އުމުރުން ދިހަ މަހުގެ އުދައްޔު: އޭނާގެ ފަރުވާއަށް ބޮޑު ހަރަދެއް ހޭދަވޭ
03 އޯގަސްޓް 2018 - 10:45
އައިމިނަތު ނަޝްފާ ހުސައިން އެންމެ ފުރަތަމަ ހީކުރީ އޭނާގެ ހަތަރު މަހުގެ ދަރިފުޅު، އުދައްޔު ދާވޫދަށް ޖެހުނީ އާދައިގެ ރޯގާއެއް ކަމަށެވެ. މިދިޔަ ފެބުރުއަރީ މަހު ހުޅުމާލޭ ހޮސްޕިޓަލަށް އޭނާ ދިޔައީ ވެސް، ދަރިފުޅު ކެއްސާތީ ބޭސް ނެގުމަށެވެ. އެކަމަކު މާ ތުއްތު ކުއްޖަކަށް ވުމުން، ނޭސަލް ޑްރޮޕް ފިޔަވައި އިތުރު ބޭހެއް ދޭން ޑޮކްޓަރު ދެކޮޅުހެދި އެވެ.
އޭގެ އެއް ދުވަސް ފަހުން، ދަރިފުޅު އޭޑީކޭއަށް ގެންދިޔައީ ހީސް ނުލާތީ އެވެ. އެކަމަކު ޓެސްޓުތަކުގެ ނަތީޖާ ދެއްކީ ނަޝްފާ އާއި އޭނާގެ ފިރިމީހާ މުހައްމަދު ޝުޖާއު އަދި ހޮސްޕިޓަލުގެ ޑޮކްޓަރުން ވެސް ހީކުރި ގޮތަކަށް ނޫނެވެ. ހަތަރު މަހުގެ އެ ކުއްޖާގެ ކިޑްނީގެ މަސައްކަތްް ވަނީ ހުއްޓިފަ އެވެ.
އުދައްޔުގެ ބައްޔަކީ "ހައިޕައޮގްޒާލޫރިއާ ޓައިޕް-1" އެވެ. މިއީ ދުނިޔޭގައި ވެސް މަދުން ނޫނީ ނުފެންނަ ވައްތަރުގެ، ޖެނެޓިކް ބައްޔެކެވެ. މިހާރު ދިހަ މަސް ވެފައިވާ އުދައްޔުގެ ފުރާނަ ސަލާމަތް ކުރުމަށް، އެ އާއިލާއަށް ވަނީ އާއްމުންގެ އެހީތެރިކަން އިންތިހާއަށް ބޭނުންވެފަ އެވެ.
ނަޝްފާ ބުނިގޮތުގައި ދަރިފުޅު ހީސް ނުލާތީ، އޭޑީކޭން އެންމެ ފުރަތަމަ ހެދީ ކިޑްނީގެ ޓެސްޓެކެވެ. އެއިން ދެއްކީ، ކިޑްނީގައި ކްރިއާޓިނިން ލެވެލް ވަރަށް މައްޗަށް ހުރިކަމަށެވެ. އެ ނަތީޖާ ގަބޫލު ނުކުރެވިގެން ޑޮކްޓަރުން ދެވަނަ ފަހަރަށް ވެސް ޓެސްޓުތައް ހެދި އެވެ. ސްކޭންކޮށްގެން ބެލުމުން ކިޑްނީގެ މަސައްކަތް ހުއްޓިފައިވާކަން އެނގުމުން ޑޮކްޓަރުން ވަރަށް ބޮޑަށް އެލާޓްވި އެވެ.
"ވަގުތުން ދަރިފުޅު އައިސީޔޫއަށް ލީ. އަދި ޑީހައިޑްރޭޓެޑް ޕޭޝަންޓެއްގެ ގޮތަށް ފަރުވާ ދޭން ފެށީ. އެކަމަކު ހީސްނުލައި، އެއްވެސް އެއްޗެއް ބޭރު ނުކުރެވޭތީ ދަރިފުޅު ދުޅަވާން ފެށީ،" ނަޝްފާ ކިޔައިދިނެވެ.
ތުއްތު އުދައްޔު: ކިޑްނީ ހަލާކުވީ ވަރަށް މަދުން ނޫނީ ނުފެންނަ ބައްޔަކާ ހެދި
ދެވެން އޮތް އެންމެ އަވަސް ފަރުވާއަކީ އުދައްޔުގެ ބަނޑަށް ހޮޅިކޮޅެއް ލައްވައިގެން ޑައިލިސިސް ހެދުން ނަމަވެސް، ރާއްޖޭން އެވަގުތު އެކަން ކުރެވޭކަށް ނެތެވެ. އެހެންވެ، ޖެހިގެން އައި ދުވަހު، އިމަޖެންސީގައި އެ އާއިލާއިން އިންޑިއާއަށް ފުރީ އެވެ.
