ކެމެރާތައް ހިފައިގެން ނުކުމެ މިފަހަރު މިތިބީ ދަރިވަރުން!

ސްކޫލުތަކުން ބާއްވާ މި ފަދަ މުބާރާތްތަކާއި އިވެންޓުތަކުގެ ފޮޓޯ އާއި ވީޑިއޯ ނެގުމަކީ އާއްމު ގޮތެއްގައި އެ ސްކޫލެއްގެ މީޑިއާގެ ކަންކަން ބަލަހައްޓާ މުވައްޒަފުން ކުރާ ކަމެކެވެ. ނަމަވެސް، ދ. ކުޑަހުވަދޫގައި ހުންނަ އަތޮޅު ތައުލީމީ މަރުކަޒުން މި ފަހަރު ފެނުނީ ތަފާތު ކަމެކެވެ.

ކީ-ސްޓޭޖް 3 ގެ ދަރިވަރުންގެ ސްޕޯޓްސް ފެސްޓިވަލްގެ ފައިނަލް އާއި ނިންމުމުގެ ރަސްމިއްޔާތު ލައިވްކުރުމުން ފެށިގެން، އެ މަންޒަރުތައް ފަހަށް ރައްކާކުރުމުގެ ހުރިހާ ކަމެއްގައި ބައިވެރިވީ އެ ސްކޫލުގައި ދަރިވަރުންނެވެ.

މި މަހުގެ 1-10 އަށް ބޭއްވި ފުޓްސަލް އަދި ހޭންޑްބޯޅަ މުބާރާތުގެ ކަވަރޭޖުގައި އެ ސްކޫލުގެ ގްރޭޑު 9 އަދި 10 ގެ 10 ވަރަކަށް ދަރިވަރުން ބައިވެރިވި އެވެ. މީޑިއާ ކްލަބްގައި މިހާރު ވެސް ގްރޭޑު 6 އިން ފެށިގެން މަތީގެ ދަރިވަރުން ބައިވެރިވެ އެވެ.

އެ ސްކޫލުގެ ފޭސްބުކް ޕޭޖުގައި ބުނީ، ސްޕޯޓްސް ފެސްޓިކަލްގެ ކަވަރޭޖުގައި ބައިވެރިވެގެން ދަރިވަރުންނަށް ގިނަ ކަންކަން ދަސްވެފައިވާ ކަމަށެވެ. އެކަންކަމުގެ ތެރޭގައި ކުޅިވަރު ހަރަކާތެއްގައި ގިނަ ކެމެރާ ސެޓަޕެއް ބޭނުންކޮށްގެން ޝޮޓް ހަދާނެ ގޮތްތަކާއި އިންޓަކޮމް ސިސްޓަމް މެދުވެރިކޮށް މުއާމަލާތްކުރުމުގެ ހުނަރު ދަސްކޮށްދީފައިވެ އެވެ.

އޭގެ އިތުރުން ބޫމް މައިކް އޮޕަރޭޓްކުރާނެ ގޮތާއި ކުޅިވަރު ކުޅޭ ތަނެއްގައި، އެ ތަނުގެ އަސްލު އޯޑިއޯ ބަލަހައްޓާނެ ގޮތްތައް އަދި ތަފާތު 2 އޯޑިއޯ މިކްސަރު މެދުވެރިކޮށް ސްޓޭޖް އޯޑިއޯ މައިކްރޯފޯން ބަލަހައްޓާނެ ގޮތް ކިޔައިދީފައިވާ ކަމަށް، މީގެ ހަތަރު ދުވަސްކުރިން އެ ޕޭޖުގައި ކުރި ޕޯސްޓުގައި ބުންޏެވެ.

ސްކޫލުން ބުނީ އެ ހަރަކާތުގައި ދަރިވަރުން ބައިވެރިކުރުމުގެ ބޭނުމަކީ ޕްރޮފެޝަނަލް މަލްޓި ކެމެރާ ލައިވް ޕްރޮޑަކްޝަން މާހައުލެއްގައި މަސައްކަތްކުރުމުގެ ތަޖުރިބާ ހޯދައިދިނުމަށް ކަމަށެވެ.

އެހެންވެ، އޭގެ ހުރިހާ އިންތިޒާމެއް ހަމަޖައްސާފައި ވަނީ ޓީވީ ބްރޯޑްކާސްޓިންގެ މިންގަނޑުތަކާ އެއްގޮތަށެވެ. އޭގެ ސަބަބުން ދަރިވަރުން މުސްތަގުބަލުގައި ބޭނުންކުރާނެ ތަޖުރިބާ ހޯދައިދިނުމުގެ އަމާޒަށް ވާސިލްވުމުގެ މަގު ފަހިވެގެން ގޮސްފައިވާ ކަމަށް ސްކޫލުން ބުންޏެވެ.

ދ. އަތޮޅު ތައުލީމީ މަރުކަޒުގެ އާޓް އެންޑް މީޑިއާ ކްލަބުގެ ދަރިވަރުން މިހާރު އަންނަނީ ވީޑިއޯ ޕްރޮޑަކްޝަނާއި އޯޑިއޯ ތިއަރީގެ ތަމްރީނުތައް ހަދަމުންނެވެ. އެއާއެކު، އެ ކުދިންނަށް މަސައްކަތުގެ މާހައުލުގައި ބޭނުންވާ ތަމްރީނު ވެސް ދެމުން އަންނަ ކަމަށް، އެ ޕޭޖުގައިވެ އެވެ.