ރައްޔިތުންގެ މަޖިލިހުގެ ޖަލްސާއެއްގެ ރިޔާސަތުގައި މަޖިލިހުގެ ރައީސް މުހައްމަދު ނަޝީދު. އެމަނިކުފާނު ވިދާޅުވި ގޮތުގައި ފަހު ދައުރުގައި މެމްބަރުން ބުރަ މަސައްކަތެއް ކުރެއްވި. --- ފޮޓޯ: މަޖިލިސް
07 ޑިސެމްބަރ 2019 - 15:02
ރައްޔިތުންގެ މަޖިލިހުގެ މިދިޔަ ދައުރަށް ވުރެ، ފަހު ދައުރުގައި ގިނަ މަސައްކަތްތަކެއް ނިންމިފައިވާ ކަމަށް ވިދާޅުވެ، މަޖިލިހުގެ ރައީސް މުހައްމަދު ނަޝީދު މިއަދު މެމްބަރުންނަށް ހިތްވަރު ދެއްވައިފި އެވެ.
މަޖިލިހުގެ ތިން ވަނަ ދައުރުގައި ބޭއްވި 33 ޖަލްސާ އަށް ފަހު، މެމްބަރުން މިއަދު ވަނީ ދެ މަސް ދުވަހުގެ ޗުއްޓީއަކަށް ވަޑައިގެންފަ އެވެ. މަޖިލިހުގައި މެމްބަރުން ކުރެއްވި މަސައްކަތަށް ތައުރީފް ކުރައްވައި ނަޝީދު ވިދާޅުވީ މެމްބަރުންގެ މުސާރަ "ހަލާލް" ކަމަށް "ލަފާކުރެއްވޭ" ކަމަށެވެ.
ނަޝީދު ވިދާޅުވީ ފަހު ދައުރުގައި ކުރި ބައެއް ބޮޑެތި މަސައްކަތްތަކުގެ ތެރޭގައި މަސްވެރިންގެ ގާނޫނަށް ގެންނަން ފާސް ކުރި އިސްލާހުތަކާއި ލާމަރުކަޒީ ގާނޫނަށް ގެންނަން ނިންމި އިސްލާހުތަކާއި އަންނަ އަހަރުގެ ބަޖެޓު ފާސްކުރުމާއި އާމްދަނީން ޓެކްސް ނެގުމުގެ ބިލް ނިންމުން ހިމެނޭ ކަމަށެވެ.
"މި ކުޑަ ދައުރުގައި މެމްބަރުން ކުރައްވާފައިވާ މަސައްކަތް މާ ގިނަ،" ނަޝީދު ވިދާޅުވި އެވެ.
މަޖިލިހުން އާންމުކުރި ތަފާސް ހިސާބުތަކަށް ބަލާ އިރު، ކުރީގެ ދައުރުން ލިބުނީ 16 ބިލެވެ. ފަހު ދައުރުގައި 23 ބިލެއް މަޖިލިހަށް ހުށަހެޅި އެވެ. މަޖިލިހަށް ހުށަހެޅި ބިލްތަކުގެ ތެރެއިން 11 ބިލް ނިމުނު އިރު، ނުނިމި 28 ބިލެއް އޮތް ކަމަށް އެ ތަފާސް ހިސާބުތަކުން ދައްކަ އެވެ.
ގަރާރުތަކަށް ބަލާއިރު، ކުރީގެ ދައުރުން ލިބިފައި ވަނީ 12 ގަރާރެވެ. މަޖިލިހަށް ފަސް ގަރާރެއް ހުށަހެޅި އިރު، ނުނިމި 15 ގަރާރެެއް އެބައޮތެވެ. ސަރުކާރުން ފޮނުވި މައްސަލަތަކުގެ ތެރެއިން ކުރީގެ ދައުރުން ދެ މައްސަލައެއް ލިބުނު އިރު، މި ދައުރުގައި ހުށަހަޅާފައި ވަނީ 16 މައްސަލައެކެވެ. އަދި އެންމެ މައްސަލައެއް ފިޔަވައި ހުރިހާ މައްސަލަތަކެއް މަޖިލިހުން ވަނީ ނިންމައިފަ އެވެ.
