ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲގެ ދެކަނބަލުން 9 މިލިއަން ރުފިޔާ އަށް "ރެހެންދި-6" އަކުން ފުލެޓް ގަތް މައްސަލަ ބަލަން ޖެހޭ ކަމަށް އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް މިއަދު ވިދާޅުވެއްޖެ އެވެ.
އުއްތަމަ ފަނޑިޔާރު އަބްދުﷲ ސައީދު އާއި ސުޕްރީމް ކޯޓުގެ ފަނޑިޔާރު އަލީ ހަމީދުގެ އިތުރުން ޖުޑީޝަލް އެޑްމިނިސްޓްރޭޓަރު ހަސަން ސައީދު ހައްޔަރު ކޮށްފައިވާއިރު އެ ބޭފުޅުންގެ މައްޗަށް ވެސް ކުރަނީ ފްލެޓްތަކެއްގެ މުއާމަލާތުގައި ބައިވެރިވެވަޑައިގެންނެވުމުގެ ތުހުމަތެވެ. އެ ބޭފުޅުން ހައްޔަރުކޮށް އެ މައްސަލަ މިހާރު އަންނަނީ ތަހުގީގުކުރަމުންނެވެ.
ރޮޒެއިނާ ވިދާޅުވީ ސުޕްރީމް ކޯޓުގެ ފަނޑިޔާރުން ފުލެޓް ބައްލަވައިގެންނެވި ކަމަށް ރައީސް އަބްދުﷲ ޔާމީން ވިދާޅުވެ އެ މައްސަލަ ބަލަން ފަށާފައިވާއިރު އަބްދުއްރަހީމް 9 މިލިއަނަށް ދެ ފުލެޓް ބައްލަވައިގަތީ ކިހިނެއް ހޯދި ފައިސާ އަކުންތޯ ބަލަން ޖެހޭ ކަމަށެވެ.
"ދެ ދައުރު މަޖިލީހުގައި އުޅޭއިރު ލިބޭ މުސާރަ ބޭނުން ނުކޮށް އެއްކުރީމަ ނޫނީ އެވަރެއް {ނުވަ މިލިއަން} ނުވާނެ. ވިޔަފާރި ކުއްލިއަަކަށް ފުޅާވެގެން ދިޔައީ ކިހިނެއްކަށް ވެސް ބަލަން ޖެހޭ،" ރޮޒެއިނާ ވިދާޅުވި އެވެ.
އަބްދުއްރަހީމް ވިދާޅުވީ ރެހެންދި-6 އިން ދެ ފްލެޓް ބައްލަވައިގެންނެވި ކަމަށެވެ. އަދި އޭގެ ތެރެއިން އެއް ފްލެޓް ބައްލަވައިގަތީ އަނބިކަނބަލުންގެ ނަމުގައި ކަމަށް ވެސް އޭނާ ވިދާޅުވި އެވެ.
ކެބިނެޓް މިނިސްޓަރުން ވެސް ފުލެޓް ފަދަ އަގުބޮޑު މުދާ ބައްލަވާ ގަންނަވަމުން ދާއިރު އެކަންކަން ވެސް ބަލަން ޖެހޭ ކަމަށް ރޮޒެއިނާ ވިދާޅުވި އެވެ.
އޭނާ ވިދާޅުވި ގޮތުގައި އެފަދަ މައްސަލަތައް އޭސީސީ އާއި ޕޮލިހަށް ހުށަހެޅިިޔަސް ނުބެލުމަކީ ކަންބޮޑުވުމެކެވެ.
ރައްޔިތުން މަޖިލީސް މެދުވެރިކޮށް އެފަދަ މައްސަލަތައް ބަލަން ބޭނުންވިޔަސް ރައީސް ޔާމީނަށް މަޖިލިހުގެ މެޖޯރިޓީ ގެއްލުނު ހިސާބުން މަޖިލިސް އޮތީ ހުއްޓުވާފައި ކަމަށް ވެސް ރޮޒެއިނާ ވިދާޅުވި އެވެ.
