ކޮވިޑް-19 އަށް ޕޮޒިޓިވްވާ މީހުންގެ ތެރެއިން ހައި ރިސްކު މީހުންނަށް ފަރުވާދިނުމަށް އަލުން މަރާމާތުކުރި، ފަރުކޮޅުފުށި އައިސޮލޭޝަން ފެސިލިޓީ --.ފޮޓޯ: ނިޝާން އަލީ/މިހާރު
13 އެޕްރީލް 2020 - 12:40
4 comments
ފިލިޕީންސުން ރާއްޖެ އައިސް ކަރަންޓީނުގައި ތިބި ދަރިވަރުންގެ ތެރެއިން އެކަކު ކޮވިޑް-19 އަށް އިއްޔެ ޕޮޒިޓިވްވެފައި ވާތީ، އޭނާއާ އެކު އެއް މަތިންދާބޯޓެއްގައި އައި އެންމެންގެ ކަރަންޓީންގެ މުއްދަތު ރިވިއު ކުރަމުން އަންނަ ކަމަށް ނޭޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ) ން މިއަދު ބުނެފި އެވެ.
އެރިޔަދޫ ކަރަންޓީން ފެސިލިޓީގައި ހުރި ދިވެއްސަކު ކޮވިޑް-19 އަށް އިއްޔެ ޕޮޒިޓިވްވިކަން އެނގުނީ ކަރަންޓީނު މުއްދަތު ހަމަވެ، 14 ދުވަސް ފަހުން ޓެސްޓް ހެދުމުންނެވެ. އޭނާ މިހާރު ވަނީ ވެލިދޫ ކަރަންޓީން ފެސިލިޓީ އަށް ބަދަލުކޮށްފަ އެވެ.
އެންއީއޯސީގައި މަސައްކަތް ކުރައްވާ އޮފިޝަލަކު ވިދާޅުވީ ޕިލިޕީންސުން އައި ދަރިވަރުންގެ ކަރަންޓީން މުއްދަތު އިތުރުކުރާނީތޯ ނުވަތަ ދޫކޮށްލާނީތޯ އަދި ނުނިންމާ ކަމަށެވެ. އެއް މަތިންދާބޯޓެއްގައި އައި ދަރިވަރުންގެ ތެރެއިން އެކަކު ކޮވިޑް-19 އަށް ޕޮޒިޓިވް ވެފައިވާތީ، މިހާރު އަންނަނީ އެ އެންމެންގެ ކަރަންޓީންގެ މުއްދަތު ރިވިއު ކުރަމުން ކަމަށް އޭނާ ވިދާޅުވި އެވެ.
"އޭގެ ތެރެއިން އެކަކު ފިޔަވައި އެހެން ހުރިހާ އެންމެން ވަނީ ޓެސްޓުން ނެގެޓިވް ވެފައި. އެކަމަކު ވެސް އެކެއްގެ ސާމްޕަލް ޕޮޒިޓިވް ވުމުން ދެން އަމަލު ކުރާނެ ގޮތެއް ކަނޑައަޅާނީ ރިވިއު އަށް ފަހު. އެ އެންމެންގެ ކަރަންޓީނަށް 14 ދުވަސް އިތުރު ކުރާކަށް ވެސް ނުނިންމަން،" އޮފިޝަލް ވިދާޅުވި އެވެ.
ކަރަންޓީނުގައި ބޭތިއްބުމާއި ދޫކޮށްލުމާ ގުޅޭ ގޮތުން މަޝްވަރާކޮށް ލަފާ އަރުވަނީ، ޑޮކްޓަރުންނާއި ސިއްހީ ތަޖުރިބާކާރުން ހިމެނިވަޑައިގަންނަވާ ޓެކްނިކަލް އެޑްވައިޒަރީ ގްރޫޕް (ޓެގު)ންނެވެ. ފިލިޕީންސުން އައި މީހުންނާ ދޭތެރޭގައި ގޮތެއް ނިންމާނީ ޓެގުގެ ލަފަ އަށް ބިނާކޮށެވެ.
ކޮވިޑް-19 އަށް ޕޮޒިޓިވްވީ، މިދިޔަ މަހުގެ 27 ވަނަ ދުވަހުގެ ރޭ ރާއްޖެ އައި ގަތަރު އެއާވޭސްގެ މަތިންދާބޯޓަކުން ސަރުކާރުގެ ޚަރަދުގައި ގެނައި 47 ދިވެހިންގެ ތެރޭގައި ހިމެނޭ ދަރިވަރެކެވެ. އެ 47 މީހުންނަކީ ފިލިޕިންސްގެ މެނީލާގައި ޑޮކްޓަރުކަމާއި ޕައިލެޓުކަން ކިޔަވަން ތިބި ދަރިވަރުންތަކެކެވެ.