ރިޔާސަތުން ހުށަހެޅި މައްސަލަތަކުގެ ތެރެއިން ކުރީ ދައުރުން ހަ މައްސަލަ އައި އިރު، މި ދައުރުގައި ހުށަހެޅީ 17 މައްސަލަ އެވެ. އަދި ނުނިމި ހަ މައްސަލައެއް އެބައޮތެވެ. ނަޝީދު ވަނީ ޗުއްޓީ ދުވަސްވަރު، ކޮމިޓީތައް ބާއްވައިގެން މި މައްސަލަތައް ނިންމަވައި ދެއްވުމަށް އެދިވަޑައިގެންފަ އެވެ. މިނިސްޓަރުންނާ ސުވާލު ކުރުމުގެ 24 މައްސަލައެއް ކުރިއަށް ގެންދިޔަ އިރު، ނުނިމި 12 މައްސަލައެއް އެބައޮތެވެ.
އެހެންވެ، މެމްބަރުން ޗުއްޓީ އަށް ވަޑައިގަތީ 53 ޕަސަންޓު މަސައްކަތް ނިންމަވައިފަ އެވެ.
ނަޝީދު ވިދާޅުވީ 33 ޖަލްސާގައި 128 ގަޑިއިރާއި 37 މިނިޓު ހޭދަކޮށްފައިވާ ކަމަށެވެ. އަދި މެމްބަރުން 92 ޕަސަންޓަށް ޖަލްސާތަކަށް ވަޑައިގެންނެވި ކަމަށް ވެސް އެމަނިކުފާނު ވިދާޅުވި އެވެ. އަދި 395 ކޮމިޓީ ބައްދަލުވުމެއް ބޭއްވި އިރު، 441 ގަޑިއިރު ހޭދަކޮށްފައިވާ ކަމަށް ނަޝީދު ވިދާޅުވި އެވެ.
"އަޅުގަނޑަށް ލަފާ ކުރެވޭ ގޮތުގައި މުސާރަ ހަލާލު،" ނަޝީދު ވިދާޅުވި އެވެ.
މިއަދުގެ ޖަލްސާގައި ޖުޑީޝަލް ސާވިސް ކޮމިޝަން (ޖޭއެސްސީ) ގައި އާންމުންގެ ފަރާތުން ކަނޑައަޅާ މީހަކު އައްޔަން ކުރަން މަޖިލީހުގައި މިއަދު ވޯޓު ނެގި ނަމަވެސް އެއްވެސް މީހަކަށް ރުހުން ދޭން މެމްބަރުންނަށް ފެނިވަޑައެއް ނުގަތެވެ. ޖުޑިޝަރީ ކޮމިޓީން ދިރާސާ ކުރުމަށް ފަހު މަޖިލިހުގެ ތަޅުމަށް ފޮނުވި ނަންތަކުގެ ތެރެއިން ވ. ރޯޝަން، ހުސައިން އަމްރު އާއި ދަފްތަރު ނަންބަރު: 5295، އަހްމަދު ސާވީ އަށް ވެސް ރުހުން ދޭން ނުފެންނަ ކަމަށް މެމްބަރުން ވަނީ ނިންމަވައިފަ އެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
މުހައްމަދު ފިކުރީ
09 December 2019
ކޮންމެ މީހަކުވެސް ބުނާނީ ހަލާލުވާނެކަމުގަ. މީހުންގެ މުޅަމަަސްކާމީހުންވެސް ނަމާދުކުރޭ އަދި ނަމާދުން ފާބައިގެންވެސް މުޅަމަަސް ކާން ތިބޭ މިމީހުންގެ ނަމާދުންވެސް ފުރިހަމަ ސަވާބު ލިބޭނެކަމަށް އެމީހުން ލަފާކުރޭ
ހަސަން112
08 December 2019
ބިރުބޮޑު! 2012 ފެބްރުއަރީގައި ވީގޮތަށް މަޖްލިސް ޗުއްޓީއަށް ދިޔައީމަ، އިދިކޮޅުގެ މުޒާހަރާތައް ބާރަށް ކުރިއަށް ދާއިރު، އަނެއްކާ އަނެއް ބަގާވަތް ނުފެށީއްޔާ ކިތަންމެހާވެސް ރަގަލު!