އިންޑިއާގެ ކިމްސް ހޮސްޕިޓަލަށް ގެންގޮސް ހެދި ތަހުލީލުތަކުން އެނގުނީ އުދައްޔުގެ ކިޑްނީ ހަލާކުވެފައިވާކަމެވެ. އެހެންވެ އޭނާއަށް ފަރުވާ ދޭން ޖެހުނީ އައިސީޔޫގައި ބާއްވައިގެންނެވެ. ބަލީގެ އަސްލު ހަގީގަތް ނުވަތަ "ހައިޕައޮގްޒާލޫރިއާ ޓައިޕް-1" ކަން ޑޮކްޓަރުންނަށް އެނގުނީ، އޭނާގެ ސާމްޕަލް ޖަރުމަނަށް ފޮނުވައިގެން ހެދި ޓެސްޓުތަކުން ކަމަށް ނަޝްފާ ބުންޏެވެ.
"ޑޮކްޓަރުން ބުނީ މިއީ ވަކި ކަމެއް ދިމާވެގެން ޖެހުނު ބައްޔެއް ނޫން ކަމަށް. އުފަންވި އިރު ވެސް ހުރި ޖެނެޓިކް ބައްޔެއް ކަމަށް،" ދޮއްޓަށް އަދި އިތުރު ކުއްޖެއް ހުންނަ ނަޝްފާ ބުންޏެވެ.
އޭނާ ބުނި ގޮތުގައި ބަލީގެ ގޮތުން ދަރިފުޅުގެ ކިޑްނީއާ އެކު މޭ ވެސް ވަނީ ހަލާކުވެފަ އެވެ.
އުދައްޔުގެ ފަރުވާގެ ފުރަތަމަ ކަމެއްގެ ގޮތުން ވެސް ފެށީ ޑައިލިސިސް ހަދާށެވެ. އައިސީޔޫގައި ބާއްވައިގެން ފަރުވާ ދިނުމަށް ފަހު، ފަހުން އެކަން ކުރީ ވަކި ކޮޓަރިއަށް ބަދަލުކޮށްގެންނެވެ. އަދި ޑައިލިސިސް ހަދާނެ ގޮތް ނަޝްފާގެ ދެމަފިރިންނަށް ކިޔައިދިނުމަށް ފަހު، ދުވަސްކޮޅެއް ފަހުން ގެއަށް ދޫކޮށްލި އެވެ.
ދަރިފުޅު ގޮވައިގެން ރާއްޖެ އައި ނަމަވެސް، އޭނާގެ ޑައިލިސިސްއަށް ބޭނުންވާ ފްލުއިޑް ރާއްޖޭން ލިބެން ނެތުމުން ޖެހުނީ އަވަށްޓެރި ސްރީ ލަންކާއަށް ބަދަލުވާށެވެ. އެއީ ރާއްޖޭން ލިބެން ނުހުންނަ ފަރުވާއެއް ކަމަށްވާ، ހީމޯޑައިލިސިސް ކޮންމެ ފަދަ ވަގުތެއްގައި ވެސް އުދައްޔުއަށް ބޭނުން ވެދާނެ ކަމަށް ޑޮކްޓަރުން ބުނެފައިވާތީ އެވެ.
އުދައްޔުގެ ފަރުވާއަށް އެހީ ހޯދުމަށް ތައްޔާރުކޮށްފައިވާ ޕޯސްޓަރެއް
މިހާރު ލަންކާގައި ދިރިއުޅެމުން އަންނަ އާއިލާއަށް ކުރިމަތިވެފައި ވަނީ، އެމީހުން ބުނާ ގޮތުގައި، ދަތި ދިރިއުޅުމެކެވެ. ކޮންމެ ދުވަހަކު 19 ގަޑިއިރު އުދައްޔު ޑައިލިސިސް އަށް ހޭދަކުރެ އެވެ. ގިނަ ދުވަސް ދުވަހު އޮންނަން ޖެހެނީ ހޮސްޕިޓަލުގަ އެވެ. އެ ހުރިހާ ކަމަކަށް ކޮންމެ ހަފުތާއަކު 11 ވަރަކަށް ހާސް ރުފިޔާ ހޭދަވެ އެވެ.
ދަރިފުޅުގެ ހިދުމަތުގައި އަބަދުމެ ތިބެން ޖެހޭތީ، ނަޝްފާގެ ދެމަފިރިންނަށް މަސައްކަތެއް ނުކުރެވެ އެވެ. އެހެންވެ، ފަރުވާގެ ހުރިހާ ހަރަދެއް ހޯދަން މި ވަގުތު ބަރޯސާވެފައި އޮންނަނީ ތިމާގެ މީހުންނާއި އެކުވެރިން އަދި އާއްމު ބައެއް ފަރާތްތަކުން ދޭ އެހީތަކަށެވެ.
