މަބްރޫކަށް ރޭ 80 ކޯލު! ސަމާސާއަކަށް ވުރެ ސީރިއަސް މައްސަލައެއް

ސަމާސާއަކަށް ނުވަތަ ޖޯކަށް ހަދާ ވަރަށް ވުރެން ހިއުމަން ޓްރެފިކިންގެ މައްސަލަތައް ސީރިއަސް ކަން ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒް އާއްމުންނަށް މިއަދު ހަނދާންކޮށްދެއްވައިފި އެވެ.

އޭނާ އެކަން ހަނދާންކޮށްދެއްވީ، މޮރޮކޯގެ އަންހެނުންނާ ކައިވެނިކުރަން ދިވެހިންނަށް އޮތް ރަނުގެ ފުރުސަތެއް ކަމަށް ބުނެ، ސޯޝަލް މީޑިއާގައި ދައުރުވި ޕޯސްޓެއްގައި މަބްރޫކްގެ ފޯނު ނަންބަރު އޮތުމުން ރޭ އޭނާއަށް ނުދަންނަ މީހުންގެ 80 ވަރަކަށް ކޯލު ވެސް އައި ފަހުންނެވެ.

މަބްރޫކް ވިދާޅުވީ ރާއްޖޭގައި ވެސް އެތައް ބަޔަކު ޝިކާރައަކަށް ވާ ހިއުމަން ޓްރެފިކިންގެ ކުށުގައި މިހާރަށް ވުރެން ބޮޑަށް ދިވެހިން ހޭލުންތެރިވާން ވެއްޖެ ކަމަށެވެ.

އަންހެނުންތަކެއްގެ ފޮޓޯ ޖަހައި އޭގެ ތެރެއިން ބޭނުން މީހަކު ޚިޔާރުކުރުމުގެ ފުރުސަތު އޮތް ކަމަށް ބުނެ ދީފައި އޮތް ފޯނު ނަމްބަރުތަކުގެ ތެރޭގައި މަބްރޫކްގެ އިތުރުން ރައީސް އޮފީހުގެ އެހެން ބައެއް މުވައްޒަފުންގެ ނަންބަރު ވެސް ޖަހާފައިވެ އެވެ.

އެ ޕެކޭޖުގައި އަންހެނުން "ވިއްކާ" އަގަކީ 2،500 ޑޮލަރު ނުވަތަ 43،700ރ. ކަމަށް ވެސް ޖަހާފައިވެ އެވެ.

އެ ޕޯސްޓުގައި އޮތީ މަބްރޫކްގެ ނަމްބަރުކަން އެނގޭ މީހުން ސޯޝަލް މީޑިއާގައި، އެ އަންހެނުންނާ އެކު އޭނާގެ ފޮޓޯ ޖަހައި ދިމާ ވެސް ކުރި އެވެ.

ސޯޝަލްމީޑިއާގައި އާއްމުކުރި ޕޯސްޓް

އެ މައްސަލައާ ގުޅިގެން މަބްރޫކް ވިދާޅުވީ ޖޯކަކަށް ހަދައިގެން ކޮންމެ ބަޔަކު ކޮށްފައި އޮތަސް އޭނާއަށް އެކަން ބަލައިނުގެންނެވޭ ކަމަށެވެ. އެއީ މަޖަލަކަށް ނުވަތަ ސަމާސާއެއްކޮށްލުމުގެ ނިޔަތުގައި ކުރާ ކަހަލަ ކަމެއް ނޫން ކަމަށާއި މުޅި ދުނިޔޭގައި ވެސް ހިއުމަން ޓްރެކިންގެ އަމަލުތައް ފުޅާވެ ސީރިއަސް ވަމުން އަންނަ ކަން އޭނާ ފާހަގަކުރެއްވި އެވެ.

