ނިޔާޒީ، އޮޑިޓަ ޖެނެރަލްގެ މަގާމުގެ ހުވާކުރައްވައިފި

އެސިސްޓެންޓް އޮޑިޓާ ޖެނެރަލްގެ މަގާމުގައި މިހާތަނަށް ހުންނެވި ހުސައިން ނިޔާޒީ އޮޑިޓާ ޖެނެރަލްގެ މަގާމުގެ ހުވާ ދެންމެ ކުރައްވައިފި އެވެ.

އެންމެ ފަހުން ހުންނެވި އޮޑިޓާ ޖެނެރަލް ހަސަން ޒިޔަތު މަގާމުން އިސްތިއުފާ ދެއްވުމުން އެ މަގާމަށް ނިޔާޒީ އައްޔަންކުރަން ރައްޔިތުންގެ މަޖިލީހުން ރުހުން ދިނީ މިިދިޔަ ބުރާސްފަތި ދުވަހު އެވެ.

ހަސަން އިސްތިއުފާ ދެއްވީ އެމްއެމްޕީއާރުސީގެ ބޮޑު ހިޔާނާތުގެ ފައިސާ ލިބުނު ފަރާތްތަކުގެ ލިސްޓުގައި އޭނާގެ ނަން އޮތުމުން ނެވެ. އިސްތިއުފާގެ ސިޓީގައި ހަސަން ވިދާޅުވެފައި ވަނީ ހިޔާނާތުގެ ފައިސާ ނަންގަވާފައި ނުވާނެ ކަމަށާއި އެހެން ނަމަވެސް އިސްތިއުފާ ދެއްވީ ލިސްޓްގައި ނަން އޮތުމުން އޮޑިޓް އޮފީހުގެ ކަރާމާތް ގެއްލޭ ކަމަށެވެ.

ހަސަންގެ އިސްތިއުފާ އަށް ފަހު، އޮޑިޓާ ޖެނެރަލްގެ މަގާމަށް ކުރިމަތިލާން ހުޅުވައިލުމުން ކުރިމަތިލެއްވި ބޭފުުޅުންގެ ތެރެއިން ރައްޔިތުންގެ މަޖިލީހުގެ ރުހުން ހޯދުމަށް ރައީސް އިބްރާހިމް މުހައްމަދު ސޯލިހު ފޮނުއްވީ ނިޔާޒީގެ ނަން އެކަންޏެވެ. އޮޑިޓާ ޖެނެރަލްކަމަށް ނިޔާޒީ އައްޔަން ކުރަން ފެންނަ ކަމަށް މަޖިލީހުން ރުހުން ދިނީ ބުރާސްފަތި ދުވަހުގެ އެ ވޯޓުގައި ބައިވެރިވެވަޑައިގެންނެވި 55 މެމްބަރުންގެ އިއްތިފާގުންނެވެ.

ނިޔާޒީ، އޮޑިޓަ ޖެނެރަލްކަމުގެ މަގާމުގެ ހުވާ މިއަދު ކުރައްވަނީ.---ފޮޓޯ: ރައީސް އޮފީސް

މާލިއްޔަތު ކޮމިޓީގެ ރިޕޯޓް މަޖިލީހަށް ހުށަހަޅުއްވަމުން އެ ކޮމިޓީގެ މުގައްރިރު، ކިނބިދޫ ދާއިރާގެ އެމްޑީޕީގެ މެމްބަރު މުހައްމަދު ނާޝިޒު ވިދާޅުވީ އޮޑިޓާ ޖެނެރަލަކަށް ނިޔާޒީގެ ހުރިހާ ޝަރުތެއް ހަމަވޭތޯ މަޖިލީހުގެ ސެކްރެޓޭރިއަޓުން ބެލި އިރު އެ ކަންކަން ވެސް ހަމަވާ ކަމަށެވެ. ނިޔާޒީއާ ކޮމިޓީން އިންޓަވިއު ކުރުމަށް ފަހު ރުހުން ދޭން ފާސްކުރީ ކޮމިޓީގެ 12 މެމްބަރުންގެ އިއްތިފާގުން ކަމަށް ވެސް ނާޝިޒު ވިދާޅުވި އެވެ.

އޮޑިޓާ ޖެނެރަލްގެ އޮފީހުގެ ފައިނޭންޝަލް އޮޑިޓް ސާވިސަސް ޑިވިޝަންގެ ވެރިޔާގެ މަގާމު ވެސް ފުރުއްވާ ނިޔާޒީ އެސިސްޓެންޓް އޮޑިޓާ ޖެނެރަލެއްގެ މަގާމަށް އައްޔަންކުރީ 2011 ވަނަ އަހަރު އެވެ. ފައިނޭންޝަލް އޮޑިޓް ސާވިސަސް ޑިވިޝަނަކީ ދައުލަތުގެ އިދާރާތަކާއި ކުންފުނިތަކުން ފައިސާ ހަރަދުކުރާ ގޮތުގެ އޮޑިޓްތައް ކުރާ ޑިވިޝަނެވެ.

އޮޑިޓް އޮފީހުގައި 15 އަހަރު ދުވަހަށް ވުރެ ދިގުު މުއްދަތެއްގައި މަސައްކަތް ކުރައްވާފައިވާ ނިޔާޒީ އަކީ މިހާތަނަށް އޮޑިޓާ ޖެނެރަލްގެ އޮފީހުގެ ލައިސަންސިން އެންޑް ޑިސިޕްލިނަރީ ކޮމިޓީގެ ވެސް ޗެއާ އެވެ. އެ ކޮމިޓީގެ މެންޑޭޓަކީ ޕްރައިވެޓް ސެކްޓާ އޮޑިޓިންގެ ކަންތައްތައް ރެގިއުލޭޓް ކުރުމެވެ. އޭނާއަކީ ޗާޓާޑް މެނޭޖްމެންޓް އެކައުންޓެންޓެކެވެ.