ޝާފިއު: އޭނާ މަރުވީ ރޭގެ ވަގުތެއްގައި
15 ފެބުރުއަރީ 2017 - 14:48
13 comments
ތޮއްޑޫގެ ރައްޔިތުންނަށް އެއީ މީހުންނާ ގުޅޭ ސަމާސާ މިޒާޖުގެ މީހެކެވެ. އެހެންވެ، އެ ރަށު ބްލޫއެންޑްވައިޓްގޭ މޫސާ ޝާފިއު މަރު ވެގެން ދިޔައީ ގިނަ ބަޔަކަށް ހިތްދަތިކަން ގެނުވި، ގަބޫލުކުރަން ދަތި ހާދިސާއަކަށެވެ. މިދިޔަ ހުކުރު ދުވަހު ހިނގި ސައިކަލް އެކްސިޑެންޓުގައި ބޮޑެތި އަނިޔާތަކެއް ވެގެން، 34 އަހަރުގެ އެ ޒުވާނާ ރޭ މަރުވި ވާހަކައާ އެކު ރަށަށް ވެރިވެފައި ވަނީ ހިތާމަ އެވެ.
"ގިނަ މީހުންނަށް އަދިވެސް ގަބޫލެއް ނުކުރެވޭ އޭނާ މަރުވީ ކަމެއް. އެންމެންނަށް ވެސް ކުއްލި ޝޮކެއް ލިބިފައިވަނީ،" ތޮއްޑޫ ކައުންސިލްގެ ނައިބު ރައީސް އިބްރާހިމް ރަޝީދު ވިދާޅުވި އެވެ.
ތޮއްޑޫގެ މަގެއް: ޝާފިއު އެކްސިޑެންޓުވީ ބާރު ސްޕީޑެއްގައި ދުއްވާފައި ދަނިކޮށް ސައިކަލު ރުކެއްގައި ޖެހިގެން-- ފޮޓޯ: އައިމިނަތު ޝިފްލީން
މޫސާ ޝާފިއު އަކީ އެ ރަށުގައި ދުއްވާ "ނަސްރު" ލޯންޗު ކެޕްޓަނެވެ. ގިނަ މީހުންނާ އޭނާ ގުޅުން އޮންނަނީ ވެސް އެހެންވެ އެވެ. މުހިއްމު އެއްޗެއް މާލެއަށް ފޮނުވަން ޖެހުނަސް އެ އެއްޗެއް ހަވާލު ކުރާނީ ޝާފިއު އާ އެވެ. އެހެންވެ، އޭނާ ވެފައި ވަނީ ތޮއްޑޫ މީހުން ވަރަށް އިތުބާރު ކުރާ އަދި ވަރަށް ގާތް އެކުވެރިއަކަށެވެ. އޭނާ އަކީ އެ ރަށުގައި އޮންނަ ބްރައިޓް ކްލަބްގައި ވެސް ވަރަށް ހަރަކާތްތެރި މީހެކެވެ. ހިތްހެޔޮ، ދީނީ ކަންކަމަށް އިސްކަން ދޭ މީހެކެވެ.
އެނގިފައިވާ ގޮތުގައި މިދިޔަ ހުކުރު ދުވަހު އެ އެކްސިޑެންޓް ހިންގީ، ތިން މީހަކު އަރައިގެން ދުއްވި ސައިކަލު ކޮންޓްރޯލް ނުކުރެވިގެން ގޮސް ރުކެއްގައި ޖެހިގެންނެވެ. އެކްސިޑެންޓްވި އިރު ސައިކަލް ދުއްވަން އިން ޝާފިއުގެ ބޯ، ރުކުގައި ޖެހި ބޮލުގެ ނާށިގަނޑު ވަނީ ފަޅައިގެން ގޮސްފަ އެވެ. އޭގެ އިތުރުން އޭނާގެ މޫނުމަތި ވެސް ވަރަށް ބޮޑަށް ޒަހަމްވެފައި ވެ އެވެ.
ރޭ 9:30ހާއިރު އޭނާ މަރުވީ، އައިޖީއެމްގެ އައިސީޔޫގައި ފަރުވާދެމުން އަންނަތާ ފަސް ވަރަކަށް ދުވަސް ފަހުންނެވެ. މަރުވި އިރު ވެސް އޭނާގެ ހެޔެއް ނެތެވެ.
