ރޮހިންޖާ މީހުންނަށް އެހީވުމުގައި ދިވެހިން ނަމޫނާއަކަށް

ލާއިންސާނީ އަނިޔާތަކުން ސަލާމަތްވާން މިޔަންމާގެ ރަކީން ސްޓޭޓުން ބަންގްލަދޭޝް އަށް ހިޖުރިކުރި ރެފިއުޖީންނަށް ކުއްލި އެހީ ހޯދަން ބައިނަލްއަގުވާމީ ރެޑް ކްރޮސް އަދި ރެޑް ކްރެސެންޓް ޖަމާއަތުން (އައިއެފްއާރުސީ) ކުރި އިލްތިމާސަށް ދުނިޔޭގެ އެކި ގައުމުތަކުން އިޖާބަދިން އިރު ރާއްޖެ އިން ވެސް އެކަމަށް ތަރުހީބު ދިނެވެ. އަދި ރާއްޖޭގެ ރެޑް ކްރެސެންޓުން މިހާރު ބުނާގޮތުގައި ދިވެހިން ދިން އެހީއަކީ ދުނިޔޭގެ ވެސް ނަމޫނާ އެކެވެ.

ސެޕްޓެމްބަރު މަހުން ފެށިގެން އެކި ފަރާތްތަކުން ފަންޑް ރެއިޒްކޮށްގެންނާއި ވަކިވަކި މީހުންގެ ފަރާތުން 7.6 މިލިއަނަށް ވުރެ ރުފިޔާ މޯލްޑިވިއަން ރެޑް ކްރެސެންޓަށް ވަނީ ލިބިފަ އެވެ. އެ ފައިސާ އޮކްޓޯބަރު މަހުގެ ނިޔަލަށް އައިއެފްއާރުސީއާ ހަވާލުކޮށް، ރޮހިންޖާ މީހުންނަށް އެހީތެރިވުމުގެ މަސައްކަތުގައި ބޭނުންކުރަން ފަށާފައިވާ އިރު، އާބާދީގެ ނިސްބަތުން އައިއެފްއާރުސީގެ ފަންޑަށް އެންމެ ގިނަ އަދަދެއްގެ ފައިސާ ހަދިޔާކުރީ ރާއްޖެ އިން ކަމަށް ރެޑް ކްރެސެންޓުން ބުނެ އެވެ. އެއާއެކު، އައިއެފްއާރުސީ އިން ވަނީ ބަންގްލަދޭޝް އަށް ގޮސް، ރެފިއުޖީންގެ ހާލަތާއި އެ މީހުންނަށް އެހީތެރިވުމުގެ މަސައްކަތް ބަލައިލަން ރާއްޖޭގެ ރެޑް ކްރެސެންޓަށް މަގުފަހިކޮށްދީފަ އެވެ. އޭގެ ބޭނުމަކީ، ރެޑް ކްރެސެންޓުން ފާހަގަކުރި ގޮތުގައި، އެހާ ބޮޑު އެހީއެއް ފޯރުކޮށްދިން ދިވެހިންނަށް ރެފިއުޖީންގެ ހާލަތު ބުނެދީ "ދިވެހިންނަށް ޖަވާބުދާރީވުމުގެ ފުރުސަތު" އެ ޖަމްއިއްޔާ އަށް ދިނުމެވެ.

"މިއީ ރެޑް ކްރެސެންޓުގެ ގޮވާލުމަކަށް އެހީގެ މިހާ ބޮޑު އަދަދެއް ލިބުނު ފުރަތަމަ ފަހަރު. އެހެންވީމާ މިއީ އަޅުގަނޑުމެންނަށް ވެސް ކުރެވުނު ވަރަށް ބޮޑު ތަޖުރިބާއެއް،" ރޮހިންޖާ މީހުންގެ ހާލަތު ބަލައިލަން ބަންގްލަދޭޝްގެ ކޮކްސް ބާޒާރަށް މި ހަފްތާގައި ޒިޔާރަތްކުރި ރެޑް ކްރެސެންޓްގެ ދެ އޮފިޝަލުންގެ ތެރޭގައި ހިމެނިވަޑައިގެންނެވި އެ ޖަމްއިއްޔާގެ ސެކްރެޓަރީ ޖެނެރަލް ނޫރާ މުހައްމަދު ވިދާޅުވި އެވެ.

