"ފަރީ" ގެ ޕޯސްޓަރެއް.
06 ފެބުރުއަރީ 2020 - 06:23
4 comments
މަދޮށިޕް ސްޓޫޑިއޯ އިން މީގެ ދެ އަހަރު ކުރިން އިއުލާންކުރި ފިލްމު "ފަރީ" އަންނަ އެޕްރީލް މަހު ސިނަމާ އަށް ގެންނަން ނިންމައިފި އެވެ.
އެންމެ ފަހުން ބޭއްވި ދިވެހި ފިލްމު އެވޯޑްސްގައި އެންމެ މޮޅު ފިލްމުގެ މަގާމު ހޯދި "ވިޝްކާ" ގެ ޓެކްނިކަލް މަަސައްކަތުގެ ފަހަތުގައި އޮތް މަދޮށިޕުން ގެނެސްދޭ ފެމިލީ ޑްރާމާ "ފަރީ" ސިނަމާ އަށް ގެންނަން ނިންމާފައި ވަނީ އެޕްރީލް މަހުގެ 2 ގަ އެވެ.
އަލަށް ޑައިރެކްޝަނަށް ނުކުތް އަހުމަދު ހިޝާމް ސައީދު (އަންދު) ލިޔެ، ޑައިރެކްޓްކޮށްފައިވާ ފިލްމުގެ ލީޑް ރޯލުން ފެނިގެންދާނީ ރަވީ ފާރޫގާއި ނުޒުހަތު ޝުއައިބް (ނުޒޫ) އެވެ. އެކަނިވެރި މައެއްގެ ވާހަކަ ކިޔައިދޭ "ފަރީ" ގެ އިތުރު ކާސްޓުންގެ ތެރޭގައި އަހުމަދު އީސަ (އާނަންދު) އާއި ފައުޒިއްޔާ ހަސަނާއި "ބޮސް" އިން ތައާރަފުވި މުހައްމަދު ޔުނާންގެ އިތުރުން "ގޮށްރާޅު" އިން ތައާރަފުވި ބަތަލާ ތަސްނީމާ ހިމެނެ އެވެ.
"ފަރީ" ގެ ޝޫޓިންގެ ތެރެއިން.
"ފަރީ" ސިނަމާ އަށް ގެންނަނީ މަދޮށިޕާއި ޑައިރެކްޓަރު އަންދުގެ ފިލްމު ކުންފުނި ކުއްނާރު ޕްރޮޑަކްޝަނާއި "ލީނާ" އާއި "އަހުޝަމް" ފަދަ ފިލްމުތަކުގެ ސްކްރީން ރައިޓަރު އަހުމަދު ޒަރީރުގެ އެއް ކާފު ޕްރޮޑަކްޝަންސް ގުޅިގެންނެވެ.
މީގެ މާކެޓިން އާއި ޑިސްޓްރިބިއުޝަންގެ ޒިންމާތައް ނަގާ ޒަރީޒު ބުނީ "ފަރީ" އަކީ ދިވެހި މުޖުތަމައާ ވަރަށް ގުޅޭ ވާހަކައެއް ކިޔައިދޭ ފިލްމަކަށްވާތީ، މިއީ ބެލުންތެރިންނަށް ވަރަށް ކަމުދާނެ ފިލްމަކަށް ވާނެ ކަމަށެވެ.
"ވަރަށް ރިއަލިސްޓިކްކޮށް މީތި ޕްރެޒެންޓްކޮށް ދީފައި އޮންނާނީ،" އެއްވެސް ލަވައެއް ނުހިމެނޭ ފިލްމާ ބެހޭ ގޮތުން އޭނާ ބުންޏެވެ.
"ފިލްމު އަހަންނަށް ވެސް އެއްކޮށް ފެނިފައި އޮތީމަ ބުނެލަން ކެރޭ ބެލުންތެރިންނަށް ކަމުދާ ރާއްޖޭގެ މުޖުތަމައާ ވެސް ވަރަށް ގުޅޭ ފިލްމަކަށް ފަރީ ވާނޭ."
ފިލްމުގެ ޓްރެއިލާ މި މަހުގެ މެދުތެރޭގައި އާންމުންނަށް ދޫކޮށްލަން ވެސް މިހާރު އަންނަނީ ތައްޔާރުވަމުންނެވެ.
"ފިލްމުގެ މަސައްކަތް އޮތީ ގާތްގަނޑަކަށް އެއްކޮށް ނިމިފައި. ޕޮލިޝްކުރުމުގެ ބައި މިހާރު ބޮޑަށް ކުރިއަށް މި ދަނީ." ޒަރީރު ބުންޏެވެ.
"ފަރީ" ގެ ޝޫޓިންގެ ތެރެއިން.
އޭނާ ބުނީ ފިލްމު އޮލިމްޕަހުގައި ޕްރިމިއާކުރުމަށް ފަހު، އެޕްރީލް 3 އިން ފެށިގެން ޝްވެކް ސިނަމާގައި ޝޯތައް ދައްކަން ފަށާނެ ކަމަށެވެ.
"ހަމައެއާއެކީ ވަރަށް ގިނަ ރަށްރަށުގައި ވެސް ފިލްމުން ދެއްކުން ޓާގެޓަކީ. ރަށްރަށުން ރިކްއެސްޓް އަންނަ ވަރަކުން ފިލްމު އެޅުވުމުގެ ކަންކަން ކުރިއަށް ދާނެ." އަންނަ މަހު ރިލީޒްކުރާ "އަނދިރިކަން" ގެ ސްކްރިޕްޓް ވެސް ލިޔެފައިވާ ޒަރީރު ބުންޏެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ހައްޖަ
06 February 2020
މި ވާނެ އުފެއްދުމުގެ ފެންވަރުގެ ގޮތުން ދިވެހި ފިލްމުތަކަށް ގޮންޖަހާލާނެ ފިލްމަކަށް. ވަރަށް ބަލާހިތުން މި ހުރީ.
ލޫކަސް
06 February 2020
ނުޒޫގެ ހުނަރާ މެދު ޝައްކެއް ނުކުރަން. ތިގޮތުގައި ހިފަހައްޓާލާ ނުޒޫ. މަދު އަހަރުތަކެއްގެ ތެރޭ މުޅި އިންޑަސްޓްރީގެ ލޯބި ހޯދައިފި. ނުޒޫގެެ އެކްޓިންގ ވެސް ހަމަ ތަފާތީ.
ޒުބް
06 February 2020
ޔަޤީން ތަފާތު ވާނެކަން.. ސަޅި މި މީހުން ފިލްމް ހަދަން ފެށީމަ
ސަލް
06 February 2020
އާ. ޢަދި ކިރިޔާ މި އަންނަނީ އަހަރުމެން ބަލާ ކަހަލަ ދިވެހި ފިލްމް..