އެމެރިކާ ބައްރުގެ ވެރިންގެ މަހާސިންތާ ފަށައިފި

އެމެރިކާ ބައްރުގެ ގައުމުތަކުގެ ވެރިންގެ މަހާސިންތާ، އެމެރިކާގެ ކެލިފޯނިއާގައި ރައީސް ޖޯ ބައިޑެން އިއްޔެ ފައްޓަވައިދެއްވައިފި އެވެ.

އެމެރިކާގެ ސިޔާސަތުތަކަށް ފާޑުކިޔާ ގައުމުތައް ބައިވެރިނުކޮށް، މިއަހަރުގެ މަހާސިންތާ އިއްޔެ ފެށި އިރު އެމެރިކާގެ އެންމެ ބޮޑު ކަންބޮޑުވުމަކަށް އޮތީ، އެމެރިކާ ބައްރުގައި ފެތުރެމުންދާ ޗައިނާގެ ނުފޫޒެވެ. އެމެރިކާގެ އަވައްޓެރިންގެ ގޮތުގައި އޮތް، ލެޓިން އެމެރިކާގެ ގައުމުތަކުން އެމެރިކާގެ އެހީތެރިކަމަށް އެދިއެދި އޮތް އިރު، އެމެރިކާގެ ސިޔާސަތު ބޮޑަށް އަމާޒުކޮށްފައި ހުރީ، ރަޝިޔާ އާއި ޗައިނާ އަދި އުތުރު ކޮރެއާގެ ސިޔާސީ އަދި އަސްކަރީ ނުފޫޒު ފެތުރުން ހުއްޓުވުމަށެވެ.

އެމެރިކާގެ ކެލިފޯނިއާގެ ލޮސް އެންޖަލްސްގައި، ޖޫން 8، 2022 ގައި ފެށި އެމެރިކާ ބައްރުގެ ގައުމުގަކުގެ ވެރިންގެ މަހާސިންތާ ހުޅުވުމުގެ ޖަލްސާ އަށް، ކޮސްޓަރީކާގެ ރައީސް ރޮޑްރިގޯ ޗާވޭޒް ރޮބެލްސް އާއި އަނބިކަނބަލުން ސިގްނޭ ޒެއިކާޓް ވަޑައިގަންނަވަނީ. --އޭއެފްޕީ

މިފަހަރުގެ މަހާސިންތާ އަށް އެމެރިކާ އިން ދައުވަތު ނުދޭ ގައުމުތަކުގެ ތެރޭގައި ހިމެނެނީ، ކިއުބާ އާއި ވެނެޒުއޭލާގެ އިތުރުން ނިކަރާގުއާ އެވެ. އެ ގައުމުތަކަށް އެމެރިކާ އިން ދައުވަތު ނުދޭތީ އެކަމާ ދެކޮޅު ހެއްދެވުމުގެ ގޮތުން، މެކްސިކޯގެ ރައީސް އަންދްރޭސް މެނުއެލް ލޮޕޭޒް ވަނީ މަހާސިންތާގައި ބައިވެރިނުވާން ނިންމަވައިފަ އެވެ. އެމެރިކާގެ އެ ނިންމުމާ ދެކޮޅު ހެދުމުގެ ގޮތުން، އެހެން ބައެއް ގައުމުތަކުން ނިންމީ ވެރިންގެ ބަދަލުގައި ޚާރިޖީ ވަޒީރުން ބައިވެރި ކުރުމަށެވެ.

މަހާސިންތާ ފައްޓަވައިދެއްވުމުގެ ގޮތުން ދެއްކެވި ވާހަކައިގައި އެމެރިކާގެ ރައީސް ޖޯ ބައިޑެން ވިދާޅުވީ ދެމެހެއްޓެނިވި ގޮތެއްގައި ވިޔަފާރީގެ މުއާމަލާތްތައް ހިންގޭ ފަދަ ގޮތަކަށް، އެމެރިކާ ބައްރުގެ ގައުމުތައް އެއް ގައުމުން އަނެއް ގައުމުގައި އިންވެސްޓުކުރަންޖެހޭ ކަމަށެވެ. އަދި އެމެރިކާ ބައްރުގެ ވިޔަފާރީގައި އެމެރިކާގެ ބައިވެރިވުން އިތުރުކުރުމަކީ މުޅި އެމެރިކާ ބައްރަށް ލިބޭނެ އިތުރު ފާގަތިކަމެއް ކަމަށް ވެސް ބައިޑެން ވިދާޅުވި އެވެ.

އެމެރިކާގެ ކެލިފޯނިއާގެ ލޮސް އެންޖަލްސްގައި، ޖޫން 8، 2022 ގައި ފެށި އެމެރިކާ ބައްރުގެ ގައުމުގަކުގެ ވެރިންގެ މަހާސިންތާ ހުޅުވުމުގެ ޖަލްސާ އަށް، އާޖެންޓީނާގެ ރައީސް އަލްބާޓޯ ފެރްނާންޑޭޒް އާއި އަނބިކަނބަލުން ފަބިއޯލާ ޔަނޭޒް ވަޑައިގަންނަވަނީ. --އޭއެފްޕީ

ބައިޑެންގެ ވާހަކަތަކުން އެނގުނު ގޮތުގައި އެމެރިކާ މިހާރު އެންމެ ބޮޑަށް ބޭނުންވަނީ ލެޓިން އެމެރިކާގެ ގައުމުތަކާއި ކެރީބިއަންގެ ގައުމުތަކުން ޗައިނާއާ އެކުގައި ކުރަމުން އަންނަ ވިޔަފާރީގެ މުއާމަލާތްތައް ހުއްޓާލައި، އެހެން ގައުމުތަކަކާ އެކު ވިޔަފާރީގެ ގުޅުން ބަދަހިކުރުމަށެވެ.

އދ.ގެ ތަފާސްހިސާބުތަކަށް ބަލާއިރު 2015 ވަނަ އަހަރާ ހަމައަށް އައިއިރު ވެސް، ލެޓިން އެމެރިކާގެ ގައުމުތަކުގެ ވިޔަފާރީގައި، ޗައިނާ އަށް ވުރެ އެމެރިކާގެ ހިއްސާ ބޮޑެވެ. ނަމަވެސް 2015 ވަނަ އަހަރުން ފެށިގެން 2021 ވަނަ އަހަރާ ދެމެދު، އެމެރިކާގެ ސިޔާސަތުތަކަށް އައި ބަދަލުތަކުގެ ސަބަބުން، ލެޓިން އެމެރިކާ ގައުމުތަކުގެ ވިޔަފާރީގައި، އެމެރިކާގެ ހިއްސާ އަށް ވުރެ ޗައިނާގެ ހިއްސާ މިހާރު މާ ބޮޑެވެ.

މިހާރު އެމެރިކާގެ ލޮސް އެންޖަލްސްގައި ކުރިއަށް ދާ މަހާސިންތާއަކީ، އެމެރިކާ ބައްރުގެ ގައުމުތަކުގެ ވެރިންގެ މަހާސިންތާ ތައާރަފްކުރުމުގެ ގޮތުން 1994 ވަނަ އަހަރު ބޭއްވި ބައްދަލުވުމަށް ފަހު، އެމެރިކާގައި މި މަހާސިންތާ ބާއްވާ ފުރަތަމަ ފަހަރެވެ.