ބިލް ފާސްވެއްޖެ ނަމަ މަހަކު 35،000ރ. ގެ އިނާޔަތް ލިބިވަޑައިގަންނަވާނެ ބޭފުޅުން (ކ-ވ) އަބްދުﷲ ޖިހާދު، ޑރ. މުހައްމަދު ޖަމީލް އަދި މުހައްމަދު ވަހީދުއްދީން (ޑީން).
17 އެޕްރީލް 2019 - 10:40
78 comments
ރާއްޖޭގައި ނައިބު ރައީސްކަން ކުރެއްވި ބޭފުޅުންގެ ތެރެއިން ކުށްވެރި ނުވެ، އެ މަގާމުން ވަކިވެއްޖެ ނަމަ، ދައުލަތުން މަހަކު 35،000ރ. ގެ މުސާރައެއް ދިނުމަށް ރައްޔިތުންގެ މަޖިލިހުގެ ކަމާ ބެހޭ ކޮމިޓީން ނިންމައިފި އެވެ.
އޭދަފުށީ ދާއިރާގެ ޕީޕީއެމްގެ މެމްބަރު އަހުމަދު ސަލީމް (ރެޑްވޭވް ސަލީމް) ހުށަހެޅުއްވި، ރައީސުލްޖުމްހޫރިއްޔާގެ ނައިބުކަން ކުރައްވާފައި ތިއްބެވި ބޭފުޅުންނަށް ދޭން ޖެހޭ ރައްކާތެރިކަމުގެ ބިލް މަޖިލިހުގެ ވަގުތީ ކޮމިޓީން ފާސްކުރި އިރު، ބައެއް ބޮޑެތި ބަދަލުތަކެއް ބިލަށް ވަނީ ގެނެސްފަ އެވެ.
އެ ކޮމިޓީން ބިލަށް ބަދަލު ގެނައި ނަމަވެސް، މަޖިލިހުގެ ތަޅުމުގައި އެއާ މެދު ގޮތެއް ނިންމަން ޖެހޭ އިރު، މިއަދު އޮންނަ ވޯޓު ގަޑީގައި އެކަން ނިންމާނެ އެވެ.
ބިލްގައިވާ ގޮތުން ނައިބު ރައީސްކަން ކުރެއްވި ބޭފުޅަކު ޖިނާއީ ކުށެއް ކުރިކަން ސާބިތުވެ، އޭނާގެ މައްޗަށް ނިހާއީ ހުކުމެއް އަންނަ ވަގުތުން ފެށިގެން އޭނާ އަށް ބިލުން ލިބޭ އެއްވެސް ރައްކާތެރިކަމާއި އިނާޔަތެއް ނުލިބޭނެ.
ބިލްގައިވާ ގޮތުން، ނައިބު ރައީސުންނަށް މާލީ އިނާޔަތް ލިބޭނީ ދައުލަތުން މުސާރަ ލިބޭ އެހެން ވަޒީފާއެއް ނުވަތަ މަގާމެއް އަދާނުކުރާ ނަމަ އެވެ. އަދި ނައިބު ރައީސަކު ބޭނުންވެއްޖެ ހާލަތެއްގައި އެކަށީގެންވާ ފެންވަރަކަށް ސަލާމަތީ ހިދުމަތް ފޯރުކޮށްދޭން ވާނެ ކަމަށް ބިލްގައި ވެ އެވެ.
މީގެ އިތުރުން، ނައިބު ރައީސުންނަށް ރާއްޖެ އާއި ރާއްޖެ އިން ބޭރުން ސަރުކާރުން ކަނޑައަޅާ ގޮތެއްގެ މަތިން ސިއްހީ ހިދުމަތް ފޯރުކޮށްދޭން ވާނެ ކަމަށް ވެސް ބިލްގައިވެ އެވެ. އަދި މާލޭގައި އެއްގަމު ދަތުރުފަތުރުކުރުމުގެ ވަސީލަތްތައް ސަލާމަތީ ބާރުތަކުން ހަމަޖައްސައިދޭން ވާނެ ކަމަށް ބިލްގައިވެ އެވެ.
މިހާތަނަށް ނައިބު ރައީސްކަން ކުރައްވާފައިވާ ބޭފުޅުން (ކ-ވ) އަބްދުﷲ ޖިހާދު، މުހައްމަދު ވަހީދު، މުހައްމަދު ވަހީދުއްދީން (ޑީން)، ޑރ. މުހައްމަދު ޖަމީލް އަހުމަދު އަދި އަހުމަދު އަދީބު: ބިލް ފާސްވެއްޖެ ނަމަ މީގެ ތެރެއިން ދައުލަތުގެ ފައިސާގެ އިނާޔަތް ލިބިވަޑައިގަންނަވާނީ ޑީން އާއި ޑރ. ޖަމީލާއި ޖިހާދަށް.
