މެމްބަރު އާމިރު: އޭނާއަށް 19 މިލިއަން ރުފިޔާ ދައްކަން ޑީއާރުޕީގެ މައްޗަށް ހުކުމް ކޮށްފައި ވަނިކޮށް ހައި ކޯޓުން ވަނީ އެ އަދަދު ކުޑަކޮށްފައި -- ފޮޓޯ/މިހާރު
23 ޖުލައި 2019 - 14:28
16 comments
ރައްޔިތުންގެ މަޖިލީހުގެ ކުޑަހުވަދޫ ދާއިރާގެ މެމްބަރު އަހުމަދު އާމިރަށް 19 މިލިއަން ރުފިޔާ ދައްކަން ޑީއާރުޕީގެ މައްޗަށް ދަށު ކޯޓުން ހުކުމް ކޮށްފައި ވަނިކޮށް އެ އަދަދު ހަތަރު މިލިއަނަށް ހައި ކޯޓުން ކުޑަކޮށްފި އެވެ.
އާމިރަށް 19 މިލިއަން ރުފިޔާ ދައްކަން ޑީއާރުޕީގެ މައްޗަށް ސިވިލް ކޯޓުން ހުކުމްކުރީ 2008 ވަނަ އަހަރުގެ ރިޔާސީ އިންތިޚާބުގެ ދުވަސްވަރު އާމިރު ދެ ސްޓޫޑިއޯއަކުން ޑީއާރުޕީ އަށް ފޯރުކޮށްދިން ޚިދުމަތްތަކުގެ ފައިސާ ނުދެއްކުމުން އެ ފައިސާ އާއި އޭގެ ޖޫރިމަނާ ހޯދަން އާމިރު ދައުވާ ކުރެއްވުމުންނެވެ. އެ މައްސަލާގައި ސިވިލް ކޯޓުން 2015 ގައި ހުކުމްކުރީ ފޯރުކޮށްދިން ޚިދުމަތްތަކުގެ އަގަށްވާ ހަތަރު މިލިއަން ރުފިޔާ އާއި އެ ފައިސާ ނުދެއްކުމުން އަރާފައިވާ ޖޫރިމަނާގެ ގޮތުގައި 15 މިލިއަން ދެއްކުމަށެވެ.
އެ މައްސަލަ ޑީއާރުޕީގެ ފަރާތުން އިސްތިއުނާފް ކުރުމުން ހައި ކޯޓުން މިއަދު ކުރި ހުކުމުގައި ވަނީ އާމިރުގެ ސްޓޫޑިއޯއިން ފޯރުކޮށްދިން ޚިދުމަތްތަކުގެ އަގަށްވާ ހަތަރު މިލިއަން ރުފިޔާ ޑީއާރުޕީން ދައްކަން ޖެހޭނެ ކަމަށެވެ. އެކަމަކު ޖޫރިމަނާގެ ގޮތުގައި އަރާފައިވާ 15 މިލިއަނަށް ވުރެ ގިނަ ރުފިޔާ ޑީއާރުޕީން ދައްކަން ނުޖެހޭނެ ކަމަށް ހައި ކޯޓުން ނިންމި އެވެ.
ހައި ކޯޓުގެ ހުކުމުގައި ވަނީ ހެކިންގެ ބަހަށް ބަލާއިރު ޑީއާރުޕީ އަށް އާމިރުގެ ދެ ސްޓޫޑިއޯއިން މަސައްކަތްތައް ކޮށްދީފައިވާކަން އެނގޭ ކަމަށާއި އަދި އެ ޚިދުމަތްތަކުގެ ފައިސާ ނުލިބިގެން އާމިރުގެ ފަރާތުން ޑީއާރުޕީ އަށް ސިޓީ ފޮނުވިކަން ވެސް އެނގޭ ކަމަށެވެ. އަދި އެ ފައިސާ ދައްކަން ނުޖެހޭނެ ކަމަށް ބުނެ ޑީއާރުޕީން އެކަން އާމިރަށް އަންގާފައިވާ ކަން ނުވަތަ ފޮނުވި އިންވޮއިސްތަކަށް އިންކާރު ކުރާ ކަން ޑީއާރުޕީން އާމިރަށް އަންގާފައި ނެތް ކަން ވެސް އެނގޭ ކަމަށް އެ ހުކުމުގައިވެ އެވެ.
