިގެން އުޅުނު އެތައް އާއިލާތަކެއް މި ވަގުތު މަގުމަތިވެ، ހަދާނެ ގޮތް ހުސްވެފައި ތިބި ކަމަށެވެ. ބައެއް ފަރާތްތަކުން ތަންތަނުގެ ކުލި ނުދެއްކި ހަރަދުތައް މެނޭޖު ނުކުރެވޭ ހާލަތުގައި ތިބި ކަމަށް އޭނާ ވިދާޅުވި އެވެ.
މި އެއްވުމުގައި ވާހަކަ ދެއްކެވި ސައުތު ކޭޓަރިންގެ ވެރިޔާ މުހައްމަދު ތައުފީގު (ސައުތު ތައުފީގު) ވިދާޅުވީ، ކޮވިޑުގެ މި ހާލަތުގައި ރެސްޓޯރެންޓްތަކާ ގުޅިގެން ކުއްލި ކުއްލިއަށް ސަރުކާރުން އަޅާ ފިޔަވަޅުތަކާ މެދު ވަރަށް ބޮޑަށް ކަންބޮޑުވާ ކަމަށެވެ.
ރެސްޓޯރެންޓްތަކުން މިއަދު ބޭއްވި އެއްވުމުގައި ވިޔަފާރިވެރިންގެ ކަންބޮޑުވުންތައް ހާމަކުރަނީ. --ފޮޓޯ: މުހައްމަދު އަވްޝަން އިލިޔާސް/މިހާރު
"ބަންދުވާ ގަޑިއެއް ހުޅުވޭނެ ގަޑިއެއް އަޅުގަނޑުމެންނަށް އެނގެނީއެއް ނޫން. މިހާރު އަޑު އަހަން މާދަން ނޫން އަނެއް ދުވަހު އަނެއްކާ ހުއްދަ ދެއޭ. ސަރުކާރުން ޕްލޭން ކުރަމުން އަންނަ އިރު ވިދާޅުވާން ޖެހޭނެ އަންނަ ހަފުތާގައި ލަފާކުރެވެއޭ ހުޅުވާލެވޭނެ ކަމަށް. އޭރުންތާ ހޮޓާ ހިންގާ މީހުންނަށް ތައްޔާރުވާން އެނގޭނީ،" މާލޭގައި ކެފޭ/ރެސްޓޯރަންޓު ހިންގުމާއި ކޭޓަރިންގެ ހިދުމަތް ދިނުމުގައި އެންމެ ތަޖުރިބާކާރު މީހުންގެ ތެރޭގައި ހިމެނޭ ސައުތު ތައުފީގު ވިދާޅުވި އެވެ.
އޭނާ ވިދާޅުވީ، ހޮޓާތަކުގައި މަސައްކަތް ކުރަން ޖެހޭ މުވައްޒަފުން ހޯދާއި އެކަމަށް ތައްޔާރުވުމަށް ވަގުތު ބޭނުންވާ ކަމަށެވެ. ކުއްލިއަކަށް ހުޅުވައިލުމުން ރެސްޓޯރެންޓްތަކުގައި މަސައްކަތް ކުރާނެ މުވައްޒަފުން ނުލިބޭ ކަމަށާއި މި ކަންކަން ހައްލުކުރަން ސަރުކާރުން ރެސްޓޯރެންޓްތަކުގެ ވެރިންނާ ބައްދަލު ކުރުން ވަރަށް މުހިއްމު ކަމަށް ސައުތު ތައުފީގު ވިދާޅުވި އެވެ.
އޭނާ ވަނީ ސަރުކާރުގެ އިސް ސަފުގައި ތިއްބެވި ބައެއް ބޭފުޅުންނަށް ވެސް މިއަދުގެ އެއްވުމުގައި ފާޑުވިދާޅުވެފަ އެވެ.
