އެމެރިކާގެ ޑިޕާޓްމަންޓް އޮފް ޑިފެންސްގެ ނަން "ޑިޕާޓްމަންޓް އޮފް ވޯ" އަށް ބަދަލުކުރަނީ

އެމެރިކާގެ ދިފާއީ ވުޒާރާ، ޑިޕާޓްމަންޓް އޮފް ޑިފެންސްގެ ނަމެއްގެ ގޮތުގައި "ޑިޕާޓްމަންޓް އޮފް ވޯ" ބޭނުންކުރަން ނިންމައިފި އެވެ.

ރައީސް ޑޮނަލްޑް ޓްރަމްޕު މިގޮތަށް ނިންމަވާފައި މި ވަނީ ނަމަށް މި ގެންނަ ބަދަލުގެ އެމެރިކާގެ ބާރާއި ހައިބަތު އިތުރަށް ވަރުގަދަކޮށް ފެންނާނެ ކަމަށް ތަކުރާރުކޮށް ވިދާޅުވުމަށް ފަހުގަ އެވެ.

ވައިޓް ހައުސްގެ ލިޔުމެއްގައިވާ ގޮތުން ޑިފެންސް ޑިޕާޓްމަންޓުގެ "ސެކަންޑަރީ ޓައިޓަލް" އެއްގެ ގޮތުގައި "ޑިޕާޓްމަންޓް އޮފް ވޯ" ބޭނުންކުރުމާ ބެހޭ ގޮތުން ރިޔާސީ ގަރާރެއް ނެރުއްވާނެ އެވެ. ތަނުގެ ނަން އެއްކޮށް ބަދަލު ނުކޮށް، ދެ ވަނަ ނަމެއްގެ ގޮތުގައި ރީބްރޭންޑްކުރަނީ "ޑިޕާޓްމަންޓް އޮފް ޑިފެންސް" އަކީ ރަސްމީ ނަމުގެ ގޮތުގައި ގާނޫނަކުން ކަނޑައަޅާފައި ވާތީ އެވެ.

ވައިޓް ހައުސްގެ ލިޔުމުގައި ބުނެފައިވަނީ ނަމަށް ގެންނަ ބަދަލުން "ތައްޔާރީ ހާލަތުގައި އޮންނާނެކަމާއި ވަރުގަދަ އަޒުމްގެ މެސެޖު" ފޯރުކޮށްދޭނެ އެވެ.

ޓްރަމްޕް ތަކުރާރުކޮށް ވިދާޅުވެފައިވާ ގޮތުގައި އެ ޑިޕާޓްމަންޓުގެ ނަމުން ބޮޑަށް ދޭހަވަނީ "ދިފާއީ" ރޫހެވެ. އެހެންވެ އެއަށްވުރެ ވަރުގަދަކޮށް އެ ނަން އޮންނަން ބޭނުންވާ ކަމަށް ވިދާޅުވެފައިވެ އެވެ.

ޑިޕާޓްމަންޓް އޮފް ވޯ އަކީ "އަހަރެމެން ފުރަތަމަ ބޮޑު ހަނގުރާމަ އާއި ދެ ވަނަ ބޮޑު ހަނގުރާމަ އާއި ހުރިހާ ކަމެއްގައި ކާމިޔާބު ހޯދި އިރު ބޭނުންކުރި ނަން" ކަމަށް ޓްރަމްޕް ވިދާޅުވެފައިވެ އެވެ.

އެމެރިކާއަށް މިނިވަންކަން ލިބުނުތާ ކުރީކޮޅު އުފެއްދި ޑިޕާޓްމަންޓް އޮފް ވޯ އަކީ އެމެރިކާގެ އެއްގަމު ސިފައިންގެ ކަންކަމަށް އޭރު ހާއްސަ ޑިޕާޓްމަންޓެކެވެ.

ޑިޕާޓްމަންޓް އޮފް ޑިފެންސްގެ ނަމަށް ބަދަލުކުރީ ދެވަނަ ބޮޑު ހަނގުރާމައަށް ފަހު ސަރުކާރުގެ އޮނިގަނޑަށް ގެނައި ބަދަލުތަކުގެ ތެރޭގައި އެމެރިކާގެ ނޭވީ އާއި އެއާ ފޯސް ޔުނިފައިޑް ނޭޝަނަލް މިލިޓަރީ އެސްޓަބްލިޝްމަންޓަކަށް ބަދަލުކޮށް، 1949 ވަނަ އަހަރު އެވެ.

ނަމަށް ގެންނަން ނިންމާފައިވާ ބަދަލާ އެކު ވައިޓް ހައުސްގެ ލިޔުމުގައި ޓްރަމްޕު ވަނީ ދާއިމީކޮށް ނަން ބަދަލުކުރުމަށް ގާނޫނާއި ގަވައިދުތަކަށް ގެންނަންޖެހޭ ބަދަލުތައް ގެނައުމުގެ މަސައްކަތް ކުރުމަށް ސެކްރެޓަރީ އޮފް ވޯ އަށް އަންގަވައިފަ އެވެ.

ރަސްމީ ސިޓީތަކާއި، އާންމު އިއުލާނުތަކާއި ރަސްމީ އެކި ކަންކަމުގައި އަދި އެގްޒެކެޓިވް ބްރާންޗްގެ ތެރޭގައި ގާނޫނީ ލިޔުންތަކުގައި "ސެކަންޑަރީ ޓައިޓްލްސް" ބޭނުންކުރުމުގެ ހުއްދަ އޮފިޝަލުންނަށް ވަނީ ދީފަ އެވެ. -- އޭއެފްޕީ