މިހާރުގެ ރެސިިޕީ: ހަވާދުލީ ބިސް

ބޭނުންވާތަކެތި

½1 ޖޯޑު ފުށް

1 ދަޅު ފެންމަސް

½ ޖޯޑު ކާށި ހުނި

½ ޖޯޑު ކާށި ކިރު

2 ފިޔާ (އާދައިގެ)

1 ސައިސަމުސާ އިނގުރު (ގާނާފައި)

1 ސައިސަމުސާ ލޮނުމެދު (ގާނާފައި)

½ ސައިސަމުސާ އަސޭމިރުސް (މުގުރާފައި)

1 ސައިސަމުސާ ޓޮމާޓޯ ޕޭސްޓު

2 މޭޒުމަތީސަމުސާ ފުނޑާފައިވާ ހަނާކުރި ތެޔޮ ހަވާދު (އައްޑޫ ހަވާދު)

ގިތެޔޮމިރުސް، ލޮނު، ރީނދޫ، ލުނބޯ، ތެޔޮ، ރާނބާފަތް، ހިކަނދިފަތް (ކޮށާފައި)

މަސްގަނޑު ހަދާ ގޮތް

އެއް ފިޔާ، ރީނދޫ، ލޮނު، ދެބައިކުޅަ އެއްބައި އަސޭމިރުސް، ގިތެޔޮމިރުސް، ހިކަނދިފަތް އަދި އިނގުރު އެއްކޮށްގެން މޮޑެފައި، ލުނބޯ ޖެހުމަށް ފަހު، ހުންޏާއި މަސް ވެސް އެއްކުރުން. ރަނގަޅަށް މޮޑުމަށް ފަހު 20 ގުޅަ ޖެހުން. ރޮށި ފިހާ ގޮތަށް ފުށް މޮޑެފައި، އެ އިން ވެސް 20 ގުޅަ ޖެހުން. ކޮންމެ ފުށްގުޅައެއްގެ ތެރެއަށް މަސްގުޅައެއް ލާފައި، ބިހުގެ ބައްޓަމަށް ހެދުން.

ބިސް ކައްކާ ގޮތް

ކެކިކެކި ހުރި ފެނުގެ ތެރޭގައި 15 މިނެޓު ވަންދެން ބިސްތައް ކައްކާލުން. ކައްކާއިރު، ބައި މޭޒުމަތީސަމުސާ ތެޔޮ، ފެންގަނޑަށް އަޅަން ވާނެ. އެހެން ނޫނީ ބިސްތައް ތަތްލާނެ. ފެން ހުންނަން ވާނީ ބިސްތަކުގެ މަތިން ކިރިޔާ އަރާ ވަރަށް. ބިސްތައް ރަނގަޅަށް ކެކުނީމައި، ފެންގަނޑާ ހަމައަށް ބިސްތައް އަރާނެ. އެރުމުން ބިސްތައް ނެގުން.

ބިހުގައި ލާ ހަވާދު ހަދާ ގޮތް

ރާނބާފަތާއި، ހިކަނދިފަތް ލައިގެން ފިޔާ މީރުކޮށްފައި، ލޮނުމެދު އެޅުން. ޓޮމާޓޯ ޕޭސްޓު އަޅާފައި، އެއްކުރަމުން، ތިން މިނެޓު ފަހުން ހަވާދު އެޅުމަށް ފަހު، ބައި ޖޯޑު ފެން އެޅުން. ފެންފޮދު ހިނދެންދެން، މަޑު ގިނީގައި، ރަނގަޅަށް އެއްކުރަމުން ކެއްކުން. ލޮނާއި، ކިރާއި، އަސޭމިރުސް އެޅުން. ބޭނުމިއްޔާ ގިތެޔޮމިރުސް ވެސް އެޅިދާނެ. ތިން މިނެޓު ވަންދެން ކައްކާފައި، މާ ހިކިއްޔާ ކުޑަ ފެންފޮދެއް އަޅާފައި، ރަނގަޅަށް އޮލަ ކޮށްލާފައި، ބިސްތައް އަޅާލުން. ރަނގަޅަށް ބޮކިޖަހައި ހަވާދުގަނޑު ކެކެން ފެށުމުން އުނދުން ނިއްވާލުން.

އެޑިޓަރުގެ ނޯޓް

މި ރޯދަ މަހު "މިހާރު"ގެ ކިޔުންތެރިންނަށް މި ގެނެސްދެނީ ފާތިމަތު ޚުރުޝިދާގެ ރެސިޕީތަކެކެވެ. އޭނާ ވަނީ ދިވެހި ރަހަތައް ހިމެނޭ ގޮތަށް ވަރަށް ގިނަ އަދަދަކަށް އަމިއްލަ ރެސިޕީތައް ހަދައި، އާންމުންނަށް ދޫކޮށްލައިފަ އެވެ. އެ ހުރިހާ ރެސިޕީއެެއް އޭނާ ވަނީ https://web.facebook.com/Rumaa-495764227208278 ގައި ހިމަނައިފަ އެވެ.