ނޭޕާލުގައި އެންމެ ފަހުން ބޭއްވި ސަމިޓުގައި ގައުމުތަކުގެ ވެރިން ފޮޓޯއަކަށް ހުއްޓިވަޑައިގެން: ޕާކިސްތާނުގައި ބާއްވާ ސަމިޓުގައި ހަތަރު ގައުމަކުން ބައިވެރި ނުވާން ނިންމުމުން ސަމިޓް ވަނީ ފަސްކޮށްފައި.
02 އޮކްޓޯބަރ 2016 - 11:06
3 comments
ސާކް ސަމިޓް ބޭއްވޭނެ ފަދަ މާހައުލެއް ގާއިމްކޮށް ދިނުމަށް މެމްބަރު ގައުމުތަކުގެ ކިބައިން ރާއްޖޭން އެދިއްޖެ އެވެ.
ޕާކިސްތާނުގައި ނޮވެމްބަރު 9-10 އަށް ބާއްވަން ހަމަޖައްސާފައި އޮތް ސާކް ސަމިޓުގައި ބައިވެރި ނުވާނެ ކަމަށް ހަތަރު ގައުމަކުން ބުނުމާ އެކު، އެ ސަމިޓް ފަސްކުރިކަން، ސާކުގެ މި ދައުރުގެ ޗެއާ ނޭޕާލުން ވަނީ އިއުލާންކޮށްފަ އެވެ. ސާކް ސަމިޓް ބޮއިކޮޓް ކުރި ގައުމުތަކުގެ ތެރޭގައި އިންޑިއާގެ އިތުރުން، އަފްގާނިސްތާނާއި ބަންގްލަދޭޝް އަދި ބޫޓާން ހިމެނެ އެވެ.
ރާއްޖޭގެ ފޮރިން މިނިސްޓްރީން މިދިޔަ ހުކުރު ދުވަހު ނެރުނު ބަޔާނެއްގައި ބުނި ގޮތުގައި ސާކް ސަމިޓް ބޭއްވޭނެ ފަދަ ފަހި މާހައުލެއް ގާއިމްކުރުމަށް ބޭނުންވާ ފިޔަވަޅުތައް މެމްބަރު ގައުމުތަކުން އަޅާނެ ކަމަށް ރާއްޖޭން އުއްމީދު ކުރެ އެވެ. އެއީ، ފޮރިން މިނިސްޓްރީން ބުނި ގޮތުގައި، މި ސަރަހައްދުގެ ގައުމުތަކުގެ ވެރިން އެއް ތަނަކުން ބައްދަލުވެ، ކުރިމަތިވެފައިވާ މުހިއްމު މައްސަލަތަކާ ގުޅޭ ގޮތުން މަޝްވަރާ ކުުރުމުގެ ފުރުސަތު ދިނުމަށެވެ.
ސާކް ސަމިޓް ފަސްކުރަން ޖެހުނީ އިންޑިއާ އާއި ޕާކިސްތާނާ ދެމެދު ޖެހުނު މައްސަލަތަކާ ހެދި އެވެ. އެ ގޮތުން، ސަރަހައްދީ ރޮނގު ހުރަސްކޮށް ޕާކިސްތާނު ފަޅިން އިންޑިއާ އަށް ދެމުން ދާ ހަމަލާތަކުގެ ސަބަބުން ބޮޑުވަޒީރު ނަރެންދުރަ މޯދީ އަށް ސާކް ސަމިޓުގައި ބައިވެރިވެވަޑައިގެންނެވޭ ފަދަ މާހައުލެއް ނެތް ކަމަށް އިންޑިއާ އިން ވަނީ ބުނެފަ އެވެ.
ކަޝްމީރުގެ އުރީގައި މި މަހު 18 ވަނަ ދުވަހު ހަމަލާދީ އިންޑިއާ ސިފައިންގެ 18 މީހުން މަރާލި ހާދިސާއާ ގުޅިގެން އިންޑިއާ އިން ވަނީ ޕާކިސްތާން އެކަހެރި ކުރާނެ ކަމަށް އިންޒާރު ދީފަ އެވެ.
"ޓެރަރިޒަމްގެ އަމަލުތައް، ހާއްސަކޮށް ގައުމުން ބޭރުން ދޭ ހަމަލާތައް، ރާއްޖޭން ކުށްވެރިކުރަމެވެ،" ބަޔާނުގައިވެ އެވެ.
