ސްކައިޕް މެދުވެރިކޮށް ރައީސް ނަޝީދު ވާހަކަފުޅު ދައްކަވަނީ: ރައީސް ޔާމީންގެ އިގްތިސާދީ ސިޔާސަތަށް ވަރަށް ބޮޑަށް ފާޑުވިދާޅުވި.
21 މެއި 2018 - 11:26
ދިވެހިރާއްޖޭގައި އިންސާފާއި ހަމަހަމަކަން ނިގުޅައިގަނެ، ރައީސް އަބްދުﷲ ޔާމީންގެ ސަރުކާރުން ތަރައްގީގެ ނަމުގައި ދިވެހި ރައްޔިތުންނަށް ދެއްކީ ކޮމްޕިއުޓަ ގްރެފިކްސްގެ މަންޒަރުތަކެއް ކަމަށް ކުރީގެ ރައީސް މުހައްމަދު ނަޝީދު ރޭ ވިދާޅުވެއްޖެ އެވެ.
ބޮޑުތަކުރުފާނު މަގުގައި ހުންނަ އެމްޑީޕީގެ ހަރުގޭގައި "ޖަޒީރާ ކެމްޕޭން އޮފީސް"ގެ ނަމުގައި އެ މަނިކުފާނުގެ ކެމްޕޭން އޮފީސް ހުޅުވަން ބޭއްވި ބައްދަލުވުމުގައި، ސްކައިޕް މެދުވެރިކޮށް ނަޝީދު ވިދާޅުވީ ރައީސް ޔާމީން ގެންނަވަން ވައުދުވެވަޑައިގެންނެވި އެއްވެސް ސިޔާސަތެއް ކާމިޔާބުނުވާ ކަމަށެވެ. ސްޕެޝަލް އިކޮނޮމިކް ޒޯން ހައްދަވައިގެން ގިނަ އަދަދެއްގެ ވަޒީފާ އުފައްދަވާނެ ކަމަށް ވިދާޅުވި ނަމަވެސް އެކަން ފޭލްވެފައިވާ ކަމަށާއި ކޮންމެ އަހަރެއްގެ ބަޖެޓުގައި ގުޅީފަޅުގެ މަޝްރޫއު ހިންގުމަށާއި އިހަވަންދިއްޕޮޅުގެ ބިޔަ މަޝްރޫއެއް ހިންގަން އަދަދުތައް ޖެހި ނަމަވެސް އެ މަޝްރޫއުތައް ވެސް ފެންނަން ނެތް ކަމަށެވެ.
އެމަނިކުފާނު ވިދާޅުވި ގޮތުގައި ކޮމްޕިއުޓަރު ގްރެފިކްސް އިން ދެއްކޭނެ އެންމެހާ ނަލަ މަންޒަރުތައް ދިވެހި ރައްޔިތުންނަށް ރައީސް ޔާމީން ވަނީ ދައްކަވައިފަ އެވެ.
"ކޮމްޕިއުޓަ ގްރެފިކްސް އިން ވަރަށް ގިނަ އެއްޗެހި ދެއްކޭ، ވަރަށް ގިނަ މަންޒަރުތައް ކުރެހޭ. އެހެން ނަމަވެސް އެ ކަންކަން ހަގީގަތަކަށް ވެދަނީ އިންސާފު ގާއިމް ކުރެވުނީމާ. ހަމަހަމަކަން ގާއިމް ކުރެވުނީމާ. ވެރިކަން ސާފު ކުރެވުނީމާ. ރައްޔިތުން ބާރުވެރި ކުރެވުނީމާ. ރައްޔިތުން ތަރައްގީވީމާ. އަޅުގަނޑުމެންގެ އިގްތިސާދީ ސިޔާސަތުގެ ނާރެސްއަކީ އާއިލާ، ގެ،" ނަޝީދު ވިދާޅުވި އެވެ.
ނަޝީދު ވިދާޅުވީ އެމްޑީޕީގެ އެ ސިޔާސަތުގައި އުފުލައިދޭނީ ގެއެއްގެ އާމްދަނީ ކަމަށާއި އެ އާމްދަނީން ރައްޔިތު މީހާގެ ޖީބު ތަނަވަސްވާނެ ކަމަށެވެ.
