26 މެއި 2018 - 00:15
54 comments
އެއް ދުވަހުން ޑްރައިވިން ލައިސަންސް ލިބޭ ޕްރޮގްރާމް ޓްރާންސްޕޯޓް އޮތޯރިޓީން މިރޭ ފެށުމާއެކު އެތައް ސަތޭކަ ބަޔަކު ކިޔޫ ޖެހިއްޖެ އެވެ.
ހުރަވީ ބިލްޑިންގެ ތިރީގައި މިރޭ 9 ޖެހުމާއެކު އެ ހަރަކާތް ފެށިއިރު އޭގެ މާ ކުރިން މީހުން ވަނީ އެއްވެފަ އެވެ. ލައިސަންސް ނެގުމަށް އެއްވެ ތިބި މީހުންގެ ކިޔޫ، އަމީރު އަހުމަދު މަގުން ފެށިގެންގޮސް ބަނޑޭރި ކޮއްޓާއި ހުކުރު މިސްކިތާވީ ވީ ގޯޅިން ގޮސް މެދުޒިޔާރަތް މަގުން ހުކުރު މިސްކިތަށް ވުރެ މާ ދުރަށް ދެމިގެންގޮސްފައިވެ އެވެ. އެކި އުމުރުގެ ގިނަ އަދަދެއްގެ އަންހެނުންނާއި ފިރިހެނުން ކިޔޫގައި ތިބިއިރު ގިނައިން ފެންނަނީ ޒުވާނުންނެވެ.
ލައިސަންސް ނެގުމަށް ހަދާފައި އޮތް ކިޔޫ ހުކުރު މިސްކިތް ކައިރީގައި-- ފޮޓޯ: ހުސައިން ވަހީދު/މިހާރު
"އެއްލަކިން މަށަށް ލައިސަންސް"ގެ ނަމުގައި މިރެއާއި މާދަމާ ރޭގެ އިތުރުން ހޯމަ ދުވަހުގެ ރޭ 9:00 އިން 12:00 އަށް ހިންގާ އެ ޕްރޮގްރާމަށް، ފޯމް ހުށަހަޅާ ތަރުތީބުން ތިއަރީ ޓެސްޓާއި ޑްރައިވިން ޓެސްޓް އެއް ދުވަހުގެ ތެރޭގައި ހަދައި ފާސްވުމުން ހަމަ އެރޭ ލައިސަންސް ލިބެ އެވެ.
ޓްރާންސްޕޯޓް އޮތީރިޓީން ބުނިގޮތުގައި މި ޕްރޮގްރާމުގައި ޑްރައިވިން ޓެސްޓް ކުރިއަށް ގެންދާނީ، މިހާރު އޮންނަ ގޮތަށް ވުރެ ފަސޭހަ އުސޫލަކުންނެވެ.
މިހާރު އޮންނަ ގޮތުން ލައިސަންސް ނެގުމަށްޓަކައި ތިއަރީ އަދި ވެހިކަލް ދުއްވުމުގެ ޓެސްޓް ހަދަން ހަފުތާ އަކަށް ވުރެ ގިނަ ދުވަސް ނަގަ އެވެ.
މި ޕްރޮގްރާމުގައި ސައިކަލް ލައިސަންސްގެ އިތުރުން ކާރާއި ޕިކަޕްގެ ލައިސަންސް ވެސް ނެގެ އެވެ.
ކިޔޫގައި ތިބި މީހުންނާ ވާހަކަ ދައްކާލުމުން ބުނީ ކުރިން ލައިސަންސް ނުނެގި އޮތީ ޕްރޮސީޖާ ދިގުކަމުން ކަމަށާއި މި ޕްރޮގްރާމާއެކު އެކަން ފަސޭހަ ވެގެންދާ ކަމަށެވެ.
