މި ސަރުކާރުގައި ބްރޯއަކަށް ބްރޯއެއް އެބަހުރި، ކުންފުނިތަކުން ވައްކަން ކުރޭ: ޔާމީން

މި ސަރުކާރުގައި ވެސް "ބްރޯއަކަށް ބްރޯއެއް އެބަހުރި" ކަމަށާއި ކުންފުނިތައް މެދުވެރިކޮށް ވެސް ވައްކަން ކުރަމުންދާ ކަމަށް އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން ރޭ ތުހުމަތު ކުރައްވައިިފި އެެވެ.

ބްރޯ ނިސްބަތް ކުރަނީ ޔާމީންގެ ވެރިކަމުގެ ފަހު ދުވަސްކޮޅު ނައިބު ރައީސްގެ މަގާމު ފުރުއްވި އަހުމަދު އަދީބަށެވެ. ސިޔާސީ ބާރުވެރިކަމާއި ނުފޫޒު ގަދަކަމުން "ބްރޯ" ގެ ގޮތުގައި އަދީބު މަޝްހޫރުވެ، އެ މަނިކުފާނަކީ ޔާމީންގެ ސަރުކާރުގައި ހިންގި އެންމެ ބޮޑު ހިޔާނާތުގެ އެންމެ އިސް ބޭފުޅާ ކަމަށް ތުހުމަތު ކުރެ އެވެ.

މިދިޔަ ހޮނިހިރު ދުވަހު ބޭއްވި ކުރެންދޫ ކައުންސިލްގެ ރައީސްގެ މަގާމުގެ ބައި އިލެކްޝަން ޕީޕީއެމަށް ކާމިޔާބުވުމުގެ އުފަލުގައި އެ ރަށުގައި ރޭ އޮތް ޖަލްސާއެއްގައި ޔާމީން ވިދާޅުވީ، އެމްޑީޕީ އިދިކޮޅުގައި އޮތްއިރު ބުނަމުންދިޔައީ ރާއްޖެ އަށް ދިމާވެފައިވާ އެންމެ ބޮޑު މައްސަލައަކީ ކޮރަޕްޝަނާއި ފަސާދަ ކަމަށް ވިޔަސް އެ މީހުންގެ ވެރިކަމުގައި އެއްވެސް ބަދަލެއް ނުުފެންނަ ކަމަށެވެ.

ކުރެންދޫ ކައުންސިލް ރައީސްގެ ގޮނޑި ޕީޕީއެމަށް ކާމިޔާބުވުމުން އެ ރަށުގައި އެ ޕާޓީން ރޭ ބޭއްވި ޖަލްސާގައި ޔާމީން ވާހަކަފުޅު ދައްކަވަނީ.--- ފޮޓޯ: ޕީޕީއެމް

ދައުލަތުގެ ފައިސާ ނުހައްގު ގޮތުގައި ވެރިކަން ކުރަން ތިބޭ މީހުންނާއި އެ މީހުންގެ ގާތް މީހުން ނަގާ ވާހަކަފުޅު ދައްކަވަމުން ޔާމީން ވިދާޅުވީ މި ސަރުކާރުގައި ދައުލަތުގެ ފައިސާ އަށް ހިޔާނާތްތެރިވަނީ އެކަކު ދެ މީހަކު ނޫން ކަމަށެވެ. އެކަމަކު އޭގެ މާބޮޑު ތަފްސީލަކަށް އެ މަނިކުފާނު ވަޑައެއް ނުގަންނަވަ އެވެ.

"ބްރޯއަކަށް ބްރޯއެއް އެބަހުރޭ މި ސަރުކާރުގައި ވެސް. ނަގަނީ އެކަކު ދެ މީހަކު ނޫން. މި ސަރުކާރުގެ ކަންތައްތަކާ ހަވާލުވެގެން ތިބި މީހުން، ކުންފުނިތައް ހިމެނޭ ގޮތަށް. ނުނަގާ [ފައިސާ ނުނަގާ] މީހަކު މަދުވާނެ،" ޔާމީންގެ ތުހުމަތުގައި ވިދާޅުވި އެވެ.

އެމްއެމްޕީއާރުސީގެ ހިޔާނާތާ ގުޅިގެން މުއައްސަސާތައް ފެއިލްވެފައިވާ ކަމަށް ވިދާޅުވިޔަސް އެކަމާ ގުޅިގެން މާބޮޑު ވާހަކައެއް އެ މަނިކުފާނު ނުދައްކަވަ އެވެެ. ހަމައެކަނި ވިދާޅުވީ ދައުލަތުގެ ތިޖޫރިން މުއްޖަހާފައި އެއްވެސް މީހަކަށް ފައިސާ ނުނެގޭނެ ކަމަށެވެ.

ޔާމީން، އިއްޔެ ހަވީރު ކުރެންދު އަށް ވަޑައިގަތުމުން މަރުހަބާ ކިޔަނީ.---ފޮޓޯ: ޕީޕީއެމް

"މީހަކަށް ދައުލަތުގެ ތިޖޫރިއަކުން މުއްޖަހާފައި ފައިސާ ނެގޭނެ ގޮތެއް ނޯންނާނެ. އެ ވާހަކަ މިރޭ ދައްކާކަށް ނެތިން. "މިއީ ވިސްނާ މީހުންނަށް ދޫކޮށްލި ވާހަކައެއް،" އެ މަނިކުފާނުގެ ވެރިކަމުގައި ހިންގި އެމްއެމްޕީއާރުސީގެ ހިޔާނާތާ ގުޅުވައިގެން ޔާމީން ވިދާޅުވި އެވެ.

މި ސަރުކާރާ ގުޅުވައިގެން ހިޔާނާތާއި ވައްކަމުގެ ތުހުމަތު ޔާމީން ކުރެއްވިއިރު، އެ މަނިކުފާނުގެ ތުހުމަތުކުރެވޭ، އެމްއެމްޕީއާރުސީގެ ހިޔާނާތުތަކާ ގުޅުން ހުރި ދެ ދައުވާއެއް މިހާރު ވެސް ކޯޓުގައި ކުރިއަށް އެބަދެ އެވެ.