ވަގްނާ ގުރޫޕް: މި ގުރޫޕްގެ ކޮމާންޑަރު ޔެވްގެނީ ޕްރިގޮޒީން ދަތުރުކުރި ކުޑަ މަތިންދާބޯޓު ވެއްޓި އެއިން ދަތުރުކުރި އެންމެން މަރުވެފައި
28 އޯގަސްޓް 2023 - 14:54
ރަޝިޔާގެ މަޝްހޫރު ކުލީ ސިފައިންގެ ޖަމާއަތް، ވަގްނާ ގުރޫޕްގެ ކޮމާންޑަރު ޔެވްގެނީ ޕްރިގޮޒީން ދަތުރުކުރި ކުޑަ މަތިންދާބޯޓު ވެއްޓި، އޭނާ އާއި އެއިން ދަތުރުކުރި އެންމެން މަރުވެފައިވާ އިރު، އެ ހާދިސާގެ ހަގީގަތާ މެދު ގިނަ ބަޔަކު ސުވާލު އުފައްދަން ފަށައިފި އެވެ.
ޔެވްގެނީ އާއި ވަގްނާ ގުރޫޕްގެ އިސް ވެރިންތަކެއް ދަތުރުކުރި އަމިއްލަ މަތިންދާބޯޓު ވެއްޓުނީ، މި މަހުގެ 23 ވަނަ ދުވަހު ރަޝިޔާގެ ވެރިރަށް މޮސްކޯ އިން ފުރައިގެން ސެއިންޓް ޕީޓަސްބާގް އަށް ދަތުރު ކުރަނިކޮށެވެ. އެ ހާދިސާގައި އެ ބޯޓުގައި ދަތުރުކުރި 10 މީހުންވެސް މަރުވެފައިވާ ކަން ރަޝިޔާ ސަރުކާރުން ކަށަވަރުކޮށްދޭއިރު، ހުޅަނގުގެ ބައެއް ގައުމުތަކުން ބުނާ ގޮތުގައި އެއީ ރަޝިޔާ ސަރުކާރުގެ ރޭވުމަކަށް ވެދާނެ އެވެ.
ޖާސޫސީ މަސްދަރުތަކާ ހަވާލާދީ ހުޅަނގުގެ ބައެއް ގައުމުތަކުން ބުނާ ގޮތުގައި ޔެވްގެނީ ދަތުރުކުރި މަތިންދާބޯޓު ވެއްޓުނީ އޭގައި އެއްޗެއް ގޮވުމުގެ ސަބަބުން ކަމަށް ވަރަށް ބޮޑަށް ބެލެވެ އެވެ. ވަގްނާ ގުރޫޕުގެ ޓެލެގްރާމް ޗެނަލުން ބުނި ގޮތުގައި ޔެވްގެނީ ދަތުރުކުރި މަތިންދާބޯޓު ވެއްޓުނީ، ރަޝިޔާގެ ވައިގެ ދިފާއީ ނިޒާމުން ދިން މިސައިލް ހަމަލާއެއްގަ އެވެ.
ރަޝިޔާގެ ތަހުގީގީ އިދާރާ އިން ބުނެފައިވަނީ، އެ ބޯޓުން ދަތުރުކުރި މީހުންގެ ލިސްޓުގައި ހިމެނޭ 10 މީހުންނާ، ބޯޓު ވެއްޓުނު ސަރަހައްދުން ފެނުނު މިނި ގުނަވަންތަކުގެ ތަހުލީލީ ނަތީޖާ ބަރާބަރަށް ދިމާވާ ކަމަށެވެ. އަދި ބޯޓު ވެއްޓުނު ސަރަހައްދުން ފެނުނު މިނި ގުނަވަންތަކުގެ ޖެނެޓިކް ޓެސްޓުތަކުގެ ނަތީޖާ ދައްކާ ގޮތުން، މަރުވި މީހުންގެ ތެރޭގައި ޔެވްގެނީ ވެސް ހިމެނޭ ކަން ކަށަވަރުވެފައިވާ ކަމަށް ވެސް އެ އިދާރާ އިން ބުންޏެވެ.
މަރުވި މީހުންގެ ތެރޭގައި ހިމެނެނީ ބޯޓުގެ ޕައިލެޓާއި ކޯ ޕައިލެޓާއި ފަޅުވެރިޔާގެ އިތުރުން ޔެވްގެނީ އާއި އޭނާގެ އިސް އެހީތެރިންގެ ހަ މީހުންނެވެ. އަމިއްލަ ޖެޓެއްގައި އެ 10 މީހުން ދަތުރުކުރީ ޔެވްގެނީގެ އުފަން ސަހަރު، ސެއިންޓް ޕީޓަސްބާގް އަށް ދިއުމަށެވެ. ބޯޓު ވެއްޓުނީ ދަތުރުގެ މެދަކާ ހިސާބުންނެވެ.
