އަޝްމަލީ ހިމެނޭ މައްސަލާގައި މިހާތަނަށް 40 މީހަކު ހައްޔަރުކޮށްފި

ސްރީ ލަންކާގައި އުމުރުން 15 އަހަރުގެ ކުއްޖަކު ލައްވައި ހަށިވިއްކުވައި އެ ކުއްޖާގެ ބޭނުން ނަހަމަ ގޮތުގައި ހިފި މައްސަލާގައި ހައްޔަރުކުރި މީހުންގެ އަދަދު 41 އަށް އަރައިފި އެވެ.

މީގެ ދެ ހަފްތާ ކުރިން ފަޅާއެރި މި މައްސަލައިގައި މައުންޓް ލެވީނާ ސަރަހައްދުގައި އެ ކުޑަކުއްޖާ ވިއްކީ ވެބްސައިޓްތަކެއް ހަދައިގެންނާއި ސޯޝަލް މީޑިއާ ޕްލެޓްފޯމްތައް މެދުވެރިކޮށް އިޝްތިހާރުކޮށްގެންނެވެ. ލަންކާ ފުލުހުންނަށް އެކަން އެނގި ބަޔަކު ހައްޔަރުކުރި އިރު އެކަން ހިންގާތާ ތިން މަހެއްހާ ދުވަސް އޮތީ ވެފަ އެވެ.

ހައްޔަރުކޮށް ބަންދު އިތުރުކޮށްފައިވާ މީހުންގެ ތެރޭގައި ކުރީ ސަރުކާރުގައި ފިނޭންސް މިނިސްޓްރީގެ ސްޓޭޓް މިނިސްޓަރުކަން އަދި ދިރާގުގެ ޗެއާމަންކަން ކުރެއްވި މުހައްމަދު އަޝްމަލީ ހިމެނެ އެވެ. އޭނާއަކީ ކުއްޖާ ގާތަށް ދިޔަ "ކަސްޓަަމަރެއް" ކަމަށް ލަންކާ ފުލުހުން ތުހުމަތުކުރެ އެވެ.

އުމުރުން 45 އަހަރުގެ އަޝްމަލީ މި މަހުގެ 16 އާ ހަމައަށް ބަންދުގައި ބަހައްޓަން ކޯޓުން ނިންމާފައިވާއިރު އޭނާ ކޯޓުގައި ބުނެފައި ވަނީ، އޮންލައިންކޮށް ފައިސާ ދައްކައި ބުކިން ހެއްދީ ވެބްސައިޓަކުން އިސްތިހާރެއް ފެނިގެން "އޮއިލް މަސާޖެއް ކުރަން" ކަމަށެވެ. އަދި ބުކިން ހެއްދިއިރު އެއީ ކުޑަ ކުއްޖެއްކަން ނޭނގޭ ކަމަށް ވެސް ބުންޏެވެ.

ހައްޔަރުކޮށްފައިވާ މީހުންގެ ތެރޭގައި، ކުއްޖާގެ މައިންބަފައިންގެ އިތުރުން، ނޭވީ ޑޮކްޓަރަކާއި، ސިޔާސީ މީހަކާއި، ޑްރައިވަރުންތަކަކާއި، ފާދިރީއަކާއި، ވިޔަފާރިވެރިންތަކަކާއި، ކުރީގެ ބޭންކް މެނޭޖަރަކާއި، ހޮޓެލް މެނޭޖަރަކާއި، ފުލުސް އޮފިސަރަކާއި، ކުއްޖާ ވިއްކަން ބޭނުން ކުރި ވެބްސައިޓުތަކުގެ ވެރިންނާއި، އިސްތިހާރު ހެދި މީހުން ހިމެނެ އެވެ.

އޭގެ ތެރެއިން ގިނަ މީހުންނަކީ ކުއްޖާއާ ގުޅުން ހިންގި ކަމުގެ ތުހުމަތު ކުރެވޭ މީހުންނެވެ.

ނޭވީ ޑޮކްޓަރާއި، ސިޔާސީ މީހާގެ އިތުރުން ދެ ވިޔަފާރިވެރިއަކަށް ބެއިލް ދައްކައިގެން ބަންދުން ސަލާމަތްވެވޭނެ ގޮތް ކޮލަމްބޯ މެޖިސްޓްރޭޓު ކޯޓުން މި މަހުގެ ނުވަ ވަނަ ދުވަހު ވަނީ ހަމަޖައްސައިދީފަ އެވެ.

Ashmalee dhifaaugai bunee kuda kujjeh kameh neynge ey

The most trusted news source in the Maldives

Mihaaru

މި މައްސަލައިގައި ފުލުހުން އެންމެ ސީރިއަސް ތުހުމަތުތައް ކުރަނީ ކުއްޖާގެ މައިންބަފައިންނަށެވެ. ބައެއް މީޑިއާތަކުގައިވާ ގޮތުން އެ ކުއްޖާގެ ބައްޕަ ވަނީ ކުއްޖާއަށް ޖިންސީ ގޯނާކޮށްފަ އެވެ. އެކަމަށް އެހީވުމުގެ ތުހުމަތު ކުއްޖާގެ މަންމައަށް ކުރެވެ އެވެ. އަދި ކުއްޖާ ވިއްކުމުގައި މަންމަގެ ބައިވެރިވުން އޮތް ކަމަށް ވެސް ވަނީ ތުހުމަތު ކުރެވި އެވެ.