"ޖުމްލަ 0.5 މިލިއަނަށް ވުރެ ގިނަ ޑޮލަރު ރާއްޖެ އިން ހަދިޔާކުރި އިރު ބޮލަކަށް ގާތްގަނޑަކަށް 1.25 ޑޮލަރު މި ޖެހެނީ. މިއީ ރާއްޖޭގެ އާބާދީ އަށް ބަލާ އިރު ފާހަގަކުރެވޭ ވަރުގެ ބޮޑު އަދަދެއް. އަދި މިއީ އައިއެފްއާރުސީގެ އިމަޖެންސީ އެޕީލްއަށް، އާބާދީގެ ނިސްބަތުން ގައުމަކުން ހަދިޔާކުރި އެންމެ ބޮޑު އަދަދު."

ރޮހިންޖާ މީހުންނަށް ރެޑް ކްރެސެންޓް މެދުވެރިކޮށް ރާއްޖެ އިން ހަދިޔާކުރި ފައިސާގެ ބޮޑު ބަޔަކީ ރާއްޖެ ޓީވީން ހިންގި ފަންޑް ރެއިޒިން ހަރަކާތަށް ލިބުނު 5.1 މިލިއަން ރުފިޔާ އެވެ. އަދި އެހެނިހެން ގޮތްގޮތުން ވެސް ގިނަ އަދަދެއްގެ ފައިސާ ލިބުނުކަން ރެޑް ކްރެސެންޓުން ފާހަގަކުރެ އެވެ.

"ގާތްގަނޑަކަށް 400-500 މީހުން ދރިއުޅޭ ކުދިކުދި ރަށްރަށުން ވެސް ކައުންސިލް މެދުވެރިކޮށް ބޮޑެތި އެހީތަކެއް ވި. ވިޔަފާރިވެރިންނާއި ބައެއް ކުންފުނިތަކުން ވެސް ފައިސާ ހަދިޔާކުރި. އަދި ރާއްޖޭގައި ދިރިއުޅޭ ބަންގްލަދޭޝް މީހުން ވެސް ގާތްގަނޑަކަށް 5،000 ޑޮލަރު އެއްކޮށްގެން ހަދިޔާކުރި. އެ މީހުންނަކީ މާކަ ބޮޑު އެއްޗެއް ލިބޭ ބައެއް ވެސް ނޫން. އެކަމަކު ވެސް އެހީވާން އެހާ ބޮޑަށް މަސައްކަތްކުރުން އެއީ ވަރަށް ޚާއްސަ ކަމެއް،" ނޫރާ ވިދާޅުވި އެވެ.

ކޮކްސް ބާޒާރުގައި ދެ ދުވަހާއި ބައި ހޭދަކޮށް ކޭމްޕްތައް ބަލައިލާ ރެފިއުޖީންނާ ބައްދަލުކުރުމުގެ ފުރުސަތު ރެޑް ކްރެސެންޓަށް ވަނީ ލިބިފަ އެވެ. ނޫރާ ވިދާޅުވި ގޮތުގައި ސިއްހީ ފަރުވާ، ފެނާއި ނަރުދަމާ، ބޯހިޔާވަހިކަން އަދި ކާބޯތަކެތީގެ ބޭނުންތަކުގެ އިތުރުން ނަފްސާނީ އެހީތެރިކަން ވެސް އެ މީހުންނަށް ވަރަށް ބޮޑަށް ބޭނުންވެ އެވެ. ދިވެހިން ހަދިޔާކުރި ފައިސާ ޚަރަދުކުރަން ހަމަޖެހިފައިވަނީ އެފަދަ ޚިދުމަތްތައް ފޯރުކޮށްދިނުމަށްކަން ފާހަގަކުރައްވައި އޭނާ ވިދާޅުވީ އެ އެހީ ބޭނުންކުރާނީ ރަކީން ސްޓޭޓްގެ މީހުން "ބޭނުންވާ ކަންކަން ވަރަށް ބޮޑަށް އެނގިގެން ސީދާ އެ ބޭނުންތަކަށް" ކަމަށެވެ. ރާއްޖެ އިން ހަދިޔާކުރި ފައިސާ ހޭދަކުރާނީ މިދިޔަ ސެޕްޓެމްބަރުން ފެށިގެން އަންނަ އަހަރުގެ ސެޕްޓެމްބަރަށް، އެއް އަހަރަށް ބަހާލައިގެންނެވެ.