ޅަ އުމުރުގައި އަންހެން ކުދިން ވަގަށް ނަގައިގެން ވިއްކުމާއި މަޖުބޫރުން އަންހެނުން ކައިވެނިކުރުވަމުންދާ މައްސަލައަށް ރާއްޖޭގައި ވެސް މިހާރަށް ވުރެން ބޮޑަށް މުޖުތަމައު ހޭލުންތެރިވާންވެފައި އޮތް ކަމަށް މަބްރޫކް ވިދާޅުވި އެވެ. އަވަށްޓެރި ބައެއް ގައުމުތަކަށް ގޮސް އެ އާއިލާއަކަށް ނުވަތަ އަންހެން މީހާއަށް ފައިސާކޮޅެއް ދީގެން ކައިވެނިކޮށްގެން ރާއްޖެ ގެނައުމަކީ ވެސް އިޖުތިމާއީ މައްސަލަތަކުގެ ތެރޭގައި ހިމެނޭ ކަމެއް ކަމަށް ވިދާޅުވި އެވެ.

އޭނާ ވިދާޅުވި ގޮތުގައި ސޯޝަލް މީޑިއާގައި ދައުރުކުރި އެ ޕޯސްޓުގައި ތިބި އަންހެނުންނާ ކައިވެނިކުރަން ބޭނުންވެގެން ކަމަށް ބުނެ ދެ ގަޑިއެއްހާ އިރު ތެރޭގައި 80 އަށް ވުރެން ގިނަ ކޯލް ލިބުނެވެ.

"އަޅުގަނޑަށް ރޭ ޖެހުނީ ފޯނު ނިންވާލަން. ހެނދުނު ވެސް އެހާ ކޯލް އައި،" މަބްރޫކް ވިދާޅުވި އެވެ.

އެ ޕޯސްޓުގައި ނަމްބަރު އާއްމުކޮށްފައިވާ ރައީސް އޮފީހުގެ އަނެއް މުވައްޒަފަށް ގުޅާފައި "ކިތަންމެ ބޮޑު އަގުގައި ވެސް ޚިދުމަތް ހޯދަން ބޭނުންވާ" ކަމަށް ބައެއް މީހުން ބުނި ކަމަށް ވެ އެވެ.

މަބްރޫކް އެދިވަޑައިގަތީ އަންހެނުންގެ ފޮޓޯ ޖަހައި އެގޮތަށް ހިންގާ ހިއުމަން ޓްރެފިކިންގެ އަމަލުތައް މަޖަލަކަށް ނުނެގުމަށެވެ. އެއީ އެންމެން އެކުގައި ހުއްޓުވަން ޖެހޭ ވަރުގެ ބޮޑު މައްސަލައެއް ކަމަށް ވެސް ވިދާޅުވި އެވެ.

ފައިސާ ހޯދަން މުޅި ދުނިޔޭގައި ހިންގާ އެންމެ ބޮޑު ކުށްތަކުގެ ތެރޭގައި ހިމެނޭ ހިއުމަން ޓްރެފިކިންގެ ޝިކާރައަކަށް އަހަރެއްގެ ތެރޭގައި އެތައް ލައްކަ ބަޔަކު ވެ އެވެ. ރާއްޖެ ހިމެނެނީ ވަޒީފާގެ ނަމުގައި އޮޅުވާލައިގެން މީހުން ގެންނަ ގައުމުތަކުގެ ތެރޭގަ އެވެ. އެހެންވެ ހިއުމަން ޓްރެފިކިންގެ އެންމެ ގޯސް އެއް ގައުމަށް ރާއްޖެ ވެސް އޮތީ ލޭބަލްވެފަ އެވެ.

މިކަމުން އަރައިގަތުމަށް ރާއްޖޭގައި ހިއުމަން ޓްރެފިކިންއާ ދެކޮޅަށް އެކްޝަން ޕްލޭނެއް އެކުލަވާލައި މަސައްކަތްތަކެއް ވެސް އަންނަނީ ކުރަމުންނެވެ.