"ކުރިން ވިއްޔާ ލައިސަންސް ލިބެނީ ޑްރައިވިން ސްކޫލަށް ލާރި ދައްކައިގެން، ކިޔޫގައި ތިބެގެން ތިއަރީ ހަދައިގެން. އޭގެ ފަހުން އެތައް ދުވަހެއް ފަހުން ދުއްވަން ގޮސްގެން ލައިސަންސް ނަގަން މިޖެހެނީ. އެކަމަކު މި ޕްރޮގްރާމުން އެއް ރެއިން އެބަވޭ،" ކިޔޫގައި ހުރި ޒުވާނަކު ބުންޏެވެ.
ލައިސަންސް ނެގުމަށް ޒުވާނުންތަކެއް ފޯމް ފުރަނީ-- ފޮޓޯ: ހުސައިން ވަހީދު/މިހާރު
މި ހަރަކާތުގައި ބައިވެރިވުމަށް ފޯމުގެ އިތުރުން، ދެން ހުށަހަޅަން ޖެހޭނީ ޑްރައިވިން ލައިސަންސަށް އެދޭ ފޯމެވެ. އެ ފޯމުތަކުގައި ޖަހަން ބޭނުންވާ ފޮޓޯ އާއި ސްޓޭމްޕާއި އައިޑީ ކާޑު ކޮޕީ ނެގުމާއި ފައިސާ ބަލައިގަތުމާ ބެހޭ އިންތިޒާމް ވެސް ހަމަޖައްސާފައި ވަނީ ހުުރަވީ ބިލްޑިންގުގެ ތިރީގަ އެވެ. ތިއަރީ ޓެސްޓާއި ލައިސަންސް ކާޑަށް ދައްކަން ޖެހޭ ފީގެ އިތުރުން އެހެން ފީއެއް ނުނަގަ އެވެ.
ކުރިއަށް އޮތްތަނުގައި ރަށްރަށުގައި ވެސް އެ ޕްރޮގްރާމް ހިންގާނެ ކަމަށް އިކޮނޮމިކް މިނިސްޓްރީން ބުނެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މަގޭ
27 May 2018
އެހެންނު ވާނީ އެލަހަލަ ކަންކަން
މަ
26 May 2018
ނަސީބެއް ކުރިން ނެގުނު ކަން!
އައިމިނަ
26 May 2018
މިކަމުގެ މަޤްސަދަކީ މީހުން ވީހާވެސް އެއްތަނަކަށް އެއްކޮށް ފޮޓޯ ވީޑިއޯނަގައި، ކުލައިގަ ހޭކި، ސަރުކާރަށް ތާއީދު އޮތްކަން ދޭހަވާގޮތަށް ދެއްކުން. ރައްޔިތުން ގުބޯ ހައްދަނީ. ހީކުރަނީ ސަރުކާރުން ގޮވާލާ ގޮވާލުމަކަށް ރައްޔިތުން އެއްވާނެކަމަށް. މީ ނުވެގެން އުޅޭކަމަކީ އަދިވެސް.