ރަޝީދު ވިދާޅުވީ ހަތަރު މީހުން ހިމެނޭ އާއިލާގެ އެންމެ ދޮއްޓަށް ހުންނަ ފިރިހެން މީހާ އަށް ވުމުން އާއިލާގެ ހުރިހާ ހަރަދުތަކެއްހެން ބަލަހައްޓަނީ އޭނާ އާއި ހަގަށް ހުންނަ ފިރިހެން ކޮއްކޮ އެވެ. އަދި ހަތް އަހަރުގެ ދަރިއެއް ހުންނަ ޝާފިއު އަކީ ވަރަށް ޒިންމާދާރު މީހެއްކަން ވެސް އޭނާ ފާހަގަ ކުރި އެވެ.
ތޮއްޑޫގެ މަގެއް: ޝާފިއު އެކްސިޑެންޓުވީ ބާރު ސްޕީޑެއްގައި ދުއްވާފައި ދަނިކޮށް ސައިކަލު ރުކެއްގައި ޖެހިގެން
"އެއީ އާއްމުކޮށް ބާރަށް ސައިކަލް ދުއްވާ މީހެއް ވެސް ނޫން. ދެން އެ ދުވަހު ހަމައެހެންވީ،" ރަޝީދު ވިދާޅުވި އެވެ.
ތިން މީހުން އަރުވައިގެން ސައިކަލް ދުއްވުމަކީ ތޮއްޑޫގައި ވަރަށް އާއްމު ކަމެކެވެ. އަދި މިއީ ކައުންސިލުން މަނާކުރަން ބޭނުންވާ އެކަމަކު އަދި މިހާތަނަށް ނުކުރެވި އޮތް ކަމެއް ކަމަށް ރަޝީދު ވިދާޅުވި އެވެ.
އޭނާ ވިދާޅުވީ ތޮއްޑޫގައި ފަހަކަށް އައިސް ބާރަށް ސައިކަލު ދުއްވުމާއި ގަވައިދާ ހިލާފަށް ސައިކަލު ދުއްވުން އިތުރުވެފައިވާ ކަމަށެވެ. އެހެންވެ އެކަން ކޮންޓްރޯލް ކުރުމަށް އެ ރަށުގައި ފުލުހުން ބައިިތިއްބުމަށް މަޝްވަރާ ކުރަމުން އަންނަ ކަމަށް ވެސް ރަޝީދު ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އާދަމް
16 February 2017
އެންމެ ހިތާމަޔަކީ ޝާފިޔުގެ ބައްޕަ ކެންސަރު ބަލީގައި ކުއްލިއަކަށް ނިޔާވިތާ ސާޅީސް ވީ ދުވަސް ޝާފިޔު ނިޔާވިދުވަސް.. މާތް ﷲ އާއިލާ އަށް ކެތްތެރިކަން ދެއްވާށި! އާމީން
ހައްލު
16 February 2017
ރާއްޖޭގައި މިހާތަނަށް ހިނގާފަ ހުރި ހިތާމަވެރި އެކްސިޑެންޓް ތަކަށް ބަލާ އިރު ރާއްޖެ ގެނެސް ގެން ދުއްވާ ސައިކަލް ތަކުގެ ސްޕީޑް ލިމިޓް އޭގެ ޑިސައިން އަށް ބަދަލު ގެނެސްގެން ނަމަވެސް އެބަ ޖެހޭ 40 އިން މައްޗަށް ނުދެވޭ ގޮތަށް ހަދަން! މިހާ ލުއި ކުދި ކުދި ސައިކަލް އެހާ ބާރަށް ދުއްވާނެ ޖާގަ އެއް ނޯވޭ! ދެން ބާރު ސްޕީޑްގައި ދަނިކޮށް ކުއްލިއަކަށް މަޑު ކުރީމާ އެތިގަނޑު މިދަނީ ފަހަތު ކޮޅު ހިއްލިގެން! ދެން ދުއްވަން އިންނަ މީހާ ވިއްސައިގެން ގޮސް ޖެހޭ ބާރުމިނުން މިހެންވަނީ! އަނެއް ކަމަކީ ސައިކަލް މިއީ ރާއްޖެއަށް މުހިއްމު އެއްޗެއްވެސް ނޫން! ބައެއް ބޮޑެތި ގުޅިފައި ހުންނަ ރަށް ރަށް ފިޔަވައި އެހެން ރަށްރަށުގައި ބައިސިކަލް ދުއްވުމާ ހިނގާ ބިނގާ ވެ އުޅުމަށް