ބިލްގައިވާ ގޮތުން ނައިބު ރައީސްކަން ކުރެއްވި ބޭފުޅަކު ޖިނާއީ ކުށެއް ކުރިކަން ސާބިތުވެ، އޭނާގެ މައްޗަށް ނިހާއީ ހުކުމެއް އަންނަ ވަގުތުން ފެށިގެން އޭނާ އަށް ބިލުން ލިބޭ އެއްވެސް ރައްކާތެރިކަމާއި އިނާޔަތެއް ނުލިބޭނެ އެވެ. އަދި އޮގަސްޓް 7، 2008 އިން ފެށިގެން އަމަލު ކުރަން ފެށި ގާނޫނުއަސާސީގެ ދަށުން ނައިބު ރައީސް ކަން ކުރި ބޭފުޅަކަށް އިނާޔަތާއި ރައްކާތެރިކަން ލިބޭނެ ކަމަށް ބިލްގައިވެ އެވެ.
ނައިބު ރައީސުންނަށް ދޭ އިނާޔަތާއި ރައްކާތެރިކަން ލިބޭނީ ބިލަށް އަމަލު ކުރަން ފަށާ ތާރީޚުން ފެށިގެން ކަމަށް ވެސް ސަލީމް ހުށަހެޅުއްވި ބިލަށް ކޮމިޓީން ގެނައި ބަދަލުތަކުގެ ތެރޭގައި ހިމެނެ އެވެ.
ބިލް ހުށަހެޅުއްވި ސަބަބެއްގެ ގޮތުގައި ސަލީމް ވިދާޅުވީ ކުރީގެ ނައިބު ރައީސުންނަކީ އިއްޒަތާއި ގަދަރާއި ސަލާމަތާއި ރައްކާތެރިކަން ކަށަވަރުވާ ބަޔަކަށް ވާތީ ކަމަށެވެ. ކުރީގެ ނައިބު ރައީސުންނަކީ އަބަދު، ގައުމާއި ރައްޔިތުންގެ ލާބަ އަށް މަސައްކަތް ކުރައްވާ ބޭފުޅުން ކަމަށް ވެސް ސަލީމް ވިދާޅުވި އެވެ.
ކުރީގެ ނައިބު ރައީސުންނަށް އިނާޔަތާއި ރައްކާތެރިކަން ލިބޭ ބިލެއް މަޖިލީހަށް ހުށަހެޅި އިރު، ނައިބު ރައީސްކަން ކުރެއްވި ފަސް ބޭފުޅަކު މި ވަގުތު ދުނިޔޭގައި އެބަތިއްބެވި އެވެ. އޭގެ ތެރެއިން ކުރީގެ ނައިބު ރައީސް އަހުމަދު އަދީބުގެ މައްޗަށް ޖިނާއީ ކުށެއް ސާބިތުވެފައިވާތީ އޭނާ އަށް އިނާޔަތާއި ރައްކާތެރިކަމެއް ނުލިބޭނެ އެވެ. އަދި ކުރީގެ ނައިބު ރައީސް ޑރ. މުހަންމަދު ވަހީދު ފަހުން ރައީސްކަން ކުރައްވާފައި ވާތީ، އެމަނިކުފާނަށް ލިބިވަޑައިގަންނަވާނީ ކުރީގެ ރައީސުންގެ އިނާޔަތްތަކެވެ.
ބިލް ފާސްވެ، ރައީސް ތަސްދީގު ކުރައްވައި، ސަރުކާރުގެ ގެޒެޓްގައި ޝާއިއުކުރާ ދުވަހުން ފެށިގެން އިނާޔަތާއި ރައްކާތެރިކަން ލިބިވަޑައިގަންނަވާނީ މުހައްމަދު ވަހީދުއްދީނަށާއި ޑރ. މުހައްމަދު ޖަމީލް އަހުމަދަށާއި އަބްދުﷲ ޖިހާދަށެވެ. އަދި މިހާރު ހުންނެވި ނައިބު ރައީސް ފައިސަލް ނަސީމަށް ބިލުން އިނާޔަތާއި ރައްކާތެރިކަން ލިބޭނީ ކުށްވެރި ނުވެ، މަގާމުން ވަކިވެ ވަޑައިގަންނަވާ ހިސާބުންނެވެ.
ދައުލަތުގެ ބަޖެޓުން މިހާރު އިނާޔަތް ދެނީ ރައީސްކަން ކުރައްވާފައި ތިއްބެވި ބޭފުޅުންނަށެވެ. އެގޮތުން، އޮފީސް ހިންގުމުގެ ޚަރަދާއި ދިރިއުޅުއްވާ ތަނުގެ ޚަރަދު ހަމަޖެއްސުމަށާއި މާލީ އިނާޔަތުގެ ގޮތުގައި އެތައް މިލިއަން ރުފިޔާއެއް ދިނުމަށް ބަޖެޓުގައި ކޮންމެ އަހަރަކު ވެސް ހިމަނަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޢަހުމަދުބެ
17 April 2019
އެކަކަށް އެކައްޗެއްވެސް ދޭނެކަމެއްނެތް. ތިމީހުން މަގާމާ ހަވާލުވަނީ މުސާރަވެސް ބޭނުންނެތޭ ކިޔާފަ. ޢެކަމަކު އެންމެބޮޑުމުސާރަދީފަ ދުނިޔެއުމުރަށް ދައުލަތުން ބަލަން ޖެއްސުމަށްވުރެ ނިކަނެއްޗަކަށް އެއްޗެއްދިނިއްޔާ ކީއްތަ.