ސާކުގެ މެމްބަރު އަށް ގައުމުގެ ތެރޭން އެންމެ ގައުމަކުން ސަމިޓުގައި ބައިވެރި ނުވިޔަސް އޮޓޮމެޓިކުން ސަމިޓް ފަސްކޮށް ނުވަތަ ކެންސަލް ވާނެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އުމަރު
02 October 2016
ސާކު އުފެދުނީ 8 ޑިސެންބަރު 1985 ގައި ބަންލަދޭޝްގެ ވެރިރަތް ޑާކާގައި، އެހެންކަމުން ސާކް އުފެދުނުތާ މިއީ 31 ވަނައަހަރު، އިންޓަނެޓް ފުރަތަމަ ދުނިޔެއަށް ލޯހުޅުވާލީ 1983 ގައި އަދި 1990 މުޅިދުނިޔެއަށް އިންޓަނެޓްގެ މަންފާލިބި އަދި ވޯލްޑްވައިޑް ވެބް 1989 ގައި ދުނިޔެއަށް ނޭވާލި އަދި އޭގެ ފަހުން ފެބްރުއަރީ 2004 ގައި ފޭސްބުކް އުފެދުނު، އޭގެ ކުރީގައި 1997 ގައި ސޯޝަލް މީޑިއާ އުފެދުނު، އަދި މިއަދު އެންމެ ތަރައްޤީވެފައިވާ ސްމާޓްފޯނު 1992 ގައި އުފެދުނު، ދުނިޔެ ބަދަލުކޮށްލި މިދެންނެވި ޓެކްނޮލޮޖީ އުފެއްދި އެކަކުވެސް ސާކްގެ ގައުމެއްގައިނެއް، ދިރިއުޅުމުގެ ޖަނަރޭޝަނަކީ 25 އަހަރުދުވަސް، އެހެންކަމުން އެއްޖަނަރޭޝަން ފަހަނަޅައިގޮސް އަނެއް ޖަނަރޭޝަނަށް ފެށިގެން މިހާރު މިދަނީ ތިޔަބުނާ ސާކު އުފެދުނުފަހުން، އެއިން އެއްވެސް ޤައުމެއް ތަރައްޤީވެއްޖެތޯ؟ ޑިމޮކްރަސީ އަށަގަނެ ރެފިއުޖީން އަމާޒްހިފާފައިވާ މަންޒިލެއް ތިޔަ ސާކުގެ ސަރަހައްދުގައި އެބައޮތްތޯ؟ އިންޑިއާގެ މީހުން އަދިވެސް ފައިލްތަށް ބަންނަނީ ރޯނުކޮޅަކުން، ދުނިޔޭގެ އެންމެ ގިނަ ފަގީރުންތިބީ ސާކުގެ ޤައުމުތަކުގައި، ނޭޕާލަކީ ދުނިޔޭގެ ތިންވަނަ ފަގީރު ޤައުމު، އެހެންކަމުން އެއްވަނައިގައި އޮތީ ބަނގްލަދޭޝް އަދި އިންޑިއާ، ދެން ވިސްނާލާ ސާކު ކުރިއަރާފައިވާ މިންވަރު، އެހެންކަމުން ސާކުގެ ފައިދާ ސާކު ހިމެނޭ ގައުމުތަކަށް ނުކުރޭ، ސާކަކީ ހުދުމުހުތާރުކަން އާލާކޮށް، ވެރިކަމުގައި ބަގުޑި ބައްދައިގެން އާއިލާ ވެރިކަމުގައި ދުނިއުމުރު ބައިތިއްބަންވެގެން ދުނިޔޭގެ ބޮޑެތި ޑިމޮކްރަސީތަކުން ސާކުގެ ގައުމުތަކާ ދިމާކޮށްފާނެތީ އެއްވެގެން އުޅޭ ބައިގަނޑެއް، އަދި ސާކު މުހިންމީ ސާކު ހިމެނޭ ޤައުމުތަކުގެ ކޮރަޕްޝް ރައީސުންނަށާއި، މިނިސްޓަރުންނަށާއި، ސިޔާސީ މީހުންނަށް، އެހެންކަމުން ދިވެއްސެއްގެ ހައިސިއްޔަތުން އަހަރެން ނެއެދެން ސާކުގެ މެންބަރެއްގެ ގޮތުގައި އޮންނަން،
ޏަމްޏަމް
02 October 2016
މިއުޅުނީ އަމިއްލަ ގައުމުގައި ބާއްވަން އުޅޭ މަސްވަރާ ބައްދަލުވުންތަކަށް ފަހި މާހައުލެއް ގާއުމުނުވެގެން.ފުރަތަމަ އަމިއްލަ ގައުމު އިސްލާހުކުރޭ އޭގެފަހުން އެހެންމީހުންނަށް ބަސްކިޔާ
GAN Island
02 October 2016
ކާކު ތިތަނަށް ފޮނުވާނީ ؟؟ ދުނިޔޭގެ Head of State އިން ތަޤުރީރު ކުރައްވަވާ އދ ގެނަރަލް އެސަމްބުލީގައި ދިވެހިން ތަމްސީލު ކުރައްވަން ''ކެރިވަޑައި ނުގަންނަވާ'' މީހަކު ސާކް ސަމިޓް ގެ ވާހަކަ ދައްކަން ލަދުގަންނާން ޖެހޭނެ. ސާކް ސަމިޓަށް ކޮންމެވެސް ކޯޑިނޭޓަރަކު ކަން ނޭގެ ފޮނުވާނީ. ވެރިކަން ހޯއްދެވީ ހަމަ އެކަނި އިޤުތިސޯދާއި ބެހެން ކަމަށް ވެދާނެ.