ސަރުކާރުގެ ޚަރަދުގައި ފިލިޕިންސުން ގެނައި 47 ދަރިވަރުންގެ އިތުރުން ވެސް އެހެން ދެ ބުރެއްގައި އަމިއްލަ ގޮތުން ބައެއް މީހުން ރާއްޖެ އައި ކަމަށް ވެ އެވެ.
އެންއީއޯސީން ރޭ ބޭއްވި މީޑިއާ ބްރީފިންގައި އައިޖީއެމްއެޗުގެ ޑރ. މޫސާ މުރާދު ވިދާޅުވީ، ފިލިޕިންސުން އައި ދަރިވަރުންގެ ތެރެއިން ކޮވިޑް-19 އަށް ޕޮޒިޓިވްވި ދަރިވަރުގެ ފަރާތުން ބަލީގެ އަލާމާތެއް ކުރިން ނުފެންނަ ކަމަށެވެ.
ފަރުވާއެއް ހޯދިފައިވާ ނުވާ ކޮވިޑް-19 އަށް ރާއްޖެ އިން މިހާތަަނަށް 20 މީހަކު ޕޮޒިޓިވްވެ 14 މީހަކު ވަނީ ރަނގަޅުވެފަ އެވެ. މިހާރު ބަލިން ރަނގަޅު ނުވެ ތިބީ ހަތަރު ދިވެހިންނާއި ރާއްޖެ އިން ދިޔަ ފަހުން ލިބުނު ސާމްޕަލްގެ ނަތީޖާ ޕޮޒިޓިވްވި އިޓަލީގެ ދެ ޓޫރިސްޓުންނެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ބޯހަރުބީ
13 April 2020
މީ އާދައިގެ ވައިރަސް އެއް ނޫން. އެންމެ ކަތި ފިޔަވަޅެއް ބޭނުންވަނީ ވައިރަސް އަށް ހުށަހެޅެން. ވިސްނާ
ސޮމްޗައި
13 April 2020
ހެދިޓެސްޓު ހަމަރަނގަޅަށްވެސް ޕޮޒިޓިވްވީބާއެވެ. ދެވަނަފަހަރަށް ކަށަވަރުކޮށްލުންވެސް ބުއްދިވެރިވާނެ. ބޭރުފުށުން ބަލީގެ އަލާމާތެއްނެތް، ކުއަރަންޓީނަށް ލުމާއެކު ތިޔަޓެސްޓު ހެދުން ކިހިނެއްބާވާނީ.
އުއްމީދު ފެނަށް
13 April 2020
އަސްލު ވީގޮތަކީ 14 ދުވަސްކޮށްފައި ސާމްޕަލް ނަގާފައި، އެމީހުން ރަށުތެރެއަށް ދޫކޮށްލީ. ދެން ކަރަންޓީނުގައި ތިބި އެންމެން އެއްކޮށް އުޅެންފެށީ. ނަތީޖާ ލިބުނުއިރު، އެކަކު ޕޮސިޓިވް. ކަންކަން ރެއަކާލިއިރު ވަގުތު ފާއިތުވެއްޖެ. ކަރަންޓީނު ކުރާ އެހެން ރަށްރަށުގައި، ނަތީޖާ ނުލިބެނީސް ދުލެއްނުކުރޭ. މިހާތަނަށް ބަރާބަރަށް އަމަލުކޮށްފައިވަނީ. އެހެންވީމާ އެއްރަށުން ގޯސްކޮށް ދިޔަކަންކަން ބަލަންޖެހޭ
12345
13 April 2020
ވަރަށް ދެރަކަމެއް. ސަރުކާރުން އަދި ކަމާބެހޭ އެންމެން ތިކުރާ ބުރަ މަސައްކަތަށް ޝުކުރުކުރަން. ކޮމަނިޓީ ސްޕްރެޑަކަށްވެދާނެކަމަށް ބަލައިގެން އެގޮތް މެދުވެރި ވުން ހުއްޓުވަން ކުރެވެން އޮތް ހުރިހާ މަސައްކަތެއް ކުރުން އެދެން.