ރައީސް ޔާމީންގެ ވެރިކަމުގައި ދައުލަތުގެ ދަރަނި އިންތިހާ އަށް ބޮޑުވެފައިވާ ކަމަށް ވިދާޅުވެ، ސަރުކާރުގެ އިގްތިސާދީ ސިޔާސަތަށް ނަޝީދު ވަރަށް ބޮޑަށް ފާޑުވިދާޅުވި އެެވެ.
އެ މަނިކުފާނު ވިދާޅުވި ގޮތުގައި ރާއްޖޭގެ ދަރަނި ބޮޑު ވެފައިވާއިރު، ރާއްޖެ ދަރަމުން އަންނަނީ، ލައްކައެއްހާ ރުފިޔާ ބޭނުންވުމުން، އެއް މިލިއަން ރުފިޔާ، ދަރަންޏަށް ފައިސާ ދޫކުރާ މީހެއްގެ އަތުގައި ބާއްވާފައި ފައިސާ ނަގާ އުސޫލުން ކަމަށެވެ.
"އެއް ލައްކަ ރުފިޔާ ނަގައިގެން އުފައްދާ ވިޔަފާރިއަކުން އެއް މިލިއަން ރުފިިޔާ އަނބުރާ ނުދެއްކޭނެ، ދެން ގެއްލެނީ ގޭގެ ގޯތި. [މި އުސޫލުން] އަޅުގަނޑުމެންގެ ރާއްޖޭގެ ރަޖިސްޓްރީ މިދަނީ ގެއްލެމުން. ޗައިނާގެ އެގްޒިމް ބޭންކުން ރާއްޖޭގައި ހިންގާ މަސައްކަތްތަކަށް ލޯނު ދީފައި ހުރީ ސީދާ މި ދެންނެވި އުސޫލުން،" ނަޝީދު ވިދާޅުވި އެވެ.
ތަފްސީލް ދެއްވަމުން ވިދާޅުވީ ކޮންޓްރެކްޓް ނެގުމަށް ފަހު އަގު ބޮޑު ކުރާ ކަމަށާއި އެ އަގަށް ސޮވަރިން ގެރެންޓީއެއް ހޯދާ ކަމަށެވެ. އެކަމަކު އުފައްދާ ވިޔަފާރި އަކީ ކުޑަ އަގުގެ ވިޔަފާރިއެއް ކަމަށް ވިދާޅުވި އެވެ.
"އެ ވިޔަފާރިން ކިހިނެއްތޯ ބޮޑުކުރި އަގުގެ ލޯނު ދައްކާނީ؟ ނުދެއްކޭނެ. 100 މިލިއަން ޑޮލަރުގެ ބްރިޖް 300 މިލިއަން ޑޮލަރަށް އެޅީމާ އޭގެ ލޯނެއް ނުދެއްކޭނެ. ނުދެއްކުނީމާ އެ ފަރާތްތަކުން ބޭނުން ވަނީ ހިއްސާ. އެ ހިއްސާއެކު ގެއްލެނީ ބިމާއި އިސްތިގްލާލް،" ނަޝީދު ވިދާޅުވި އެވެ.
އެމަނިކުފާނު ވިދާޅުވި ގޮތުގައި ދިވެހިންގެ އަތުގައި ދިވެހިރާއްޖެ ބާއްވަން ޖެހެ އެވެ. އެކަމަށް އެމްޑީޕީ އޮތީ ނުކުމެ ކަމަށާއި ރިޔާސީ އިންތިހާބުގައި ބޮޑު އަޣުލަބިއްޔަތުން ރައީސް ޔާމީން ބަލިކުރައްވާނެ ކަމަށް ވިދާޅުވި އެވެ.