"ކުރެވޭ މަސައްކަތްތަކަށް ބަލާ އިރު އެއް ކަމަކީ ވަރަށް ވަރުގަދަ ފީލްޑް ހޮސްޕިޓަލެއް އައިއެފްއާރުސީން ގާއިމްކޮށްފައި އެބަހުރި. މީސްލްސް އަދި ޑިފްތީރިއާ ކަހަލަ ބަލިތައް ފެތުރެމުންދާ އިރު ކުޑަކުދިންގެ ވެސް ފުރާނަ އަށް އެބަ ނުރައްކާވޭ. މެލްނިއުޓްރިޝަން ސަބަބުން ދިފާއީ ނިޒާމު ބަލިކަށިވެފައި ހުންނާތީ ބަލިތަކުގައި އަވަހަށް މަރުވެގެން އެބަދޭ. އޭގެ އިތުރުން އޮޕަރޭޝަންތައް ކުރަން ވެސް އެބަ ބޭނުންވޭ. މި ކަންކަމަށް ރެޑް ކްރޮސް ރެޑް ކްރެސެންޓުން ފީލްޑް ހޮސްޕިޓަލެއް އެބަ ހިންގާ،" ނޫރާ ވިދާޅުވި އެވެ.

"އޭގެ އިތުރުން ފާޚާނާ ހެދުން އަދި ސާފު ބޯފެން ދެމެހެއްޓެނިވި ގޮތެއްގައި ހޯދުމުގެ މަސައްކަތް ވެސް އެބަ ކުރެވޭ. ރެފިއުޖީންގެ ނަފްސާނީ ދުޅަހެޔޮކަމަށް އަދި އެ މީހުންގެ ރައްކާތެރިކަމަށް ވެސް މަސައްކަތްތައް އެބަކުރެވޭ. ރެފިއުޖީންގެ އާބާދީގެ 80 ޕަސެންޓަކީ އަންހެނުންނާއި ކުޑަކުދިން. އެހެންވީމާ އަންހެނުންނަށް ކުރާ އަނިޔާތަކާއި ޓްރެފިކިންގެ މައްސަލަތައް ވެސް ނުކުންނަ އިރު އެ ކަންކަމަށް ހައްލު ހޯދަން އެބަ ޖެހޭ."

މިޔަންމާ ސިފައިންނާއި ހައްދުފަހަނަޅާފައިވާ ބުޑިސްޓުން ހިންގި ޖަރީމާތަކާ ހެދި މިދިޔަ އަހަރުގެ އޮކްޓޯބަރުން ފެށިގެން ބަންގްލަދޭޝް އަށް ހިޖުރަކުރި ރޮހިންޖާ މީހުންގެ އަދަދު އަށް ލައްކަ އަށް ވުރެ މަތީގައި އުޅޭ އިރު، އެ މީހުންގެ ހާލަތަކީ ދުނިޔޭގެ ފެންވަރުން ވެސް ބޮޑު މައްސަލައެކެވެ. ނޫރާ ގަބޫލުކުރައްވާ ގޮތުގައި ރޮހިންޖާ މީހުންނަށް އެހީތެރިވުމަށް ދިވެހިންގެ ފަރާތުން އެހާ ބޮޑު ތަރުހީބެއް ލިބުނު އެއް ސަބަބަކީ އެ މައްސަލައިގެ ސީރިއަސްކަމެވެ. އޭގެ އިތުރުން އަވައްޓެރި ގައުމެއްގައި ހިނގަމުންދާ ކަމަކަށް ވުމާއި ރޮހިންޖާ މީހުންގެ ތެރޭގައި ގިނައީ މުސްލިމުން ކަމަށްވާތީ އެހީތެރިވުމުގެ ރޫހު ބޮޑުވާނެކަން ވެސް އޭނާ ފާހަގަކުރެއްވި އެވެ.

ރެޑް ކްރެސެންޓުން ބުނިގޮތުގައި ކުއްލި އެހީގެ ގޮތުގައި މިހާތަނަށް ލިބިފައިވާ ފައިސާގެ އިތުރުން އަދިވެސް 16 މިލިއަން ޑޮލަރު ހޯދަން އައިއެފްއާރުސީ އިން އަންނަނީ މަސައްކަތްކުރަމުންނެވެ. އެއާ އެކު ދެން އޮތީ ރޮހިންޖާ މީހުންނަށް އަބުރުވެރި ދިރިއުޅުމެއް ހޯދައިދިނުމުގެ މަސައްކަތެވެ.

"އެ މީހުންނަށް ހަމައެކަނި އަސާސީ ބޭނުންތައް ފުއްދައިދިނުމަކުން ނުފުދޭ. ކޮންމެ ތާކު ތިބި ބަޔަކަށް ވިޔަސް، ރެޑް ކްރޮސް ރެޑް ކްރެސެންޓުން އިންސާނީ އެހީތެރިކަން ފޯރުކޮށްދޭ އިރު، އެ ބަޔަކަށް ކަރާމާތްތެރިކަން ލިބޭނެ ދިރިއުޅުމެއް ހޯދައިދޭން ވެސް މަސައްކަތްކުރާނެ،" ނޫރާ ވިދާޅުވި އެވެ.