ތުއްތު އުދައްޔަށް ދެވެން އޮތް ދާއިމީ ފަރުވާއަކީ މެޔާއި ކިޑްނީ ބަދަލު ކުރުމެވެ. ނަޝްފާމެން ކުރިން ނިންމާފައި އޮތީ ދަރިފުޅު ތަންކޮޅެއް ބޮޑުވަންދެން، އޮޕަރޭޝަން ލަސްކޮށްލާށެވެ. އެކަމަކު ޑައިލިސިސްގެ އަސަރު ކުޑަވެ، އެހެން ގުނަވަންތައް ފެއިލްވަމުންދާތީ ޑޮކްޓަރުންގެ އިރުޝާދަކީ ވީހާ ވެސް އަވަހަކަށް އޮޕަރޭޝަން ކުރުމެވެ.
އޮޕަރޭޝަނުގެ ހަރަދު އާސަންދައިން ހަމަޖެހެ އެވެ. ނަމަވެސް ގިނަ ދުވަސްތަކެއް ވަންދެން ރާއްޖޭން ބޭރުގައި ތިބެން ޖެހޭތީ އެކަމަށް ފައިސާ ބޭނުންވެ އެވެ. އެހެންކަމުން އާއިލާއިން ވަނީ އާއްމުންގެ އެހީތެރިކަމަށް އެދިފަ އެވެ.
އުދައްޔުގެ ފަރުވާއަށް އެހީވުމަށް، އޭނާގެ ބައްޕަގެ ވައިބާ ނަމްބަރު، 7866418 ގުޅުމަށް އާއިލާއިން އެދެ އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ޢައއިސއ
07 August 2018
ޢެކައުންްޓް ނަމްބަރ ؟
ދޮން
04 August 2018
އަޅުގަނޑަކީ އޭސީ ރިޕެއަރ އަދި އިންސްޓޯލް ކުރާ މީހެއް. އަޅުގަނޑަށް އޭސީ މަސައްކަތު ގުޅަންވީނުން. އޭރުން މަސައްކަތް ކުރުވާފަރާތުން ބުނަންވީ އުދައްޔު ގެ ބައްޔަށް އެހީތެރިވުމުގެ ގޮތުންނޭ މި މަސައްކަތް ތިފަރާތާ މިޙަވާލުކުރީ. އޭރުން ބިލަށް އެރިފައިސާގެ 50 ޕަސެންޓް އެފާރާތުގެ ހާޒިރުގަ އުދައްޔު ބައްޕަގެ އެކައުންޓައް ޓްރާންސްފަރ ކޮށްދޭނަން، އަތުން ޚަރަދެއް ނުގޮސް އެހީތެރިވެވޭނެ ގޮތެއް މިބުނީ
ސަހުނާ
03 August 2018
ސަދަގާތަކީ ފަރުވާ އެއް. ކުއްޖާގެ ނަމުގަ ޝިފާގެ ނިޔަތް ގަނެފަ ސަދަގާތް ކުރަންވީ. އޭގެ ފަހުން ޑޮކްޓަރުގެ ފަރުވާއަށް ދާންވީ.
މިރައިސްދޯ2019
03 August 2018
ކޮބާތަ ކުއާޓަރ އެެއްގައި އެތަކެއް ސަތޭކަ މިލިއަނެއް ލިބޭ ކުންފުނިތައް. ނެތްދޯ ދިއްކޮއްލާނެ އެހީއެއް. އެކަމަކު ތަނެއްގަ ގޯނި ރޭހެއް ނޫނީ ޑަބިޔާ ޖެހުމެއް ބާއްވަބަލަ އަންނާނެ ދުވަމުން ސްޕޮންސަރ ކުރަން
ސަޒުނާ
03 August 2018
މާތް ﷲ އުދައްޔުއަށް އަވަސް ޝިފާއެއް ދެއްވާށި. އާމީން
މެސީ
04 August 2018
އާމީން
ތުނިޔަ
03 August 2018
ޢުދައްޔުއަށް ފަރުވާ ކުރެވޭނެ ފަސޭހަ ގޮތް މިންވަރު ކުރައްވާށި! ކީތްވެބާ ވެރިކަމަށް އަންނަން އުޅޭ އެއްވެސް ބޭފުޅަކު ވައުދު ނުވަނީ މިފަދަ ކަންކަމަށް ރައްޔިތުން ސަލާންޖަހަން ނުޖެހޭ ވަރަށް ދައުލަތުން އެހީވާނަމޭ ކިޔާފަ.