ދަރުސީ
17 April 2019
އިންކަމް ޓެކްސް ތައާރަފްކުރެވި އާމްދަނީގެ ގޮތުގައި ލިބޭ މިންވަރު ކަށަވަރު ކުރެވި އިނާޔަތް ދޭންޖެހޭތޯ ނުޖެހޭތޯ ކަނޑައެޅެން ޖެހޭ
މަލްޑީވިއަންޓް
17 April 2019
ސިވިލް ސާވާންޓުންވެސް ޙިދުމަތް ކުރަނީ ހަމަ ގައުމަށް. އެމީހުންނަށް ތިއިނާޔަތްތައް ވަޒިފާއިން ވަކިވުމަށްފަހު ނުލިބެންވީ ސަބަބަކީ ކޮބާ؟ ގާނޫނީ އިމުން ރައްޔިތުންގެ ލާރި ކާލައި ރައްޔިތުން ލޫޓުވުމަކީވެސް ހަމަ ވައްކަން.
މަލްޑީވިއަންޓް
17 April 2019
އެކި ނަންނަމުގައި ރައްޔިތުންގެ ލާރި އެކި މީހުންނަށް ބަހަނީ!
ޢަދުރޭހިންނަވަރު
17 April 2019
އެޖެންޑާ19 އިންމިކަން އަލުން ބަދަލުކޮއް 5000 ރުފިޔާއައް ކުޑަކުރުމައްގޮވާލަން
ޙަބީބު
17 April 2019
ތީވަރައްބޭއިންސާފު ގޮތެއް ޓުވެރިޒަމުގަ ރާއްޖެޔައް ޑޮލަރު އެތެރެކުރާތާ 20 އަހަރުވީ ކޮންމެ މީހަކައް 5000 ރުފިޔާގެ ޕެންޝަނެއް ދޭންޖެހޭ
ސޯޝަލިސްޓް
17 April 2019
ތޔައީ ވިޔަފާރިވެރިން. ބޭނުން އެެއްޗެއް ކައިގެން ގަނެގެން އުޅޭ ބައެއް. ދައުލަތުން މިމީހުންނަށް އެއްވެސް އެއްޗެއް ދޭނެކަމެއްނެތް. އެއަަށްވުރެ މާރަގަޅުވާނެ ލާރި އެއްގޮތައްވެސް ނުލިބޭ ނުަވަތަ ލާރި މަދުން ލިބޭ މީހުންނަށް މިލާރި ދިނަސް.
ސީދާ
17 April 2019
މުޅިގައުމުގެ ޚަޒާނާ ހައެއްކަ މީހުންނަށް ބަހާ ހުސްކުރަނީ
އަޙުމަދު.
17 April 2019
ތީން އެއްވެސް މީހަކަށް ފައިސާދޭކަށް ނުޖެހެ، ތީ ހަމަ މައުމޫނު ވެރިކަމުން ފޭބިތަނާ އޭނައަށް ފައިސާދޭންވެގެން ފާސްކުރި ބިލާ އެއްވެސް ތަފާތެއް ނެއްބިލެއް. ސަރުކާރުގެ ވަޒީފާ އަދާކުރީމާ އޮންނާނީ ޕެންޝަން، ޕެންސަން ލިބޭވަރަށް އަދާނުކުރެވޭނަމަ ދޭކަށް ނުޖެހެ، ތިކަމަކީ ރައްޔިތުންގެ ފައިސާތަކެއް ނަހަމަ ގޮތުގަ ބަޔަކަށް ދިނުން، އެމީހުން ވަޒީފާ އަދާކުރީ ހިލޭސާބަހަކަށް ނޫ. މުސާރައަށް. އެ އޮންނާނީ ދީފައި. ބާރު އޮތީމާ ސޭޓަށް މިކަން ކުރެވިދާނެ.
ގެޒެޓް
17 April 2019
ބާކީ އޮތް ކުޑަ ދުވަސްކޮޅުތެރޭވެސް ހަމަ ސަރުކާރަށް ޖެއްސުން ކުރަނީ. އާ މަޖިލީސް އައީމަ ތީތި 5 އަހަރުގެ ދައުރު ހަމަކުރީމަ އެކަނި ލިބޭ އެއްޗަކަށް ބަދަލުކޮށްލާ. އޭރުން ތިތަނުން އެކަކަށްވެސް ދޭކަށް ނުޖެހޭނެ.