ޔެވްގެނީގެ މަރުގެ ހާދިސާ މި ހިނގީ، ރަޝިޔާގެ ރައީސް ލަޑިމިއާ ޕުޓިންގެ ސަރުކާރު ވައްޓައިލުމަށް، އޭނާގެ ލަޝްކަރު ގޮވައިގެން ބަރު ހަތިޔާރާއެކު ރަޝިޔާގެ ވެރިރަށް މޮސްކޯއަށް އަރައި ސަރުކާރުގެ މުހިންމު ބައެއް އިމާރާތްތައް ހިފައި ބަޣާވާތް ކުރިތާ ބަރާބަރު ދެމަސް ފުރުނު ދުވަހު އެވެ.
މި އަހަރުގެ ޖޫން 23 ވަނަ ދުވަހު ކުރި ބަޣާވާތުގައި ޔެވްގެނީގެ ރޭވުމާ އެއްގޮތަށް ކަންތައް ނުދިޔުމުން، ޖެހިގެން އައި ދުވަހު ވަގްނާ ގުރޫޕުގެ ހަނގުރާމަވެރިން ވަނީ މޮސްކޯ އިން ފައިބައިފަ އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ވިކިލީކްސް
29 August 2023
ނޭޓޯއާ މުޅި ހުޅަނގަށްވެސް ރަޝިއާ ބަލިކުރުމަކީ ނާދިރު ކަމެއްކަމާ، ޕުޓިން އަކީ ކިހާވަރެއްގެ ލީޑަރެއްކަމާ، ޤައުމުގެ ސަލާމަތަށްޓަކައި ކިތަންމެ ގާތް މީހަކުވެސް މަރާލާކަށް ޕުޓިން ފަސްނުޖެހޭނެކަން މީގެން މިއެނގެނީ.
ޔެވްގެނީ
28 August 2023
ބަނީ އިސްރާއިލް ގެ ދަރިން ބުނާނީ އޭނާ މަރެއްނުވޭ. އޭނާ މަރެއް ނުވޭ.
ސިމްޕަލް
28 August 2023
ވަގްނާ ގުރޫޕްގެ ވެރިޔާގެ މަރާ މެދު ސުވާލު އުފެދުނަސް، އަޅުގަނޑު ހިތުން ސުވާލު ނުއުފެދޭ ހަގީގަތަކީ، ރައީސް ޕުޓިންއަކީ، ދުވަހަކުވެސް ހަނދާން ނައްތާނުލާ އަދި ދުވަހަކުވެސް މާފު ނުކުރާ ވެރިއެއްކަމެވެ.
އަމީނު
29 August 2023
އެއީ މުސްލިމު ވަރުގަދަ ލީޑަރުން ގެ ގޮތަކީ
ކަންކުރާ އާއި ނަންނުވާ
28 August 2023
ވަގްނާ ގްރޫޕްގެ ކޮމާންޑަރަކަށް ޕްރިގޮޒީން ލީ ރަޝިޔާއިން. އެކަމަކު ހަނގުރާމައިގެ މެދުތެރެއިިން ފެނުނީ ޔޫކްރޭންއާއި ހަނގުރާމަ ކުރުން ދޫކޮށް ވެގްނަރ ގްރޫޕުން ރަޝިޔާ ސަރުކާރުގެ މައި މަރުކަޒަށް މިސްރާބު ޖެހިތަން، ޕުޓިން މިކަމާ ހިތްހަމަނުޖެހި ޕްރިގޮޒީން އަކީ ގައްދާރެކޭ ޓީވީއަށް އަރާ ބުނި. ގައްދާރުންނަށް ޕުޓިން ހަދާލާ ގޮތް އެފެނުނީ. އެކަމަކު ޕްރިގޮޒީން މަރާލިކަމުގެ ތުހުމަތު ރަޝިޔާއިން އަޅުވާނީ އެމެރިކާގެ ބޮލުގައި ކަމަށް ވަރަށް ބޮޑަށް ހީވޭ.
ބީރުބޮލުވަޒީރު.
28 August 2023
ޔެވްގެނީ ޕްރިގޮޒީން އެއީ ޕުޓިންގެ ބޮޑުކައްކާ. ވެގުނާ ގުރޫޕުގެ ލީޑަރަކީ ރަސިއާގެ ރައީސް ޕޫޓިން. ޔެވްގެނީ ޕްރިގޮޒީން އަކީ ދުނިޔެއަށް ދައްކާފަހުރި ނަންބޯޑެއް. ބޭނުން ކެނޑުނީމަ ދުއްވާލީ. ޕޫޓިން އެއީ ރަސިއާގެ މާފިއާގެ ލީޑަރު. ރަސިއާގެ ހުރިހާ ތެއު ދަނޑުތަކާއި ދަނޑު ބިންތަކާއި ގޭސްވަޅުތަކުގެ ވެރިއާ. ރަސިއާގެ ރައީސް. ވެގުނާ ގުރޫޕުގެ ބޮސް. އޯލް އިން ވަން. ސަލީމު އިދުރީސަށް މިކަން ވަރަށް ރަނގަޅަށް އެނގޭނެ.