ޔާމިން
03 August 2018
މިތުއްތު ކުއްޖާ އަށް އެހީއެއް ވެދިނުމަކީ ކޮންމެ މީހެއްގެ އުފަލެއް ކަމުގަ ހަދަމާ .އުރީދު ދިރާގު ކަހަލަ ބޮޑެތި ކުންފުނިތަކުންވެސް އިޖުތިމާއީ ޒިންމާދަށުން މިކަހަލަ ކަންކަމައް ހަރަދު ކުރުން މާ ރަނގަޅު
އަލީބަލީ
03 August 2018
ހުސްނުވާ އާސަންދަ ކޮބާ؟ އެކަމަކު އެހީއަށް އެދޭ މީހުން ވަނީ ގިނަ.
ހަސަންއިބުރޭ
03 August 2018
އާސަންދަ ލިބުނަސް ހާދަ އިތުރު ހަރަދުތައް ދާނެއޭ.. އައިޖީއެމްއެޗްް ގައި އާސަންދަ ލިބިގެން އޮޕަރޭޝަން އެއް ކުރާ އިރުވެސް ފަހަން މިހާރު ބޭނުން ކުރާ ހީރަސް ވެސް ކަވަރ ނުކުރޭ.. ކޮބާ އެމީހުންގެ ކެއުން ހުރުން ދަތުރު ހަރަދު
ވިސްނާށޭ
03 August 2018
ހުސްނުވާ އާސަންދައިން އޮޕަރޭޝަނުގެ ހުރިހާ ޚަރަދެއް ހަމަޖެހޭ ވާހަކަ ބުނެފަ އެބަ އިން ކަންނޭނގެ ދެއްތޯ!! އެކަމަކު އެ ތުއްތު ކުއްޖާއަށް ބޭނުންވާ އެހެނިހެން ޚަރަދުތައް ކުރުމަށް ފުދޭ ވަރެއްގެ ބޮޑު ޚަރަދެއް ދާނެ. އެކަންކަމަކީ ހުސްނުވާ އާސަންދައިން ޚަރަދުކުރާނެ ކަންކަމެއް ނޫން. ކުއްޖާގެ ހާލަތު މިހާރު ހުރި ގޮތުން ކުއްޖާގެ މައިންބަފައިންނަށް ފައިސާ ހޯދަން މަސައްކަތް ކުރެވޭނެ ގޮތެއް ނެތް. އެކަންކަމަށް އެހެންމީހުންގެ ދީލަތި އެހީ ބޭނުންވާ ކަމަށް ބުނެފަ އޮތީ. ހަމަހުރެފަ އެއްޗެކޭ ބުންޏަކަސް ކަމަކު ނުދާނެ އަލީބަލީ. ތިބާއަށް ވެސް މިފަދަ ޙާލަތެއް ކުރިމަތި ވީމަ އިނގޭނީ އެހެންމީހުންގެ އެހީތެރިކަމަށް ބޭނުންވާ ވަރު. އެކަމަކު ތިބާއަށް އެފަދަ ޙާލަތެއް މެދުވެރި ނުކުރައްވާށި. އަދި ތިފަދަ މީހުންނަށް ހެޔޮ ވިސްނުން ދެއްވާށި. އަދި އެ ތުއްތު ކުއްޖާއަށް އަވަސް ޝިފާއެއް މިންވަރު ކުރައްވާށި! އާމީން!
ލިލޫ
03 August 2018
އެ އޮތީ އާސަންދަ ލިބޭ ވާހަކަ ދޯ... ޢާސަންދަ ލިބެނީ ބޭސްފަރުވާ އަށް އެކަނި... ޢެކަމަކު ރާއްޖެއިން ބޭރުގަ ގިނަ ދުވަސް ވަންދެން ތިބެންޏާ ކެއުން ބުއިމަށާ އިތުރު ޒަރޫރީ ބޭނުން ތަކަކަށް ރުފިޔާ ބޭނުން ވާ ވާހަކަ އެއޮތީ... ކުއްޖާ ކުޑަވީމަ މަންމަ އާއި ބައްޕަ އެ ކުޑަކުއްޖާ ކައިރީގަ ތިބެން ޖެހޭނެ ދޯ... މިހާލަތުގަ ރުފިޔާ ލިބޭނެ އިތުރު ގޮތެއް ނެތީމަ އާންމުގެ އެހީ ވަރަށް ބޮޑަށް ބޭނުން ވާނެ... ތުއްތު ކުއްޖާ އަށް އަވަސް ޝިފާ އަކަށް އެދެން.
މެދުމިން
03 August 2018
ހުސްނުވާނީ ހެއްދެވި ފަރާތުގެ ފަޒްލުވަންތަކަން. އެފަރާތުގަ ދަންނަވާ