މަޖިލިސް
08 December 2019
569 ގަޑި އިރު މަސައްކަތް ކޮށްފަ 1440 ގަޑި އިރު ގެ ޗުއްޓީ އެއް. މޮޅުކޮށްލަންވެގެން ދޯ 569 ގަޑި އިރު ގ ެމަސައްކަތް ކުރެވިއްޖެ އޭކިޔަަފަ ރ.ޓީވީ އަށް އަރުވަނީ
77777
08 December 2019
މާ ފައިދާ ހުރި ބަދަލެއް އަދި ނުފެނޭ، ޖަލްސާ ގިނަވެގެން ރައްޔިތުންނަށް ވާނީ ގެއްލުން، އެވަރަށް ކާންދޭންޖެހޭ ބައެއްަތީ
ގޯސް
08 December 2019
ކޮންގޮތަކުން. ޙުސްޗުއްޓީ.
ޖާބެ
07 December 2019
ޗުއްޓީ ލިބުނީމަ ބައްދަލުވާނެބާ ތިޔަތަނުން މީހަކާ ރައްޓެސަކު ބުނީ އިންތިޔާ ބައްދަލުކުރަން އުޅޭގެން ފައިންޕުޅު ނުފެންނަކަމައް މިވަރުން ކިހިނެއްބާ ދެން ވޯޓުލާނީ އެމް.ޑީ.ޕީ އައް
އަހޫ
08 December 2019
ހަމަބުނެލާއިރަށް ވޯޓުލާނެ. ކޮންމެހެން މިތާ ތިއްތިދެއްކެން ނޫޅޭ.
ނަސީދު
07 December 2019
ކޮބާހޭ މިނިވަންވެއިޖް ބިލް އެކަމާ ވާހަކަދައްކާ ތަނެއްވެސް ނުފެނޭ މިހާރަކު އަނެއްކާ އެޖެންޑާ 23 ހައްބަދަލުކޮއްލީބާ
ފަހުދު
07 December 2019
މަހުޖަނުން ޓެކްސް ދައްކަން ނުޖެހޭގޮތައް ގާނޫނު ފާސްކުރި ފުރަތަމަ ގައުމު. މަރްހަބާ!
ގައުމީދޫ
07 December 2019
ރައްޔިތުން އަތުން ނަގާ ފީތަށް ބޮޑުކުރުމާއި ޓެކްސް އިތުރުކުރުން އަދި ޖުޑިޝަރީ އަށް އަތް ބޭނުން ފަދަ ކަންކަން ބާރަށް ކުރިއަށް ގެންދިޔަ މަޖްލިސް އެއް! ދައުލަތަށް ވަންނަ އާމްދަނީ އިތުރުކޮށްގެން އިގްތިސާދު ކުރިއަރުވޫމަކީ އެމްޑީޕީ ދަންނަކަމެއް ނޫން. ރައްޔިތުން އަތުގަ ހުންނަ ފައިސާކޮޅު ދައުލަތަށް ނަގައި ގައުމުގެ އިގްތިސާދު މިދަނީ ފުނޑަމުން!
ޜައްޔިތު އަހުމަދު
07 December 2019
ސާބަސް ހަމަ އަންނި އަށް އަދި ކިރިޔާ މަޖްލިހެއް މި ފެނުނީ