ފަސްކޮށްދޭ ސްޓޫޑެންޓް ލޯނަށް ދައްކަންޖެހޭ ފައިސާ އިތުރެއް ނުވާނެ

ކޯޕަރޭޓް ސްކޮލަޝިޕްގެ އެއްބަސްވުމުގައި ބީއެމްއެލްގެ ސީއީއޯ ޓިމް ސޯޔާ (ވ) އަދި ހަޔަ އެޑިއުކޭޝަން މިނިސްޓަރު ޑރ. އިބްރާހިމް ހަސަން ސޮއިކުރެއްވުމަށްފަހު ފޮޓޯއަކަށް ހުއްޓިވަޑައިގެން.-- ފޮޓޯ: ބީއެމްއެލް

އާސިމާ ނިޒާރު، މިހާރު

31 މާޗް 2020 - 12:29

މަތީ ތައުލީމް ހާސިލްކުރަން ދޫކޮށްފައިވާ ސްޓޫޑެންޓް ލޯނު ފަސްކޮށްދިނުމަށް އެދި ދަރިވަރުން އަމިއްލައަށް ހުށަހަޅަން ނުޖެހޭނެ ކަމަށާއި ލޯނަށް ފައިސާ ދެއްކުން ހަ މަސް ފަސްކޮށްދޭއިރު ލޯނަށް އިތުރު އިންޓަރެސްޓެއް ވެސް ނާރާނެ ކަމަށް ބޭންކް އޮފް މޯލްޑިވްސް (ބީއެމްއެލް) އިން ރޭ ބުނެފި އެވެ.

ގައުމީ ބޭންކުން މިކަމާ ބެހޭ ގޮތުން ނެރުނު ބަޔާނުގައި ބުނީ، ކޮރޯނާވަރަހާ ހެދި ދިމާވެފައިވާ އިގްތިސާދީ ދަތި ހާލަށް ބަލައި ސްޓޫޑެންޓް ލޯނާއި އެޑިއުކޭޝަނަލް އެސިސްޓަންސް ލޯނުތަކަށް ފައިސާ ދެއްކުން ކުރިއަށް އޮތް ހަ މަހަށް ފަސްކޮށްދޭން ނިންމާފައިވާ ކަމަށެވެ. މިގޮތަށް ހެދުމުން ލޯނު ދައްކަން ކަނޑައަޅާފައިވާ މުއްދަތަށް ހަ މަސް އިތުރުވާނެ އެވެ. ނަމަވެސް ލޯނުގެ ބާކީ އޮންނަ މުއްދަތުގައި މަހުން މަހަށް ދައްކަންޖެހޭ އަދަދަށް އެއްވެސް ބަދަލެއް ނާންނާނެ ކަމަށް ބޭންކުން ބުންޏެވެ.

މި އިންތިޒާމް ހަމަޖައްސަން ކުރަންޖެހޭ ހުރިހާ ކަމެއް ކުރާނީ ބޭންކުން ކަމަށް ވެސް ބުންޏެވެ. އަދި ލޯނު ފަސްކޮށްދިނުމަށް ދަރިވަރުން ހުށަހަޅާކަށް ނުޖެހޭނެ އެވެ.

Student loan dhekkun 6 mahah faskoffi

The most trusted news source in the Maldives

Mihaaru

މަތީ ތައުލީމުގެ ލޯނު އަނބުރާ ދައްކަންޖެހޭ ދަރިވަރުންގެ އަދަދު 4،000 އަށްވުރެ ގިނަ އެވެ.

ބީއެމްއެލް އިން ވަނީ ސްޓޫޑެންޓް ލޯނުގެ އިތުރުން އެ ބޭންކުން ދޫކޮށްފައި ހުރި ހުރިހާ ލޯނެއް އަނބުރާ ދެއްކުން ވެސް ހަ މަހަށް ފަސްކޮށްދީފަ އެވެ. ނަމަވެސް އެ ބަދަލު އަންނާނީ އެކަމަށް އެދި ހުށަހެޅުމުންނެވެ. ސްޓޫޑެންޓް ލޯނާ ހިލާފަށް އެހެން ލޯނުތަކުގެ ފަސްކޮށްދޭ ހަ މަހުގެ އިންޓަރެސްޓް ލޯނަށް އިތުރުކޮށް ލޯނުގެ މުއްދަތުގެ ތެރޭގައި ދައްކަންޖެހެ އެވެ.