ކުށުގެ މައްސަލަތަކާ ގުޅިގެން ރައްޔިތުން އަމިއްލައަށް ނިކުމެ ކަންކަމުގައި ގޮތް ނުނިންމަން ޕޮލިސް ކޮމިޝަނަރު މުހައްމަދު ހަމީދު ގޮވާލައްވައިފި އެވެ.
ދާދިފަހުން ކ. ދިއްފުށީގައި ވައްކަން އިތުރުވުމުން އެ ރަށު ރައްޔިތުން ވަނީ މަގުތަކަށް ނިކުމެ ވަގުންނާއި ކުރިމަތިލައި، ހަމަނުޖެހުންތައް ހިންގައިފަ އެވެ. އަދި ދާދިފަހުން ހުޅުމާލޭގައި ކުޑަކުއްޖަކާ ބެހުނު މީހަކު މަގުމަތީގައި ގަންހިންގުވަނިކޮށް ފުލުހުން ވަނީ އެ މީހާ ހައްޔަރުކޮށްފަ އެވެ.
ހަމީދު އިއްޔެ ކުރެއްވިި ޓްވީޓެއްގައިވަނީ ފުލުހުންނަށް ރައްޔިތުން އިތުބާރު ކުރަން އުނދަގޫވާ ފަދަ ކަންތައްތަކެއް ހުރިކަން ގަބޫލު ކުރައްވާ ކަމަށާއި އެކަމަކު ކުށްތައް ހިނގުމުން އެކަން ބެލުމަށް ރިޕޯޓްކޮށް، އެކަންކަން ބެލުން ފުލުހުންނާ ހަވާލު ކުރުމަށް އެދިވަޑައިގަންނަވާ ކަމަށެވެ. އަދި ގާނޫނު ރައްޔިތުންގެ އަތްމައްޗަށް ނުނެގުމަށް ގޮވާލާ ކަމަށް އެ ޓްވީޓްގައިވެ އެވެ.
"ގާނޫނުގެ ވެރިކަމަށް އިހްތިރާމް ކުރުމަށް އަޅުގަނޑުމެންގެ އެންމެންގެ މައްޗަށް ވެސް ޒިންމާއެއް އެބައޮތް." ހަމީދުގެ ޓްވީޓްގައިވެ އެވެ.
Whilst understanding the issues around trust and confidence in the police servive, we urge the public to report crime and disorder matters to us and not take law in to hands. We are working on to improve. We all have a duty to respect the rule of law.
— Mohamed Hameed (@M_Hameedh) May 27, 2019
ދިއްފުށީގައި ދެ ތިން ރޭ މަތިން ހިނގި ހަމަނުޖެހުންތަކުގައި ބައެއް މީހުންނަށް އަނިޔާވެފައިވެ އެވެ. އެ ހަމަނުޖެހުންތައް ކޮންޓްރޯލް ކުރުމަށްޓަކައި އެސްއޯ ފުލުހުން ވެސް އެރަށުގައި ބޭތިއްބި އެވެ.