ބާރު އަޅަން ވީ! ދެން އައްޑޫ، ލާމު އަދި ފުވައްމުލައް ފަދަ ރަށްތަކުގައި އެކަށީގެންވާ ފުރިހަމަ ބަހުގެ ހިދުމަތެއް ދެވެނިކޮށް މީހުން ސައިކަލް ބޭނުން ކުރުން މަދު ކުރެވޭނެ! އަދި މިފަދަ ތަންތާނގަ ވެސް ބައިސިކަލް ދުއްވުމަށް ހާއްސަ ލޭން ތައް ހަދާ ބައިސިކަލް ދުއްވުމަށާ ހިނގާ ބިނގާވެ އުޅޫމަށް ބާރު އަޅަންވީ! އަޅުގަނޑު ހިއްމަފުށްޓަށް ގޮސްފަ ހަމަ ބޯހަލާކުވި! އެހާ ކުޑަ ކުޑަ ރަށެއްގައިވެސް ސައިކަލް ގިނަ ކަމުން! މިއީ ސިޔާސަތު ކަނޑަ އަޅާ ފަރާތްތަކަުން ވިސްނަން ޖެހޭ ކަންކަން! އަހަރެމެން ކިތައްމެ ވަރަކަށް ޔޫރަޕްގެ މަގުތައްހެން މަގު ހަދައިގެން އެއްޗިހި ދުއްވަން އުޅުނަސް އެކަމެއް ނުވާނެ! އަހަރެމެންގެ ރަށްތަކަކީ ކުދި ކުދި އަދި ފަސޭހަ ކަމާ އެކު ހިނގާ ބިނގާވެ އުޅެވޭނެ ގޮތަށް ގުދުރަތީ ގޮތުން ހުރި ރަށްރަށް! އަސްލުގަ ކުދި ކުދި ރަށްރަށުގައި ތާރުވެސް އެޅުން މުހިއްމެއް ނޫން! މައްސަލޔަކީ އަހަރެމެން ތަރައްގީވާން ބޭނުންވަނީ ބޭރުގެ ގައުމުތައް ކޮޕީ ކޮށްގެން! އެއްގޮތަކަށް ވެސް އަހަރެމެންގެ ރަށްތަކުގެ ތަބީއީ ސިފަތަކަށް ބަލައިގެންނެއް ނޫން!
ބައިސްކަލު
16 February 2017
ކޮމެންޓު ކުރީމަ އެންމެން ވެސް ލައިކް ކުރާނެ. ޢެކަމަކު ބައިސްކަލު ދުއްވަން އެކަކުވެސް ބޭނުމެއް ނުވޭ! އެހެންނަމަ އެވަރު ވިސްނޭމީހުން ބައިސްކަލުގަ އުޅޭނީ. މީހުން ކޮމެންޓްކުރީމަ ލައިކް ކުރަން ނުތިބެ. ދިވެހިންގެ އާންމު އުސޫލަކީ ހުރިހާ ކަމެއް ވެސް އެނގޭނެ އެކަމަކު އަމިއްލަ ނަފުސު އިޞްލާޙުކޮށް އެގޮތަށް ޢަމަލުކުރާނެ ބަޔަކު ނުތިބޭނެ.
ޕޮގޭ
15 February 2017
މީހަކު ކުއްލިގޮތަކަށް މަރުވީމަ ދެރަވެ މަރުއައިސްޖެހުނީމަ ކޮންމެވެސްކަމެއްވެގެން މަރުވާނެ
ހާދަ ނުވިސްނޭ
16 February 2017
ބޭފުޅާ ޤަޟާ ޤަދަރަށްވެސް އީމާން ނުވަނީ ތޯ! ކަރުގައި ދަންމަޅިއެއް އައްސައިގެން އޮވެ ވެސް ބުނެވިދާނެ މަރު އައިސް ޖެހޫނީމަ އޭ މަރުވީ!
Thimanna
15 February 2017
ތިޔަ ރަށަށް 3 މީހުން އަރުވައިގެން ދުއްވޭކަހަލަ ސައިކަލު ގެންނަން ވީނުން
ނޫން
16 February 2017
ކުދި ރަށް ރަށުގައި ސައިކަލް ދުއްވުމުގެ އެއްވެސް ބޭނުމެއްނެތް! ހިނާގާފަ އުޅެވޭ ވަރު ގެ ރަށް ރަށް ހުރީ ގިނައިން! ދެން ބައިސިކަލް ދުއްވަންވީ! މިއީ ފަސޭހަ ސިއްހަތަށްވެސް ފައިދާ ހުރި ގޮތަކީ!