ވިދާޅުވީ ރައީސް އިބްރާހިމް މުހައްމަދު ސޯލިހުގެ އަރިހުގައި ތިއްބެވީ ހެޔޮ އެދިގެން ތިބި ބައެއް ނޫން ކަމަށެވެ. ނަމަވެސް ރެސްޓޯރެންޓްތަކުގެ ވެރިންނާ ސަރުކާރާ ދެމެދު ހިތްހަމަނުޖެހި ތަޅައިފޮމަކީ ބޭނުންވާ ކަމެއް ނޫން ކަމަށް ސައުތު ތައުފީގު ވިދާޅުވި އެވެ.
ސައުތު ކޭޓަރިންގެ ވެރިޔާ ތައުފީގު ވާހަކަދައްކަވަނީ: އޭނާއަކީ ރާއްޖޭގައި ރެސްޓޯރެންޓް ވިޔަފާރި ކުރުމުގައި އެންމެ ދުވަސްވީ އެއް ފަރާތް. --ފޮޓޯ: މުހައްމަދު އަވްޝަން އިލިޔާސް/މިހާރު
ވިޔަފާރިތައް އިތުރަށް ކުރިއަށް ގެންދަން ފައިސާއެއް ނެތް
ރޭމްގެ ރައީސް ހާމިދު ވިދާޅުވިގޮތުގައި، ރެސްޓޯރެންޓްތައް މިއަދު ވަނީ ބިކަވެ، ދާނެ މަގެއް ނޭނގި ގޮތް ހުސްވެފަ އެވެ.
"ވިޔަފާރިތައް ހުއްޓާލަންވީ ކަމެއް. ކުރިއަށް ދާންވީ ކަމެއް ނޭނގޭ. ސަރުކާރުން ފިޔަވަޅުތައް އަޅަމުން އަންނަ އިރު އަޅުގަނޑުމެންގެ އިންޑަސްޓްރީގެ ބަހެއް ހޯދުމެއް ނެތް،" އޭނާ ވިދާޅުވި އެވެ.
ހާމިދު ވިދާޅުވީ ރެސްޓޯރެންޓްތަކުގެ ވިޔަފާރި ހަލާކުވެފައިވާ ކަމަށެވެ. މުވައްޒަފުންނާއި ވިޔަފާރިތައް މަގުމަތިވެފައިވާ އިރު މިކަންކަމަށް ހައްލެއް ހޯދައިދިނުމުގައި ސަރުކާރުން އިހުމާލުވެފައިވާ ކަމަށް އޭނާ ވިދާޅުވި އެވެ. މުވައްޒަފުންނަށް މުސާރަ ނުދެވޭ އިރު އިތުރު ލޯނުތަކެއް ނަގައިގެން ވިޔަފާރި ހިންގާނެ ގޮތެއް ނޭނގޭ ކަމަށް އޭނާ ވިދާޅުވި އެވެ.
ރެސްޓޯރެންޓްތައް މިހާރު އޮތް ހާލަތުން ހަ ޕަސެންޓުގެ އިންޓްރެސްޓް ރޭޓެއްގައި ލޯނު ނެގުމުގެ ގާބިލުކަމެއް ނެތް ކަމަށާއި މި ވަގުތު ރެސްޓޯރެންޓްތަކަށް ބޭނުންވަނީ ރިކަވަރީ އަށް މާލީ އެހީތެރިކަމެއް ކަމަށް ހާމިދު ވިދާޅުވި އެވެ.
