ގެއެއްގެ ވެރިފަރާތަށް އަނިޔާކުރި ކަމަށް ތުހުމަތުވާ މީހުންގެ މައްޗަށް ހެކި ނެތް ކަމަށް ބުނެ ބަންދުން ދޫކޮށްލައިފި

މާލޭގެ ގެއެއްގެ ވެރިމީހާ އަށް ބިރުދައްކައި، އަނިޔާކުރި މައްސަލާގެ ތުހުމަތުގައި ހައްޔަރުކުރި ހަތަރު މީހުންގެ މައްޗަށް ހެކި ނެތް ކަމަށް ބުނެ ކްރިމިނަލް ކޯޓުން އެ މީހުން ބަންދުން ދޫކޮށްލައިފި އެވެ.

ގަލޮޅުގައި ހުންނަ ގެއެއްގެ ވެރިމީހާއަށް ބިރު ދައްކައި، އަނިޔާކުރާ މަންޒަރު ފެންނަ ވީޑިއޯއެއް އާންމުވެފައި ވާއިރު އެކަމުގައި ބައިވެރިވި ކަމުގެ ތުހުމަތުގައި މީގެ އެއް މަސް ކުރިން ބަޔަކު ހައްޔަރު ކޮށްފައިވެ އެވެ. އެ މީހުންގެ ބަންދަށް ދެ ފަހަރެއްގެ މަތިން 30 ދުވަސް ކުރިން ކޯޓުން އިތުރުކޮށްފައިވެ އެވެ.

އެ މައްސަލާގައި ކުށުގެ ވެށިން ހައްޔަރު ކޮށްފައިވަނީ ތ. ގުރައިދޫ ފަޒާ، އަލީ ނަވާފު އާއި ނ. މަނަދޫ ހަވޭލީ، މުހައްމަދު އަޒާނާއި ނ. ވެލިދޫ އެލަސް، އިބްރާހިމް އަހުނަފާއި އއ. މާޅޮސް ރީތިހިޔާ މުހައްމަދު އަފްލާހެވެ.

އެ ހަތަރު މީހުންގެ ބަންދުގެ މުއްދަތު ހަމަވާތީ އިއްޔެ ކްރިމިނަލް ކޯޓަށް ހާޒިރުކުރުމުން އެ މީހުން ބަންދުން ދޫކޮށްލަން ނިންމާފައިވަނީ ބަންދުގައި ބައިތިއްބަން އެކަށީގެންވާ މިންވަރަށް ހެކި ހުށަހަޅާފައިނުވާ ކަމަށް ބުނެ އެވެ. އެ މީހުން ޝަރުތުކޮށް ބަންދުން ދޫކޮށްލީ އެ މީހުން ޝަރީއަތް ނިމެންދެން ބަންދުކުރަން ދައުލަތުން އެދިފައި ވަނިކޮށެވެ.

Aniyaa libunu meeha bunee apartment kuyyah dhinee ves biru dhekkumun kamah

The most trusted news source in the Maldives

Mihaaru

ކޯޓުގައި އެ މީހުންގެ ފަރާތުން ބުނެފައިވާ ގޮތުގައި އެ މީހުން ދިޔަ އެޕާޓްމެންޓަކީ އަތޫފް ނަމަކަށް ކިޔާ އެ ރައްޓެއްސަކު ކުއްޔަށް ނަގައިގެން އުޅޭ ތަނެކެވެ. އެ ތަން ކުއްޔަށް ނަގާފައިވާކަން ހާމަވާ ލިޔުމެއް އޮތް ކަމަށް އެ މީހުން ބުނި ނަމަވެސް، އެފަދަ ކަމެއް އެނގޭނެ އެއްވެސް ލިޔުމެއް ލިބިފައިނުވާ ކަމަށް ފުލުހުން ވަނީ ކޯޓުގައި ބުނެފަ އެވެ.

ނަމަވެސް ގޭގެ ވެރިފަރާތާ ހަވާލާދީ ފުލުހުން ކޯޓުގައި ބުނި ގޮތުގައި އެ ތަން ކުއްޔަށް ދީފައިވަނީ އަލީ ޝިމާން ރަޝީދު ކިޔާ މީހަކަށެވެ. އޭނާއަށް އެ ތަން ކުއްޔަށް ދޭން ޖެހުނީ ވެސް ބިރު ދައްކައި، ގަދަކަމުން އެއްބަސްވުމުގައި ސޮއިކުރުވައިގެން ކަމަށް ގޭގެ ވެރިފަރާތުން ބުނެފައިވާ ކަމަށް ފުލުހުން ކޯޓުގައި ވަނީ ބުނެފަ އެވެ.

ބިރު ދެއްކި ކަމަށް ތުހުމަތުވާ އެޕާޓްމެންޓްގެ ތެރެއިން ހައްޔަރުކުރި އެ ހަތަރު މީހުން ވެސް ކޯޓުގައި ބުނެފައިވަނީ އެ މީހުން އެ އެޕާޓްމެންޓަށް ދިޔައީ ފައިސާ ދީގެން، އެ ތަން ސާފުކޮށްދޭން އަތޫފް އެދުމުން ކަމަށެވެ. އަދި އެ ތަނަށް ގެއްލުންދީ، މާރާމާރީ ހިންގާފައިނުވާނެ ކަމަށް އެ މީހުން ވަނީ ބުނެފަ އެވެ.

ދައުރުވި ވީޑިއޯއިން ފެންނަ ގޮތުގައި އެޕާޓްމެންޓެއްގެ ތެރޭގައި އެ ގޭގެ ވެރިފަރާތުގެ އަނގައިގައި ޓޭޕު އަޅައި ބަންދުކޮށް، އިތުރު މީހަކު އޭނާގެ ގައިގައި ހިފަހައްޓައިގެން ހުރެ އެވެ. ދެން ހުރި މީހާ މަސައްކަތް ކުރަނީ ރޯކޮށްފައި އޮތް ސިނގިރޭޓެއް އެ މީހާގެ ގައިގައި ޖައްސާށެވެ. އަދި އިތުރު މީހަކު ބޮޑު ހީރަސް ދައްޗަކުން އެ މީހާގެ ގަޔަށް ހީރަސް ޖަހަން ވެސް މަސައްކަތްކުރާ ތަން ވީޑިއޯއިން ފެނެ އެވެ. އެއީ އެ ތަން ކުއްޔަށް ދޭން އެއްބަސްކުރުވުމަށް އަނިޔާ ކުރަމުން ނަގާފައިވާ ވީޑިއޯއެއް ކަން އަދި ސާފެއް ނުވެ އެވެ.