ހުކުމުގައިވާ ގޮތުން، އިންވޮއިސްގައިވާ ފައިސާ ނުދައްކައިފި ނަމަ ޖޫރިމަނާގެ ގޮތުގައި ވަކި މިންވަރަކުން ފައިސާ ނެގޭނެ ކަމަށް ބަޔާން ކޮށްފައި އޮތަސް، ކުރިން ޑީއާރުޕީ އަށް ފޮނުވި ބައެއް އިންވޮއިސްތަކަށް ފައިސާ ދެއްކިއިރު ޖޫރިމަނާ ނަގާފައި ނުވާކަން އެނގެ އެވެ. އެކަމުގައި ދެ ފަރާތުން އަމަލުކުރި ގޮތަށް ބަލާއިރު ކޮންޓްރެކްޓާ ބެހޭ ގާނޫނުގެ ދަށުން އެއް ފަރާތުން އަނެއް ފަރާތަށް ލުޔެއް ދީފައިވާ ކަމަށް ބެލެވޭ ކަމަށް އެ ހުކުމުގައިވެ އެވެ. އެހެންވެ، ޖޫރިމަނާގެ ގޮތުގައި 15 މިލިއަން ރުފިޔާ ދައްކަން ދަށު ކޯޓުން އެންގީ ދެ ފަރާތުން އަމަލު ކުރަމުން ދިޔަ ގޮތާ ޚިލާފަށް ކަމަށް އެ ހުކުމުގައިވެ އެވެ.
އެކަންކަން ފާހަގަކޮށް، ހައި ކޯޓުގެ ތިން ފަނޑިޔާރުންގެ އިއްތިފާގުން ކުރި ހުކުމުގައިވަނީ ޑީއާރުޕީ އަށް ފޯރުކޮށްދިން ޚިދުމަތްތަކުގެ އަގަށް ހަތަރު މިލިއަން ރުފިޔާ ދައްކަން ޑީއާރުޕީގެ މައްޗަށް ދަށު ކޯޓުން ކުރި ހުކުމަށް ތާއީދުކުރާ ކަމަށެވެ. އެކަމަކު ޖޫރިމަނާގެ ގޮތުގައި 15 މިލިއަން ރުފިޔާ ދައްކަން އެންގި ބައި ބާތިލްކުރާ ކަމަށް އެ ހުކުމުގައިވެ އެވެ. އަދި އާމިރަށް ލިބެންޖެހޭ ހަތަރު މިލިއަން ރުފިޔާ އެއް މަސް ތެރޭގައި ދެއްކުމަށް ވެސް އެ ހުކުމުގައި އަންގާފައިވެ އެވެ.
އެ މައްސަލަ ބެއްލެވީ ފަނޑިޔާރު އަބްދުއްރައޫފް އިބްރާހިމާއި ފަނޑިޔާރު އަލީ ސަމީރުގެ އިތުރުން ފަނޑިޔާރު އަބްދުﷲ ހަމީދެވެ. ރިޔާސަތު ބެލެހެއްޓެވީ ފަނޑިޔާރު ރައޫފެވެ.
ކުރިން އިދިކޮޅު އެންމެ ބޮޑު ޕާޓީގެ ގޮތުގައި އޮތް ޑީއާރުޕީގެ ދަރަނީގެ އެހެން މައްސަލަތަކެއް ވެސް އެބައޮތެވެ. އެގޮތުން އެމްޓީސީސީއަށް މިލިއަނަކަށް ވުރެ ގިނަ ރުފިޔާ ދައްކަން ކޮށްފައިވާ ހުކުމަކާއި ހަބް ކުންފުންޏަށް ހަތް ލައްކަ ރުފިޔާ ދައްކަން ވެސް އެ ޕާޓީގެ މައްޗަށް އެބައޮތެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ލޮލީ ޓައްޕު
24 July 2019
ދެން ބޮޑު މަހުޖަނު ޑީއާރުޕީ އާ ހަވާލުވީމަ ތި ހުރިހާ ފައިސާ ދައްކާފަ ރައްޔިތުންގެ ތެރެއިން ދޮޅު ލައްކަ މީހުން ތިޕާޓީ އަށް ވަންނާނެނު. އެމްޑީޕީ އާ ރައީސް މައުމޫން ވެސް ގަނެލި މީހަކު ދެން ރައްޔިތުންގެ ތެރެއިން ދޮޅުލައްކަ މީހުން ނުގަނެވޭންވީ ސަބަބެއްނެތެއްނު.
ޑރ.ފަޒުނާ/ހިތަދޫ/ސ.އެފުރިކާ
24 July 2019
އަތޮޅޭ/ ޖާބިރު ޕާޓީގެ ވެރިޔާ ފައިސާކޮޅު އަވަހަށް ދައްކައިލައްވާ... އެއިރުން މަނިކުފާނުގެ އަސްލު ތަސައްވަރު ތިޔަ މަޖިލީހުގައި ތިބީ އެޖެމްޑާ 19 އަށް އެނގިގެންދާނެ
ޑާޑާ
23 July 2019
އާމިރު މީ ބޮޑު މަހުޖަނެއްތާ، ނުވެސް ދެނަހުރިން، ހާދަ ވަރުގަދަ ޚިދުމަތްތަކެއް ފޯރު ކޮށްދޭ ދެ ސްޓޫޑިއޯ އަކަށޭ ތިތަންތަން ވާނީ، މިހާރު ކޮބައިތަ ތިޔަ ބުނާ ސްޓޫޑިއޯ ތައް....