ރެސްޓޯރެންޓްތަކުގެ ވެރިން ބޭއްވި އެއްވުމުގައި މީހަކު ޕޯސްޓަރެއް ހިފަައްޓައިގެން--ފޮޓޯ: މުހައްމަދު އަވްޝަން އިލިޔާސް/މިހާރު
ސަރުކާރުން ހިންގާ ސްޓިމިއުލަސް ޕްރޮގްރާމުތަކުން ވެސް ކެފޭ/ރެސްޓޯރެންޓް ވިޔަފާރިތަކަށް އެންމެ އެކަށީގެންވާ އެހީތެރިކަމެއް ލިބިފައި ނުވާ ކަމަށް ރެމް އިން ބުންޏެވެ. މިިދިޔަ އަހަރު ހިންގި ޕްރޮގްރާމުން ލޯނު އެހީ ލިބުނީ އެންމެ ހަތަރު ރެސްޓޯރެންޓަށް ކަމަށް ވެސް އެ ޖަމިއްޔާ އިން ބުނެފައިވެ އެވެ. ކޮވިޑާއެކު، މާލީ ހާލަތު ގޯސްވުމުގެ ސަބަަބުން ފާއިތުވެދިޔަ 18 މަސް ދުވަހު ގިނަ ރެސްޓޯރެންޓްތަކުން ކުއްޔާއި ކަރަންޓް ބިލު ނުދެއްކި ވަނީ ދަރަނިވެރިވެފަ އެވެ.
ކޮވިޑް ހާލަތުގައި "ގުރުބާންކުރާ ކަންބަޅި" އަކަށް ރެސްޓޯރެންޓް ވިޔަފާރި
ހާމިދު ވިދާޅުވީ، ކޮވިޑް ހާލަތުގައި އެންމެ ފުރަތަމަ ފިޔަވަޅު އަޅަނީ ރެސްޓޯރެންޓް ވިޔަފާރިތަކަށް ކަމަށެވެ. އަދި ލުއި ދޭ އިރު އެންމެ ލަހުން ލުއިދެނީ ވެސް އެ ފަރާތްތަކަށް ކަމަށެވެ. އެހެން ކަމުން މިއީ އިންސާފުވެރިގޮތެއް ނޫން ކަމަށް އޭނާ ވިދާޅުވި އެވެ.
"ކަމެއް ވެގެންދާ އިރު ކޮންމެ ކަމެއްގައި ކިރުފެލައި ކަންބަޅިއަކަށް އަޅުގަނޑުމެން ހަދަނީ ކީއްވެގެންތޯ؟ ހާމިދު ސަރުކާރާ ސުވާލުކުރި އެވެ.
މިއަދުގެ އިހްތިޖާޖުގައި ރެސްޓޯރެންޓްތަކުގެ ވެރިން ވަނީ އެ މީހުންނަށް މާލީ އެހީތެރިކަން ބޭނުންވާކަން ފާހަގަކޮށް އެކަން ފަހިކޮށްދިނުމަށް ސަރުކާރަށް ގޮވާލައިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އިދިކީލި ސޮރު
01 July 2021
ކާންދޭ އަތުގައި ދަތް ނާޅާށޭ ބުނާ އިރު ތިޔައީ އާއްމު ރައްޔިތުންނަށް ހިލޭ ސާބަހަށް ކޮށްދޭކަމެއްނޫން. ވަރަށް ވެދުން. ހަޖަމް.
ވޓފ
29 June 2021
ހާދަ ހެއްވާ ވާހަކައެއް. ބަލަ ވިޔަފާރި ހިންގާތީ ދޯ ދިވެހިންނަށް ހިދުމަތްތަށް މި ލިބެނީ. އެ މީހުންވެސް އެ ބުނަނީ ރަނގަޅުވާހަކައެއް. 2 އަހަރު ވާއިރު ވިޔަފާރިތަކަށް ވަރަށް ގެއްލުންވާނެ. މައްސަލައަކީ ސަރުކާރުގެ ހަރުދަނާ ނިޒާމެއް ނެތުން. ނިއުޒިލޭންޑް ފަދަ ގައުމުތަކަށް ކޮވިޑް އުޅޭކަންވެސް ނޭންގޭ. ފިހާރަތަށް ވަނީ ހުޅުވާފަ. އެއީ އެ ގައުމުގެ ސަރުކާރު އެޅި ހަރުދަނާ ފިޔަވަޅުތަކުކެ ނަތީޖާ.
