އެޗްޑީސީން މިލިއަން ގަސް އިންދުމަށް ގަމުގައި ނާސަރީއެއް ހަދަނީ

ލ. ގަމުގައި އެޗްޑީސީގެ ނާސަރީއެއް ހަދަން ނިންމައި، އެކަމަށް ބޭނުންވާ ބިން އެ ރަށުން ހަމަޖައްސައިފި އެވެ.

ނާސަރީ ހެއްދުމަށް ބޭނުންވާ ބިން ހަމަޖެއްސީ އެ ކުންފުނީގެ މެނޭޖިންގް ޑިރެކްޓަރު މުހައްމަދު މައުރޫފް ޖަމީލް އިއްޔެ ގަމަށް ކުރެއްވި ރަސްމީ ދަތުރުގައި، ގަމު ކައުންސިލާ އެކު ބޭއްވި މަޝްވަރާ ބައްދަލުވުމުގަ އެވެ.

ނާސަރީ ހައްދަން އެޗްޑީސީ އަށް ދޫކުރީ އެއްލައްކަ އަކަފޫޓުގެ ބިމެކެވެ.

އެޗްޑީސީން މިއަދު ބުނީ، އެ ނާސަރީ ހަދަން ނިންމީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުތަކުގެ ތެރޭގައި ހިމެނޭ ފަސް މިލިއަން ގަސް އިންދުމުގެ ޕްރޮގުރާމުގައި ބައިވެރިވުމުގެ ގޮތުން ކަމަށެވެ.

އެޗްޑީސީން ވަނީ އެއް މިލިއަން ގަސް އިންދުމަށް ނިންމައިފަ އެވެ. ގަމުގައި ހަދާ ނާސަރީ ބޭނުން ކުރާނީ އެކަމަށް ބޭނުންވާ ގަސް ހެއްދުމަށް ކަމަށް ވެސް އެ ކުންފުނިން ބުންޏެވެ.

ހުޅުމާލޭގެ އިތުރުން އެޗްޑީސީގެ ބެލުމުގެ ދަށުގައިވާ ރަސްމާލެ އާއި ކުޑަގިރި އާއި ތިލަފުއްޓާއި ގުޅިފަޅުގައި އިންދާ ގަސްތައް ހެއްދުމަށް ވެސް އެ ނާސަރީ ބޭނުންކުރާނެ ކަމަށް އެޗްޑީސީން ބުންޏެވެ.

އެޗްޑީސީގެ ބެލުމުގެ ދަށުގައިވާ ރަށްތައް ފެހިކުރުމަށާއި ސަރުކާރުގެ ފަސް މިލިއަން ގަސް އިންދުމުގެ ޕްރޮގުރާމުގައި ބައިވެރިވުމަށް އެ ކުންފުނިން ސޮއިކުރީ، ކުޑަގިރި ޕިކްނިކް އައިލެންޑަށް ދެ އަހަރު ފުރުން ފާހަގަކުރުމަށް މިދިޔަ ހޮނިހިރު ދުވަހު ބޭއްވި ހަރަކާތްތަކުގެ ތެރެއިންނެވެ.

އެޗްޑީސީން ބުނީ އެ ޕްރޮގްރާމާ އެކު، ހުޅުމާލެ ހިމެނޭހެން އެ ކުންފުނީގެ ބެލުމުގެ ދަށުގައި އޮންނަ ރަށްތައް ފެހިކުރުމުގެ އަމާޒަށް ވާސިލުވުމަށް މަގުފަހިވާނެ ކަމަށެވެ.