ޕްލޭސްޓޭޝަން 5ގެ ޕްރި-އޯޑަރު ރަޖިސްޓްރޭޝަނަށް ހުޅުވާލައިފި

ގިނަ ބަޔަކު އިންތިޒާރުކުރަމުން އަންނަ ޕްލޭސްޓޭޝަން 5ގެ ކޮންސޯލް މިދިޔަ ޖޫން މަހުގެ ތެރޭގައި ދައްކާލާފައި ވަނިކޮށް އޭގެ ޕްރި-އޯޑަރު ރެޖިސްޓްރޭޝަނަށް ސޮނީން ހުޅުވާލައިފި އެވެ.

މިކަމާ ބެހޭ ގޮތުން ޕްލޭސްޓޭޝަންގެ ވެބްސައިޓްގައި އާންމުކޮށްފައިވާ ބަޔާނުގައި ބުނީ ލިމިޓެޑް އެޑިޝަނެއްގެ ގޮތުގައި ނެރޭ ޕީއެސް 5 ޕްރި-އޯޑަރަށް ރަޖިސްޓްރީވުމުގެ ފުރުސަތު ބޮޑަށް އޮންނާނީ ކުރިން ވެސް ޕްލޭސްޓޭޝަންގެ އެކިއެކި ކަންކަމަށް ޝައުގުވެރިކަން ދޭ ކަސްޓަމަރުންނަށް އިސްކަންދޭ ގޮތަށް ކަމަށެވެ.

އެންމެ ފުރަތަމަ ގޭމު ގަތުމުގެ ފުރުސަތު ލިބޭނީ އެންމެ ފުރަތަމަ ރަޖިސްޓްރީކުރާ މީހުންނަށް އިސްކަން ދީގެންނެވެ. އަދި ރަޖިސްޓްރީވިކަން އީމެއިލަކުން އަންގާނެ ކަމަށް ވެސް ޕްލޭސްޓޭޝަނުން ބުންޏެވެ. ރަޖިސްޓްރީނުވާ ނަމަ އީމެއިލެއް ނުލިބޭނެ އެވެ.

އާ ކޮންސޯލް ނެރެން ތައްޔާރުވަމުން ދިޔަ ނަމަވެސް އަދިވެސް ވަކި ތާރީހެއް ކަށަވަރެއް ނުވެ އެވެ. އެކަމަކު އަންނަ ނޮވެމްބަރު މަހުގެ ތެރޭގައި ނެރޭނެ ކަމަށް ބެލެވެ އެވެ. ޕީއެސް 5 އަކީ ގޭމް އިންޑަސްޓްރީ އަށް އަނެއްކާ ވެސް ބޮޑު ބަދަލުތަކެއް ގެނުވާނެ އުފެއްދުމެއް ކަމަށް ވީޑިއޯ ގޭމްގެ ތެރޭގައި އުޅޭ މީހުން އުންމީދުކުރެ އެވެ.