ޑްރަގްސް ފެނުނު ބޭރު ބޯޓުގެ ކެޕްޓަންގެ ބަންދަށް އިތުރު 15 ދުވަސް

ކަނޑުބޯޓެއްގައި މިދިޔަ މާޗު މަހު ރާއްޖެއަށް ޑްރަގްސް އެތެރެކުރަން އުޅުމުގެ ތުހުމަތުގައި ހައްޔަރުކުރި މީހުންގެ ތެރެއިން އެކެއްގެ ބަންދުގެ މުއްދަތު އިއްޔެ އިތުރުކޮށްފި އެވެ.

ކްރިމިނަލް ކޯޓުގެ ބަންދު އަމުރުގައި ބުނީ އިންޑޮނޭޝިއާގެ ނަސްވާން އަދީލްގެ ބަންދަށް 15 ދުވަސް އިތުރުކުރީ ކުށް ކުރި ކަމަށް އެކަށީގެންވާ ހެކި ހުށަހަޅާފައިވާތީ ކަމަށެވެ. އަދި ބަންދުގައި ބަހައްޓަނީ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެތީ ކަމަށް ވެސް ބުނެފައިވެ އެވެ.

ފުލުހުން ހިންގި އޮޕަރޭޝަނެއްގައި މިދިޔަ މާޗު 21 ވަނަ ދުވަހުގެ ރޭ މާލެ ސަރަހައްދުން ބޯޓެއް ބަލައި ފާސްކޮށް މަސްތުވާތަކެތި ކަމަށް ތުހުމަތު ކުރެވޭ ހަތް ކިލޯ އަށް ވުރެ ގިނަ ތަކެތި ހޯދި އެވެ. އެ މައްސަލައިގައި 10 މީހުން ހައްޔަރުކުރި އެވެ. އެއީ އިންޑިއާގެ ހަތް މީހަކާއި އިންޑޮނީޝިއާގެ ތިން މީހެކެވެ. ކޯޓުގައި ފުލުހުން ބުނީ ބޯޓުގެ އިންޖީނު ރޫމްގެ ވަތެއްގެ ތެރެއިން މަސްތުވާތަކެތި ކަމަށް ޝައްކުކުރެވޭ ހަތް ޝީޓު ފެނިފައިވާ ކަމަށާއި އެ ތަކެތި ޓެޓްރާހައިޑްރޯކެނަބިލް އަދި ކެނަބިލޯއަށް ޕޮޒިޓިވްވެފައިވާ ކަމަށެވެ. ނަސްވާނަކީ ބޯޓުގެ ކެޕްޓަނަށް ވުމާއި އެ ތަކެތީގެ ޒިންމާ އެހެން މީހަކު ނުނަގާ ހާލަތުގައި މަސްތުވާތަކެއްޗަށް ޒިންމާ ނަގަން ޖެހޭނީ ނަސްވާން ކަމަށް ފުލުހުން ބުނެފައިވާ ކަމަށް އަމުރުގައި ވެ އެވެ.

"މައްސަލައިގައި ތުހުމަތު ކުރެވޭ ބައެއް ފަރާތްތައް މިހާރު ބަންދުން ދޫކޮށްފައިވާ ކަމަށް ދިފާއީ ވަކީލު ފާހަގަކޮށްފައިވާއިރު މީނާއަކީ ބޯޓުގެ ކެޕްޓަން ކަމަށް ވާތީ ޒިންމާގެ ގޮތުން ފަރަގުތަކެއް ހުންނާނެ ކަން ބަލަންޖެހެ އެވެ...މި ބޯޓުން ފެނުނު މަސްތުވާތަކެތި ޒިންމާ އެހެން ފަރާތަކުން ނަގާފައި ނުވާއިރު އަދި އެ ތަކެތި ބޯޓުގައި ތިބި އެހެން އެއްވެސް ފަރާތަކާ ގުޅުވައިދޭނެ ހެއްކެއް ނުވަތަ ގަރީނާއެއް ނަމަވެސް ލިބިފައި ނުވާއިރު މި ފެނުނު މަސްތުވާތަކެތި ރާއްޖެ އެތެރެ ކޮށްފައިވަނީ މީނާގެ ކެޕްޓަން ކަމުގައި ރާއްޖެ އައި ބޯޓަކުން ކަން އެނގެން އޮވެ އެވެ،" ބަންދު ހުކުމުގައި ވެ އެވެ.

އެހެންވެ، ބޯޓުގައި މަސްތުވާތަކެތި ހުރިކަން ނޭނގޭ ކަމަށް ބުނެ ކެޕްޓަންގެ ޒިންމާއިން ބަރީއަވެވިދާނެ ކަމަށް ނުދެކޭ ކަމަށް ހުކުމުގައި ފާހަގަކޮށްފައިވެ އެވެ.