ޓެރަރިޒަމްގެ 13 އަހަރުގެ ޖަލު ހުކުމާ ހެދި އިންތިހާބުގައި ވާދަކުރުމުގެ ގާނޫނީ ފުރުސަތުތައް ބަންދުވެފައިވާ ނަޝީދުގެ ވިދާޅުވީ އެ މަނިކުފާނުގެ ކެންޑިޑެސީއާ ގުޅޭ ގޮތުން ޝައްކު އުފައްދާނެ ތަނެއް ނެތް ކަމަށެވެ. ފެބުރުއަރީ 1 ގައި ސުޕްރީމް ކޯޓުގެ ފަސް ފަނޑިޔާރުން ސޮއި ކުރައްވައި ނެރުއްވި އަމުރަކުން އެ ހުކުމް ބާތިލް ކޮށްފައިވާ އިރު، އދ.ގެ ވޯކިން ގްރޫޕް އޮން އާބިޓްރަރީ ޑިޓެންޝަނާއި އިންސާނީ ހައްގުތަކާ ބެހޭ ކޮމެޓީން ވެސް އެ މަނިކުފާނު މިނިވަންކުރަން ގޮވާލާފައިވާ ކަމަށް ވިދާޅުވި އެވެ.
ސުޕްރީމް ކޯޓުގެ އަމުރަކުން އެ މަނިކުފާނު މިނިވަންވެފައި ވަނިކޮށް، އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދު ހައްޔަރުކޮށްގެން ނެރުނު އަމުރަކުން، އެހެން ގޮތަކަށް ބަދަލުވެފައިވާ ކަމަށް ރައީސް ޔާމީން ވިދާޅުވިއަސް އެކަން ގަބޫލުކުރާނެ ބަޔަކު ނެތް ކަމަށް ވިދާޅުވި އެވެ.
ނަޝީދު އެ އިޝާރާތް ކުރެއްވީ، ސިޔާސީ ލީޑަރުންތަކެއް މިނިވަންކުރަން ސުޕްރީމް ކޯޓުން ނެރުނު އަމުރު، އެ ކޯޓުގެ ތިން ފަނޑިޔާރުން ފަހުން ބާތިލް ކުރެއްވި ވާހަކަ އަށެވެ.
އެހެންކަމުން އިންތިހާބުގައި އެ މަނިކުފާނަށް ވާދަ ނުކުރެއްވެންވީ އެއްވެސް ސަބަބެއް ނެތް ކަމަށް ނަޝީދު ވިދާޅުވި އެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
މަގޭ ގައުމު
22 May 2018
ނަޝީދު ލޮލުގެ ފަރުވާއަކަށް އަދި 10 އަހަރު ބޭރުގަ މަޑުކޮށްލާފަ އިންތިޚާބަކަށް އައުން ރަގަޅުވާނެ.
ސައިަ
22 May 2018
ނަސީދު އުޅެނީ އައްޑޫ މީހަކު ރަނިންމޭޓކަށް ލައިގެން ގައުމު ދެބައިކޮށް އައްޑޫގައި ވަކި ސަރުކާރެއް ހަދަން. ރަނިންމޭޓް އަސްލަމަކީ ގާނޫނު އަސާސީ ހެދި ދުވަސް ވަރު ދިވެހި ދިދަ ބަދަލް ކުރަން އުޅުނު މީހެއް. ޖަޒީރަތުލް އައްޑުއްޔާގެ ރައީސް އަކީ ނަޝީދު ވާން އުޅެނީ. ދިވެހިން ވިސްނާ......... ގައުމު އިޖްިތިމާއީ ގޮތުން ހަލާކު ކުރުމަށް ފަހު ، ގައުމު ކުދިކޮށް ކޮށާލަނީ. ނަސީދު މިގައުމުގެ ވެރިކަމަށް ފަރި ނުޖަހާނީ ކޮން ދުވަހަކުން ބާ. މަދުނިޔޭގައި ހުއްޓާ އެދުވަސް ދައްކަވާދޭ
ަަަްްއަނގަރިވެތިގޭ ނަސީމް
21 May 2018
މަގޫދަނޑި ސަރުކާރުގެ ރައީސް
އަލީ ނާޒިމް
21 May 2018
ހެހެހެ... މިފަހަރަކު މުލިއާގެއިން ފުޅި ނެރުތަނެއް އަދި ނުފެނޭ ހަމަ ގައިމުވެސް!!!