ހިތްދަތި
26 May 2018
އަޅޭ، މިރޭ ނަންބަރެއް ދެން ދުލެއްއ ނުކުރަނެޔޯ. ދެން މިރޭގެ ބަދަލުގައި އަލުން އިތުރު ކުރާނެތަ. އެއްލަކިން މަށަށް ލައިސަންސް ނުލިބިޖެއްޔާ މަށެއް އަދި މަގޭ މުޅި އައިލާގެ ވޯޓުވެސް ޔާމިނަށް ނުލިބެނޭ. މަށަށް ނުދީ އެހެން މީހުންނަށް ދިނީމަށް ކޮބާ އިންސާފެއް. އަހަރެން މީ ލައިސަންސް ނަގަން ނުލާހިކު މަސައްކަތްކުރާ މީހެއް. އެކަމު އެއް ދުއްވާ ތަނުގައި ތިބޭ އެގްޒަމިނަރުންގެ ދުއްޕާން ބޮޑުކަމުން ނުވެފަ. އަޅެ އެމީހުން އެއީ ހާދަ މޭފުއްޕާ ބަޔެކޭ. ރަގަަޅަށް ވިއްޔާ ނިދާއިރުވެސް ތަސްބީހަ ފައްޗެއް ހެން، 'ފެއިލް'، 'ފެއިލް'، 'ފެއިލް' ކިޔަލާ ކިޔާލާ ތިބެނޭ... އެމީހުންނަަށް ދުވަހެއް. އަދި އަހަންނަށްވެސް ދުވަހެއް އަންނާނެ. އިންޝާ ﷲ
ޖެއްސުން
26 May 2018
މިއީ ވ ރަގަޅު ކަމެއް. ނޯރމަލްކޮށް ލައިސަސަންސް ނަގަން ދުއްވާ ޓެސްޓް ހަދަން ދިޔައިމަ އެތާ ތިބޭ އެގްޒަމިނަރުން ކުރަނީ ޖެއްސުން. އަޅެ މީ ދޮގެއްތަ؟
ރޯނު އަދުރޭ
26 May 2018
އެއޯ ރައީސްގެ ހެޔޮފުޅުކަމުން ފޮނުވާފަ ތިބި އެގްޒްމިނަރުން ނޫންތޯ
ވަރަށް
26 May 2018
ވަރަށް ފީކަޅާކަމެއް ތިކުރެއްވީ... ޓެސްޓް ޕޭޕަރ އަތަށްދީފައި ހަދައިލައިގެން އަންނާށޭ ތިބުނެވެނީ. އެއްވެސް ވަރަކަށް އެމީހެއްގެ ފެންވަރެއް ނުބެލޭނެ. ތިގޮތަށް ކަންތައްތައް ކުރެއްވީމަ ކޮންމެ މީހަކުވެސް ޗާންސްގެ ބޭނުންކުރާނެ ނޫނީ ފަސޭހަގޮތްހަދާނެ. ވަރަށް ދެރަ...
ހާސަރު
26 May 2018
މިހާރުވެސް މަގުމަތީ ދުއްވުމުގައި ހަމައެއް ލަމައެއް ނެތް ދެން ތިހެން އަވަސް އަރުވާލައިގެން ސިޔާސީ ލައިސަންސް ދިނީމަ މަގުތައް ހާމަ ނާމާން ވާނޭ.
1234
26 May 2018
ތިތާ ހުސް ތިތުބީ ޒުވާނުން. ކަރުދާސް ފޯމްތަކެއް ފުރުމުގެ ބަދަލުގައި ގައިމު މާ ފަސޭހަވާނެ ދޯ އޮންލައިކޮށް އެޕްލިކޭޝަން ސަބްމިޓް ކުރެވޭގޮތް ހަދާދިންނަމަ. ތި ހެން ކިޔު ހަދާކަށް ވަގުތު ބޭކާރު ކުރާކަށް ނުޖެހޭނެ.. އަދިވެސް ސަރުކާރު ހިނގަނީ 70 އަހަރު ތަކުގަ ހިނގާ އުސޫލުން.
ރަށްދު
26 May 2018
އެއްދުވަހުން ވާހާވެސް ގިނަބަޔަކަށް ޚިދުމަތް ނުދިނުމަކީ އެމްޑީޕީގެ ސިޔާސަތެއް އެއީ!!!! މިސަރުކާރުގެ ސިޔާސަތެއްނޫން އެއްދުވަހުން ވާހާގިނަބަޔަކަށް ޚިދުމަތް ނުދިނަސް އޮންނަނީގޯސްވެފަ ދިނަސް އޮންނަނީގޯސްވެފަ ބޭނުމީ ވެރިކަން
ބްލެޑާ
26 May 2018
ރައްޔިތުމީހާ ބޮޑު ކިޔޫއެއްގަ ޖައްސާލެވުނީމަ ސަރުކާރަށް ތިކުރެވެނީ ވަރަށް މޮޅުކަމެއް... ތީ ސަރުކާރު ހިންގުން ބޮޑުތަނުން ފެއިލް ވުމުން ކަންކުރަން ޖެހުނު ގޮތެއް