ދިއްލީ އަށް ކުރަމުންދާ ވިއްސާރައިގައި ކެރީ ވެސް ޖެހިއްޖެ

ދިއްލީގެ އިންޑިއަން އިންސްޓިޓިއުޓް އޮފް ޓެކްނޮލޮޖީގެ ދަރިވަރުންނާ ކެރީ މިއަދު ބައްދަލު ކުރައްވަނީ. --ފޮޓޯ:އޭއެފްޕީ

ހަސަން އާމިރު، މިހާރު

31 އޯގަސްޓް 2016 - 15:45

ނިއު ދިއްލީ (އޮގަސްޓް 31) - އެމެރިކާގެ ޚާރިޖީ ވަޒީރު ޖޯން ކެރީ މިދިޔަ ހޯމަ ދުވަހުގެ ރޭ އިންޑިއާ އަށް ވަޑައިގެންނެވިއިރު ވެސް ވަރަށް ވިއްސާރަ އެވެ.

ކެރީގެ ދެ ދުވަހުގެ ދަތުރުފުޅުގައި މިއަދުގެ އެއް އިވެންޓަކަށް އޮތީ ދިއްލީގެ އިންޑިއަން އިންސްޓިޓިއުޓް އޮފް ޓެކްނޮލޮޖީގެ ދަރިވަރުންނާ މުޚާތަބު ކުރެއްވުމެވެ. ނަމަވެސް ވިއްސާރައިގައި ޖެހިގެން ކެރީ އަށް ވަޑައިގެންނެވުނީ އެއް ގަޑިއިރު ފަހުންނެވެ. ދަރިވަރުންނާ މުޚާތަބު ކުރައްވާ ކެރީ ވިދާޅުވީ "ތިޔަ ކުދިން މިތަނަށް އައި ގޮތް ނޭނގޭ" ކަމަށެވެ. އަދި މި ތަނަށް އަންނަން ބޯޓުތައް ބޭނުންވާނެ ކަމަށް ވިދާޅުވި އެވެ.

ދިއްލީގެ ފެންބޮޑުވެފައިވާ މަގަކުން ކާރުތައް ދުއްވަނީ: އިންޑިއާ އަށް ކުރަމުންދާ ވިއްސާރައިގައި ދިއްލީގެ ބޮޑު ހިސާބެއްގައި ވަނީ ފެންބޮޑުވެފައި. --ފޮޓޯ:އޭއެފްޕީ

ވިއްސާރަވުމުގެ ސަބަބުން ކެރީ ވަނީ ދިއްލީގެ މިސްކިތަކަށާއި ފައްޅިއަކަށް ކުރައްވަން އޮތް ތިން ޒިޔާރަތެއް މިއަދު ކެންސަލް ކުރައްވައިފަ އެވެ.

ހޯމަ ދުވަހުގެ ރޭ ދިއްލީ އަށް ކެރީ ވަޑައިގެން ފަސް ތަރީގެ ހޮޓަލަށް ވަޑައިގެންނެވިއިރު ވެސް ވިއްސާރައިގެ ސަބަބުން އެއް ގަޑިއިރު ޓްރެފިކުގައި މަޑުކުރައްވަން ޖެހިވަޑައިގަތެވެ. ކެރީއާ އެކު ދަތުރު ކުރެއްވި ނޫސްވެރިން ވެސް ވަނީ ޓްރެފިކުގައި ގިނައިރު މަޑުކުރަން ޖެހުމުން ފޫހިވެގެން ޓްވީޓްކޮށްފަ އެވެ.

އިންޑިއާގެ ޚާރިޖީ ވަޒީރު ސުޝްމާ ސްވަރާޖް (ކ) އާ ޖޯން ކެރީ ބައްދަލު ކުރައްވަނީ. --ފޮޓޯ:އޭއެފްޕީ

ކެރީގެ ދަތުރުފުޅުގައި ވަނީ ދެ ގައުމުގެ އަސްކަރީ ގުޅުމާއި ވިޔަފާރީގެ ގުޅުން ބަދަހި ކުރުމާ ބެހޭ ގޮތުން މަޝްވަރާ ކުރައްވައިފަ އެވެ. ޚާރިޖީ ވަޒީރު ސުޝްމާ ސްވަރާޖްއާ އިއްޔެ ބައްދަލު ކުރައްވާ ކެރީ ވަނީ ޕާކިސްތާނާއި ޓެރަރިޒަމާ ދެކޮޅަށް ވަރުގަދަ ބަޔާނެއް ދެއްވައިފަ އެވެ.