ސަޅިބެ
21 May 2018
އާދޭހެވެ،މަނިކުފާނުގެ ތިންއަހަރުގެ އަނެއްދިވެހިރާއްޖޭގެ ނަނާހުވަފެންތަކައްވުރެ ރައީސްޔާމިނުގެ މިފަސްއަހަރުގެ ކޮމްޕިއުޓރ ގުރެފިކުސްތައްވެސް ހާސްބައިރަނގަޅެވެ. މަނިކުފާނު ވެރިކަމުގާ އަޅުގަނޑުމެން ތަހައްމަލުކުރި ދަތިތައް އަޅުގަނގުމެންނައް ފުދެއެވެ. ހަށީގާ ހޭހުރީވިއްޔާ އަލުންތިޔަ ސޫރަނުދެކޭނަން
އަބްދުއްލާ
21 May 2018
ސްޕްރީމް ކޯޓުން ވަނީ ނަސީދުގެ ހުކުމް ދަމަހައްޓާފަ އެހެންވެ ހުކުމް ބާތިލް ނުކުރެވުނީ އެހެންވެ ޔާމީނަށް އެންގީ ނަސީދު ދޫކުރާށޭ އެއީގާނޫނާ ހިލާފު އަމުރެއްނެރެފަވާތީ ނަސީދުދޫނުކުރީމަ ނަސީދު ވަނީ ކުށުގެ ހުކުމް ތަންފީޒުވަމުންދާ މީހަކަށް. ވީމާ ހުކުމެއްގާ ހުރި މީހަކަށް ރިޔާސީ އިންތިހާބުގަ ވާދައެއް ނުކުރެވޭނެ. މިހާރު ނަސީދަކީ ކަރެކްސަނަށް ފިލައިގެން އުޅޭ މީހެއް.
ކަޅުސޮރު
21 May 2018
މީނަ 100ޑޮލަރުގެ ކިތައް ބުރިޖު އަޅާފަތަ މިވާހަކަ ދައްކަނީ...ކުރިން ބުނީ ނެޅޭނޭ މިހާރު 100ޑޮލަރު...
ޝޮކްތެރަޕީ
21 May 2018
މިރޯދަމަހުވެސް ސިޔާސީ ކަންތަކުގައި މީދެރަމަސްސަލޭ.
ޤާދިރު
21 May 2018
މީނަ ބޭނުން ވަނީ ޔާމިނުގެ ވެރިކަން ދަމަހައްޓަން. މީނަ މިގަންނަ ސަަކަރާތަކުން އިނދިކޮޅު އެހެން މީހަކަށް ވެސް ކުރިމަތި ނުލެވޭނެ ވިއްޔަ. މީނަ ބޭނުން ވަނީ އޭނައަށް ކުރިމަތި ނުލެވޭތާ އިނދިކޮޅު އެހެން މީހަކަށް ވެސް ކުރިމަތި ލުމުގެ ފުރުޞަތު ނުދޭން. އެއީ ރަނގަޅަށް އެނގޭނެ މީނައަށް ކުރިމަތި ނުލެވޭނެކަން.
ރަދީފް
21 May 2018
މަނިކްފާނު ، ތެދެއް ހަދާލަން ލިބޭ ފުރުސަތުގަވެސް އިތުރުފުޅު ހެއްދެވީމަ ތާއީދުކުރަން ތިބި މީހުންވެސް ފޫހިވާނެކަން ދަންނަންޖެހޭ.ޔާމީން ސަރުކާރުންވެސް ކިތަންމެ ގިނަ ރަނގަޅު ކަންތައްވެސް ކޮއްފި.ހަމަ އެކަނި 3ޑީ ކުރެހުމެއް ނޫން.ރަނގަޅު ކުރެހުމުގެ ސްޓޭޖްގަ ހުރި ކަންކަން ވެސް އެބަހުރި.ބަޓް ޕްރޮގްރެސް ވޭ އެހެންނޫންތޯ.ވ.ވެދުން.-™ރަދީފް®-