އެމެރިކާގައި ގަދަ ހޫނަށް ފަހު ޖަންގަލިތައް އަނދަނީ

ކެލިފޯނިއާ (ޖުލައި 12) - އެމެރިކާގެ ގިނަ ސަރަހައްދުތަކެއްގައި ހޫނުމިން ރެކޯޑް މިންވަރަކަށް މައްޗަށް ދިޔުމަށް ފަހު، ބައެއް ސަރަހައްދުތަކުގެ ޖަންގަލިތަކުގައި ރޯވެ އަނދަމުންދާތީ، އެ ސަރަހައްދުތަކުގައި ދިރިއުޅޭ މީހުން، ރައްކާތެރި ސަރަހައްދުތަކަށް ދިޔުމަށް، ކަމާ ބެހޭ އިދާރާތަކުން އަންގަން ފަށައިފި އެވެ.

ޖަންގަލީގައި ރޯވުމުގެ ހާދިސާތައް އެންމެ ގިނައީ އެމެރިކާގެ ހުޅަނގު ފަޅީގެ ސަރަހައްދުތަކުގަ އެވެ. އެ ސަރަހައްދުތަކުގައި ރޯވެފައިވާ އަލިފާންގަނޑުތައް ނިއްވުމަށް، އަލިފާން ނިއްވާ މީހުން ރެޔާއި ދުވާލު އަންނަނީ މަސައްކަތް ކުރަމުންނެވެ. އެ މަސައްކަތުގެ ތެރޭގައި އުޅުނު ފެން ޖަހާ މަތިންދާބޯޓެއް ވެއްޓުމުގެ ސަބަބުން، އެ އިން ދަތުރުކުރި ދެ މީހުން ވަނީ މަރުވެފަ އެވެ.

ލަސް ވެގަސްގެ މޫސުމާ ބެހޭ އިދާރާ އިން ބުނި ގޮތުގައި އެ ސަރަހައްދުގެ ހޫނުމިން މިދިޔަ ހޮނިހިރު ދުވަހު ވަނީ ރެކޯޑް މިންވަރަކަށް މަތިވެފަ އެވެ. އެ ދުވަހު ލަސް ވެގަސްގެ ހޫނުމިން ހުރީ 47.2 ސެލްސިއަސްގަ އެވެ.

އަލިފާން ނިއްވާ މީހުން ބުނާ ގޮތުގައި ލަސް ވެގަސްގެ ޖަންގަލިތަކުގައި ރޯވެފައިވާ އަލިފާންގަނޑުތައް ނިއްވުމުގައި ދިމާވާ އެންމެ ބޮޑު ދައްޗަކީ، އެ ސަރަހައްދުތަކުގެ ވައި އާދަޔާ ޚިލާފަށް ހޫނުވެފައި ވުމުގެ ސަބަބުން، މަތިންދާބޯޓުތަކުން އޮއްސާ ފެންތައް ވެސް، އަލިފާންގަނޑާ ހަމައަށް ތިރިއަށް ފޭބުމުގެ ކުރިން، އާތްވަށް އަރައިގެން ދިޔުމެވެ.

ކެލިފޯނިއާ ސްޓޭޓާ ގުޅިފައިވާ ނެވާޑާ ސްޓޭޓްގެ އުތުރު ސަރަހައްދުގެ ޖަންގަލިތަކުގައި ރޯވެފައިވާ އަލިފާންގަނޑު، މީހުން ދިރިއުޅޭ އަވަށްތަކާ ކައިރިއަށް ފެތުރެން ފަށާފައިވާތީ، އެ ސަރަހައްދުތަކުގައި ދިރިއުޅޭ މީހުން އެހެން ތަންތަނަށް ދިޔުމަށް މިހާރު ވަނީ އަންގައިފަ އެވެ. ނެވާޑާގެ ސިއެރާ ނެވާޑާ ޖަންގަލި ސަރަހައްދުގެ ބޮޑު ބަޔަކަށް އިއްޔެ ވެސް، ވަރަށް ގިނައިރު ވަންދެން ހޮނު އަޅާފައިވެ އެވެ. ހޫނު ވައިގެ ތެރޭގައި ހޮނު އެޅުމުގެ ސަބަބުން، ޖަންގަލީގެ ވަރަށް ގިނަ ސަރަހައްދުތަކުގައި ވަނީ ރޯވެފަ އެވެ.

އެމެރިކާގެ ޖަންގަލިތަކުގައި ރޯވުމުގެ މައްސަލަ ކުރިމަތިވެފައި މިވަނީ، އާދަޔާ ހިލާފަށް ހޫނު ގަދަވުމުގެ ސަބަބުން އެތައް ސަތޭކަ ބަޔަކު މަރުވެފައި ވަނިކޮށެވެ. އެމެރިކާގެ އާތު އޮބްޒަވޭޝަން ޕްރޮގްރާމްގެ ފަރާތުން ބުނި ގޮތުގައި، އެމެރިކާ ސަރަހައްދަށް މިހާތަނަށް އެންމެ ހޫނުވި ކަމަށް ރެކޯޑްތަކުން ދައްކަނީ، ހުސްވި ޖޫން މަހުގެ ތެރޭގަ އެވެ.

ތަޖުރިބާކާރުން ބުނާ ގޮތުގައި މި އަހަރުގެ މި ދުވަސްވަރު އާދަޔާ ހިލާފަށް ހޫނު ގަދަވެފައިވަނީ، މޫސުމަށް އަންނަ ބަދަލުތަކުގެ ސަބަބުންނެވެ. މޫސުމަށް ނުރަނގަޅު އަސަރުތަކެއް ކުރަމުން ދަނީ، ޖައްވަށް ދޫކުރާ ވިހަ ގޭސްތަކުގެ ސަބަބުން، ދުނިޔޭގެ އޯޒޯން ފަށަލަ ފޫގޮސް، އިރުން ފޮނުވާ ނުރައްކާތެރި ދޯދިތައް މި ބިމަށް ފޯރާ މިންވަރު އިތުރުވާތީ އެވެ.

ދުނިޔޭގެ މޫސުމަށް އަންނަ ބަދަލުތައް ދިރާސާކުރާ ތަޖުރިބާކާރުން ބުނާ ގޮތުގައި ކެނެޑާގެ ހުޅަނގު ސަރަހައްދަށާއި އެމެރިކާ ސަރަހައްދަށް، މިދިޔަ ޖޫން މަހު ފަހުކޮޅު އާދަޔާ ހިލާފަށް ހޫނު ގަދަވުމުގައި، ދުނިޔޭގެ މޫސުމަށް އައި ބަދަލުތައް ފިޔަވައި އެހެން ސަބަބެއް އޮތް ކަމަކަށް ނުބެލެވެ އެވެ.