ތިބެބަލަ
24 July 2019
އަދި ވެސް ޑާޑާ ޖަހއިގެން ކޮމެންޓްކުރާތި.''އެއިމްސް ސްޓޫޑިއޯ'' އެއީ އާމިރުގެ ތަނެއް.މިހާރު އެތަން އެކްޓިވް ކަމެއް ނޭނގޭ.މަހަށް ދޭ ބަލަ.
ނޫސް ބަލާމީހާ
23 July 2019
ސަރުކާރުން ވަކިބަޔަކަށް ވިއްޔާ ޖޫރުމާނާ ފައިސާ މިލިޔަނުންދޯ ދައްކަން ޖެހެނީ . ޙެހެ
ބޮޑުމީހާ
23 July 2019
އަމިއްލަ މީހެއް ވީމަ ޖޫރިމަނާ ނުލިބޭ. ސަރުކާރު ފެލައިގެން ނުކުރާ އިންވެސްޓްމަންޓްތަކަށް 300 މިލިއަނުން ހުކުމް ކުރަން އޯކޭތޯ
ބޮރޯ
23 July 2019
އެކަމުދީބާޖާއަށް ހާދަބައިވަރެކޭދޯ
އަމީތާބު
23 July 2019
ދީބާޖާ ތަފާތުވާނެ. އެއީ ރނަޝީދު ވެރިކަމުގައި އެނބުރިގޭސް ތަކުން ރޭވިގެން ޕާރޓީކުދިން ނަށް އިންސާފާ ހައްގު މިންވަރު ހޯދާދިނުން.
ލޮނުމެދުފަޓާސް
23 July 2019
އެއީ ސްޓޫޑިއޯއެއް ނޫނެއްނު، އެހެންވީމަ ބޯކޮށް ދޭނެ...............
ދިޔާވާނާ
23 July 2019
ޖާބިރުތިލާރި ދައްކާލަދޭނެ
ހަކީމް
23 July 2019
އިންސާފު ލިބެނީ 10 އަަހަރު ފަހުން ... މިއީކީ އިންސާފެއް ނޫން.
ދަސފސަފދ
23 July 2019
ހަތަރު ރުފިޔާ ނުދައްކާއިގެން ޖުރުމައިނާ އަށް 15 މިލިޔަން ރުފިޔާ! ބެންކް ލޯނަކަށް ވެސް ތިހާ އިންޓްރެސްޓް ނާރާނެ. ތި ޖުރުމައިނާ އަށް ވިސްނާލީމަ ހީވަނީ އާމިރު އަށް ބޮޑު ލާރިގަޑެެެއް ލިބޭގޮތަށް ހަދާފަ ހުރި އެގްރީމަންޓް ތަކެއްހެން
އިންސާފް ނެތް ރައޫފް
23 July 2019
10 އަހަރު ފަހުން މީހަކުކޮށްފައި އޮތް ބުރަ ބޮޑު މަސައްކަތެއްގެ ޕްރިންސިޕަލް ވެލިއު ދިނީމަ ކޮނަތާކު އެ ޖެހެނީ، މީ ކޮން އިންސާފެއް؟ އާމިރު އަކީ މަޖިލިސް މެންބަރަކަށް ވުމުގެ މާކުރިން ފެށިގެން ވީޑިއޯގްރަފީ މަސައްކަތް މާލޭގައި އެންމެ ފުޅާކޮށް ކުރި އެކަކު. މައުމޫނު މި ލާރިކޮޅު ނުދީގެން އެފަކީރުގެ މުޅި ވިޔަފާރި އެއްކޮށް ބަންގުރޫޓް ވެފަ. 10 އަހަރު ވަންދެން ބޭންކުގަ 4 މިލިއަން ބެހެއްޓިޔަސް ލައްކަ ލާރި ލިބިފަނުން ހުންނާނި.
ސާދާސީދާ
23 July 2019
ދަޢުލަތުން ޑީއާރުޕީއަށް އެއްވެސް ފައިސާއެއް ދޫކުރަންވާނީ ކޯޓްތަކުން ކޮށްފައިވާ ޙުކުމަށް ދައްކަންޖެހޭ ފައިސާ އުނިކޮށްފައި!