އިބިރިހިންބެއްޔާ
15 February 2017
މައްސަލަޔަކީ މާބާރަށް ދުއްވުން. 3 މީހުން އަރުވައިގެން ހައިވޭނޫން މަގުތަކުގައި ދުއްވުމަކީ ގިން ޤައުމުތަކެއްގައި އާއްމު ކަމެއް. އަންޑިޔާގައި ހެލްމެޓް އަޅަނީވެސް ދުއްވާމީހާ އެކަނި. ދުއްވަންވީ މައިތިރިވާނެ ސްޕީޑެއްގައި.
އެހެނެއްނުން
16 February 2017
އަހަރެެންގެ ވިސްނުން ބަދަލުވާންވީ! އިންޑިޔާ ގެ ހައިވޭ ތަކަކީ ރާއްޖޭ ގެ ދިހަ ރަށުގެ ދިގުމިން ހުންނަ ތަންތަން! އެހެންވީމާ ބާރު ސްޕީޑްގަ ދަމުންވެސް މަޑު ކުރެވޭނެ ޖާގާ އޮވޭ! ރާއްޖޭގެ ކުދި ކުދި ރަށްތަކަށް ސައިކަލް ބޭނުމެއްނުވޭ!
ފުލުސް މީހާ
15 February 2017
ތޮއްޑޫ ކައުންސިލުން ބޭނުންވާކަމެއް ނޫން ތޮއްޑޫގައި ފުލުހުން ބޭތިއްބުމަކީ، ސަބަބަކީ ހާއްސަކޮށް ކައުންސިލްގައި މަސައްކަތްކުރާ މުވައްޒަފުންވެސް 3 މީހުން އަރުވައިގެން ސައިކަލް ދުއްވަން ބޭނުންވާތީ. އަދި އެމީހުން މިހާރުވެސް އެކަން ކުރަމުން ގެންދަނީ ގަވާއިދާ ޙިލާފަށްކަން ތޮއްޑޫގެ ކުދިބޮޑު ހުރިހާ ރައްޔިތުން ދަންނާނެ. ފުލުހުން ތޮއްޑޫ އަށް ގޮސް އެކަން ހުއްޓުވަން މަސައްކަތްކުރަން އުޅުނަސް ކައުންސިލުން އެއްބާރުލުން ނުދޭކަމަށް ވަންޏާ އެކަމެއް ނުހުއްޓުވޭނެ. ތޮއްޑޫ މީހުންނަށް ހީވާކަހަލަ ޓްރެފިކް ޤާނޫނު ހަދާފައި ހުރީ ތޮއްޑޫ މީހުންނަށް ޖެއްސުމަށްކަމަށް. މިއަދު ޝާފިއު މާދަމާ ނޭނގެ ކާކުކަމެއް. މިކަމުން އިބުރަތެއް ޙާޞިލް ކުރުން މުހިންމު. ޝާފިއު އަށް ސުވަރުގެ މިންވަރު ކުރައްވައި އާއިލާއަށް ކެއްތެރިކަން ދެއްވާ ތޮއްޑޫ ރައްޔިތުންނަށް ހެޔޮ ވިސްނުން ދެއްވާދޭވެ!!!
އަލިފުޅު
15 February 2017
ޝާފިއުއަކީ ޒިންމާދާރު މީހެއްނަމަ 3 މީހުން އަރުވައިގެން ސައިކަލްދުއްވުމަކީ މަނާކަމެއްކަން އެނގިހުރެ ނުދުވައްނާއެވެ. އަދި ކައުންސިލަކީ ޒިންމާދާރު ބައެއްނަމަ އިތުރު ޤަވާއިދެއް ހަދައިގެން އެކަން ހުއްޓުވަން މަޑުކުރާކަށްވެސް ނުޖެހޭނެއެވެ. ޤަވާއިދުވާނީ ޤަވާއިދަށެވެ. ތޮއްޑުއަށް ވަކި ޤަވާއިދެއް މާލެއަށް ވަކި ޤަވާއިދެއް ތިކަމަކަށް ނޯވެއެވެ.
ޢެޑަމް
15 February 2017
ތޮެއްޑޫއިން ފެނޭ ހަތަރުމީހުން އަރައިގެން ދުއްވާ ތަންވެސް ވަރަށް ހިތާމަ ހުރި ކަމެއް
އިބިރިހިންބެއްޔާ
15 February 2017
5 މީހުންވެސް އަރަންވީ. މަޑުން ދުއްވޭނެ ނަމަ.