އަލަށް ނުކުންނަ ގިނަ ވަކީލުންނަކީ އަންހެނުން

އަންހެނުންނާ އެކަށީގެން ނުވާ ކަމަށް ޒަމާނުއްސުރެ ގަބޫލުކުރެވިފައި ހުންނަ ދާއިރާތައް ނުވަތަ ކުރިންސުރެ ވެސް އަންހެނުން ގިނައިން ނޫޅޭ ދާއިރާތަކަށް ނުކުންނަ އަންހެނުން އާއްމު ގޮތެއްގައި މަދެވެ. އެކަމަކު ރާއްޖޭގެ ގާނޫނީ ދާއިރާ އިން އެކަން ދަނީ ބަދަލުވަމުންނެވެ. މި ފަހުގެ ދެ އަހަރެއްގައި ވަކީލުކަމަށް އަލަށް ނުކުތް އަންހެނުންގެ އަދަދު ފިރިހެނުންނަށް ވުރެ ގިނަ އެވެ.

ގައުމީ ތަފާސްހިސާބުގެ އަހަރީ ފޮތްތަކުން ލިބެން ހުރި މައުލޫމާތުން އެނގޭ ގޮތުގައި ވަކީލުންގެ ތެރޭގައި އަންހެނުންގެ އަދަދު ވަނީ ފާހަގަކުރެވޭ މިންވަރަށް އިތުރުވެފަ އެވެ.

އަލަށް ރަޖިސްޓްރީކުރި ގާނޫނީ ވަކީލުންގެ އަދަދު 2015ގައި ފިރިހެނުންނާ އެއްވަރެއްގައި ހުރެފައި 2016ގައި ވަނީ 59 ޕަސެންޓަށް އަރައިފަ އެވެ.

އަލަށް 2016ގައި ރަޖިސްޓްރީކުރި 132 ވަކީލުންގެ ތެރެއިން 78 މީހުންނަކީ އަންހެނުންނެވެ. އެއީ ފިރިހެނުންނަށް ވުރެ ނުވަ ޕަސެންޓް މަތީ އަދަދެކެވެ. އަދި 2015ގައި އަލަށް ރަޖިސްޓްރީކުރި 145 ވަކީލުންގެ ތެރެއިން 73 މީހުންނަކީ އަންހެނުންނެވެ.

އަލަށް ރަޖިސްޓްރީކުރި ގާނޫނީ ވަކީލުންގެ އަދަދު

އަލަށް 2017ގައި ރަޖިސްޓްރީކުރި ވަކީލުންގެ އަދަދެއް ނެތެވެ. މިދިޔަ އަހަރުގެ ތަފާސްހިސާބުގެ ފޮތުގައިވާ ގޮތުން 2017ގައި އެއްވެސް ވަކީލަކު ހުވާކޮށްފައެއް ނުވެ އެވެ.

އެކަމަކު އަންހެނުންގެ ދުވަހަށް ހާއްސަކޮށްގެން ނެޝަނަލް ބިއުރޯ އޮފް ސްޓެޓިސްޓިކްސް (އެންބީއެސް) އިން އެކުލަވާލައި އިއްޔެ ޝާއިއުކުރި ތަފާސްހިސާބުން އެނގޭ ގޮތުގައި ގާނޫނީ ވަކީލުންގެ ދަފްތަރުގައި 2017 ވަނަ އަހަރު ތިބި 1،075 ވަކީލުންގެ ތެރޭގައި 423 އަންހެނުން ހިމެނެ އެވެ. އެއީ 39 ޕަސެންޓެވެ.

އޭގައި ހިމަނާފައިވާ ދާއިރާތަކަށް ބަލާ އިރު ޓީޗަރުން ފިޔަވައި ދެން އަންހެނުން އެންމެ ގިނައިން އުޅެނީ ވަކީލުންގެ ގޮތުގަ އެވެ.

އެކަމަކު މިދިޔަ އަހަރާއި މި އަހަރު ހުވާކޮށްފައިވާ ވަކީލުންގެ އަދަދު އެނގޭކަށް ނެތެވެ.

ވަކީލުންގެ ގޮތުގައި ނުކުންނަ އަންހެނުންގެ އަދަދު މިހާރު ގިނަޔަސް ފަނޑިޔާރުންގެ ތެރޭގައި ތިބީ އެންމެ ހަތަރު ޕަސެންޓް އަންހެނުންނެވެ. އެއީ 195 ފަނޑިޔާރުންގެ ތެރެއިން އެންމެ އަށް މީހުންނެވެ.