އަހުމިއްޓޭ
29 June 2021
ބަލަގަ މިހާރުވެސް ތިކެފޭތައް އޮންނަނީ ފުރާލާފަ. އަޑިއަޑިން ސިއްރުން މީހުންވައްދައި ދޮރުލައްޕައިގެން ސިއްރުން ވިޔަފާރިކުރަނީ. ބޮޑު ކޮންމެވެސް އެކަކު ހުންނާނެ ފާރައަށް ބޭރުގަ. އެކަމުވެސް ނިކަމެތީ ކަލޭމެން. 1ރ ނުޖެހޭ ފެންފުޅި 8ރ އަށް ވިއްކައިގެން.
ހާމިދު ކަރުޒާއީ
29 June 2021
ބަލ ަހާމިދޫ، ކޮވިޑްޖެހިގެން އެންމެން މަރުވީމަ ކަލޭމެނަށް ލާރިދޭން ތި ރެސްޓޯރަންޓްތަކަށް ދާނެ މީހުން ތިބޭނެތަ؟ މީ ހަމަ އެކަނި ރާއްޖޭގެ ވިޔަފާރިތަކަށް ވާކަމެއްނޫނޭ. މުޅި ދުނިޔެއަށް ޖެހިގެންއުޅޭ ކަމެކޭ.
ޓިންޓިކް
29 June 2021
މުސްކުޅި ވީއިރުވެސް ފައިސާއާ ހެދި.
ލައްޕާ
29 June 2021
އެއްބަޔަކު ކެފޭތަކާ ރެސްޓޯރަންޓްތައް ލައްޕަބަލަ. އެއް ތަނަކާ ބަލާފަ ކުރީގަވެސް މާ ގިނައޭ. ހިރިލާނެ ތަންކޮޅެއް ނޯންނަވަރުގެ ތަންތަން ހުޅުވައިގެން ޖާގަ ބަހައްޓަންޖެހޭވަރު ހަނދާންނެތިފަ ތިބީމަ ކޮވިޑް އެ ދައްކަދެނީ 3 ފޫޓް ބާއްވަންޖެހޭ ވާހަކަ. ކަމާބެހޭ ފަރާތްތަކުންވެސް އެކަން ރެގިއުލޭޓްކުރަންޖެހޭ. ކޮންމެ ގެއެއްގަ ކެފޭއެއް ފިހާރައެއް ހުންނާކަށް ނުޖެހޭ. އެތަންތަންވެސް ވަކި ދުރުމިނެއްގަ ބަހައްޓަންވީ. ކެފޭއަކާ ޖެހި ކެފޭއެއް ފަޅަމުން ދިއައީ މާލޭގަ.
ޑިޑިން
29 June 2021
ވަރަށް ދެރަވޭ ރެސްޓޯރަންޓް ތަކަށް ގެއްލުންވާތީވެ، އެކަމަކު އެމީހުން ދެކެން ޖެހޭ ބަލި ފެތުރެނީ ރެސްޓޯރަންޓް ތަކުންކަން. އެތަންތަނަށް ބަލި ޖެހިފައި ތިބޭ މީހުން ގޮސް އެހެން މީހުނާ ދިމާވެ އުޅެނީ ރާއްޖޭގައި ރެސްޓޯރަންޓް ތަކަށް ދިއުންނޫން އިތުރު ސޯޝަލް ލައިފެއްނޯވޭ. ބަލިފެތުރެނީ ރެސްޓޯރަންޓް ތަކުން ހަމަ.
ޗޮސްބެ
29 June 2021
ރެސްޓޯރަންޓް ހިންގައިގެން މިލިޔަނަރުންނަށް ވެފަ ތިބިމީހުން ސަލާންޖަހަން ނުކުންނަންޖެހޭ ހިސާބަށް ދިޔައީމަ ދެރަވަރު.
ބަލިވެ އިނުން
29 June 2021
ބަލި ވަންނަ މައި ދޮރު އެއަރ ޕޯރޓް ބަންދު ނުކުރަނީ ކީއްވެ. އަދި ކީއްތަ ސަރުކާރު އޮފީސް ތަކާ ޕާޓީ އެއްވުންތަށް ހުއްދަ ލިބޭ. ބޮޑު އިންތިހާބެއް ނިންމާލީ އެއޮއް އެހައްދުވަހު. ވެރިން ނުޖެހޭ އަދި އަދައް އައިސޮލޭޓް/ ގެރެންޓީން ވާކަށް. ހަމަ އާންމު ރައްޔިތުންނާ އެމީހުންގެ ވިޔަފާރި ވީމަ ވަރިހަމަ. ދެން 6% ރިބާ ލާފަ ހަރާމް ކަންތައްތަކަށް މަގުފަހި ކުރުވީމަ ހުރިހާ ކަމެއް ހައްލުވީތަ.
އިބްރާހީމްސ
29 June 2021
ގައުމުގެ އިގުތިސާދީ އިންޖީނުތައް ބަނގުރޫޓުވެގެން ދާއިރު ހަމަ ބަލަހައްޓައިގެން ތިބެންވީބާ؟
ސަރަނގު
29 June 2021
ވަރަށް އަމިއްލަ އެދުން ބޮޑު ބައެއް މި ދިވެހިންނަކީ އަދި ވިޔަފާރިވެރިއެކޭ ކިޔައިފިތަ.. ދުވާލަކު 40000 ސޭލްސް ނަގާ އަމިއްލަ ގެދޮރުގައި ހަދާފަ ހުންނަ ކެފޭގައި ދަންވަރު 3 ޖަހަންދެން ބައިދާފަ އިންނަ ކޭޝިއަރަށް 3000 ރުފިޔާ ދޭން ނުކެރޭ ގައިމު ލާރިއެއް އޮންނާނެތާ
ރޯޒަސް
29 June 2021
ރެސްޓޯރަންޓް ހިންގާ ގިނަ ފަރާތްތަކުންވެސް ކުރަން ޖެހޭ ކަންކަން ނުކުރީމައި މިހިސާބަށް ދާންޖެހުނީ. ހުޅުވާލަން ފުރުސަތު ދިނީމައި ހިންގީ މިގައުމުގައި ކޮވިޑެއް ނެތޭ މިމީހުންނަށް ހިީވާ ކަހަލަ ގޮތަކަށް. ގޮޑިތަށް ހުންނަނީ ކައިރިއަށް ޖަހާ ފިއްތާފައި، ބުފޭ ބާއްވަނީ އެއްވެސް ރައްކާތެރިކަމެއް ނެތި. ތި މީހުންވެސްގެސް އެއްބާރު ލުން ލިބިގެން ކަންކަން ރަނގަޅުވާނީ. ބޮއްސުން ލައިގެން ބަންދުކުރީމައި ބަންދުކުރާ މީހާ އަބަދުވެސް ގޯސްވާނީ.
ފޭކް އެޗްޕީއޭ
29 June 2021
އެޗްޕީއޭ ތި ބުނާ ކޮވިޑް ތެރޭ: 1. އިންތިހާބް ބާއްވަން ބޭނުންކަމަކަށް ހުއްދަދިނީ. 2. ކެމްޕެއިން ޖައްސަން ސިޔާސީ ފަރާއްތަކަށް ގަންޑުކޮޅާ އެކީ ހުއްދަ ދިނީ. 3. އަދިވެސް ވެރިންނަށް ބޭރައްގޮސްގޮސް އާދެވޭ. އާންމުން ވީމް އައިސޮލޭޝަން. ހެލްތުއާ ގުޅުންހުރި ފަރާތްތަކުންވެސް ކުރަން ޖެހޭ ކަންކަން ނުކުރީމައި މިހިސާބަށް ދާންޖެހުނީ. އަމާނާތަށް ވަނީ ކޮޅުފާންޖަހާފަ.